Markôs 9
9
1Laih anŭn Yêsu laĭ hăng gơñu: “Sĭt biă mă Kâo laĭ kơ ƀing gih, hmâo đơđa ƀing dŏ dơ̆ng ƀơi anai ƀu či djai ôh hlâo kơ gơñu ƀuh dêh čar pơtao Ơi Adai rai hăng tơlơi dưi mơyang.”
Yêsu Hrih Drơi Jan
(Mat 17:1-13; Luk 9:28-36)
2 #
II Pê 1:17-18. Năm hrơi tơdơi Yêsu ba Pêtrôs, Yakơ, hăng Yôhan đĭ pơ glong čŏng čư̆ hơjăn gơñu. Laih anŭn drơi jan Yêsu hrih ƀơi anăp gơñu. 3Sum ao Ñu rơđah jing kơmlă hăng kŏ biă mă, kŏ hloh kơ arăng dưi ngă ƀơi lŏn tơnah anai. 4Plŭt Êli hăng Môis pơƀuh rai. Dua čô anŭn dŏ pơhiăp hrŏm hăng Yêsu. 5Pêtrôs laĭ hăng Yêsu. “Ơ Nai hiam yơh ƀing ta dŏ pơ anai, brơi ƀing ta ngă klâo boh sang khăn, sa boh kơ Ih, sa boh kơ Môis, hăng sa boh kơ Êli.” 6Yua kơ Pêtrôs ƀu thâo či pơhiăp hơgĕt ôh, yua kơ gơñu hwĭ biă mă.
7 #
Mat 3:17; Mar 1:11; Luk 3:22. Giơ̆ng anŭn hmâo sa ƀŭt kơthul gom gơñu, laih anŭn hmâo asăp pơhiăp mơ̆ng kơthul anŭn: “Anai yơh jing Ană Kâo, Pô Kâo khăp hơeng biă mă. Brơi ƀing gih hmư̆ hiăp Ñu bĕ.” 8Tô̆ kơ thĕng, tơ ƀing ding kơna lăng jum dar, gơñu ƀu ƀuh hlơi dơ̆ng ôh hrŏm hơbĭt hăng gơñu, kơnơ̆ng hơjăn Yêsu đôč.
9Tơdang gơñu trŭn mơ̆ng čư̆, Yêsu pơtă kơ ƀing gơñu anăm ră ruai kơ arăng ôh kơ tơlơi gơñu hmâo ƀuh laih tơl Ană Mơnuih hơdip glaĭ mơ̆ng ƀing djai.
10Tui anŭn gơñu djă pioh tơlơi anŭn laih anŭn tơña tơdruă gơñu: “hơgĕt kiăng laĭ: ‘tơlơi hơdip glaĭ mơ̆ng ƀing djai?’” 11#Mal 4:5; Mat 11:14.Gơñu tơña kơ Yêsu: “Hyư̆m ƀing nai pơtô tơlơi juăt laĭ, Êli khŏm rai hlâo?”
12Yêsu laĭ kơ gơñu: “Sĭt biă mă Êli khŏm rai hlâo kiăng pơkra glaĭ abih bang bruă. Hyư̆m ngă ăt hmâo mơ̆n Hră Ơi Adai Pơhiăp čih kơ Ană Mơnuih khŏm tŭ lu tơlơi ruă nuă laih anŭn tơlơi arăng či hơngah lui hĭ Ñu? 13Samơ̆ Kâo laĭ kơ ƀing gih thâo, Êli hmâo rai laih, laih anŭn gơñu hmâo ngă laih kơ gơ̆ tui hăng tơlơi gơñu kiăng, tui hăng Hră Ơi Adai Pơhiăp hmâo čih djơ̆ laih kơ gơ̆.”
Yêsu Pơsuaih Sa Čô Čơđai Đah Rơkơi Yang Sat Ngă
(Mat 17:14-21; Luk 9:37-43a)
14Tơ gơñu truh pơ ƀing ding kơna pơkŏn, gơñu ƀuh phung mơnuih lu biă mă dŏ jum dar gơñu, laih anŭn hmâo hơdôm čô nai pơtô tơlơi juăt dŏ pơrơjah hăng gơñu. 15Tơ phung mơnuih lu ƀuh Ñu, gơñu kơtuă biă mă laih anŭn tañ mơtam gơñu nao čơkă kơkuh kơ Yêsu. 16Yêsu tơña kơ gơñu: “Tơlơi hơgĕt ƀing gih pơrơjah hăng gơñu?”
17Sa čô amăng phung mơnuih lu anŭn laĭ glaĭ kơ Yêsu: “Ơ Nai, kâo ba rai ană đah rơkơi kâo pơ Ih, yua kơ hmâo yang sat ngă kơ ñu jing kơmlô. 18Rĭm wơ̆t yang ngă ñu, ñu pơrơbuh gơ̆ pơ lŏn, ƀlĕ pơrơboh ia bah, kĕ tơgơi laih anŭn drơi jan gơ̆ khăng arăng hĭ. Kâo hmâo rơkâo kơ ƀing ding kơna Ih puh pơđuaĭ hĭ yang sat anŭn, samơ̆ gơñu ƀu dưi puh pơđuaĭ ôh.”
19Yêsu laĭ glaĭ: “Ơ kơnŭng djuai ƀu hmâo tơlơi đaŏ, hơdôm sui dơ̆ng Kâo khŏm dŏ hrŏm hơbĭt hăng ƀing gih? Dơ̆ pă dơ̆ng Kâo khŏm gir hăng ƀing gih? Ba rai ñu pơ Kâo bĕ.” 20Laih anŭn gơñu ba čơđai anĕt anŭn pơ Yêsu; tơ yang sat ƀuh Yêsu, ñu prăh rơbuh čơđai anŭn ƀơi lŏn mơtam, tơglung blư̆ nao rai, blôk ia bah. 21Yêsu tơña kơ ama ñu: “Hơbin ñu hmâo laih tơlơi anŭn?” Ñu laĭ: “Čơdơ̆ng mơ̆ng gơ̆ hlăk dŏ anĕt.
22Lu wơ̆t yang sat glŏm gơ̆ amăng apui ƀôdah amăng ia kiăng pơdjai gơ̆. Samơ̆ tơdah hơgĕt Ih dưi ngă, rơkâo kơ Ih pap hăng djru gơmơi đa.”
23Yêsu laĭ kơ ñu: “Hyư̆m ih laĭ: ‘Tơdah Ih dưi’ Abih bang tơlơi dưi soh sel kơ hlơi pô đaŏ.”
24Tañ mơtam ama čơđai anŭn ur laĭ: “Kâo đaŏ, rơkâo ih djru brơi tơlơi kâo ƀu đaŏ!”
25Tơ Yêsu ƀuh ƀing mơnuih lu rai, Ñu ƀuah, laĭ kơ yang bơngăt grĭ hơƀak anŭn: “Ơ yang kơmlô hăng tơngil, Kâo pơtă kơ ŏng tơbiă bĕ mơ̆ng čơđai anĕt anai, laih anŭn anăm glaĭ mŭt amăng gơ̆ dơ̆ng ôh.”
26Giơ̆ng kơ yang sat ur laih anŭn ñu pơañak drơi jan gơ̆ kơtang biă mă hăng tơbiă hĭ. Čơđai anŭn jing kar hăng sa čô djai yơh, tơl hmâo lu mơnuih amăng ƀing anŭn laĭ: “Gơ̆ djai yơh!” 27Samơ̆ Yêsu mă tơngan ñu hăng rŭ đĭ, laih anŭn gơ̆ tơgŭ.
28Tơ Yêsu mŭt sang, ƀing ding kơna tơña kơ Ñu tơdang Ñu dŏ hơjăn: “Yua hơgĕt ƀing gơmơi ƀu dưi puh pơđuaĭ ôh yang sat anŭn?”
29Yêsu laĭ kơ gơñu: “Tơdah ƀu iâu laĭ#9:29 Đơđa Hră Ơi Adai Pơhiăp so đưm thim: laih anŭn ư̆ ƀơ̆ng huă, ƀu hmâo hlơi dưi puh pơđuaĭ mơta yang sat anŭn ôh.”
Yêsu Laĭ Hlâo Dơ̆ng Kơ Tơlơi Ñu Djai Hăng Hơdip Glaĭ
(Mat 17:22-23; Luk 9:43b-45)
30Mơ̆ng anih anŭn gơñu hlŏng nao găn kwar Galilê, Yêsu ƀu kiăng arăng thâo tơlơi anŭn ôh, 31yua kơ Ñu hmâo pơtô kơ ƀing ding kơna Ñu tơdang laĭ kơ ƀing gơ̆: “Arăng či jao lui Ană Mơnuih amăng tơngan mơnuih, laih anŭn gơñu či pơdjai hĭ Ñu; laih arăng pơdjai, hrơi tal klâo Ñu či hơdip glaĭ dơ̆ng.”
32Samơ̆ ƀing gơñu ƀu thâo hluh ôh kơ tơlơi Yêsu hmâo pơhiăp anŭn, laih anŭn dơ̆ng gơñu hwĭ ƀu khĭn tơña Yêsu ôh.
Hlơi Jing Pô Prŏng Hloh
(Mat 18:1-5; Luk 9:46-48)
33Tui anŭn gơñu truh pơ plei Kapernum. Tơ Ñu mŭt amăng sang laih, Ñu tơña kơ ƀing gơ̆: “Hlăk rơbat ƀơi rŏk jơlan, ƀing gih pơrơjah tơlơi hơgĕt?”
34 #
Luk 22:24. Samơ̆ ƀing gơñu dŏ rơiăt, yua kơ hlăk rŏk jơlan ƀing gơñu pơrơjah tơdruă gơñu, hlơi amăng ƀing gơñu jing prŏng hloh. 35#Mat 20:26-27; 23:11; Mar 10:43-44; Luk 22:26.Yêsu dŏ ber, iâu pluh dua čô ƀing khua ding kơna hăng laĭ: “Tơdah hlơi kiăng jing tal sa, brơi ñu khŏm jing pô dŏ pơ rơnuč hloh kơ abih bang laih anŭn jing ding kơna kơ abih bang.” 36Giơ̆ng anŭn Yêsu mă sa čô čơđai anĕt pioh gơ̆ ƀơi tơ̆ng krah ƀing gơñu. Ñu pi gơ̆ tơdang laĭ kơ ƀing gơñu. 37#Mat 10:40; Luk 10:16; Yô 13:20.“Hlơi jum sa čô čơđai anĕt kar hăng anai amăng anăn Kâo kar hăng ñu jum Kâo mơ̆n; laih anŭn hlơi jum Kâo, ƀu djơ̆ jum Kâo ôh, samơ̆ jum Pô hmâo pơkiaŏ rai Kâo.”
Hlơi Ƀu Pơkơdơ̆ng Hăng Ƀing Ta Jing Gơ̆p Ta
(Luk 9:49-50)
38Yôhan laĭ hăng Yêsu: “Ơ Nai, gơmơi hmâo ƀuh sa čô mơnuih puh pơđuaĭ yang sat amăng anăn Ih, laih anŭn gơmơi khă ñu yua kơ ñu ƀu tui hăng ƀing ta ôh.”
39Samơ̆ Yêsu laĭ: “Anăm khă ñu ôh, yua kơ ƀu hmâo ôh sa čô mơnuih ngă bruă mơsêh mơyang amăng anăn Kâo mơ̆n laih anŭn pơhiăp sat kơ Kâo mơ̆n. 40#Mat 12:30; Luk 11:23.Yua kơ hlơi ƀu pơkơdơ̆ng hăng ƀing ta ñu jing pô lơ̆m kơ ƀing ta. 41#Mat 10:42.Laih anŭn hlơi pô brơi kơ ƀing gih mơñum sa kơčok ia yua kơ ƀing gih jing ƀing lơ̆m kơ Yang Krist. Sĭt biă mă Kâo laĭ kơ ƀing gih, pô anŭn ƀu či rơngiă ôh tơlơi bơni apah ñu.”
Tơlơi Plư
(Mat 18:6-9; Luk 17:1-2)
42“Tơdah hlơi ngă brơi sa čô amăng ƀing čơđai anĕt anai hmâo đaŏ laih Kâo lĕ amăng tơlơi soh, hiam hloh brơi arăng akă hĭ sa boh rơsŭng boh pơtâo prŏng ƀơi tơkuai pô anŭn hăng glŏm hĭ ñu amăng ia rơsĭ. 43#Mat 5:30.Tơdah tơngan ih ngă brơi ih lĕ rơbuh, čơ̆ng hĭ ñu bĕ; hiam hloh kơ ih mŭt amăng tơlơi hơdip hmâo kơnơ̆ng sa ƀĕ tơngan, hăng ih hmâo dua ƀĕ tơngan samơ̆ mŭt amăng war apui, amăng apui ƀu thâo rơngăm ôh.#9:43 Đơđa hră Ơi Adai Pơhiăp so đưm thim jơlan 44 laih anŭn jơlan 46 tui anai: Pơ anŭn hlăt ƀơ̆ng gơñu ƀu thâo djai ôh; laih anŭn apui ƀơ̆ng gơñu ƀu thâo thăm ôh. 45Tơdah tơkai ih ngă brơi ih lĕ rơbuh, čơ̆ng hĭ ñu bĕ; hiam hloh kơ ih mŭt amăng tơlơi hơdip hmâo kơnơ̆ng sa ƀĕ tơkai, hăng ih hmâo dua ƀĕ tơkai samơ̆ arăng glŏm ih amăng war apui. 47#Mat 5:29.Tơdah mơta ih pơsoh ih ngă brơi ih lĕ rơbuh, blač hĭ ñu bĕ; hiam hloh kơ ih mŭt amăng dêh čar pơtao Ơi Adai hăng sa gah mơta, kơ ih hmâo dua gah mơta samơ̆ arăng glŏm hĭ ih amăng war apui. 48#Êsai 66:24.Pơ anŭn hlăt ƀơ̆ng gơñu ƀu thâo djai, hăng apui ƀơ̆ng gơñu ƀu thâo rơngăm ôh.
49Yua kơ arăng či pơđăm rĭm čô hăng apui.#9:49 Đơđa hră so đưm thim mŭt ƀôdah pơblih hĭ laih anŭn arăng či pơđăm abih bang mơnơ̆ng pơyơr hăng hra.
50 #
Mat 5:13; Luk 14:34-35. Hra jing hiam, samơ̆ tơdah hra rơngiă hĭ mơsĭn, hyư̆m ƀing gih dưi ngă kiăng kơ ñu mơsĭn glaĭ dơ̆ng? Brơi ƀing gih khŏm hmâo hra amăng ƀing gih pô, laih anŭn brơi ƀing gih hơdip rơnŭk rơnua hăng tơdruă ƀing gih.”
Currently Selected:
Markôs 9: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
