Ko fɔlɔfɔlɛ 14

Iburama la Luti lakisi koe

1Wo tɛmuɛ, Amirafɛli be Sineyari jamanɛ mansaya tɔ. Ariyoki be Elasi jamanɛ mansaya tɔ. Kedorolami be Elamu jamanɛ mansaya tɔ. Tideyali be Goyimu jamanɛ mansaya tɔ. 2Wo mansa naanɛ kafuta anu tagata Bera kɛlɛ, Sodɔmu mansa, anun Birisa, Gomori mansa, anun Sineyabi, Adima mansa, anun Semebɛri, Seboyimu mansa anun Bela dugu mansa, wo Bela tɔgɔ le tugun Soware. 3Kɛ mansa loole tagata madɛn kɔnkɛ kɔtɔ, ka min tɔgɔ Sidimu. Bi, ɲɔ be maren kɔɔkɔ je dala le la. 4Wo ka a taran, anu ka san tan nun fila ma, anu be mansa Kedorolami la nɔɛ kɔtɔ. A san tan nun sabaɲɔgɛ, anu murutɛta a ma. 5A san tan nun naaniɲɔgɛ Kedorolami anun a mansaɲɔgɛnu, anu wulita anu ni taga wo mansa loole kɛlɛ. Kɔnɔ anu taga tɛmuɛ anu ka Refeyati kaanu fɔlɔ kɛlɛ betunna Asitoroti Karinayimu saa tɔ, anu ka wonu nɔ. Anu ka Susi kaanu tugun kɛlɛ Hamu saa tɔ, anu ka wonu tugun nɔ. Anu ka Emiti kaanu tugun kɛlɛ Sawe Kiriyatimu saa tɔ, anu ka wonu tugun nɔ. 6Anu tagata Koori kaanu kɛlɛ wonu la kɔnkɛnu tɔ, Seyiri saa mafanna, anu ka wonu nɔ. Anu ka anu bee han Paran lɔgɔ kute kɔtɔ janfue tɔ. 7Wo kɔma, Kedorolami nun a mansaɲɔgɛnu saagita, anu tagata Enimisipati, ale saa mɛn tɔgɔ tugun Kadesi. Anu ka Amaleki kaanu kɛlɛ ɲɔ, anu ka wonu nɔ, anu ka anu la jamanɛ bɛ tiɲa. Anu ka Amɔri kaanu tugun nɔ minnu be sabatiren nun Asasɔn Tamari saa tɔ.

8Awa, wo tanbi kɔma, Kedorolami anun a mansaɲɔgɛnu tagata wo mansa loole kɛlɛdula. Anu la kereŋɛ ɲɔ, Sodɔmu mansa nun Gomori mansa bɔɔta, anun Adima mansa, anun Seboyimu mansa, anun Bela mansa, wo Bela tɔgɔ le tugun Soware. Kɛ mansanu bɔɔta anu tagata kɛlɛ madula kɔnkɛ kɔtɔ, ka min tɔgɔ Sidimu. 9Anu ka Kedorolami kɛlɛ, Elamu mansa, anun Tideyali, Goyimu mansa, anun Amurafɛli, Sineyari mansa, anun Ariyoki Elasare mansa. Kɛ mansa naanɛ ka wo mansa loole kɛlɛ. 10Awa, Sodɔmu mansa nun Gomori mansa, anun anu la mɔgɛnu borita anu jaguenu la. Anu siyama borita, anu tagata boe dolo ji dinka butɔ, bayi kɔnkɛ kɔtɔ ka min tɔgɔ Sidimu, dinka siyata a tɔ, dolo je be minnu tɔ. Mɔgɛnu minnu ma boe wo dinkanu tɔ, wonu borita han kɔnkɛnu tɔ. 11Wo butɔ, Kedorolami nun a mansaɲɔgɛnu tagata, anu ka Sodɔmu kaanu nun Gomori kaanu bolofeŋɛnu bɛ jigan, anun anu la dɔmɛ bɛ, anu tagata anu fɛ. 12Iburama baabadɔndɛ la den Luti be sigiren Sodɔmu saa tɔ le. Anu ka wo tugun bita anu tagata a fɛ, anun a bolofeŋɛ bɛ.

13Mɔgɛ do borita a ni taga wo koe bɛ sifɛ Iburama ye, a be a fɔla Iburama min ma Hebure kaye. Wo tɛmuɛ, Iburama be sabatiren Mamire la lɔgɔ kutu banba kɛnna. Wo Mamire mu Amɔri bɔnsɛ do le la. A bareŋɛnu le mu Esikoli anun Anɛri la. Wonu bɛ mu Iburama dɛmanna le la. 14Anu to ka Iburama bareŋɛ Luti bita koe fɔ a ye, a ka mɔgɔ kɛmɛ saba mɔgɔ tan nun sagin kele a la mɔgɛnu tɔ minnu kusan kɛlɛ la. Anu bɛ be sɔtɔren Iburama bata le. Anu ka wo mansa naanɛ jokki han Dan saa tɔ. 15Iburama ka a la mɔgɛnu mafatan mansanu kɛlɛ koe la sue tɔ. Iburama nun a la mɔgɛnu ka anu kɛlɛ han anu ka anu nɔ. A ka anu bee han Hoba, Damasi saa bolo mara tɔ. 16Iburama ka kɛlɛ tɔnɛ bɛ jigan, a ka a nati. A ka a bareŋɛ Luti tugun nati, anun Luti bolofeŋɛnu bɛ, anun musenu minnu be bitaren nun, anun mɔgɔ tɔɛnu bɛ.

17Awa, Iburama to ka mansa Kedorolami nun a mansaɲɔgɛnu kɛlɛ, a saagita kunnawule fɛ. A saagi tɛmuɛ Sodɔmu mansa bɔɔta, a tagata Iburama labɛn Sawe kɔnkɛ kɔtɔ, mɔgɛnu be a fɔla min ma mansa la kɔnkɛ kɔtɔ. 18Wo tɛmuɛ le, Salɛmu mansa, min tɔgɔ Melikisedeki, a ka dɛgɛ nun beere nati Iburama ye. Ala min mayɛlɛta, wo la sarika lakelá le mu wo mansa la. 19A dubata Iburama ye, a ko:

«Ala mu barikɛ sala Iburama la ko tɔ,

Ala min mayɛlɛta, saŋɛ nun duge tige.

20Ala ni tantue sɔtɔ min mayɛlɛta,

min ka i jaguenu jarabi i ye.»

Iburama ka kɛlɛ tɔnɛ bɛ farila bɔɔ a ka a dii Melikisedeki ma. 21Sodɔmu mansa ka a fɔ Iburama ye, a ko: «N na mɔgɛnu lasaagi n ma, kɔnɔ n bolofeŋɛnu yan kan ni to ile ye.» 22Iburama ka a jaabi, a ko: «N bata n bole sɔ, n ka n kali Alatala la, Ala min mayɛlɛta, saŋɛ nun duge tige, 23n te i bolofen yo jigan, hali ɲa te ka wo ma samata jule, alako i kana naa a fɔla ile le bata Iburama ma fondo tige la. 24N te fenfen jigan fɔ n na mɔgɛnu ka min ma anu balue la. N nun minnu tagata, Anɛri nun Esikoli nun Mamire, wonu ni anu tɛŋɛ jigan.»

Currently Selected:

Ko fɔlɔfɔlɛ 14: MOG

Highlight

Copy