Markôs 1

Tơlơi Yôhan Ƀatem Pơtô

(Mat 3:1-12; Luk 3:1-18; Yô 1:19-28)

1Čơdơ̆ng phŭn kơ Tơlơi Phrâo Hiam kơ Yêsu Krist, Ană Ơi Adai.#1:1 Đơđa Hră Ơi Adai Pơhiăp so đưm ƀu hmâo ôh boh pơhiăp: Ană Ơi Adai. 2Kar hăng Êsai pô laĭ lui hlâo hmâo čih laih:

“Anai nê, Kâo pơkiaŏ pô pơala Kâo nao hlâo ƀơi anăp Ih,

Ñu či pơkra jơlan kơ Ih.#Mal 3:1.

3Hmâo asăp mơnuih pơhiăp kraih amăng tơdrŏn tač:

Pơkra bĕ jơlan kơ Khua Yang,

Ngă pơtơpă bĕ jơlan Ñu.”#Êsai 40:3.

4Yôhan hmâo rai laih amăng tơdrŏn tač, ñu pơtô laih anŭn ngă ƀatem kơ tơlơi kơhmal tơlơi soh kiăng hmâo tơlơi Ơi Adai pap brơi tơlơi soh. 5Abih bang mơnuih mơ̆ng tring Yuđa hăng abih bang ană plei Yêrusalem leng nao pơ ñu. Gơñu pơhaih tơlơi soh hăng tŭ Yôhan ngă brơi ƀatem kơ gơñu amăng ia krong Yurdan.

6 # II Pơtao 1:8. Yôhan buh ao blâu aseh samô, hăng hrăng hơdrăng kơiăng klĭ. Ñu ƀơ̆ng kơtop hăng ia hơni glai. 7Ñu pơtô tui anai: “Pô rai tơdơi kơ kâo, jing mơyang hloh kơ kâo, laih anŭn kâo ƀu lăp ôh tơkui kleh hrĕ klĭ juă Ñu. 8Kâo ngă ƀatem kơ ƀing gih hăng ia, samơ̆ Ñu či ngă ƀatem kơ ƀing gih hăng Yang Bơngăt Hiam.”

Yêsu Tŭ Ƀatem

(Mat 3:13 – 4:11; Luk 3:21-22; 4:1-13)

9Amăng khul hrơi anŭn, Yêsu rai mơ̆ng plei Nasaret kwar Galilê, laih anŭn Yôhan ngă ƀatem kơ Ñu amăng ia krong Yurdan. 10Tơdang Yêsu tơgŭ mơ̆ng ia, Ñu ƀuh khul adai pŏk, laih anŭn Yang Bơngăt Hiam trŭn găm ƀơi Ñu kar hăng sa drơi čĭm bơrơgơ̆m. 11Laih anŭn hmâo asăp pơhiăp mơ̆ng adai laĭ: “Ih jing Ană Kâo khăp hơeng, amăng Ih Kâo hmâo tơlơi hơ̆k mơak biă mă.”#Čơd 22:2; Adoh 2:7; Êsai 42:1; Mat 3:17; 12:18; Mar 9:7; Luk 3:22.

Yang Sat Plư Yêsu

12Tañ mơtam Yang Bơngăt Hiam pơtrŭt Ñu nao pơ tơdrŏn tač. 13Ñu dŏ amăng tơdrŏn tač pă pluh hrơi, laih anŭn tŭ tơlơi satan plư Ñu. Ñu dŏ hrŏm hơbĭt hăng hlô glai; laih anŭn ƀing ling jang Ơi Adai djru Ñu.

Bruă Mă Khua Yang Yêsu Pơ Kwar Galilê. – Ƀing Ding Kơna Blŭng Hlâo

(Mat 4:12-22; Luk 4:14-15; 5:1-11)

14Giơ̆ng kơ arăng krư̆ hĭ Yôhan, Yêsu nao pơ kwar Galilê pơtô Tơlơi Phrâo Hiam Ơi Adai. 15Ñu laĭ: “Mông truh laih, laih anŭn dêh čar pơtao Ơi Adai hmâo rai giăm yơh. Kơhmal bĕ tơlơi soh laih anŭn đaŏ kơ Tơlơi Phrâo Hiam.”#Mat 3:2.

16Tơdang Yêsu rơbat kơtuai hang ia rơsĭ Galilê, Ñu ƀuh Simôn hăng Andrê adơi Simôn. Gơñu dŏ dăng hơñual amăng ia rơsĭ, yua kơ gơñu jing mơnuih trah akan. 17Yêsu laĭ kơ gơñu: “Đuaĭ tui Kâo bĕ, laih anŭn Kâo či pơjing ƀing gih mơnuih trah mơnuih.” 18Tañ mơtam gơñu lui hĭ hơñual gơñu hăng đuaĭ tui Yêsu.

19Tơ Ñu nao ataih ƀiă, Ñu ƀuh Yakơ ană đah rơkơi Sêbêdê hăng Yôhan adơi ñu, gơñu dŏ pơsir hơñual amăng sŏng. 20Tañ mơtam Yêsu iâu gơñu; gơñu lui hĭ ama gơñu Sêbêdê amăng sŏng hrŏm hơbĭt hăng ƀing mơnuih mă bruă apah, laih anŭn đuaĭ tui Yêsu.

Yêsu Puh Pơđuaĭ Yang Sat

(Luk 4:31-37)

21Gơñu nao pơ plei Kapernum; amăng hrơi saƀat Yêsu mŭt amăng sang bơjơnum Yuđa laih anŭn pơtô pơhrăm. 22#Mat 7:28-29.Abih mơnuih leng kơ hling hlang kơ tơlơi Ñu pơtô, yua kơ Ñu pơtô kơ ƀing gơ̆ ƀu djơ̆ kar hăng ƀing nai pơtô tơlơi juăt ôh, kơđai glaĭ, Ñu pơtô hăng tơlơi dưi.

23Hlăk anŭn, amăng sang bơjơnum ƀing gơñu hmâo sa čô mơnuih hmâo yang bơngăt grĭ hơƀak dŏ amăng ñu; 24gơ̆ ur: “Ơ Yêsu plei Nasaret, hơgĕt tơlơi Ih hmâo hăng gơmơi? Ih rai kiăng pơrai gơmơi hă? Kâo thâo hlơi Ih jing, Ih jing Pô Rơgoh Hiam mơ̆ng Ơi Adai.”

25Samơ̆ Yêsu ƀuah ñu, hăng laĭ: “Dŏ rơiăt hăng tơbiă bĕ mơ̆ng mơnuih anai.”

26Yang bơngăt grĭ hơƀak prăh kơñak drơi jan ñu, ur kraih laih anŭn tơbiă mơ̆ng mơnuih anŭn. 27Abih bang gơñu leng kơ hling hlang, hăng tơña tơdruă gơñu: “Hơgĕt tơlơi anai? Sa tơlơi pơhrăm phrâo hă? Hăng tơlơi dưi Ñu pơđar wơ̆t kơ ƀing yang bơngăt grĭ hơƀak, laih anŭn gơñu ăt gưt kơ Ñu mơ̆n!”

28Laih anŭn tañ mơtam tơlơi hing ang Ñu arăng hmư̆ tar ƀar tring jum dar kwar Galilê.

Yêsu Pơsuaih Tơlơi Ruă Tơhmua Pêtrôs

(Mat 8:14-17; Luk 4:38-41)

29Tơbiă mơ̆ng sang bơjơnum, Yêsu hrŏm hơbĭt hăng Yakơ laih anŭn Yôhan nao tơpă pơ sang Simôn hăng Andrê. 30Tơhmua đah kơmơi Simôn duăm dŏ đih ƀơi sưng. Gơñu laĭ pơthâo kơ Yêsu mơtam kơ tơlơi gơ̆ ruă pơgrŭn. 31Yêsu nao giăm, mă tơngan gơ̆ hăng rŭ tơgŭ, tơlơi pơgrŭn gơ̆ suaih mơtam, laih anŭn gơ̆ čơdơ̆ng buih bruă kơ gơñu.

32Ƀơi yang hrơi lĕ klam anŭn, arăng ba nao pơ Yêsu abih bang ƀing duăm ruă hăng ƀing hmâo yang sat ngă. 33Abih bang ƀing mơnuih amăng plei anŭn pơtŭm glaĭ ƀơi anăp bah amăng. 34Yêsu pơsuaih lu mơnuih hmâo tơlơi ruă phara phara hăng puh pơđuaĭ lu yang sat. Ñu khă ƀu brơi yang sat pơhiăp ôh, yua kơ ƀing gơñu thâo krăn Yêsu.

Yêsu Pơtô Amăng Čar Galilê

(Luk 4:42-44)

35Mơ̆ng mơguah ưm, tơdang adai ăt dŏ mơmŏt Yêsu tơgŭ hăng tơbiă nao pơ anih hơđơ̆ng rơiăt, hăng iâu laĭ pơ anŭn. 36Simôn hăng ƀing hrŏm hơbĭt hăng gơñu tui sem Yêsu. 37Tơ gơñu ƀuh Yêsu gơñu laĭ hăng Ñu: “Abih bang mơnuih hyu sem Ih.”

38Yêsu laĭ kơ ƀing gơñu: “Brơi ƀing ta nao pơ plei jĕ giăm jum dar anai kiăng kơ Kâo dưi pơtô Tơlơi Phrâo Hiam pơ anŭn kar kaĭ mơ̆n; yua kơ tơlơi anŭn yơh Kâo hmâo rai laih.”

39 # Mat 4:23; 9:35. Laih anŭn Yêsu nao tar ƀar kwar Galilê, pơtô amăng sang bơjơnum hăng puh pơđuaĭ ƀing yang sat.

Yêsu Pơsuaih Mơnuih Djơ̆ Phŭng

(Mat 8:1-3; Luk 5:12-16)

40Hmâo sa čô mơnuih djơ̆ phŭng nao pơ Yêsu, ñu tŏ tơŭt hăng kơwưh rơkâo: “Tơdah Ih kiăng Ih dưi pơrơgoh kâo.”

41Yêsu glưh pran jua pap,#1:41 Đơđa Hră Ơi Adai Pơhiăp so đưm thim: pap mơ̆n hil mơ̆n. yơr tơngan ruaih gơ̆, hăng laĭ kơ gơ̆: “Kâo kiăng, rơgoh bĕ.” 42Tañ mơtam phŭng gơ̆ suaih hĭ, laih anŭn gơ̆ jing rơgoh yơh. 43Yêsu brơi gơ̆ nao mơtam hăng pơđar kơ gơ̆ hăng tơlơi khĭp kơtang, 44#Lêwi 14:1-32.“Răng bĕ, anăm laĭ tơlơi anai kơ arăng ôh, samơ̆ nao pơdah ih pô kơ khua ngă yang, laih anŭn pơyơr mơnơ̆ng ngă yang yua kơ tơlơi ih rơgoh laih kar hăng tơlơi juăt Môis hmâo pơtă laih, jing sa tơlơi gơ̆ng jơlan brơi kơ ană plei pla.”

45Samơ̆ ñu tơbiă nao hăng čơdơ̆ng ră ruai laih anŭn pơhaih tơlơi anŭn tar ƀar. Yua kơ anŭn yơh, Yêsu ƀu dưi mŭt amăng plei hăng tơlơi rơngai ôh, samơ̆ dŏ amăng anih tơdrŏn tač pơ gah rơngiao plei. Laih anŭn ƀing ană plei mơ̆ng abih bang anih jum dar nao pơ Ñu.

Currently Selected:

Markôs 1: JRA2016

Highlight

Copy

Compare