Sepen 2
2
1Da: gaogoda:mina, da: gaogoda:mina,
O pisala gi binina baigabaiga.
2Omona:napa tepa pa: saolelona tepala
ya:ma kadepa ibowate kakapa alete welelona gi a:na:pi pa:lelo,
LODope kamalinapa ga:ote da:dima pa: pa:lelona tepala,
LODope kadepanapa mene gite da:dima pa: pa:lelona tepala.
3 LOD uwalela ga:o kadepala, da: ya:ma wana misa:mina luma,
obate da: danatolona gi a:na:da:minetedelewamena luma.
Sogola gi uwaledela, misa:mi gi uwaladela,
oba da: a:wada:minamaleloga,
ya:ma LODope ga:o kadepala.
Pilisitiya wama ladoloyana gilala
4Lumate Gasa baiga elatelamadili,
a:pite Asekalon baiga lumate titimite elatelamadili.
Kadepa tepama lelawela lumate A:sadod baigana wama datamidelamadili
a:pite Ekolon baiga gaminamadili.
5Kalama wasewa gegedala edelewamena luma da: sosawe eda:madelewa,
O Kiliyat baigana luma,
LODope gilalate da: asakada:mineno,
O Ka:inan, Pilikabiginapa baigayanapa wa.
Na: a: lapolamalowa,
a:pite eta lumagi menagite a:mala pa:pa elamalelo.
6Kalama wasewa gegedala dololona wa, a:mala Kiliyet lumate edeli,
a:ma saba sip tida:na dalimunu saba elamalelo, a:pite sip tate amale dowatelamadili.
7Yuda wana gwama pa:da:madilina lumumunu wa elamalelo,
obai ya:ma wala sa:sa:lena tila naenamadili.
Wa debe tepala obaite tenedelamadili,
Asakelonope gegenama gobala.
LOD obaimunu Godote obai mamanada:munamalelo,
amale obate obaimunu gi gwama sa:leda:munamalelo.
Mowa:bata: Amonota: gima gwalemonoyana gilala
8Na: Mowa:b wana lumate na:dowali luma a:ima etoda:mina gilala ladiliyana a enamadolowamena
a:pite Amon wana lumate kamali gilala ladiliyana gi,
obaite na:dowali lumadima pisala gilala ladiliyana
a:pite obaite obai gima potamina gilala wa gima ladiliyana.
9Enobala na: ne gibalamale elelowamena gile,
lalelowa, LOD Kamalinapa Islaelpe God,
gibalama, Mowa:b baiga Sodom baiga a:na:pi ewela,
Amoni wa Gomola baiga a:na:pi elamalelo,
tila menagida:te a:mala apedelamadili a:pite solo wa elamalelo.
Elomina tepala lumate a:mala pa:pa edelamadili gi ase elomina tepala a:napa wa elamlelo.
Na:dowali luma gwama pa:da:madilina obaite obai sasaba gwama alelamadili,
galabe gobala kanika:wada:madilina na:dowali lumate obaimunu wala apeyana edelamadili.
10Ma:ma enoba obaite obaimunu na: awagana: gile wisa egelamadili,
obaite LOD Kamlinapape luma a:ima etoda:mina gilala ladiliyana a:pite potamina gilala ladiliyana.
11 LODote obai kabigibegale emo gi datamalelo,
obate wa gobana ididali waelabega dapolamalelona tepala.
Baigabaiga waelabeyagaite oba balelaminamadili,
opa:pa:yana osasamale pa:diyana lumate oba balelaminamadili obaimunu wa gobala eda:dele.
Kus wama ladoloyana gilala
12 #
Ais 18:1-7
Kus wana luma da:niya:ta:,
na: na:dowali giwa:la gilile da: dapolamalowa.
Asiliya wama gwalemonoyana gilala
13Obate wawi ya:dema obape mai gigimite,
a:pite Asiliya wa lapolamalelo,
a:pite Nineba wa lapolale lapolamalelo
wi bininapa a:napa wa a:na:pi minamalelo.
14Wa gobana anekekeyapote a:mala dowatelamadili
a:pite isa wamida:na puwida:te a:mala edelamadili.
A:napa wala edeletedilina obota: isota:te
obaimunu gegenama papalala tenedelamadili.
Obaimunu gilalate genama totokaba gobala eyo edelamadili
kakapa tilimina ogosa tetepala dowatelamadili,
genama a:na:miyana sidina seda i waikola kadepate tudolamalelo.
15Ma:ma enoba na: awagana: kabiginapa baiga,
obate iwalelalo oba galabe bini eolage lalelo.
Obate obaya oba dima layana,
na: a:na:pinapa baiga eta bini.
Oba a sosawe bapi ewena,
wa waimunu a:me saba.
Wale pa:delina lumate oba iyaminadele
obaimunu mai oba dima pakakamite pipila:da:minamadili.
Currently Selected:
Sepen 2: GBOTP
Highlight
Share
Copy
Want to have your highlights saved across all your devices? Sign up or sign in
Gogodala Bible Translation Project © Bible Society of Papua New Guinea, 2016.