Osey 11
11
LODope awe iwalela gi Islael lumadima
1Islael kowabi pulagi eloyana tepala
na: oba sa:lele tiloyamana,
a:pite na: na:pe pulagi awamiyamana Isipt wa gobala wama saolamalale.
2Na: Islael awaminaleyamala,
obai ameta a:ma mamamida:te gile wama na:diyana.
Obaite Ba:il dima dapoda:na nagala lopalale balelada:minete diliyana,
a:pite obaite sa:sa:lena ipowada:na lopala ididali dima olelete diliyana.
3Na: Ipala:im a:i saowamina gi itumiyamana,
obai maima alete weloyamana,
ameta obai a:ma gi pa:pa itawa ediyana,
Ne obai sa:leda:munoyamana.
4Na:pe awe iwalelale obai alete pa:loyamana,
na: awe iwalela taole obai a:gegeda:yamana.
Obaimunu madale ne menenapa i wama egedamayamana,
a:pite obai dima golote obai baya dapuloyamana.
5Obai Isipt wama gwama na:da:madili
a:pite Asiliyate gwama obai apeyanapa elamalelo,
gi ase obai pa:pa iwiminini obaimunu sosawele wama esa:da: gima.
6Giwa:la gilite obaimunu kabigida:na baiga gogobale pa:ipilamadili,
obaimunu baiga oogosa ka:ka:mminete,
a:pite obaimunu bata gi waelabeyagimunu a:yatada: alilamadili.
7Na:dowali lumate iwiminili na:le wama esa:da: gima.
Enoba a:na:pi obaite Sidinapa dima timo eda:dele mamamida:te midili,
obate eta nabidi bini bapi obai pakada:mina gima.
8 #
Diu 29:23
O, Ipala:im, na: a: ilapala ela gima pa: awapa.
O Isalalel, na: pa: awapa eta:mi lumadima a: elatela gima,
Ne Adma dima a:na:miyamana gi a: dima a:na:mina gi pa: awapa.
Ne Seleboim dima a:na:miyamana gi a: dima a:na:mina gi pa: awapa.
Na:dowali alipo a na: gobala opa:ya eyana,
a:pite na:dowali kabiginapa awe iwalela gi a: dima a sidima diwina.
9Na: na:dowali kamalinapa ga:o gi pa:pa a:na:minamalowa,
gwama na: Ipala:im wa pa:pa gwama esa:te tilite lapolamalowa.
Ase na: God, na: pa: lumagi,
enoba Awananapa lumagi da: gobala.
Na: pa:pa ga:o gida pa:lamalowa
10Obaite LOD gwalama:madili,
obate layon a:na:pi ulupodolo,
Obate ulupodolamamalelona tepala
obape segete emoda:dele sasiwoda:da pa:da:madili
kadepate siliminanona palala.
11Obaite emoda pa:da:madii,
Isipt wana puwida: a:na:pi,
Asiliyana tulugugu puwida: a:na:pi.
Na: obai obaimunu baiga ya:bima atilida:minamalowa.
LODote lalelo.
Islaelpe soswe
12Ipala:im obate sewata gile na: gwanamana:miyana,
Islaelpe genama obate gasumitada: gile sosawemiyana.
A:pite Yuda oba Godope gi asakaminano,
gwama obate Gibalama Awananapa dima baola gi bini elelo.
Currently Selected:
Osey 11: GBOTP
Highlight
Share
Copy
Want to have your highlights saved across all your devices? Sign up or sign in
Gogodala Bible Translation Project © Bible Society of Papua New Guinea, 2016.
