Auba 1
1
1Aubadayate tiliyana gi.
Ma:ma enoba Sidinapa LODote Idom wa gima lalelona gilala.
Sa: LOD dile pa:yana gilala a enamadilimana.
Gigiwinapa lumagi a wa waelabegama auwamiyana,
obate layana, da: pa:da:la saga oba giwa:lama na:da:.
2A: ti, na: waelabega luma gobala a: kowabiminamalowa,
obaite a: kakapamite biniminamadili.
3A:dowali na: awagana: gite a: a gasumiyana,
a:dowali ela sabate kalekalenapa ba:kele gobala dola gi lalelo
a:pite a:dowali gegenama saka sidima a a:na:da:munote,
a:ya a: dima a:nege latelelo,
powate na: a:ima gwalina:te pelolamaleloya.
4Waliya a:na:pi a: sidila kekemitata waminano,
a:pite a:dowali genama ibina gagasida: gobama a:na:miyana,,
na: amale a: gwalite pelolamalowa, LOD enoba gilala lalelo.
5Ilinate a: dima saoda:madilina tepala,
gwama lopala ilile aleda:nate isa tepala saoda:madilina,
na:ya:, sosawenapa menete a: dima dololo,
ilinate a:dowali lopala waelabega ilile alelale alelamadili.
Ga:lip adami dapoda:nate a: dima pa:da:madilina,
obaite eta:mi salipanadima na:sa:da:minamadili.
6Idom, a: ameta lopala waelabega wama kaokomunamalelo,
lumate a:dowali a:wada:te dowatilina ya:biya:bi lopala alemenamadili.
7A:dowali giwa:lanate a:dowali wa a:yatale a: wama galaminamadili,
a:dowali sopodalate a: gasumite a: apeyana eda:madil,
a:da bayata: wita: edeliyana lumate a: dima batakapi milamadili,
ameta a: pa:pa tilamalelo.
8 LODote lalelo, a:ma kadepala,
na: Idomope iwalela kakamalina dala dapolamalowa,
a:pite Iso podola obape gi iwalela sa:kemana dala binida:minamalowa.
9Teman baigana lapitada:na dala waelabeyagai emodelamadili,
a:pite Iso podola edelina giwa:lana dala
waelabeyagai giwa:lanate dapolamadili.
10Gi ase a: ilile lopala aleladele a:dowali luma dapoloyana enobai#1:10: a:dowali luma: Islaelana luma, Isope wabeya Ya:ikobipe wapiki palana luma mata, Isope lumate Idom luma mata edeli. Ya:ikobipe wapiki palana luma,
a: ameta pisala egelamalelo,
obaite a: lapowila a: binilale binilamalelo.
11A: ya:ma kadepala ebatala a: lelaloyana,
giwa:lana lumate obape ogosa ka:ka:miniyana tepala
a: ya:ma sosawe bapinapa luma a:na:pi,
obaite Yelusalemape ya:biya:bi a:ipatite na:da:te
obaiya obai gabama iwatadiliyana.
12A: ya:ma iya gi pa: awapa a:na:mina gima
obaimunu sosawe ediyana kadepala
a: ya:ma iya gi pa:pa a:na:minama ewena
obaimunu sasala gobala.
13A: na:dowali lumumunu baiga gobama pa:pa sa:elama ewena,
obaimunu ededa:mida: gima obai iyada:munamalale
a:pite obaimunu ya:biya:bi apeyanapa ela gima,
enoba obaimunu gwanasaweda: gite saoyana kadepala.
14A: nabidi atakawale pa:pa lelolama ewena
giwa:la emoda:te wama gugulilila obai alolamalale,
a: obai giwa:lanapimunu maima pa:pa kakamidamama ewena
obaimunu mene tepala.
15 LODope kadepate a auwapula elelo,
baigabaiga waelabega obaimunu gi babamuda:monamalale.
Idom a: powa gi a: a a:na:miyanaya,
oba enoba gi a: dima a:na:minamalelo.
A: e na:sa:da:miyana gi a: gwama alolamalelo.
16A: Sayon sakala na:dowali lumate na:dowali ga:o wi nidiliyana
enoba na:pe awana sakala
a:na:pile baigabaiga wa kabigibega,
na:pe ga:o wi nidelamadili.
Obai kabigibegale nidelete pa:pa edelamadili.
17Ameta Sayon sakala galabe pawamina gi saolamalelo.
Sayon saka awana elamalelo,
a:pite Ya:ikobape lumate obaimunu baiga ya:bi
awapale gwama egelamadili.
18Ya:ikobape lumata: Yausepepe lumata: obai ila a:na:pi edelamadili,
obaite Isope luma sosaweda:minamadili
ilate kakapa oloda:malelona gi a:na:pi,
Isope lumagi eta menagite pa:pa kanika:wamalelo.
Ma:ma gi elamalelo gi ase na: enoba LODote ma:ma gilala lalelowa.
19Negeb palana lumate Idom wa egelamadili
saka palala edelina lumate Pilisitiya wa egelamadili.
Islael lumate Ipala:mita: Sameliyata: alelamadili,
a:pite Beniyamina lumate Giliyad wa egelamadili.
20Yelusalem baigala dibulama alete na:diyana
luma gwama Islael wa aletata na:da:te Salepat baigama saoda:madili.
Yelusalem baigala dibulama alete na:diyala a:pite Sadi wala edelina
obaite Negeb palana baigabaiga alelamadili.
21Yelusalem wana galabe pawada:mida:nate
Idom wa lapote a:ma wa tilanapa edelamadili.
A:pite LOD oba kopa kanaba elamalelo.
Currently Selected:
Auba 1: GBOTP
Highlight
Share
Copy
Want to have your highlights saved across all your devices? Sign up or sign in
Gogodala Bible Translation Project © Bible Society of Papua New Guinea, 2016.
