Markôs 10
10
Yêsu Pơtô Kơ Tơlơi Pơklaih Rơkơi Bơnai
(Mat 19:1-12; Luk 16:18)
1Yêsu đuaĭ mơ̆ng anŭn nao pơ tring Yuđa laih anŭn pơ hang gah adih ia krong Yurdan. Ƀing mơnuih lu rai pơtŭm jum dar Ñu dơ̆ng, laih anŭn Ñu pơtô ƀing gơ̆ tui hăng tơlơi Ñu juăt ngă laih.
2Hmâo ƀing Pharisi nao pơ Yêsu hăng tơña kiăng lông lăng Ñu: “Phiăn mơ̆ sa čô đah rơkơi klaih lui bơnai ñu?”
3Yêsu laĭ glaĭ gơñu: “Hơgĕt Môis hmâo pơtă laih kơ ƀing gih?”
4 #
Mơñă 24:1-4. Gơñu laĭ: “Môis brơi tơlơi dưi đah rơkơi čih hră klaih lui laih anŭn lui hĭ bơnai ñu.”
5Samơ̆ Yêsu laĭ kơ gơñu: “Yua kơ pran jua ƀing gih khăng, hnŭn yơh ñu čih tơlơi juăt anŭn brơi kơ ƀing gih. 6#Čơd 1:27; 5:2.Samơ̆ mơ̆ng phŭn tơlơi hrih pơjing: ‘Ơi Adai kơnơ̆ng pơjing sa čô đah rơkơi laih anŭn sa čô đah kơmơi đôč.’ 7‘Yua kơ tơlơi anŭn yơh đah rơkơi či lui amĭ ama ñu laih anŭn pơgop hăng bơnai ñu,#10:7 Đơđa Hră Ơi Adai Pơhiăp so đưm ƀu hmâo ôh: laih anŭn pơgop pơlir hăng bơnai ñu. 8#Čơd 2:24.laih anŭn dua gơñu či jing hĭ sa asar.’ Tui anŭn gơñu ƀu jing dua dơ̆ng ôh, samơ̆ kơnơ̆ng jing sa asar đôč. 9Tui anŭn, anăm brơi mơnuih pơčơlah hĭ ôh ƀing hlơi Ơi Adai hmâo pơgop laih.”
10Tơdang gơñu dŏ amăng sang, ƀing ding kơna tơña kơ Yêsu dơ̆ng kơ tơlơi anŭn. 11Yêsu laĭ kơ gơñu: “Hlơi lui bơnai ñu hăng dŏ bơnai pơkŏn, jing ñu ngă tơlơi klĕ pyu soh hăng bơnai ñu.#Mat 5:32; I Kôr 7:10-11. 12Laih anŭn tơdah đah kơmơi lui rơkơi ñu dŏ rơkơi pơkŏn, ăt ñu jing soh klĕ pyu mơ̆n.”
Yêsu Hơ-ŭ Mơyun Kơ Ƀing Čơđai Anĕt
(Mat 19:13-15; Luk 18:15-17)
13Arăng ba ƀing čơđai anĕt nao pơ Yêsu kiăng kơ Ñu ah tơngan hơ-ŭ mơyun kơ ƀing gơ̆; samơ̆ ƀing ding kơna ƀuah kơ ƀing ba čơđai anŭn. 14Samơ̆ tơ Yêsu ƀuh tơlơi anŭn Ñu hil hăng laĭ kơ ƀing ding kơna Ñu: “Brơi ƀing čơđai rai pơ Kâo bĕ, anăm khă ƀing gơñu ôh, yua kơ dêh čar pơtao Ơi Adai lơ̆m kơ hlơi pô jing kar hăng ƀing čơđai anŭn. 15#Mat 18:3.Sĭt biă mă Kâo laĭ kơ ƀing gih, hlơi ƀu tŭ mă ôh dêh čar pơtao Ơi Adai kar hăng sa čô čơđai anĕt, ñu ƀu dưi mŭt pơ anŭn ôh.” 16Giơ̆ng anŭn Yêsu pi mă ƀing čơđai, ah tơngan ƀơi gơñu hăng hơ-ŭ mơyun hiam brơi kơ ƀing gơ̆.
Mơnuih Pơdrŏng
(Mat 19:16-30; Luk 18:18-30)
17Tơdang Yêsu čơdơ̆ng rơbat nao, hmâo sa čô mơnuih nao čon tơŭt ƀơi anăp Ñu hăng tơña kơ Ñu: “Ơ Nai hiam klă, hơgĕt tơlơi kâo khŏm ngă kiăng dưi mă tŭ tơlơi hơdip hlŏng lar?”
18Yêsu laĭ kơ ñu: “Yua hơgĕt ih iâu Kâo jing Pô hiam klă lĕ? Ƀu hmâo hlơi hiam klă ôh, kơnơ̆ng hơjăn Ơi Adai đôč. 19Ih thâo laih tơlơi juăt: ‘Anăm pơdjai mơnuih ôh; anăm klĕ pyu ôh; anăm klĕ dŏp ôh; anăm ngă gơ̆ng jơlan ƀlor kơ arăng ôh; anăm plư pleč arăng ôh; pơpŭ bĕ kơ amĭ ama ih.’”#Tơb 20:12-16; Mơñă 5:16-20.
20Gơ̆ laĭ glaĭ: “Ơ Nai, kâo hmâo tui gưt laih abih bang tơlơi juăt anŭn čơdơ̆ng mơ̆ng kâo dŏ čơđai.”
21Yêsu lăng kơ gơ̆ hăng tơlơi khăp, laih anŭn laĭ: “Ih kơƀah sa tơlơi; nao bĕ, sĭ hĭ hơgĕt mơnơ̆ng ih hmâo hăng pha brơi kơ ƀing ƀun rin, laih anŭn ih či hmâo yơh kong ngăn yom amăng adai. Laih anŭn rai bĕ, đuaĭ tui Kâo.” 22Tơ ñu hmư̆ tơlơi anŭn ƀô̆ mơta ñu kơtraŏ, laih anŭn ñu rơbat đuaĭ hăng tơlơi rơngot, yua kơ ñu hmâo dram gơnam lu biă mă.
23Tui anŭn Yêsu lăng jum dar hăng laĭ kơ ƀing ding kơna Ñu: “Tơnap biă mă kơ ƀing pơdrŏng sah mŭt amăng dêh čar pơtao Ơi Adai!”
24Ƀing ding kơna kơtuă kơ tơlơi Ñu pơhiăp anŭn. Samơ̆ Yêsu laĭ kơ ƀing gơñu dơ̆ng: “Ơ ƀing ană Kâo, tơnap biă mă yơh dưi mŭt amăng dêh čar pơtao Ơi Adai. 25Amuñ hloh kơ sa drơi aseh samô mŭt ƀơi amăng jrum hăng sa čô mơnuih pơdrŏng mŭt amăng dêh čar pơtao Ơi Adai.”
26Ƀing ding kơna Ñu kơtuă biă mă hăng laĭ tơdruă gơñu: “Tui anŭn hlơi dưi klaih lĕ?”
27Yêsu lăng kơ ƀing gơñu hăng laĭ: “Tơlơi anŭn mơnuih ƀu dưi ngă ôh, samơ̆ Ơi Adai dưi ngă; yua kơ abih bang tơlơi Ơi Adai dưi ngă soh sel.”
28Pêtrôs čơdơ̆ng laĭ hăng Yêsu: “Lăng anai, gơmơi hmâo lui laih abih bang tơlơi kiăng đuaĭ tui Ih.”
29Yêsu laĭ: “Sĭt biă mă Kâo laĭ kơ ƀing gih, abih bang hlơi pô lui laih sang ñu ƀôdah ƀing adơi ayŏng, amai adơi, amĭ ama, ƀing ană bă, ƀôdah lŏn hmua ñu yua kơ Kâo hăng yua kơ Tơlơi Phrâo Hiam, 30ñu anŭn či mă tŭ amăng rơnŭk anai mơtam sa rơtuh wơ̆t lu hloh pưk sang, adơi ayŏng, amai adơi, amĭ, ƀing ană bă, laih anŭn lŏn hmua hrŏm hơbĭt hăng tơlơi arăng ngă sat mơ̆n, laih anŭn tơlơi hơdip hlŏng lar amăng rơnŭk či truh tơdơi. 31#Mat 20:16; Luk 13:30.Samơ̆ hmâo lu mơnuih hlâo či jing tơdơi, laih anŭn ƀing tơdơi či jing hlâo.”
Tal Klâo Yêsu Laĭ Hlâo Kơ Tơlơi Ñu Či Djai
(Mat 20:17-19; Luk 18:31-34)
32Khua Yang Yêsu hăng ƀing ding kơna hlăk rơbat ƀơi jơlan đĭ nao pơ Yêrusalem, Yêsu rơbat nao hlâo ƀơi anăp gơñu. Ƀing ding kơna hwĭ hyưt laih anŭn ƀing đuaĭ tui Ñu hmâo tơlơi hwĭ bral. Sa wơ̆t dơ̆ng Yêsu iâu mă pluh dua čô khua ding kơna hơjăn gơñu laih anŭn čơdơ̆ng laĭ brơi kơ gơñu tơlơi či truh kơ Ñu. 33Ñu laĭ: “Hmư̆ bĕ, ƀing ta nao pơ plei Yêrusalem, arăng či jao lui Ană Mơnuih kơ ƀing khua ngă yang prŏng laih anŭn kơ ƀing nai pơtô tơlơi juăt. Gơñu či klă kơđi pơdjai Ñu, laih anŭn jao lui Ñu kơ ƀing djuai tuai. 34Arăng či djik djak kơ Ñu, kơčuh ia bah ƀơi Ñu, taih Ñu hăng hrĕ hnuăt, hăng pơdjai hĭ Ñu. Samơ̆ klâo hrơi tơdơi Ñu či hơdip glaĭ.”
Tơlơi Yakơ Hăng Yôhan Rơkâo
(Mat 20:20-28)
35Yakơ hăng Yôhan, ƀing ană đah rơkơi Sêbêdê, nao pơ anăp Yêsu hăng tơña kơ Ñu: “Ơ Nai, gơmơi kiăng kơ Ih ngă brơi gơmơi hơgĕt tơlơi gơmơi rơkâo.”
36Yêsu tơña: “Hơgĕt tơlơi ƀing gih kiăng kơ Kâo ngă brơi?”
37Gơñu laĭ glaĭ: “Amăng dêh čar pơtao ang yang Ih, rơkâo kơ Ih brơi gơmơi dŏ ber sa čô gah hơnuă laih anŭn sa čô gah iao Ih.”
38Samơ̆ Yêsu laĭ kơ gơñu: “Ƀing gih ƀu thâo ôh hơgĕt tơlơi ƀing gih rơkâo. Ƀing gih dưi mơ̆ mơñum kơčok Kâo mơñum,#10:38 kiăng laĭ: tơlơi tơnap tap Kâo tŭ (Yôhan 18:11) laih anŭn dưi tŭ mơ̆ tơlơi ƀatem Kâo tŭ?”
39Gơñu laĭ: “Gơmơi dưi mơ̆n.”
Tui anŭn Yêsu laĭ kơ gơñu: “Ƀing gih či mơñum kơčok Kâo či mơñum#Luk 12:50., laih anŭn ƀing gih či tŭ tơlơi ƀatem Kâo tŭ. 40Samơ̆ tơlơi dŏ ber gah hơnuă ƀôdah gah iao Kâo, ƀu djơ̆ Kâo pha brơi ôh. Tơlơi anŭn pioh brơi kơ hlơi Ơi Adai hmâo pơkă pioh laih.”
41Tơ ƀing pluh čô hmư̆ tơlơi anŭn, gơñu čơdơ̆ng hil Yakơ hăng Yôhan. 42#Luk 22:25-26.Yêsu iâu gơñu rai pơ Ñu hăng laĭ kơ gơñu: “Ƀing gih thâo laih ƀing mơnuih arăng brơi wai lăng ƀing djuai tuai khăp yua tơlơi kơtư̆ juă wai lăng plei pla, laih anŭn ƀing khua prŏng gơñu khăp yua tơlơi dưi kơtang kiăng gĭt gai ană plei. 43#Mat 23:11; Mar 9:35; Luk 22:26.Samơ̆ tơ̆ng krah ƀing gih ƀu djơ̆ kar hăng anŭn ôh, hlơi pô kiăng jing prŏng amăng ƀing gih, brơi ñu jing ding kơna kơ ƀing gih. 44Laih anŭn hlơi pô kiăng ngă khua amăng ƀing gih, brơi ñu jing hlŭn kơ abih bang. 45Yua kơ kar kaĭ mơ̆n Ană Mơnuih hmâo rai laih ƀu djơ̆ kiăng kơ arăng mă bruă kơ Ñu ôh, samơ̆ Ñu kiăng mă bruă kơ arăng, laih anŭn jao brơi tơlơi hơdip Ñu pô jing nua song mă kơ lu mơnuih.”
Yêsu Pơsuaih Mơta Ƀartimê
(Mat 20:29-34; Luk 18:35-43)
46Giơ̆ng anŭn gơñu truh pơ plei Yêrikô. Tơdang Yêsu hăng ƀing ding kơna Ñu tơbiă mơ̆ng plei Yêrikô hrŏm hơbĭt hăng sa phung mơnuih lu, hmâo sa čô mơnuih bum mơta hyu rơkâo dan anăn gơ̆ Ƀartimê ană đah rơkơi Timê, dŏ ber ƀơi akiăng jơlan. 47Tơ ñu hmư̆ arăng laĭ anai Yêsu plei Nasaret, gơ̆ čơdơ̆ng ur kraih hăng laĭ: “Ơ Yêsu, Ană Đawit, pap mơñai kơ kâo đa.”
48Lu mơnuih khă gơ̆, brơi gơ̆ dŏ rơiăt, samơ̆ gơ̆ ur kraih hloh dơ̆ng: “Ơ Ană Đawit, pap mơñai kơ kâo đa.”
49Yêsu dŏ hĭ hăng laĭ: “Iâu gơ̆ rai pơ anai bĕ.” Gơñu iâu mơnuih bum mơta anŭn, hăng laĭ kơ gơ̆: “Kơjăp pran jua, tơgŭ bĕ, Ñu iâu ih.”
50Gơ̆ toh glŏm lui hĭ ao phyung gơ̆, tơgŭ mơtam, hăng nao pơ Yêsu.
51Yêsu laĭ kơ gơ̆: “Hơgĕt tơlơi ih kiăng Kâo ngă brơi kơ ih?”
Mơnuih bum mơta laĭ glaĭ: “Ơ Nai, brơi kâo dưi ƀuh rơđah.”
52Yêsu laĭ kơ gơ̆: “Nao bĕ, tơlơi đaŏ ih hmâo pơsuaih ih laih.” Tañ mơtam mơta ñu rơđah glaĭ laih anŭn đuaĭ tui Yêsu ƀơi rŏk jơlan.
Currently Selected:
Markôs 10: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
