Ko fɔlɔfɔlɛ 19

Sodɔmu saa nun Gomori saa halagi koe

1Wo kɔma, wo maleka fila nata ke Sodɔmu wura la tɛmuɛ la, wo ka a taran Luti be sigiren Sodɔmu saa dondula. Luti la anu yendeŋɛ, a wulita a tagata anu labɛn. A ka a majigi han a ka a tindɛ sɔ duge tɔ. 2Luti ka a fɔ malekanu ye, a ko: «N marigenu, n bata wo táran wo na yigiya wo la jondeŋɛ bata, wo ni wo kɛŋɛnu lako, wo ni ki yan bi. Ka ɲɔ kɛnɛta, wo ni taga wo la tagamaŋɛ la.» Malekanu ka Luti jaabi anu ko: «Ade de! mɔ be kila bara tɔ le.» 3Kɔnɔ Luti ka anu jokki kuma la han anu tagata yigiya a bata. A ka tabare ma anu ye, a ka dɛgɛ lɛbinibɔnɛ ɲiɲa, anu ka a dɔmɔ.

4Kɔnɔ wo ka a taran malekanu nun Luti bata don boŋɛ tɔ, Sodɔmu kaanu bɔɔta dula bɛ tɔ anu ka boŋɛ lamilin. Kamareŋɛnu yo, kayibanu yo, a bɛ nata le. 5Anu ka anu kulɛ labɔɔ Luti ma, anu ko: «Kayenu minnu nata i bata kɛ wura la anu be mina le? I ni anu labɔɔ yan mɔ ni sa anu fɛ.» 6Luti bɔɔta jama ma bara tɔ, a ka bonda balan luntaŋɛnu kunma. 7A ko: «N sigiɲɔgɛnu, yandi, n bata wo táran wo kana ko koroŋɛ ma. 8N na den museren fila be yan, wonu ma kayi koe lɔn betunna. N si wonu nati n ni anu dii wo ma. Fenfen diyata wo ye wo ni wo ma anu la. Kɔnɔ wo kana koko ma kɛ luntaŋɛnu kan na, bayi anu be naren luntanya le la n bata.» 9Anu ka a jaabi, anu ko: «Bɔɔ kila tɔ!» Anu mɛn ko: «Fenfen ma kɛ la fɔ luntaŋɛ, kɔnɔ a be a saren de kɔtɛ a ni mɔ yamɔri mɔ la saa tɔ. Ka i ma bɔɔ mɔ ɲatɔ kɔtɛ, mɔ be min mala i la, wo si fisaya i la luntaŋɛnu tɛŋɛ ko.» Anu ka Luti tuntun sɛnbɛ la han anu sutuyata bonda la alako anu ni bonda tiɲa anu ni don. 10Kɔnɔ wo kayi fila ka bonda laka anu ka Luti bita. Anu ka a ladon boŋɛ butɔ anu ka bonda sokki. 11Mɔgɛnu minnu be sɔren bonda tɔ malekanu ka dibe lajigi anu ma, anu bele nɔla dondula yenna. Kabɔɔ kamareŋɛnu ma han ka ke kayibanu ma hali dɔndɔ ɲa ma dondula yen.

12Wo maleka fila ka a fɔ Luti ye, anu ko: «I la mɔgɛnu donu be saa butɔ yan ba? I ni anu bɛ labɔɔ saa butɔ. I bitaŋɛnu yo, i la den kayireŋɛnu yo, i la den musereŋɛnu yo, i ni i la mɔgɛnu bɛ labɔɔ saa butɔ. 13Bayi mɔ be kɛ saa bɛ halagila le. Anu la ko koron ma bata ma ko makilandeŋɛ la Alatala ye. Ale le bata mɔ sɔ kɛ saa halagi koe la.» 14Luti bɔɔta a tagata kuma a bitan kayenu ye, minnu ka a la den musereŋɛnu mabita, a ko anu ma: «Wo wuli! Wo mɔ ni bɔɔ kɛ saa butɔ, bayi Alatala be nala kɛ saa halagi dula le ka.» Kɔnɔ a tota Luti bitan kayenu ye a be tolon kuma le fɔla.

15Ɲɔ la kɛnɛ banba fɛ, malekanu ka Luti lagbataa, anu ko a ma: «Teriya i ni i la muse jigan anun i la den museren fila minnu be yan, wo ni taga, alako wo kana halagi kɛ saa mɔgɔ koroŋɛnu fɛ.» 16Kɔnɔ Luti to bele teriyala, maleka fila ka a bita a bole ma, anun a la muse anun a la den museren fila anu ka anu labɔɔ saa butɔ, bayi Alatala be diren a ni ande lakisi. 17Anu la bɔɔreŋɛ saa butɔ, maleka dɔndɔ ka a fɔ Luti ye, a ko: «Wo bori alako wo ni wo nɛ lakisi. Wo kana wo kɔma tafɛlɛ! Wo kana sɔ kɛ fara kan do kan tɔ! Ka wo bele diren halagila, wo bori wo ni taga ke wo kɔnkɛ tɔ.» 18Luti ko: «Ah, n marige, n bata i táran, mɔ te nɔ wo dula masɔtɔla. 19Wo bata hinnɛ mɔ la, wo bata kinikini mɔ ma wo ni mɔ lakisi. Kɔnɔ mɔle te nɔ borila han mɔ ni ke wo kɔnkɛ tɔ. Yannun mɔ ni ke ɲɔ, jihade si mɔ bita, mɔ si faga le. 20I ɲa sɔ. I ma wo saa yen ba, min ma yanfa yan na? Mɔ si taga borila mɔ ni don ɲɔ. Wo saa mɛn dɔgɔ. Wo diɲa mɔ ni bori mɔ ni don wo saa lanmandeŋɛ tɔ, alako mɔ ni kisi.» 21Maleka ko: «Awa, n bata sɔn i la wo kuma la. I be saa min na ko fɔren n te wo halagi. 22Kɔnɔ, wo bori teriya la wo ni taga don ɲɔ. Fanni wo ma ke ɲɔ, n te nɔ fenfen mala.» Wolo ka a ma wo saa tɔgɔ sata Soware.

23Luti nun a la denbayanu donta Soware saa tɔ, wo ka a taran tele bata a da bula. 24Wo tɛmuɛ le, Alatala ka soda nun ta lajigi bɔɔla saŋɛ tɔ iko sange, a ka a laboe Sodɔmu nun Gomori saa tɔ. Wo fatanta Alatala yɛtɛ le la. 25Wo butɔ, Alatala ka wo saanu bɛ bintan a ka anu yɛlɛman anun ɲɔ fɛfɛ bɛ, anun kifeŋɛnu bɛ, anun mɔgɛnu minnu bɛ be sabatiren wo saanu tɔ. 26Anu taga tɛmuɛ, wo ka a taran Luti la muse ka a kɔma tafɛlɛ, a yɛlɛmanta kɔɔkɛ birike la.

27Wo saguma jonna tɔ, Iburahima wulita a tagata dula do tɔ, a tota sɔren Alatala ɲakɔtɔ ka min na. 28A ka a ɲa sɔ, a ka Sodɔmu nun Gomori saanu lasaga, anun fara banba bɛ. A ka siisi banba yen yɛlɛla ɲɔ, iko siise be bɔɔla biriki bintan furu tɔ ki min na.

29Awa, Ala ka fara banba anun saanu bɛ halagi kaa le, Luti be sigiren dula min tɔ nun. Kɔnɔ Ala hinnɛta Iburahima la, a ka Luti lakisi jihade ma.

Luti nun a la den musereŋɛnu

30Kɔnɔ, Luti kilanta sabatila Soware. Wo butɔ, a ka a la den museren fila jigan, a bɔɔta Soware anu tagata kɔnkɛ tɔ, anu sabatita fanmɛ tɔ ɲɔ. 31Lun do, Luti la den museren kinama ka a fɔ a dɔgɛ ye, a ko: «Mɔ baaba bata kɔtɔya. Kayi tugun bele yan, min si mɔ futu iko a be mala dunuya bɛ tɔ ki min na. 32Mɔ wakkilɛ, mɔ ni beere dii mɔ baaba ma han a ni siisi, jɔnɔn mɔ ni kafu a fɛ, alako mɔ ni deŋɛ sɔtɔ, mɔ baaba bɔnsɛ kana mule.» 33Anu ka beere dii anu baaba ma wo sue tɔ, a ka a min han a siisita. A la den museren kinama tagata kafu a fɛ. Luti ma a sa tɛmuɛ lɔn, a ma a wuli tɛmuɛ tugun lɔn.

34Wo tabantaka saguma, den museren kinama ka a fɔ a dɔgɛ ye a ko: «N kafuta le n baaba fɛ sue tɔ. Ka sue donta mɔ mɛn ni beere dii a ma. A tini a min a siisita, ile tugun ni taga kafu a fɛ, alako mɔ ni deŋɛ sɔtɔ a ye, mɔ baaba bɔnsɛ kana mule.» 35Anu mɛn ka beere dii anu baaba ma wo sue tɔ. A ka a min han a siisita, a la den museren dɔgɔmaŋɛ tagata kafu a fɛ. A baaba ma a sa tɛmuɛ lɔn, a ma a wuli tɛmuɛ tugun lɔn.

36Awa, Luti la den museren fila bɛ ka bue jigan a fɛ ɲɔgɔnna le. 37A la den museren kinama ka den kayireŋɛ sɔtɔ a ka a tɔgɔ sa Mowaba. Bi, ale le mu Mowaba kaanu benba la. 38A la den musereŋɛ dɔgɔmaŋɛ tugun ka den kayireŋɛ sɔtɔ, a ka a tɔgɔ sa Bɛn Ami. Bi, ale le mu Amoniti kaanu benba la.

Currently Selected:

Ko fɔlɔfɔlɛ 19: MOG

Highlight

Copy