Maik 3
3
Gaganabinata: gwama Godope gilala ladeletediliyana dalata: danadoloyana gi
1Amale na: layamana,
da: Ya:ikobope gaganabina gilala enamada:la,
da: Islael genama gobala edelewamena.
Da: sogolanapa gi bamina gi itawa eda: awapa.
2Da: sogola gima ilapala eda:dele ameta sosawe iwiminenewamena luma,
na:pe lumumunu kaka ta:ta:minenewamena luma
gwama obaimunu gosasa gobala sesepo ta:ta:minenewamena luma,
3da: na:pe lumumunu sesepo nanelewamena luma,
obaimunu kaka wama kwakwaminenewa,
a:pite obaimunu gosasa alisasi bapida:minenewamena luma,
amale sosopane gobanapa sepo apela minenewa.
4Amale obaite LOD dima mamida:madili,
ameta oba obaimunu gilala pa:pa wisa elamalelo.
A:ma tepala obate obape sosoko obaile wama esa:minamalelo
gi ase obaite a:na:miyana sosawe gile.
5Ma:ma enoba LODote lalelona gilala,
a:te pa: saoda:na gi lope ladeletana daladima
enobaite na:pe luma wama alete ka:odili.
Menagi lumagite obai baya dapulamalelona
obai gela gi kekeda:minini.
Oba ma:ma gi pa:pa a:na:minamalelona
obai ameta a:ma lumagidima giwa:la gile wisa ata gima sa:ledili.
6Enobala taote opa:ya ediwila inigwile gi pa:pa tidelamadelewamena iti kanabite da: kawapida:malelo.
A:pite wa itilamalelo, ugu limote da:dima pa:pa gwalemenamadili.
Pa: saoda:na gi lope ladeletana dala dima kadepate siliminamalelo.
A:pite kadepa lulilate obai dima iti kanabi elamalelo.
7Obai waelabega obaimunu sosoko kawapida:madili.
Gi ase Gododile eta wisa gilalate pa:pa saolamalelo.
Wa iwa:lanate pisala eda:madili a:pite gwama awanana iya:ta: pisala eda:madili.
8Ameta na:, kamalite na: a tawana:miwina,
enoba LODope limope kamali,
sogolale kamalile gi bamina gi na: ituna:miwina,
Ya:ikob dima obape pa: saoda:na gi waelabega anadolamalale,
a:pite Islael dima obape sosawe gi anadolamalale.
9Ma:ma gile enamada:la da: Ya:ikobope genamana gaganabina dala,
da: Islaelpe genama apeyana dala
da: sogolanapa gi bamina gi ilapalana dala
a:pite sogoda:na gi waelabega ilapalana dala.
10Da: Sayon saka a dede samina gile a:na:minenewa,
a:pite da: Yelusalem sosawe gile a:na:minenewa.
11Obape gaganabinate wisama gi babamina gi a:na:da:minini,
obape guwali dalate wisa gima wala gilala ladili,
obape pa: saoda:na gi lope ladeletedilina dalate pa: saoda:na gite saoda: gima lope ladeliyana, kipale gosa alelamada:le.
A:ma gi gobale obai LODope gagile gilala gwalemini.
LOD sa:da elelota.
Sa:dima eta galabe gite pa:pa pa:lamalelo.
12 #
Yel 26:18
Enobala da:pe ya:ma gi asema
Sayon saka egada a:na:pi pasaminamadili.
Yelusalem baigate kola:te sosawe dola bega elamalelo.
Balelamina genamate lelaloyana saka ameta oladana tilate apedilina saka elamalelo.
Currently Selected:
Maik 3: GBOTP
Highlight
Share
Copy
Want to have your highlights saved across all your devices? Sign up or sign in
Gogodala Bible Translation Project © Bible Society of Papua New Guinea, 2016.