Markôs 4
4
Tơlơi Bơhmutu Kơ Mơnuih Sai Pơjeh
(Mat 13:1-9; Luk 8:4-8)
1 #
Luk 5:1-3. Sa wơ̆t dơ̆ng Yêsu čơdơ̆ng pơtô ƀơi hang ia rơsĭ Galilê, laih anŭn hmâo sa phung mơnuih lu biă mă pơtŭm jum dar Ñu. Tui anŭn Ñu đĭ dŏ ber amăng sa boh sŏng amăng ia rơsĭ. Abih bang ƀing mơnuih lu dŏ ƀơi kơdư. 2Yêsu yua tơlơi bơhmutu pơtô kơ gơñu lu tơlơi, laih anŭn tơdang Ñu pơtô kơ ƀing gơñu, Ñu laĭ:
3“Hmư̆ bĕ! Sa čô mơnuih sai pơjeh nao sai. 4Tơdang ñu sai, hmâo đơđa pơjeh lĕ kơtuai jơlan, laih anŭn čĭm rai čoh ƀơ̆ng hĭ pơjeh anŭn. 5Pơjeh pơkŏn lĕ ƀơi anih lŏn boh pơtâo, ƀơi anŭn hmâo ƀiă lŏn. Ñu čăt tañ mơ̆n yua kơ lŏn ƀu kơpal ôh. 6Tơ yang hrơi tơbiă đĭ, pơdai čăt anŭn gliu hĭ, yua kơ ñu ƀu hmâo akha dlam ôh hnŭn yơh ñu djai hĭ. 7Pơjeh pơkŏn lĕ amăng tơ̆ng krah anih drơi, laih anŭn drơi anŭn čăt đĭ glong hăng ket hĭ ñu, laih anŭn ñu ƀu hmâo mơboh ôh. 8Pơjeh pơkŏn lĕ amăng anih lŏn hiam hnŭn yơh mơboh; ñu prŏng đĭ hăng đah jai, laih anŭn mơboh sa sar hmâo hĭ klâo pluh, năm pluh, laih anŭn sa rơtuh.”
9Laih anŭn Ñu laĭ: “Hlơi hmâo tơngia pioh hmư̆, brơi ñu hmư̆ bĕ!”
Tơlơi Kơñăm Kơ Tơlơi Bơhmutu
(Mat 13:10-17; Luk 8:9-10)
10Tơdang Yêsu dŏ hơjăn, ƀing mơnuih dŏ jum dar Ñu hrŏm hơbĭt hăng ƀing pluh dua čô khua ding kơna Ñu rai tơña kơ tơlơi bơhmutu anŭn. 11Yêsu laĭ kơ gơñu: “Kơ ƀing gih arăng brơi laih kơ tơlơi hơgơ̆m kơ dêh čar pơtao Ơi Adai, samơ̆ bơ kơ ƀing gah rơngiao, abih bang hăng tơlơi bơhmutu Kâo pơhiăp kơ gơñu, 12#Êsai 6:9,10.kiăng kơ gơñu:
Lăng samơ̆ ƀu thâo ƀuh ôh,
Laih anŭn kiăng kơ gơñu hmư̆ samơ̆ ƀu thâo hluh ôh;
Yua kơ tơdah gơñu thâo ƀuh laih anŭn thâo hluh gơñu dưi kơhmal hăng hmâo hĭ tơlơi pap brơi.”
Yêsu Pơblang Tơlơi Bơhmutu Mơnuih Sai Pơjeh
(Mat 13:18-23; Luk 8:11-15)
13Giơ̆ng anŭn Yêsu laĭ kơ gơñu: “Ƀing gih ƀu thâo hluh ôh hă tơlơi bơhmutu anai? Tui anŭn hyư̆m ƀing gih thâo hluh abih bang tơlơi bơhmutu pơkŏn lĕ? 14Mơnuih sai pơjeh anŭn jing sai boh pơhiăp Ơi Adai. 15Dôm pơjeh lĕ ƀơi rŏk jơlan jing ƀing mơnuih hmư̆ boh pơhiăp arăng pơtô kơ gơñu, samơ̆ giơ̆ng kơ gơñu hmư̆, yang sat Satan rai mơtam hăng mă hĭ boh pơhiăp arăng sai laih amăng pran jua gơñu. 16Kar hăng tui anŭn mơ̆n ƀing mă tŭ pơjeh amăng anih lŏn boh pơtâo: tơ gơñu hmư̆ boh pơhiăp, hăng tơlơi hơ̆k mơak gơñu mă tŭ mơtam, 17Samơ̆ amăng gơñu pô ƀu hmâo akha ôh, kơnơ̆ng dŏ jang jai đôč. Laih anŭn tơ hmâo tơlơi tơnap ƀôdah tơlơi arăng ngă sat yua kơ boh pơhiăp anŭn, gơñu lĕ rơbuh mơtam. 18Đơđa pơjeh pơkŏn lĕ ƀơi pum drơi jing kar hăng ƀing mơnuih hmư̆ boh hiăp pơtô, 19samơ̆ tơlơi ƀlơ̆ng bơngơ̆t kơ lŏn tơnah, tơlơi khăp đơi kơ tơlơi pơdrŏng sah, laih anŭn tơlơi amoaih kơ mơnơ̆ng pơkŏn mŭt amăng pran jua hăng ket hĭ boh pơhiăp, laih anŭn boh pơhiăp ƀu dưi mơboh ôh. 20Samơ̆ ƀing mơnuih tŭ mă pơjeh amăng lŏn hiam jing ƀing hmư̆ boh pơhiăp laih anŭn mă tŭ gơ̆, hăng hmâo mơboh sa asar lĕ ƀơi lŏn hiam, jing kar hăng ƀing mơnuih hmư̆ hiăp pơtô, tŭ mă hăng mơboh, sa asar hmâo hĭ klâo pluh, năm pluh, laih anŭn sa rơtuh.”
Bơhmutu Kơ Apui Kơđen
(Luk 8:16-18)
21 #
Mat 5:15; Luk 11:33. Yêsu laĭ kơ gơñu: “Hmâo mơ̆ arăng ba apui kơđen pioh gah yŭ kơ kơthŭng, ƀôdah gah yŭ kơ sưng pĭt, samơ̆ ƀu pioh ôh ñu ƀơi gơ̆ng apui kơđen? 22#Mat 10:26; Luk 12:2.Yua kơ hơgĕt mơnơ̆ng pơdŏp či pơrơđah hĭ, laih anŭn hơgĕt mơnơ̆ng hơgơ̆m či brơi arăng ƀuh amăng tơlơi bơngač. 23Hlơi hmâo tơngia pioh hmư̆, brơi ñu hmư̆ bĕ!”
24 #
Mat 7:2; Luk 6:38. Yêsu laĭ kơ gơñu: “Răng bĕ kơ tơlơi hơgĕt ƀing gih hmư̆. Ơi Adai či pơkă brơi kơ ƀing gih tui hăng hơnơ̆ng ƀing gih hmâo pơkă brơi kơ arăng, laih anŭn či thim brơi#4:24 Dưi pơblang dơ̆ng: thim hơnơ̆ng pơkă kơ ƀing gih dơ̆ng. 25#Mat 13:12; 25:29; Luk 19:26.Yua kơ hlơi hmâo laih, Ơi Adai či brơi thim kơ ñu dơ̆ng, samơ̆ hlơi ƀu hmâo ôh, Ơi Adai či mă hĭ wơ̆t mơnơ̆ng ñu hmâo laih.”
Tơlơi Bơhmutu Kơ Pơjeh Čăt Prŏng Đĭ
26Yêsu laĭ dơ̆ng: “Dêh čar pơtao Ơi Adai jing kar hăng sa čô mơnuih sai pơjeh ƀơi lŏn. 27Ñu pĭt ƀôdah mơdưh, mlam ƀôdah tơhrơi, pơjeh čơnăt laih anŭn čăt glong đĭ, samơ̆ mơnuih anŭn ƀu thâo hluh ôh hyư̆m tơlơi anŭn. 28Lŏn pô yơh ngă pơjing mơnơ̆ng, blŭng hlâo jing ană pơdai, giơ̆ng anŭn amŭng pơdai laih anŭn dơ̆ng hmâo asar amăng amung anŭn. 29#Yôel 3:13.Samơ̆ tơ pơdai tơsă laih, tañ mơtam pô sai mă mơnek yuă mă hĭ pơdai, yua kơ bơyan hơpuă truh laih”.
Tơlơi Bơhmutu Pơjeh Añăm Bơi
(Mat 13:31-32; Luk 13:18-19)
30Yêsu laĭ dơ̆ng: “Hăng hơgĕt ta dưi bơkơnar kơ dêh čar pơtao Ơi Adai? Ƀôdah hăng tơlơi bơhmutu hơgĕt ƀing ta yua kiăng bơrơđah ñu? 31Ñu jing kar hăng sa asar pơjeh añăm bơi, tơ arăng sai amăng lŏn, ñu jing anĕt hloh kơ abih bang pơjeh ƀơi lŏn tơnah anai. 32Samơ̆ tơ arăng sai ñu laih, ñu čăt laih anŭn jing prŏng hloh kơ abih bang añăm pơtăm pơkŏn, ñu čăt than prŏng, tơl khul čĭm brĭm dưi ngă hruh gah yŭ tơ-u ñu.”
33Yêsu pơtô boh pơhiăp Ơi Adai kơ gơñu hăng lu tơlơi bơhmutu kar hăng anŭn, tui hăng jua gơñu dưi thâo hluh. 34Ñu ƀu pơtô ôh kơ gơñu tơdah ƀu pơhiăp hăng tơlơi bơhmutu, samơ̆ tơdang Ñu dŏ hơjăn hrŏm hơbĭt hăng ƀing ding kơna Ñu, Ñu pơblang brơi abih bang kơ ƀing gơ̆.
Yêsu Khă Rơbŭ Kơthel
(Mat 8:23-27; Luk 8:22-25)
35Klam hrơi anŭn, Yêsu laĭ kơ gơñu: “Brơi ƀing ta găn nao hang gah adih.” 36Ƀing ding kơna lui ƀing mơnuih lu anŭn, Yêsu ăt dŏ amăng sŏng. Ƀing ding kơna ba Ñu nao, hmâo lu sŏng pơkŏn ăt nao hrŏm hơbĭt mơ̆n. 37Hmâo rơbŭ kơthel prŏng truh thut, laih anŭn jơlah ia poh yă klă amăng sŏng tơl sŏng bă hăng ia. 38Samơ̆ Yêsu dŏ ƀơi klon sŏng, đăl akŏ Ñu ƀơi hơnal akŏ laih anŭn pĭt. Ƀing ding kơna râo Yêsu hăng laĭ: “Ơ Nai, Ih ƀu bơngơ̆t ôh hă kơ ƀing ta či djai?”
39Yêsu mơdưh, khă angĭn hăng laĭ kơ ia rơsĭ: “Hơđơ̆ng rơiăt bĕ!” Tui anŭn angĭn dŏ krĕt hĭ, laih anŭn ia rơsĭ hơđơ̆ng rơiăt mơtam. 40Yêsu laĭ kơ gơñu: “Yua hơgĕt ƀing gih hwĭ? Ƀing gih aka hmâo tơlơi đaŏ ôh hă?”
41Laih anŭn gơñu bă hăng tơlơi hwĭ biă mă laih anŭn bơlaĭ tơdruă gơñu: “Hlơi mơnuih anai jing, tơl wơ̆t angĭn hăng ia rơsĭ ăt gưt kơ Ñu mơ̆n?”
Currently Selected:
Markôs 4: JRA2016
Highlight
Copy
Compare
Share
Want to have your highlights saved across all your devices? Sign up or sign in
© 2016 United Bible Societies. All rights reserved.
