Maik 2
2
Aitapadilina luma ilapala da:mininina lumumunu wisa gi
1Galabete da:dima sa:lete dololo da: sosawe gi bata edelewamena lumadima.
Obaimunu tene sasabale dowatate a:mai sosawe a:na:da:mina gima bata edelewa.
Ibasegenapa kadepa lulilale obaite a:mai bata gi a:na:da:minini,
gi ase a:mai gi a:na:da:mina gima obaimunu kamali gobala dowatili.
2Obaite iwida:miniyana a:i kamalile luma dile aleletediliyana,
gwama gegenamata: aleletediliyana.
Obaite eta dalagipe genama egema:te,
gwama sopodalimunu lopala aledamenetedili.
3Enoba gi ase.
LOD a:nege lalelo,
na: aitapadilina luma ilapala da:mininina lumadima mene gi datamalowa,
a:mai gi gobala da: da:ya da:pe galabe pa:pa pawada:minamdelewa.
Da: pa:pa gwama kenatekenatale wamidelamadelewa,
gi ase a:ma enoba galabe tepa elamalelo.
4A:ma kadepala lumate a: ilapala minamadili,
obaite a: iyaminadele ma:ma sabe dili a: dima gwaledelamadili.
Sa: a sosawe bapi eda:mena,
na:pe lumumunu lopala a tepama ka:ka:miniwina.
Obate na:dile egewena
obate sa:dowali a:i eta:mi atakabina lumadima dapulowena.
5A:te enobala da:dile eta LODope gi gobala elelona lumagi bini
obate sa:lele gititiwa gi a:na:mite a:i babamunamalale.
Sewata ituda:mida:na gi
6Obaite latedili, sa:dima gilala ege ladela, pa: eda:na gi ege lope ladela.
Da: ege ma:mai pa: eda:na gi lope ladela.
Pisala gite sa: pa:pa kawapisa:malelo.
7Ya:ikobope sege ma:na:pi gilala lala gima awapa,
LODope limo ga:olelota.
Oba ma:na:pina gi a:na:da:mina gi awapata.
Na:pe gilalate sa:lenapa amowa gi elelo,
sa:lenapa gi a:na:minanona lumagidima.
8Ameta amapulale na:dowali luma a patimadiwina
enoba giwa:lana luma a:na:pi.
Da: wisa kabigida:na kaliko a wama kwaima:yamana,
pa: gi pa: gi eda:dele nabidi tepala na:diliyana lumadile,
giwa:la sabale gwama baigama pa:diliyana dala a:na:pi.
9Da: na:pe lumumunu ato wama datamideleyamana
obaimunu sa:sa:lena gegenama gobale.
Da: na:dowali a: dapilalowamena sa:kelamina gi a elomina tepama wama milelewa,
Obaimunu sege gobala.
10Patimada:te, wama na:da:la,
ase ma:ma pa: da:pe a:me saba.
Gi ase oba a sosawe ewena,
oba a titimiwina, oba sa:lela gima nabidi bini.
11Sewatanapata: gwama gasumitada:napata: etate pa:te lalamalelona,
na: a: waenta: sikata: alela gima pa: elanapa gi lope lalamalowa,
obate ma:mai lumumunu pa: eda:na gi lope ladolotanapa dalagi elamalelo.
Galabe pawamina gi
12O Ya:ikob, na: gibalamale da: waelabega menagi sabama gaogoda:munamalowa,
na: giwa:lale wama alete saoda:dele na:sa:da:miyana Islaelana luma gwama menagida:minamalowa.
Na: obai ta gobana sip a:na:pi gaogoda:munamalowa.
Sip gagasila a:na:pi sa:sa:lena tiladanapa wala edelamadili.
Luma waelabeyagaite a:ma wala edelamadili.
13Nabidi a:na:minapate ogosa gamite obai lopadamate welamalelo,
obaite ogosale wama saoda:madili.
Obaimunu kanabate obai lopadamate welamalelo,
LODote obaimunu lopa bapi elamalelo.
Currently Selected:
Maik 2: GBOTP
Highlight
Share
Copy
Want to have your highlights saved across all your devices? Sign up or sign in
Gogodala Bible Translation Project © Bible Society of Papua New Guinea, 2016.