A:imo 9
9
LODote Gi baminamalelona gi.
1Na: LOD tiliyamana ba:kele i genama lopa palale lelaleyala a:pite obate layana.
Balelamina genama salo lapoda:
genama pakamite litatilina salote gagaga edelamada:le.
Luma waelabeyagimunu gaganabima alete kola:madelewa
a:pite pa:pa meleda eda:madilina luma ne giwa:la gilile dapolamalowa.
Eta lumagi menagite pa:pa wama saolamalelo,
pa:pa etate a: wama emolamalelo.
2Obaite ola:wape a:yata bapima a:i tutata kola:madilina,
a:mala na:pe maite obai atida:malelo.
Obaite sawisakama dida:madilina,
na: a:mala obai alete pelolamalowa.
3Obaiya obai Ka:mol podoma a:wada:minamadilina,
na: a:mama obai uwalada:da wete alolamalowa.
Obai na: emoda:te wasewa gobama kola:te a:ibapima a:wada:madilina,
na: a:mala ugu lopala auwamimela obai munitodolamalelo.
4Obaimunu giwa:lanate dibulama wabeganapa wama alete na:da:madilina,
a:ma wala na: giwa:la gili anawamela obai ta:ta:munamalelo.
Na:dowali tao na: obaima lotobadolamalowa
obaite sosawena gi itawa eda:mada:le pa: sogoda:na gi.
5 LOD God enoba Kamalinapa LOD
enobate a:ibaiga dalowaminamila soseledeletedili,
a:pite a:mala edelina luma sabeletedili,
Nael wasewa a:na:pi a:ibaigate toteketata dite
a:pite Isipt wasewa a:na:pi kwaetelelo,
6a:pite obape sa:lenapa kanaba genama sawisakama a:na:mite
a:pite obape sokate a:ibaigama toda:yana,
obate wasewanapa wi egete
a:i baigama samitelelo,
LOD enoba obape gagi.
7Da: Islaelana luma,
da:na: dima Kusuna luma a:na:pi edelewa,
LODote lalelo.
Na: Isipt wale Islael wama gwalite saoyamana,
Ka:ptol wala Pilisitiyana luma,
a:pite Kil wala Alamina luma.
8Gibapile Sidinapa LODope tao
sosawe bapina baigama dololo.
Na: oba talaminamalowa
ma:ma a:ibaigala,
ameta na: Ya:ikobipe noneya
pa:pa talaminale talaminamalowa,
LODote lalelo.
9Na: kamali gilala laladele,
a:pite Islael noneya kabigibega gagaminamalowa obaite edelina sasabala,
lumagite wit kosokosominotolona gi a:na:pi,
etate a:ima pa:pa dilamalelo.
10Na:pe luma gobala sosawe a:na:da:mida:na
lumate giwa:la gilile kaokolamadili,
enoba ma:ma gilala latedilina luma,
Galabete sa: pa:pa atisa:malelo.
Islael obate gwama patayana gi
11 #
Aud 15:16-18
A:ma kadepala na: pakaminamalowa
enoba dilayana Da:ibidipe bikiwa.
A:pite obape gi gwama pakakaminamalowa,
a:pite obape kokoleliyana papala gwama pakakaminamalowa,
a:pite gwama lopanapa gweyale a:na:minamalowa,
12a:na:pile Islael lumate Idomonapimunu wa pala egelamadili
a:pite na:dowali gagile edelina luma,
ma:mai gi a:na:da:mida:napa LOD enoba gi lalelo.
13Kadepa saolamalelo LODote lalelo,
dapoda:napa lumagi a:i pasaminanona lumagite giwitilamalelo,
a:pite a:i pasaminanapa lumagi ga:lip tokobe etoda:minanona lumagite giwitilamalelo.
Podo sakale kanika:napa waen wite iwidelamadili,
a:pite waelabega sakala waen wite iwida:te kolelamadili.
14Dibulama alete na:diyana na:dowali Islael luma na: gwama alete pa:lamalowa,
obaimunu baigabaiga lumate titida:miniyana obai gwama a:na:da:minete a:mala edelamadili.
Obai ga:lip adami tolete adami wi nidelamadili,
obai egada a:na:da:minete adami naenamadili.
15Islael luma na: obaimunu wa bapima gwama tolamalowa,
lumate obai pa:pa gwama otopolamadili ne obai dima datayamana wa gobala,
LOD a:dowali God enoba gi lalelo.
Currently Selected:
A:imo 9: GBOTP
Highlight
Share
Copy
Want to have your highlights saved across all your devices? Sign up or sign in
Gogodala Bible Translation Project © Bible Society of Papua New Guinea, 2016.
