Ko fɔlɔfɔlɛ 15

Ala la lahire a nun Iburama tɛma

1Wo koenu tanbi kɔma, Alatala kumata Iburama ye kiboe tɔ, a ko: «Iburama i kana kilan, n si i latanga koe bɛ ma. N si i baraji a banba la.» 2Iburama ka a jaabi, a ko: «N Marigi Ala, n be naala fagala le, i be fondo diila n ma fenna? Den bele n bolo min si n kɛɛ jigan, fɔ n na walilá Eliyɛsɛri, min be bɔɔren Damasi saa tɔ.»

3Iburama mɛn ko: «I ma den yo dii nde ma. Wo butɔ, n na walila min be sɔtɔren n na boŋɛ butɔ, wolo be naala mala n kɛɛ jiganná la.» 4Kɔnɔ Alatala mɛn kumata a ye, a ko: «Ade, ale le bele mala i kɛɛ jiganná la de! I be naala deŋɛ min sɔtɔla, wolo yati be mala i kɛɛ jiganná la.» 5Wo kɔma, Ala ka Iburama labɔɔ bara tɔ, a ka a fɔ a ye: «Saŋɛ fɛlɛ ba, i ni loolenu kɔnti ka i si nɔ anu kɔnte lɔnna.» A mɛn ka a fɔ a ye: «I bɔnsɛ si siya le iko i be loolenu yenden ki min na kantɔ.» 6Iburama dɛnkɛnɛyata Alatala ma, wolo ka a ma Alatala ka a bita mɔgɔ telendeŋɛ la.

7Wo kɔma, Ala ka a fɔ a ye, a ko: «Nde le mu Alatala la, min ka i labɔɔ Uri saa tɔ, ka min be Kalide duge tɔ, alako n ni kɛ duge dii i ma kɛɛ la.» 8Iburama ka a jaabi, a ko: «N Marigi Alatala, n si a lɔn kama le kɛ duge si ma n tɛŋɛ la?» 9Alatala ko a ma: «Ningi yɛrɛ dɔndɔ bita i ni a nati n ɲɛ, anun baa musu dɔndɔ, anun saaka kontoŋɛ, minnu bata san saba saba sɔtɔ, i ni gabue dɔndɔ tugun bita anun legetere dɔndɔ.» 10Iburama ka wo subenu bɛ nati, a ka anu ma subu dɔndɔ yo subu dɔndɔ a ka a fara tɛma a ni ma fɛrɛn fila, a ka wo fɛrɛŋɛnu sigi ɲɔgɔn ɲakɔtɔ. A ka kondeŋɛnu tugun faga, kɔnɔ a ma wonu fara. 11Jiganu jigita wo subu fagareŋɛnu tɔ, kɔnɔ Iburama ka anu bee.

12Tele la dula fɛ, kinnɔgɛ ka Iburama bita ko, a be kinnɔgɛ butɔ, kilaŋɛ keta a ma, dibi banba jigita. 13Alatala ka a fɔ a ye, a ko: «Iburama, i ni i tolomasɔ n na, i bɔnsɛ si naa ma le lun do luntaŋɛ la duge do tɔ. Ɲɔ kaanu si naa anu ma le joŋɛnu la, anu mɛn ni anu ɲagankata koola han san kɛmɛ naani. 14Kɔnɔ jamanɛ min ka i bɔnsɛ bita jonya la, n si naa wo jamanɛ makiiti le. Wo kɔma, i bɔnsɛnu si naa bɔɔ wo jamanɛ tɔ fondo siyama fɛ. 15Ile kan si kunnawule sɔtɔ anun simaya yanfama, i si faga hɛra butɔ han anu ni i sa gabure tɔ. 16I la deŋɛnu bɔnsɔ naaniɲɔgɛ, wolo be saagila yan. Bayi, yan mɔgɛnu, minnu mu Amɔri kaanu la, anu la ko koroŋɛ ma tanbi a tɔ betunna, min si a ma n ni anu bee.»

17Awa, tele dulata tɛmuɛ min tɔ, dibi banba jigita, siise bɔɔta furu do tɔ, a nun ta lɔgɛ tanbita subu fɛrɛŋɛnu tɛma. 18Wo lun yɛtɛ, Alatala ka lahire jigan a nun Iburama tɛma, a ka a fɔ a ye, a ko:

«N si naa kɛ duge dii i bɔnsɛ ma,

ka bɔɔ Misira kɔɛɛ ma,

tagala han kɔɔ banba ma,

min mu Efirati kɔɛɛ la.

19Kɔnɔ betunna, Keni kaanu le be sigiren wo duge tɔ, anun Kenisi kaanu, anun Kadimoni kaanu, 20anun Hɛti kaanu, anun Feresi kaanu, anun Refayi kaanu, 21anun Amɔri kaanu, anun Kanana kaanu, anun Girigasi kaanu, anun Jebusi kaanu.»

Currently Selected:

Ko fɔlɔfɔlɛ 15: MOG

Highlight

Copy