Lúkas 6

Jesus samdi akivara

Mt 12.1; Mk 2.23

1Ayteke samdi abet ig Kiyavwiye Jesus tivik mpiye amadgew pahak was gikakkis gikannuhnivwi. Igkisme gikannuhnivwi matise fahhin ariw ayge igkis mariste amar igkis axwig.

2Neras farizewkis hiyapni hene, igkis awna ta gitkis:

— Mmahkay yis ka iha amekene Moís gikumadukan? Yis kannivwiye abet samdi.

3Igme Kiyavwiye Jesus kaytwa giwnkis:

— Mmah yis kote ivegbohate Uhokri gannasan amin ku pariye amekene Davi gikehni? Minikwak ig mativwe payak gikakkis gihaptiyevwi. 4Nikwe ig pareke ta arikut Uhokri Givin. Ayge ig iwe ini bugut ku pariye ekkepka ta givetunat Uhokri, ig axwin. Hawata ig ikepni ta gitkis gihaptiyevwi. Amekene Moís gikumadukan awna ku muwvegnenwa kis adahan igkis ax ini bugut. Igkisme axwin heneme igkis ka taraksa mmanawa ig muwveg amnihpigkis.

5Ayteke ig Kiyavwiye Jesus awna ta gitkis akiw. Giwn:

— Nah, ku pariye wageswe awayg amadgaya inin, nahnewa samdi akivara.

Jesus makniwa pahavwi awayg kidubetwiye giwak

Mt 12.9; Mk 3.1

6Ariwnteke ini abet nawenyewa samdi akiw ig Kiyavwiye Jesus lammesya ariku judeyenevwi gileglisakis. Ayge ig kannuhne hiyeg. Pahavwi awayg ayge kidubetwiye giwak kihehaptak.

7Igkisme neras kannuhekevutnevwi amin amekene Moís gikumadukan gikakkis neras farizewkis igkis avuriw Kiyavwiye Jesus kabayntiwa adahan igkis hiyap ba ig piyihak abet samdi. Mmanawa igkis muwaka uti gitaraksan akak amekene Moís gikumadukan adahan igkis gikamyehpitni.

8Igme Kiyavwiye Jesus hiyak ku pariye abet gihiyekemnikis. Ig hiyapni hene, ig awna ta git ner awayg kidubetwiye giwak. Giwn:

— Kannikaw. Ba ayta idiswa atan.

Igme timapni hene, ig kannikew ig idiswe atere.

9Ayteke nikwe igme Kiyavwiye Jesus awna ta gitkis hiyeg. Giwn:

— Pariye amekene Moís gikumadukan aya wotwiy adahan ku pariye wixwiy keh abet samdi? Ba adahan wixwiy kehne kabayka ba kawk, ba adahan wixwiy kehne mbayka? Ba adahan wixwiy amnihne hiyeg ba kawk, ba adahan wixwiy umahkisne hiyeg?

10 Ig awna inakni, ig ivegvusa madikte hiyeg ayge. Ayteke ig awna ta git ner awayg kidubetwiye giwak. Giwn:

— Tarak piwak.

Igme tareke giwak. Aynewa giwak makniw.

11Neras hiyeg givetunyavu hiyapni hene, igkis ka aynsima dagawne. Gitkis ig taraksevye hiyeg. Nikwe igkis ahegbete ginetnikis pawtak adahan ku samah igkis keh gikak Kiyavwiye Jesus.

Jesus kaniybeta giwatnivwi (12)

Mk 3.13

12Ayteke ariwnteke ini ig Kiyavwiye Jesus tivik ta avitit paha waxri imuwadnene adahan ig piriyepkewne. Hewke tiyegem ig piriyepkewne git Uhokri ayge.

13Hewke akiw ig pahadguhe gikannuhnivwi. Igkisme danuh atere git. Ayge nikwe ig kaniybete gaytakkis madikawku gikebikis gikakkis piyananene gawnakis (12). Ig awna gitkis:

— Kuri, yisnewa nuwatnivwi.

14Ig kaniy: Simawh ku pariye ig kuwis sarayh giw Pedru, Simawh gisamwi Andre, amekene Tiyagumni, Joawh, Filip, Bartolomew,

15Matews, Tome, Tiyagu, ku pariye amekene Alfew gikamkayh, Simawh Zeloti,

16Judas ku pariye amekene Tiyagumni gisamwi, Judas Iskariyotismin ner kamaykistinene Kiyavwiye Jesus.

Jesus makniwa ka aynsima hiyeg akiw

Mt 4.23; Mk 3.7

17Pisenwa igkis muhuke payak gikak Kiyavwiye Jesus. Ig Kiyavwiye Jesus misekwe amun asababan. Ka aynsima gikannuhnivwi ayge ganwa. Ayteke pahabunene hiyeg kabubuknene danuh atere git. Igkis ayta aytontak Judeyamnawtak, aytontak Jerusalémtak, aytontak akigbimnatak parahwokwa ku kiney paytwempu Tiru akak Sidoh.

18Igkis ayta timepne Kiyavwiye Jesus giwn. Igkis ayta adahan ig makniwgikis ariw gikahrikis. Neras ku pariye kiyimwihpika gavit wavitye igkis hawata danuh atere. Igme Kiyavwiye Jesus makniwavevgikis.

19Madikte hiyeg ayge mpiksewnekuye adahan gidaxten mmanawa Uhokri gidatni pes givititak in keh igkis makniw.

Jesus akki ku pariye hiyeg uti kabaykanek

Mt 5.1

20Ayteke ig Kiyavwiye Jesus sarayh givegi ta gimkatkis gikannuhnivwi. Ig awna gitkis:

— Ka aynsima kabayka ay yidahanek yis ku pariye ikewnevwi yumanene yawaygi yiwnteknewatma. Ayge nikwe yis kawih Uhokri gikumadukanek.

21— Ka aynsima kabayka ay yidahanek yis ku pariye kayah ku pariye yimawkanitnene giwntak Uhokri kuri akak inin ku samah yis aynete amadga inin. Ayge nikwe ig iki yitnek madikte ku pariye yis aharit.

— Ka aynsima kabayka ay yidahanek yis ku pariye sukanevwi yikantak gidahan Uhokri kuri akak inin ku samah yis aynete amadga inin. Ayge nikwe yis batekyenek.

22— Ka aynsima kabayka ay yidahanek ku aysaw hiyeg yamiyhetni avatra ku samah yis nuhiyegavu nah ku pariye wageswe awayg amadgaya inin. Ku aysaw igkis tukuhwe yiw, ku aysaw igkis arewhatay, ku aysaw igkis mbayha yiw nuvatra, ka sam. Yis uti ka aynsima kabayka nikwe.

23Bateknabay yinaktin avim ini ku aysaw yis hiyepne mbeyne nuvatra. Bateknay ka aynsima mmanawa yis uti yitiwni kibeynewanek aynte inurik. Mmanawa henewa ignes Uhokri gawnevevu pitatyevwi hiyapkiska mbeyne ta gitkis gavitkis amekenegben.

Jesus akki ku pariye hiyeg uti mbaykanek

24— Heneme, akayih, ka aynsima mbayka ay yidahanek yis ku pariye ikewnevwi yuma arikna muwekne yit ku samah yis aynete amadga inin. Yis ka uti ariknawnemanek akiw ariw ku pariye yis kuwis kadahan.

25— Akayih. Ka aynsima mbayka ay yidahanek yis ku pariye ka kayah yimawkanitnene giwntak Uhokri kuri akak inin ku samah yis aynete amadga inin. Aysawnemenek yis kayahninek.

— Akayih. Ka aynsima mbayka ay yidahanek yis ku pariye batekyevwi kuri akak inin ku samah yis aynete amadga inin. Aysawnemenek yis ka batek akiw. Yis suka yikantaknek.

26— Akayih. Ka aynsima mbayka ay yidahanek ku aysaw hiyeg madikte kabayha yiw. Mmanawa hiyeg amadga inin ka hiyak hawkri. Igkis kewa hiyeg amekenegbenbe. Mmanawa igkis amekenegben kabayha giwkis hiyeg ku pariye ikawnamahkis ke wotbe ignes Uhokri gawnevevube bawa ignes ka giwntakma Uhokri.

Bateknabay gikakkis yivetunyavu

Mt 5.38,43; Lk 23.34; At 7.60; Ro 12.14

27— Yisme ku pariye timepnevwi nuwnuh, amawka ku yihiyekemni nawenyewa ariw neras gihiyekemnikis. Ka ba yi amiyha yivetunyavu heneme bateknabay gikakkis yivetunyavu. Amnihnabay neras yamiyhetnivwi.

28Kabayhanabay hiyeg ku pariye yibiytehetni. Piriyepkawnabay gidahankis hiyeg ku pariye yimahivwihtni.

29Ku pahavwi biwhbokep, pi kabayte pis wages pahabakya adahan ig biwhbokap pebkakte mpinekata pis dagawnaw git. Ku pahavwi xuwehe pidagmanvit, ka muwaka kavigsa pisimsa git.

30Ku pahavwi makehe arikna pit, ikepniba git. Ku pahavwi xuwehe pewkanbet, ka muwaka puwimahgi adahan ig diyuhkisni pit.

31Amawka yis kabay gikakkis madikte hiyeg hawata ku samah yis muwaka igkis kabay yikak.

32Ku yis amnih nerasnen ku pariye yamnihten nawenevwime yis ka amnihgikis, mmah yis yivewkan Uhokri kabayhay adahan ini? Kawa. Ig ka kabayhay adahan inima. Mmanawa madikte hiyeg kehni hene. He hiyeg taraksavye amnih neras ku pariye gamnihtenkis.

33Hawata ku yis keh kabayka gikakkisnen hiyeg ku pariye kehnevwi kabayka yikak, nawenevwime yis ka keh kabayka gikakkis, mmah yis yivewkan Uhokri kabayhay adahan ini? Kawa. Ig ka kabayhay adahan inima. Mmanawa madikte hiyeg kuwis kehni hene. He taraksavye keh.

34Hawata ku yis sunapkis gitkisnen hiyeg ku pariye diyuhkis yiwak gitkisme nawenyevwi yis ka sunapkis gitkis mmah yis yivewkan Uhokri kabayhay adahan ini? Kawa. He taraksavye sunapkis ta gitkis hiyeg taraksavye ku pariye diyuhkis giwakkis.

35Ka ba yi kehni hene. Bateknabay gikakkis yivetunyavu. Amnihnabay madikte hiyeg. Sunapkisnabay gitkis ka waha awenyan. Ayge nikwe Uhokri katiwnihyi kabayntiwanek. Yis humaw Uhokri inurikyene gikamkayuvwi awaku yihiyekemni kewa gidahanbe mmanawa ig amnihne hiyeg kane kibeynevwima ku pariye kane kabayhig.

36Amnihnabay hiyeg hawata ku samah ig Wigwiy amnihgikis.

Ka ba yi ikiy pahavwi ku ig ka kibeynema

Mt 6.1; Ro 2.1, 14.1; 1Ko 4.5; Tiy 4.11

37— Ka ba yi ikiy pahavwi ku ig ka kibeynema. Ayge nikwe Uhokri kawnata ikayi ku yis kawnata kibeynevwima. Ka ba yi awna gimin pahavwi ku ig ka wadityema. Ayge nikwe ig Uhokri kawnata awna yimin ku yis kawnata wadityevwima. Bayahminabay hiyeg ariw gitaraksankis yikak. Ayge nikwe ig Uhokri bayahminay ariw yitaraksan hawata.

38Ikinabay ta gitkis hiyeg. Ayge nikwe ig Uhokri ikiy yit hawata. Ig kivunsay akak kabayka mpiynevevye he yis ka ikwa adahan amavin akiw. Ig ke wotbe ig kurukwin ig sassahni he in hehbetwi. Ku yis ikiy ka aynsima gitkis hiyeg, ayge nikwe ig Uhokri diyuhkis yit ka aynsima kabayka akiw.

39Ayteke ig Kiyavwiye Jesus awna pahat iwit patuwesbuhka ta gitkis. Giwn:

— Hiyeg amedgene inin ka hiyak hawkri. Ka ba yi kannuhwa gitkis. Ignes kewa motavyebe abet gihiyekemnikis. Ka ik adahan pahavwi awayg motviye huwitha giyaki motviye. Ku ig huwitig, igkis piyamate tuguhenek.

40 Kannuhwanay giwntak ignewa Uhokri. Yuma hiyeg pi kannuhte giw gikannuhten. Heneme ku aysaw ig kuwis kannuhwa git, ig mataka gikannuhten gihiyekemni.

41Mmahki pis avuriw pikebyi gitaraksan? Pis ke wotbe kiyimwihwa akak paha iget nopsesabe ay giwtrik pikebyi. Pisme ka hiyaknima ba pahat ahadma nopsadnene ay piwtrik.

42Ku aysaw pis ka hiyaknima ba ini ahadma ay piwtrik, pis ka hiya pisma awna ta git pikebyi: “Nukebyi, isaksanate nah wiwh ini iget piwtriktak.” Amun ini pis ikawvari ke wotbe pis kibeynebe hiyeg bawa pis mbayte giw pikebyi. Asa hiyak akak pidahankit pihiyekemni traksevye. Ayge nikwe ik adahan pis hiyak akak pikebyi gitaraksan.

Pikatna amutri

Mt 7.16, 12.33

43— Ku uhiyekemni kibeyne, nikwe kabaykanen pes wowntak. Uhiyakemni ke ahbe akat. Ah akat ku pariye kabaynowa ka sarayh guw mbeyevyoma guw. Ine ah akat ku pariye kane kabaynoma ka sarayh guw kabaynovwima guw.

44Ku wis hiyap pahakti amutri eg ka sarayh guw kabaynovwima, nikwe in huwewe wot ku eg amutri ka kabaynoma. Ke puduku akatbe ke iveybe egkis ka sarayh guwkis kabaynovwima kema figuma kema uvama.

45 Ke wixwiy hiyegbe. Ku pariye kibeynewa hiyeg igi ivegminene gihiyekemni adahan kabaykanenwa. Nikwe he kabaykanen pes giwntak. Pahavwime ku pariye mbeyevye hiyeg igi ivegminene gihiyekemni adahan mbaykanenwa. Nikwe he mbaykanen pes giwntak. Mmanawa ku pariye ay avit uyakni innewa wis awnin.

46Henneme ku yis awna ku nah yikivara nikwe amawka ku yis ihpene nuwnuh.

Piyana hiyeg paytya

Mt 7.24

47— Ku pahavwi hiyeg ayta numkat, ku ig tima nukannuhakni, ku ig ihpin, nah akkite yit ku samah ner gihiyekemni.

48Igi kewa pahavwi awaygbe ku pariye mutuhe givin awaku kabayntiwa. Ig atik ta warikwit he ig danuh arit tip. Ayge abetit tip ig tabirase givin awakubet. Ayteke akemni buwis in huwit ta avitit givin. Heneme givin ka hakuh mmanawa awakubet mituw kabayntiwa ta warikwit abetit tip.

49Heneme ku pahavwi hiyeg timap nuwnuh, heneme ku ig ka ihpin, igi kewa pahavwi awaygbe ku pariye ka mutuh givin awakubet mihadima ta warikwit. Ayteke warik digise un huwit ta avitit givin. Pahaye adahan givin hakuhe. In mehwe madikte.

Currently Selected:

Lúkas 6: pluPB

Highlight

Copy