Mak 13

Yesò gàʼ byìʼì byɨsə ngə̀ŋ Nyìngòŋ

(Mat 24.1-2; Luk 21.5-6)

1Andìʼ ando Yesò nlù fa ngə̀ŋ Nyìngòŋ a Jelusalèm, ndzɨ̀mtə̀ bàm wen tsen gàʼ à wen la, “Ndìʼsə̀ yen nki kəmbwom kə jùŋ kə nə̀ nki nguʼsə jùŋə sə a və bwomə̀ tsu a.”

2Yesò bwènsə̀ gàʼ à wen la, “Wù yenə kəmbwom kə jùŋkə kènkə lə̀, zhʉ boʼsə vì a və a bə̀ytə aloʼ aghenə no à tsèm kèn la tò ngùʼ muʼ a faŋ a kətʉ ghətsen kə shi a nse.”

Yesò gàʼ byìʼì ngəʼsə a sə ne vì

(Mat 24.3-14; Luk 21.7-19)

3Yesò nè kuʼ ə̀ ŋwʉʼʉ a pfèn Olìf a ghə̀ ndìʼ a ndzèn tsen yì ki vìsə̀ nə̀ ngə̀ŋ Nyìngòŋ ghoʼo, Bità nə̀ Jems nə̀ Joyn bènə̀ Andɨ̀lò nyoʼtə gàʼ à wen la, 4“Shə̀ʼtə̀ à yès la nyʉ̀ a venə lu nlyɨ̀ kəshi a tʉʼ kò lo? A lu dìʼ kəchwitə kə kò ədìʼ la nyʉ̀ avenə sə lyɨ̀ kəshi a?”

5Yesò gàʼ à vəwenə la, “Ghə̀ŋ ntùʼmə̀ la kə wìʼ lù lobtə ghə̀ŋ. 6Viʼi lu mvì no vəghoʼo à mò a zhiʼ gàʼà la, ‘A dìʼ tò no mò lə̀!’ Və lu lobtə nghoʼo viʼi a ji aghèn. 7Ghə̀ŋ sətsèn zhʉ̀ la və temə ghoŋ kəghaf bè zhʉ̀ la tətsentə boʼsə vì, kə ghə̀ŋ à fàyn byìʼàndo nyʉ̀ a venə diʼi lyɨ̀ kəshi mibu kənsèsə̀ kə mbi kə sə vì. 8Təloʼ tə lu nsoynə tətsentə, təfòn tə soynə tətsentə, pfensə mʉ̀ʼkə̀, jɨ̀ŋ be ku no a shì tsèm. Nyʉ̀ avenə lu nlyɨ̀ kəshi alə̀ à bu diʼ tò kənzìtə̀ kə ngəʼ ghoʼo.

9“Nkàntə̀ ghə̀ŋ diʼ ntùʼmə̀. Və lu ghaʼ ghə̀ŋ ə ku la və soʼ ə̀ ghòm ghə̀ŋ a aloʼ ntsèntə̀sə a shɨ viʼi a və soʼo nə̀ təfòyn tə byìʼì mò, ghə̀ŋ lyɨ kəshi kom ə̀ tùʼtə̀ shə̀ʼtə̀ ntɨm jùŋ ə ghom a vəwenə. 10Və diʼi shə̀ʼtə̀ ntɨm ə jùŋə ayì à viʼi təloʼ tətsèm mibu kənsèsə̀ kə vi. 11Və ghaʼ ghə̀ŋ sə ndyʉ̀ nə̀ ghə̀ŋ a kəbòʼ kə nsoʼ, kə ghə̀ŋ a nkaynə mbi la ghə̀ŋ a dyʉ̀ ə gàʼ la ghò lo. Ghə̀ŋ dyʉ̀ ghə̀ŋ gàʼà tò kənyʉ̀ kì a və a ku la ghə̀ŋ gàʼ a zhʉ ayì byìʼàndo à ko lu ngàʼà ghə̀ŋ. A lu ngàʼà kəzhwì kəŋwoʼəkə. 12Tʉʼ ayi lu kwʉ̀ʼ, wìʼ nlyɨ̀ lèmə̀ wen ghə̀ kù la və zhwi, tìʼ lyɨ̀ wàyn ghə̀ kù la və zhwi, vunə lu nlù a wèn və mpfi nə̀ vətìʼì, lyɨ̀ vəwenə ku la və zhwilə. 13Viʼi vətsèm lu bàyn ghə̀ŋ tò byìʼì mò, alì no ndò a ghə̀ lu ghaʼ tyɨm əzaʼa fa kəmwètə, Nyìngòŋ lu bwòŋsə wen.”

Nyʉ̀ fansəvə ghoʼkəvə a Jelusalèm

(Mat 24.15-28; Luk 21.20-24)

14Wìʼ a ghə̀ ndzàŋə̀ kènkə diʼì ntùʼù zhʉtə̀. Ghə̀ŋ nə̀ sətsèn yèn kəfo kə fansə kə, kə ti a kəshi à kə ko yì əndiʼ ə ti tsu, byɨsə kəshi kì, no tè ndò a Judiyà ə nyɨŋ kùʼ a kwi pfensə. 15Wìʼ ndiʼ tè a kətʉ kə ngə̀ŋ kə ghə̀ be bwènə̀ shiʼì ə kwen lyɨ̀ kəfo kətsenkə fà wen atì ngə̀ŋ. 16Wìʼ ndiʼ tè a sɨm, kə ghə̀ be à bwènə̀ pfwo əlyɨ kəgwʉ̀nə̀ kə wen fa ngə̀ŋ. 17Mətsi a mì lu mfànsə̀ nəkwoŋ à ki vi a və diʼì nə̀ təbèmtə nə̀ vi a və nyòŋsə̀ vunə vəbwaʼvə. 18Ghə̀ŋ njɨ̀mə̀ la kə nyʉ̀ a venə lù chò byɨ̀ŋ, 19byìʼàndo à lu ndiʼ a mətsì ayì, viʼi yen ngəʼ a wìʼ nko təmə̀ yen fa tʉʼ a Nyìngòŋ nshɨtə mbi ghèn əzaʼa fa luwèn, ko ndiʼ la wìʼ be lu yen kənyʉ̀ a nə̀ nakì. 20Bobo sə diʼ mu ghə̀ fàbtə̀ li mətsi mə̀ ngəʼ Amèyn a bwen a lì mu wìʼ ko lu bwòŋ. Ghə̀ fàbtə̀ mətsi a mì tò byìʼì viʼi wen a ghə̀ tsuʼ li ə bwòŋsə̀.

21A lu ndiʼ a mətsi ayì, və ngàʼà à ghə̀ŋ la, “Ghə̀ŋ yen a, Klistò ghèn a shèn! Ko la, ‘Ghə̀ yì a fàʼà!’ Kə ghə̀ŋ à byɨmə kənyʉ̀ akì a və gàʼà lì. 22Və Klistò və kənlobtə̀ bènə̀ nshyə̀ʼtə̀ sə kənlobtə̀ lu fʉ̀ a tʉʼ ayì ə ndìʼì chwitə be mwòmə̀ nyʉ̀ kanəvə ndi mwòmsə̀ əyen la vəwenə zì və dzɨŋsə viʼi vi a Nyìngòŋ sə diʼ mu ghə̀ tsuʼ li əbwòŋsə̀ lo. 23Ghə̀ŋ ntùʼmə̀! Ma shəʼtə̀ li nyʉ̀ avenə no tsèm à ghə̀ŋ mibu və lù sə nchò.

Məvì Wàyn Wìʼ

(Mat 24.29-31; Luk 21.25-28)

24“A lu ndiʼ a mətsi a ngəʼ ghoʼo ayì cho li chʉzhʉ bwensə fen. Sàŋ ko be lu mbanə. 25Mədzɨ̀ŋ a mə diʼ a kàŋ lu fəŋkə, fo tsenəvə vi a və bè dìʼ a kàŋ be shènkə. 26Adìʼ a zhʉ a ghèn a və lu yen Wàyn Wìʼ ghə̀ shiʼi a tì mbòʼsə kiʼ adyòʼ kanəghə nə̀ bayn ə̀ ghoʼoghə. 27Ghə̀ lu tɨm ntsɨ̀ŋsə ngə̀ŋ Nyìngòŋ a təshyə tə kàŋ nə̀ təshyə tə mbi tèn no tətsèm la sə jèʼè tsèntə̀ viʼi vi a Nyìngòŋ tsuʼ li əbwòŋsə̀.”

Ghə̀ŋ ziʼi kənyʉ̀ fa fəkòʼ fə kəbvèm

(Mat 24.32-35; Luk 21.29-33)

28“Ghə̀ŋ ziʼi kənyʉ̀ fa fəkòʼ fə kəbvèm. Ghə̀ŋ nə̀ nyenə no a zhʉ̀ kò a fə sə zhʉ̀ vì ghə̀ŋ ə kɨ̀ la byɨ̀ŋ sə chʉ̀. 29Kə diʼ tò ndə̀ŋndəŋ ando ghə̀ŋ lu yen nyʉ̀ avenə və lyɨ̀ kəshi. Ghə̀ŋ nè yen a lì ghə̀ŋ ə kɨ la zhʉ məvì Wàyn Wìʼ boʼsə li. 30Mà gàʼà à ghə̀ŋ nəmwèʼè la, viʼi mbyi venə zì kò və lù pfʉ̀kə mè kèn la nyʉ̀ avenə lyɨ li kəshi no tsèm. 31Kàŋ wenə̀ nse lu chò, alì no kənyʉ̀ kə ko lu kwitə fa tì nyʉ̀ venə a ma gàʼà à ghə̀ŋ lə̀.

No wìʼ ko kɨ kətsi kò zhʉ a wàyn wìʼ lu vì

(Mat 24.36-44)

32“No wìʼ muʼ ko diʼ a ghə̀ kɨ kətsi ko zhʉ a Wàyn Wìʼ lu vì. No tè ntsɨ̀ŋsə ngə̀ŋ Nyìngòŋ a kàŋ ko kɨ kò andìʼ la wàyn ə kɨ. A kɨ tò tìʼ. 33Ghə̀ŋ ntùʼmə̀ be bvʉ̀tə̀ byìʼàndo ghə̀ŋ ko kɨ zhʉ a nyʉ̀ avenə lu lyɨ kəshi. 34Kə lu ndiʼ to nə̀ wìʼ a ghə̀ sə ndyʉ̀ a jèʼ nghʉ viʼi shwèʼ wen la və nlye fo wen, no mə ndò kiʼ kətʉ kə shwèʼ wen a ghə̀ ku. Ghə̀ mù gàʼ à wìʼ a ghə̀ ti a chʉ mbàyn la ghə̀ ntùʼtə̀ lyè. 35Ghə̀ŋ ŋwʉʼ lì ə mbvʉ̀tə̀ byìʼ ando ghə̀ŋ ko kɨ̀ la tì kəbəŋ ayì vì a kəlyɨŋ kə mpfwomə mu a ntìntìn nəntʉʼʉ mu, mu ghə̀ a vì a zhʉ a nkə̀ʼ toŋ li mu, ghə̀ a vì a tsi boʼòngə̀ŋ lo. 36Ghə̀ŋ faŋ ke mbvʉtə̀, ghə̀ à sə kəblə̀ vì ə̀ yèn ghə̀ŋ, ghə̀ŋ bʉnə̀. 37Kənyʉ̀ kèn a ma gàʼà à ghə̀ŋ lə ə dyʉ̀ à viʼi vətsèm. Ghə̀ŋ mbvʉ̀tə̀.”

Currently Selected:

Mak 13: bbkDBLnt

Highlight

Copy