Ko fɔlɔfɔlɛ 20

Iburahima anun Abimelɛki

1Iburahima bɔɔta ɲɔ, a tagata Negɛwu duge tɔ; a ka wagate do ma Kadesi nun Suru tɛma, wo kɔma a tanbita a tagata Gerari, a ka wagate do latanbi ɲɔ. 2Iburahima ka a fɔ a la musu Sara la ko tɔ, a ko: «N dɔgɔ musuma le mu.» Wo butɔ, Abimelɛki, Gerari mansa ka Sara nati a bata. 3Sue to donta Abimelɛki be kinnɔgɔla, Ala ka a yɛtɛ labɔɔ a ma kiboe tɔ, a ka a fɔ a ye, a ko: «I si naa faga le kɛ muse la ko la i ka min nati i bata, bayi a be sigiren kayi dugu le.» 4Wo ka a taran, Abimelɛki ma maga Sara la betunna. A ka Ala jaabi, a ko: «N Marige, ka mɔle ma ko koroŋɛ le ma, i si n na jamanɛ halagi le ba? 5A la kaye le ma a fɔ n ɲɛ, a ko a dɔgɔ musuma le mu kɛ la? Muse tugun ma a fɔ le a ko ale kɔtɔ kayima le mu? Nde ka kɛ koe ma hanige beeyareŋɛ le la. N mɛn ma ko koron ma.» 6Ala ka Abimelɛki jaabi wo kibo dɔndɛ tɔ, a ko: «Nde tugun ka a lɔn i ka kɛ koe ma hanige beeyareŋɛ le la. Nde le ka a ma, i ma junube sɔtɔ n na. Wolo mu, n ma sɔn i ni maga a la. 7Awa kɔtɛ, kɛ kaye la muse lasaagi a ma; nabiyonmɛ le mu a la, a si naa Ala mataraŋɛ ma i ye, alako i ni kisi. Ka i ma a la muse lasaagi a ma, i ni laa a la i si naa faga le, i nun i la mɔgɛnu bɛ.»

8Abimelɛki wulita saguma piri, a ka a la mɔgɛnu bɛ kele a ka wo koe bɛ ɲamakaran anu ye; wo ka anu kilan koola. 9Abimelɛki ka Iburahima kele, a ka a fɔ a ye, a ko: «I be fen de maren n na ka? Nde ka hakkɛ ko miniman ma i la, han i ni nɔ nde nun n na jama mala junubu banba mala la? I bata ko ma n na, koe min ma bɛn a ni ma. 10I ka kɛ koe ma fen na?» 11Iburahima ko: «N ka a mira le n te mɔgɛnu taran kɛ jamanɛ tɔ, minnu be kilanden Ala la. N ko anu si boe n ma le anu ni n faga n na muse la ko la. 12A ɲan tɔɲa le mu, n dɔgɔ musuma le mu a la. Mɔ bɛ baaba dɔndɔ, kɔnɔ mɔ nɛɛnɛ dɔndɔ ma. N ka a futu, a mata n na muse la. 13Ala ka n nabɔɔ n baaba bata lun min na, n ka Sara madiya le, n ko, a ni hinnɛ n na. Ka mɔ tagata dula yo tɔ a ni a fɔ ɲɔ mɔgɛnu ye, a kɔtɔ kayima le mu n na.»

14Abimelɛki ka Iburahima la musu Sara lasaagi a ma, a ka saakanu nun baanu anun ningenu sa a kunma, anun jon kayenu anun a musenu. 15A ka a fɔ Iburahima ye, a ko: «N na duge bata to i sagoe tɔ. A dula ka min diyata i ye i si taga sigi ɲɔ.» 16Abimelɛki mɛn ka a fɔ Sara tugun ye, a ko: «I ka a yen, n bata kaalisi kole wulu dɔndɔ dii i kɔtɔ kayima ma, wo ni ma n na kɛ wale sɔŋɛ la. Wo nafule si a yita i la mɔgɛnu bɛ la ka a fɔla, i ma ko koron ma kɛ koe butɔ.» 17Iburahima ka Ala mataran Abimelɛki ye. Wo butɔ, Ala ka Abimelɛki lakendeya, anun a la muse, anun a la jon musenu bɛ, anu mɛn ni nɔ deŋɛ tasɔtɔla. 18Bayi Alatala dun ka den sɔtɔbaliya bande le sa musenu bɛ ma minnu be Abimelɛki bata, Iburahima la musu Sara la ko la.

Currently Selected:

Ko fɔlɔfɔlɛ 20: MOG

Highlight

Copy