Mak 3
3
Yesò chʉʼ kwoŋ wìʼ a ghə̀ mpfʉ
(Mat 12.9-14; Luk 6.6-11)
1A bè nè sə ndiʼ kətsi kətsenkə, Yesò dyʉ̀ kwen a ngə̀ŋ ntsèntə̀, wutsen diʼ tsu mu kwoŋ wen tsenghə pfʉ li. 2Viʼi ghʉ ashɨ a wèn Yesò əyen la ghə̀ a chʉʼ wìʼ ayì a kətsi kə zhʉtəkə ndi vəwenə kiʼi jì ghàmə̀ wen lo. 3Yesò gàʼ à wù mpfʉ̀ kwòŋ ayì la, “chò vì a shèn.” 4Ghə̀ chò, Yesò mù bèm à vəwenə la, “Soʼ byɨmə la və ne njùŋ a kətsi kə zhʉtəkə mu mbyɨ lo, ghə̀ byɨmə la və bwoŋsə wìʼ mu və zhwi wen zhwi lo?”
Vəwenə chɨmə tò la kùʼ. 5Yesò ki kaʼsə nə̀ vəwenə alə̀ mu tin wen fwi li alì be kusə̀ nshinsə byìʼì chiʼi kətʉ vəwenə. Ghə̀ mù gàʼ à wìʼ ayì la, “Nàʼsə kwoŋ wu.” Ghə̀ nàʼsə̀ no a zhʉ kò kwoŋ ayì to. 6Və Falàsi vi nè fʉ̀ no a zhʉ kò ə̀ ghàʼa ntsèntə̀ wenə̀ viʼi Helòd mù sə shɨ̀tə̀ jì əzhwi Yesò.
Nòyn viʼi vì yèn Yesò a mbyɨ̀ mo
7Yesò wenə̀ ndzɨ̀mtə̀sə bàm wen lù dyʉ̀ a mbyɨ̀ mo Galìlì. Viʼi dzɨ̀mtə̀ dyʉ̀ nə̀ vəwenə mu və lù fa Galìlì bènə̀ fa Judiyà. 8Vətsenvə nlu fa Jelusalèm, fa Idumiya, vətsenvə tɨm ə̀ vì fa ndzèn mo Jodàn, bènə̀ fa shyə Tayà nə̀ Sidòn, ando vəwenə nzhʉ nyʉ̀ vyi a Yesò ə̀ nè. 9Yesò mù gàʼ à ndzɨ̀mtə̀sə bàm wen la sə vi nə̀ nkànuʼ ghə̀ kwen tsu a bwen a lì viʼi à mfaʼsə̀ wen, 10byìʼàndo andìʼ a lì mu ghə̀ chʉʼ li viʼi no vəghoʼo. No ndo a ghə̀ nkwaʼa mù sə fosə̀ vì tò vi ndi əkùmsə̀ wen. 11Viʼi a və nkiʼ zhwì byɨvə nyenə wen no a zhʉ̀ kò, zhwì byɨvə a vyi nè vəwenə fəŋkə a nse sə zɨmə̀ dì gàʼà la, “Wù dìʼ wàyn Nyìngòŋ!”
12Yesò ə ku soʼ à vəwenə la kə və a shə̀ʼtə̀ wìʼ a yi diʼi wen.
Yesò tsuʼtə viʼi ntɨm wen njʉ̀sə̀bò
(Mat 10.1-4; Luk 6.12-16)
13A nè sə ndiʼ a zhʉ tsenghə, Yesò kuʼ ə̀ dyʉ̀ a kwi pfen ə̀ dzàŋ viʼi a ghə̀ nkəŋə la və dzɨ̀mtə̀ kùʼ nə̀ wen. 14Ghə̀ tsuʼ vətsenvə fà vəwenə a ntìntìn njʉ̀sə̀bò la və njèʼè boʼsə wen ə̀ ghʉ̀ vəwenə a viʼi ntɨm wen la və njèʼè shə̀ʼtə̀ kənyʉ̀ kə Nyìngòŋ, 15be kiʼ àdyoʼ ədzɨ̀m shìsə zhwì byɨvə.
16Viʼi ntɨm a vyi ndìʼ Simon yì a Yesò nkù zhiʼ wen tsenghə nə̀ Bità, 17nə̀ Jems wenə̀ lèmə̀ wen ə Joyn vunə Zebedì. Yesò chʉ zhiʼ tsenghə à vəwenə nə̀ Bonelges a ghə̀ shə̀ʼtə̀ la vəwenə diʼ vunə ghʉ̀ bwanə ghə̀. 18A mbe ndìʼ Andɨ̀lò nə̀ Filib nə̀ Bàtòlòmiyà, nə̀ Matìyò, nə̀ Tomòs, nə̀ Jems wàyn Alphùyùs, nə̀ Tadiyòs, nə̀ Simon a və ndzàŋə̀ wen nə̀ Zilyòt, 19bènə̀ Judàs Iskalìyòt yì a ghə̀ nlù bàʼlə Yesò.
Yesò wenə̀ Belzibùl
(Mat 12.22-32; Luk 11.14-23; 12.10)
20Yesò nè bwènə̀ pfwo, viʼi bè vì zhùŋtə̀ à wen a mbyɨ̀ no vəghoʼo a ji a jì nko ndìʼ ə Yesò wenə̀ Ndzɨ̀mtə̀sə bàm wen sə zhɨ kəfo. 21Viʼi wen nè yèn ando ghə̀ nshwèʼè dyʉ̀ tò dyʉ̀ sə kəŋə dyʉ̀ nə̀ wen ə nyɨŋsə wen byìʼàndo viʼi nsə̀ gàʼà la tof kətʉ wen nyɨŋ li.
22Ndìʼsə̀sə təsoʼ sətsensə a sə mvi fa Jelusalèm sə̀ gàʼà tò la, “Belzibùl dìʼ à wen a bèm.” Bè gàʼà la, “Ghə̀ dìʼ alə̀ dzɨ̀mtə̀ shìsə̀ zhwì byɨvə nə̀ kədyoʼkə mu à kù fòn ə̀ zhwì byɨvə.” 23Yesò mù dzàŋ vəwenə ə̀ mò ngàynsə sətsensə à vəwenə la, “Satan lè zì ghə̀ ndzɨ̀mə̀ shìsə̀ tò Satan fà viʼi a wèn ale?”
24Viʼi mù yì ndiʼ viʼi loʼ mùʼ, ə nkiʼ kəngə̀sə̀ à vəwenə a ntìntìn, vətsenvə soynə vətsenvə kò loʼ ayi a fàŋ ke fəŋ. 25Viʼi sətsèn ndiʼ viʼi ngwàʼa ngə̀ŋ mùʼ, ə̀ nkiʼ kəngə̀sə̀ a vəwenə a ntìntìn, mu ngwàʼa ngə̀ŋ ayi a sàykə̀. 26Loʼ Satan lè sətsèn ndiʼ a ndzensə a ndzensə bwènsə̀ soynə wenə wen mu ghə̀ a fəŋ, kə ndiʼ la kənsèsə̀ kə ki kə vi li.
27Wìʼ zì kò ghə̀ lə̀ kwèn a ngə̀ŋ wù kədyòʼ ə̀ ghaʼ shì fo wen, a bwen tò la ghə̀ ghaʼ li ə̀ kwiʼ wen a mbì mi.
28“Mà gàʼà à ghə̀ŋ nəmwèʼè la àdìʼ tè mbyɨ kò a viʼi nè mu Nyìngòŋ zì ghə̀ maʼa bè màʼà no tè mbàʼ ko a vəwenə te wen tsu, 29alì mu no ndo sətsèn tè kəzhwì kə ŋwoʼəkə kò və lə̀ bè lyèsə̀ ku wen. Mu kə lì dìʼì la mbyɨ wen faŋ li à wen a kətʉ tò ghan mùʼ.” 30Yesò ngàʼà a lì byìʼàndo vəwenə ngàʼà la, “Ghə̀ kìʼ kəzhwì kə byɨkə.”
Yesò shə̀ʼtə̀ tənki tə viʼi adiʼ lì wen bènə̀ vəlèmə̀ və wen
(Mat 12.46-50; Luk 8.19-21)
31Lì Yesò bènə̀ vəlèmə̀ və wen vì tɨ̀mə a kəbəŋ ə̀ tɨ̀m la və dzàŋ wen. 32Andìʼ a lì mu nòyn viʼi ŋwʉʼʉ li nkaʼ Yesò. Vəwenə gàʼ à wen la, “Yen a! lì wù wenə̀ vəlèmə̀ vyə dìʼ a kəbəŋ kəŋ wù.”
33Yesò bwènsə̀ bèm à vəwenə la, “Lì ghom nə̀ vəlèmə̀ vwomə diʼ vəndò?” 34Ando ghə̀ ngàʼa a lì ə̀ ki kaʼsə nə̀ vəwenə mù gàʼ la, “Lì ghom nə̀ vəlèmə̀ vwomə diʼ viʼi venə. 35No ndò a ghə̀ ne kənyʉ̀ kì a Nyìngòŋ kəŋə dìʼ lèmə̀ ghom, wùwì nə̀ wulɨm à bè dìʼ lì ghom.”
Currently Selected:
Mak 3: bbkDBLnt
Highlight
Share
Copy
Want to have your highlights saved across all your devices? Sign up or sign in
