Lúkas 15
15
Muwtoh biyukwiye
Mt 18.12
1Ka aynsima hiyeg ladwan gikakkis nawenyevwi hiyeg ku pariye ikaka kane kibeynevwima hiyeg igkis danuh atere adahan igkis timepnes giwn.
2Neras farizewkis gikakkis neras kannuhekevutnevwi amin amekene Moís gikumadukan igkis hiyapni hene, igkis minimnihekbet gimin Kiyavwiye Jesus. Igkis awna:
— Ner hiyeg darihwak gikakkis hiyeg kane kibeynevwima.
3Ig Kiyavwiye Jesus hiyapni hene, ig awna gitkis pahat iwit patuwesbuhka. Giwn:
— Mmahkay yis asene neras hiyeg? Igkis ka gavigikisima nutuh. Igkis kewa muwtoh biyukavyebe nutuh.
4Ku pahavwi yaytak kadahan ka aynsima givig muwtoh, madikawku madikwa (100) gikebikis, ku pahavwi gaytakkis biyuke, nikwe ig ikise givig akebyuvwi (99) ayge amadga amatap, ig ta ivegvevye givig biyukwiye. Ig ivegvig, ivegvig, he ku aysaw ig utevgi.
5Ig utevgi, ig hiyuhpig ta giteyapminat mmanawa ka aynsima ig batek.
6Ig tivik, ig danuh ta givinwat. Ayge ig pahadguh gikagmadavu gikakkis gihumwayevwi. Ig awna gitkis: “Uyay batek payak nukakuh. Mmanawa nah kuwis ute nuviguh biyukwiye.”
7Hawata akiw aynte inurik ka aynsima batekka ayge ku aysaw pahavwi taraksevye wages gihiyekemni. Ayge igkis pi batekte akak ku samah pahavwi taraksevye wages gihiyekemni mpiya ku samah igkis batek gikakkis kaba madikawku madikwa (99) gikebikis ikewnevwi waditye.
Karukri biyukwiyo
8Ayteke ig Kiyavwiye Jesus awna pahat iwit patuwesbuhka akiw adahan ekkene ku samah hiyeg ka avigikisima git. Ig awna:
— Ku pahavu tino yaytak kadahan madikawkumku karukri, ku pahamku biyuke guw, eg hakis gabukra, eg sagahakuh guvin, eg ivegvig kabayntiwa he ku aysaw eg utevgu.
9Ayteke ku aysaw eg utevgu, eg humak gukagmadavu gikakkis guhumwayevwi. Eg awna gutkis: “Uyay batek payak nukakuh mmanawa kuwis nah ute nukakura biyukwiyo.”
10Hawata akiw ka aynsima batekka gimunkis Uhokri gihiyegavu ahj ku aysaw pahavwi taraksevye wages gihiyekemni.
Awayg gikamkayh biyukwiye
11Ayteke ig Kiyavwiye Jesus awna pahat iwit patuwesbuhka akiw adahan ekkene ku samah hiyeg ka avigikisima git. Ig awna:
— Minikwak pahavwi awayg kakamkayh piyana gikebikis.
12Pahay hawkri gikamkayh butye awna ta git gig: “Pa, nah muwaka pis iki nutuh abusku pewkanbet ku pariye pis ikeviye nutuh. Nah muwaka pis ikepni nutuh kurinewa.” Ig gig timapni hene, ig ibekhe gewkanbet gitkis gikamkayuvwi.
13Nikwenewa gikamkayh butye piyuke gidahan gewkanbet madikte. Ig ahiwe akakuravig madikte kuwis, ig awna: “Nah peswite givinekutak niguh.” Ig tivik ta avitit paha waxri ku pariye piyawakad. Ig danuh atere, ig mahayakemnihwenenwa, ig sarayhnenenwa gikakura.
14Ayteke gikakura madike kuwis, mihetniki biwhe avitit ini waxri. Ig kamaxe mativwa ka aynsima nikwe. Ig yuma ariknawnema gimun.
15Ig hiyapni hene, ig aya gannivwi ta git pahavwi hiyeg aygnene avit ini waxri. Igme awahkiswig ta wasamdakat adahan ig avuriwne givigvu pakirempu.
16Ig danuh atere, ig mativwe mpiynevevye he ig axkere pakir gimanakis. Heneme ka ikaka git ariknawnema.
17Amun ini ig ivegminene gihiyekemni ig hawkamnihwa ariw. Ig awna: “Niguh gibukvig ka aynsima axka gidahankis. Yuma ariknawnema muwekne gitkis. Nahme ay nah hiyepne mbeyne, nah me miya awaku mativwamet. 18Nah atak hikekwate diyuhe git niguh. Nah kinetihwate gikak, nah awna git: ‘Pa, nah tarakse gikak Kiyavwiye Uhokri. Nah tarakse pikak hawata. 19Nah ka kis adahan pis kanumun pikamkayh akiw. Uya amnihun amavan adahan nah humaw he pibuknenwa.’”
20Ig awna inakni, ig ahegbetewvi, ig tivikwiye ta gimkanit gig. Piyawak ig gig sarayh givegi, ig hiyap gikamkayh nehmnik. Ig amnihpig ka aynsima. Ig kayah avit giyakni. Ig sigis piyawakad ta gitivut gikamkayh. Ig aytihpig akak madikte gibetki. Ig ugiswig. Ig ayhpokig.
21Igme gikamkayh awna git: “Pa, nah tarakse gikak Kiyavwiye Uhokri. Nah tarakse pikak hawata. Nah ka kis adahan pis kanumun pikamkayh akiw.”
22 Inme inakni gikamkayh giwn ka ariknawnema ta git gig. Nikwe ig awna ta gitkis gibukvig. Giwn: “Iwawhawnay. Ewknay nudagmanvit ku pariye pi barewtenene. Kawihkisnay givitit. Kawihkisnay akawakti ta giwakurit. Kawihkisnay kasavat ta gikugkavrikut.
23Ataknay kamax ner pak akamkayh ku pariye aynengarudi. Igi yis umah adahan wixwiy fetya. Uyay batek.
24Mmanawa ner nukamkayh ig ke wotbe ig miyarevyebe nuwhu kuwisbe. Kurime ig ay numunuh akiw. Ig ke wotbe biyukwiyebe nuwhu. Kurime ig utepka akiw.” Ayteke nikwe igkis kavusa fetya.
25Nikwenewa avim ini gikamkayh eggutye aynte wasamdak. Ig peswiye ta givinwat. Ig hiyukamin ta arimkat givin kuwis, ig timap arigman ayteke givinwatak. Ig timap hiyeg kaynekis ayteke.
26Ig timapni hene, ig humeke pahavwi gig gibuk. Ig awna git: “Mmahkay ku avim inin?”
27Igme gibuk kaytwa giwn: “Awaku pisamwi diyuhe avim inin hawkri. Pig ka aynsima batek. Ig umahkise pak akamkayh aynengarudi awaku ku samah ig ute gikamkayh makniw akiw.”
28Ig eggutye timapni hene, ig dagawne. Ig awna: “Ku hene nikwe nah ka parak uvinekut akiw.” Ig tabirasew ayge kabaywak, igme gig pese atere gimkanit adahan ig gikinistetni atere.
29Igme kaytwa giwn: “Pa, pikehni ka wadit. Ka aynsima kamukri nah kannivwiye pidahan. Nah ka taraksa pahatnema pikumadukan. Hiyaksa pisme ka ikiwa nutuh pahavwinema kabrit adahan nah fetya gikakkis nukagmadavu.
30Igme pikamkayh ku pariye he sarayhpinen pikakura gukakkis tinogben powkemnavyo, pis umahkise pak akamkayh ku pariye aynengarudi gidahan. Mmahki inere?”
31Igme gig hiyapni hene ku samah ner gihiyekemni hene, ig kaytwa giwn: “Nukamkayh, pis ay numunuh avanenekwa. Madikte ku pariye nudahan in pidahanwata.
32Heneme in kabay adahan wixwiy fetya awaku ku samah pisamwi diyuhe wotwiy akiw. In kabay wixwiy batek gidahan mmanawa ner pisamwi ig ke wotbe ig miyarevyebe wowiy kuwisbe. Kurime ig ay umunwiy akiw.”
Currently Selected:
Lúkas 15: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
