Joawh 6

Jesus iki im gitkis hiyeg

Mt 14.13; Mk 6.30; Lk 9.10

1Ariwnteke ini ig Kiyavwiye Jesus tivik manuke mahakwa Galileya. In hawata kewye mahakwa Tiberiyadis.

2 Ig manuke mahakwa, pahabu hiyeg mpiye akigbimnew mahakwa adahan igkis giharaksetni bute. Igkis atekere gihapti awaku igkis hiyap madikte gannu ku samah ig makniwe hiyeg.

3 Igme igkit danuh giwkis. Ig wagehe avitit paha waxri imuwadnene. Ayge ig batahkiswe. Igkisme gikannuhnivwi batabdawak** ayge gikak.

4Kaba danuh ahawkanavrik adahan hiyeg judeyenevwi gifetrakis adahan igkis axne muwtohyan arih. Igkis axni adahan kiyene ku samah minikwak Kiyavwiye Uhokri umahkise muwtohyan gidukwenavrikkis amekenegben adahan ig giwiwhkiswitnikis giwakutakis hiyeg ejituyenevwi.

5Ku samah ig Kiyavwiye Jesus betnene ayge, ig sarayh givegi warikwit. Ig hiyap neras pahabunene hiyeg kuruw gimkanit. Ig hiyapni hene, ig awna git Filip:

— Kit wixwiy isim im adahan gaxnikis?

6Ig awna inakni hene git adahan gihikekten. Ig kuwis hiyak ku pariye ig keh.

7Igme Filip kaytwa giwn:

— Amawka wixwiy sarayh ka aynsima karukri mpiy pimavut madikawku madikwa (200) karukri. Metakwa nikwe igkis muwavwite ax aritnanyumni ariwntak.

8Igme pahavwi gaytakis gikannuhnivwi kewye Andre, ku pariye Simawh Pedru gisamwi, ig timapni hene, ig awna git Kiyavwiye Jesus:

9— Ay pahavwi bakimni ay in. Ig kadahan pohowku akebi bugut kehka akak fahhin kewye “sevada”. Hawata ig kadahan piyana akebi im nopsanyovwi masaraku. Heneme in ka ariknawnema gitkis awaku ka aynsima hiyeg.

10Igme Kiyavwiye Jesus awna gitkis:

— Wani neras hiyeg batahkiswa.

Ayge barewye amatap adahan igkis batenne atere. Igkis hiyeg hiyapni hene, igkis batahkiswebdi atere. Igkis ka aynsima hiyeg. Awaykemninen pukuhka kaba danuh pohowku mil gikebikis (5.000).

11Ayteke nikwe ig Kiyavwiye Jesus iwe ini bakimni gibuguta. Ig kabayha Kiyavwiye Uhokri adahan ini bugut. Ayteke ig ibekhepni givuwiwkis gikannuhnivwi. Igkisme ibekhepni givuwiwkis neras batebdebdihpiye. Ku samah ig keh akak bugut ig keh hawata akak im. Ig ibakhasepni. Igkisme hiyeg kidis ku samah gimawkankis niwntak.

12Igkis ax kabihribdave. Ig Kiyavwiye Jesus hiyapni hene, ig awna gitkis:

— Ahiwvinay gimanakis asemne adahan yuma aynesnima biyukne.

13Igkisme ahiwavepni. Igkis kivunse ka aynsima panye, madikawku akebi akak pisaya arawna (12) akak ini pohowkunene bugut asemne.

14Neras hiyeg hiyapni hene ku Kiyavwiye Jesus kehe ini annut giwtrikkis, igkis awna:

— Oo! Ner igyewa Uhokri gawneve ku kamin amekene Moís kinetihwa minikwak, ku ig aytanek amadgat inin.

15Igkis givewkankis mpiksaptihpig adahan ig humaw gikivarakis. Igme Kiyavwiye Jesus hiyapni hene, ig tivik giwkis. Ig manuke avitit paha waxri imuwadnene akiw, ig pahavo.

Jesus wew ahakwew un

Mt 14.22; Mk 6.45

16Aygete kuwis, gikannuhnivwi muhuke tahan akigbimnat mahakwa.

17Igkis awna:

— Kuwis aygete. Uyay diyuhe pahabakat avitit paytwempu Kafarnawh.

— Uyay.

Ayge igkis katapte amadgat gihmunkis. Misanpi gawkis, ig Kiyavwiye Jesus kote danuhte gitkis. Igkis hiyapni hene, igkis tivik.

18Pahaye adahan mayg kamayghew. In kannikase paraw.

19 Igkis puwehnene ativut bobo piyawakad adahan pimavut madikawku madikwa (200) iwanti aviyukan. Pahaye adahan igkis hiyap Kiyavwiye Jesus waywe ahakwew un. Igkis ka hiyakgi ku pariyene ig. Ig aytweni kennesa arimkat gihmunkis. Igkis hiyapni hene, igkis avisasewbet gibohri.

20Igme awna gitkis:

— Nahnewa ay. Ka yi muwaka avis.

21 Igkis timapni inakni giwn hene, igkis batek ka aynsima. Igkis amavig amadgat wahmun. Aynewa igkis danuh atere ku kit umawkan.

Hiyeg ivegva Jesus

22Hewke akiw ka aynsima hiyeg misekwevye aynte pahabak. Igkis hiyakni ku amaka pahamkuwa umuh ayge. Igkis hiyap gikannuhnivwi tivikwiye gumadga nore umuh, igme Kiyavwiye Jesus ka atak gihaptikis. Nikwe givewkankiskam ku Kiyavwiye Jesus misekwe ayge gimunkis. Bawa kawa. Ig ayge gikakkis gikannuhnivwi.

23Ayteke nawenyevwi hiyeg danuh atere pahabakat amadga gihmunkis. Igkis ariwntak paytwempu Tiberiyades. Igkis danuh atere ku kiney amaka Kiyavwiye Jesus keh annut ig kabayha Kiyavwiye Uhokri adahan gimanakis, madikte hiyeg axnekuye niwntak.

24Neras hiyeg aygnenevwi hiyapni hene ku Kiyavwiye Jesus yuma ayge akiw, ine gikannuhnivwi yumahwata ayge, igkis awna:

— Kibeyne. Ay nawenyewa umuh akiw. Uyay ivegve Kiyavwiye Jesus tahan pahabakat avitit paytwempu Kafarnawh.

— Uyay.

Igkis katapte amadgat gihmunkis neras hiyeg danuhpenevwi.

25Igkis manuke mahakwa. Igkis danuh atere avitit Kafarnawh. Ayge igkis ute Kiyavwiye Jesus. Igkis awna git:

— Kiyavwiye, aysawneki pis danuhe atan? Usuh ivegvep muwapuw.

26Igme awna gitkis:

— Yis ka ivegvan awakuma nannuh keh yis hiyak ku pariyene nah. Kawa. Yis ivegvan ininewa awaku ku samah yis axe yimana kabiha. Ini yis aharit akiw.

Jesus kewa umanabe ku pariye keh wis aymuhwa adahan avanenekwa

27Ayteke ig awna gitkis akiw:

— Ka yi muwaka mpiksaw aharit yimana ku pariye kane dehwevyema yimun. Mpiksawnay aharit ini yimana ku pariye dehwevye adahan avanenekwa, ku pariye keh yis aymuhwa adahan avanenekwa. Nah, ku pariye wageswe awayg amadgaya inin, nahnewa iki yit akebi ini yimana. Kuwis Niguh Uhokri ekke ku ig awahkisun adahanikwa ini.

28Igkis hiyeg timapni hene, igkis awna git:

— Mmahpa usuh keh nikwe adahan usuh kehne Kiyavwiye Uhokri gibetki?

29Igme Kiyavwiye Jesus kaytwa giwnkis:

— Nah akkite yit ku pariye Uhokri gibetki. Gibetki ini adahan yis kamaxwa nuvitit nah gawahkisni.

30Igkisme awna git:

— Akkanaba pannu wotuh akiw adahan areketni pidatni wotuh adahan usuh kamaxwa pivitit. Ba pis ik adahan pis keh pahat annut ke amekene Moísbe?

31Minikwak amekenegben ax gimanakis kewye “maná” aynte amadga amatap. Uhokri gannasan awna:

— Ig iki gitkis gimanakis ayta inutak.

Ba ik adahan pis hawata iki wotuh umana ayta inutak?

32Igme Kiyavwiye Jesus kaytwa giwnkis:

— Ka ignema amekene Moís iki ini gimanakis inutak. Ig Niguh ignewa ikepni gitkis. Kurime ig akaka yit yimana ku pariye inyewa inuriktak. Henewatbaki ig iki.

33Ini yimana giwntekne Uhokri in ayta inuriktak adahan hiyeg amedgenevwi inin aymuhwa adahan avanenekwa.

34Igkisme kaytwa giwn:

— Kiyavwiye, iknaba wotuh akebi ini umana takunipti.

35Igme Kiyavwiye Jesus kaytwa giwnkis:

— Nahnewa yimana ku pariye keh yis aymuhwa adahan avanenekwa. Ku pahavwi amavan, igi bateknek ke pahavwibe ku pariye ax kabiha. Ig ka mativwati abet gihiyekemni akiw. Ku pahavwi kamaxwa nuvitit, ig ka arabyuti abet gihiyekemni akiw. 36Henewa in ku samah nah awna: “Yis kuwis hiyavun heneme yidukwenewa yis kote kamaxwate nuvitit.”

37Ignesme ku pariye Uhokri gikan nutuh igkis kamaxwa nuvititnek. Igkis ku pariye kamaxwevwi nuvitit nah ka tukuhgikisnek aynesnima.

38Nah ayta atan inuriktak ka adahanma kehnema nubetki, heneme adahan nah kehne nawahkisten gibetki.

39 Nah akkite yit ku pariye nawahkisten gibetki. Ini gibetki adahan nah ka biyuksa pahavwinema ku pariye gikan nutuh, heneme adahan nah gikannikasetnikis madikte amaksemni hawkrinek.

40Ini gibetki adahan ku pariye hiyeg iveg numkat ignes kamaxwevye nuvitit nah gikamkayh, igkis aymuhwa gimun Uhokri adahan avanenekwa. Ini gibetki adahan nah gikannikasetnikis amaksemni hawkrinek.

41Igkis judeyenevwi giwewkistenkis timapni hene, igkis minimnihekbet pawtak gimin Kiyavwiye Jesus mmanawa ig ikewne ku ignewa umana inuriktekne.

42Igkis awna:

— Mmahki ig awna inakni iwit hene? Ig ikawvari ku ig inurikyene. Ka ba pis hiyap ku ner he amekene Josenen gikamkayh? Usuh hiyak gig gukak ginag. Ig ka inurikyenema.

43Ig Kiyavwiye Jesus hiyapni hene, ig awna gitkis:

— Ka ba yi minimnihak pawtak hene numinuh.

44Ka ik adahan pahavwinema hiyeg kamaxwa nuvitit ku ka ignema Niguh nawahkisten kinistig nudahan. Ku pahavwi timap giwn, ku ig kamaxwa nuvitit, nikwe nah kannikasig amaksemni hawkrinek.

45In hawata ku samah Uhokri gawnevevu pitatyevwi giwnkis. Igkis awna:

“Igwa Kiyavwiye Uhokri humaw gikannuhtenkis madikte hiyeg.”

Madikte hiyeg ku pariye timap Niguh giwn ku pariye iha inakni giwn, igkisnewa ku pariye kamaxwenevwi nuvitit.

46Hiyeg amadgayavu inin ka hiyapti Niguh. Nahnewa gihivetni mmanawa nah ayta giwntak.

47Ku pahavwi kamaxwa nuvitit, nikwe ig aymuhwa gimun Uhokri adahan avanenekwa. 48Nahnewa yimana ku pariye inyewa keh yis aymuhwa. Ihanabay inakni nuwnuh. Henewatbaki nah.

49Minikwak yahawkrivwi amekenegben ax nor gimanakis kewye “maná” aynte amadga amatap. Heneme igkis ka aymuhwa adahan avanenekwatma. Ariwnteke ini igkis miyarap. 50Nahme kinetihwa amin nawenyewa yimana ariw ignes gimanakis. Ini yimana inuriktekne. Ku pahavwi ax ariwntak ini gimana, ig ka miya adahan avanenekwatma.

51Nahnewa ini yimana inuriktekne ku pariye inyewa keh hiyeg aymuhwa. Ku pahavwi ax nuwntak, ig aymuhwa gimun Uhokri adahan avanenekwa. Ini yimana ku pariye nah akki yit, innebaki nihuh ku pariye nah sigkebdihkisnek gidahankis madikte hiyeg amedgenevwi inin kahadbe ignes aymuhwa gimun Uhokri adahan avanenekwa.

Henewatbaki ig Kiyavwiye Jesus awna.

52Igkis judeyenevwi giwewkistenkis timapni hene, igkis awnebdi pawtak akak gihawnakis. Igkis awna:

— Mmah akaka wotwiy gih adahan wixwiy ax?

53Ig Kiyavwiye Jesus hiyapni hene, ig awna gitkis:

— Ku yis ka ax nihuh, nah ku pariye wageswe awayg amadgaya inin, ku yis kawnata higap numiguh, nikwe yis ka aymuhwa gimun Uhokri. Ihanabay inakni nuwnuh. Henewatbaki in.

54Henneme ku pahavwi ax nihuh, ku ig higap numiguh, igi aymuhwanek gimun Uhokri adahan avanenekwa. Nahme kannikasig amaksemni hawkrinek.

55Nihuh inyewa keh hiyeg aymuhwa. Numiguh hawata keh hiyeg aymuhwa akiw.

56Ku pahavwi ax nihuh, ku ig higap numiguh, amun ini nikwe igi humaw pahavwiwa nukakuh. Ig ay nuvituh. Nahme ay givit.

57Niguh ku pariye nawahkisten ig dehetniki akivara adahan avanenekwa. Nah uti nudehetni giwntak. Hawata ku pahavwi ax nuwntak, ig uti gidehetni nuwntak.

58 Inneki keh nah awna yit ku nahnewa yimana inuriktekne. Nah ka kema neras amekenegbenma gimanakis ku pariye igkis ax heneme igkis miyarap. Ku pahavwi ax nuwntak, ig aymuhwa adahan avanenekwa.

59Inakni iwit ig Kiyavwiye Jesus awna ariku judeyenevwi gileglisakis ayge Kafarnawh.

Ka aynsima hiyeg miniwvi giw Jesus

60Ka aynsima gaytakis neras timepnevwi Kiyavwiye Jesus giwn igkis timapni inakni giwn hene, igkis awna:

— Inakni giwn mahiko. Mmahpaki wis pukuhpin?

61Ig Kiyavwiye Jesus kateksan avit giyakni ku samah igkis minimnihekbet hene. Ig hiyapni hene, ig awna gitkis:

— Mmah inakni nuwnuh mmah in mahiko yit?

62Henneme aysawnemenek in ka mahiko yit akiwnek. Ku aysaw yis hiyavun Nah, ku pariye wageswe awayg amadgaya inin, nah diyuhe inurikut akiw, avim ini in ka mahiko yit.

63Ku wis ax ihti, ka innema keh wis aymuhwa adahan avanenekwa. Ignewa Uhokri Gitip ay uvit, ignewa ku pariye keh wis aymuhwa gimun Uhokri adahan avanenekwa. Kaksa nah awna yit patuwesbunka iwit giwntak Uhokri Gitip. Ku yis iha inakni nuwnuh, in keh yis aymuhwa adahan avanenekwa.

64Yaytakme ka iha nuwnuh.

Ig Kiyavwiye Jesus awna inakni hene, mmanawa ayipa ig hiyakni kuwis ku pariye hiyeg ka ihpa giwn. Ig hawata hiyak ku pariye gikamaykiswitni gitkis givetunyavu.

65Nikwe ig awna:

— Ignewa Uhokri Gitip ku pariye keh wis aymuhwa gimun Uhokri adahan avanenekwa. Inneki keh nah awna yit kaksa: “Ka ik adahan pahavwinema hiyeg kamaxwa nuvitit ku ka ignema Niguh kinistig nudahan.”

66Avim ini ka aynsima gikannuhnivwi awna:

— Inakni giwn amin axne gih, inakni mahiko adahan wis pukuhpin.

Ayge nikwe igkis tivik giw. Igkis ka wew gikak akiw.

Jesus gikannuhnivwi ka miniw giw

67Ayteke ig Kiyavwiye Jesus hiyapni hene, ig awna gitkis gikannuhnivwi madikawkunene gikebikis akak piyananene gawnakis (12). Giwn:

— Mmah yis hawata tivikere nuwhu?

68Igme Simawh Pedru kaytwa giwn:

— Kiyavwiye, karimkanitva usuh tiviknek? Pisnewa awna iwit ku pariye akki wotuh adahan ku samah usuh aymuhwa gimun Kiyavwiye Uhokri adahan avanenekwa.

69Usuh kamaxwa pivitit. Usuh hiyak ku pis Uhokri giwatni barewvitye.

70Igme Kiyavwiye Jesus awna gitkis:

— Nah kaniye yis madikawkunene yikebi akak piyana yawna (12) adahan yis wewne nukakuh. Heneme ay pahavwi yaytak ig wavitye ay givit.

71Ig awna inakni gimin Judas Iskariyotismin, ku pariye amekene Simawh gikamkayh. Mmanawa ig Judas Iskariyotismin gaytakis neras madikawkunene gikebikis gikakkis piyananene gawnakis (12) heneme ig gikamaykiswitninek Kiyavwiye Jesus gitkis givetunyavu.

Currently Selected:

Joawh 6: pluPB

Highlight

Copy