Sepen 3
3
Yelusalem baigape wapiki tepanapa gi
1Sosawe gi a:na:da:munoyana kabiginapa baiga a: sosawe elamalelo,
obate sosawebapinapa eladele luma alikikimina dapilotelelo.
2Oba gilalama pa: gima kamitanapa,
oba LODope kakami gilalama gima pa: kamitanapa.
Oba LOD pa:pa gibapiminano,
oba obape God auwama pa:pa pa:telelo.
3Obape opisol dala enobai kakamalina layon a:na:pi ulupodili,
obape gaganabina dala enobai debe tepala wamideletedilina wa soka: edili,
obai eta kadepana nana lopala pa: alitana.
4Obape Godope gilala ladeletana dala na: awagana: kabigida:na edeli,
obai seyada gidana dala.
Obape guwali dalate awana saba sosaweminini
a:pite kakami gilala ka:keminetedili.
5Kabiginapa baiga gobanapa LOD enoba sogolanapa,
oba sosawe gi pa:pa a:na:da:munotelelo.
Ibasege waelabegale oba sogolale gi babamunotelelo,
a:pite kanika:napa kadepa putolona tepala oba pa:pa bonogowalo,
ameta gi pa: sogoda:na luma pisala gi pa: itawada:.
6Na: eta:mi baigana luma a dapolowamena,
obaimunu tadana gegenama a titida:munowamena.
Obaimunu wamidilina nabidi tepala luma pa:pa wamidili,
luma waelabeyagai bini bapi.
Obaimunu kabiginapa baiga a giwa:lanate titida:miniwina,
eta lumagi menagite pa:pa elelo, bini bapi.
7Na: kabiginapa baiga dima layamana,
a: na: emoladele
a:pite ne a: sagabaminanowamena gi awapage lalamalelo.
Amale obape ela saba pa:pa titiminamalowa,
gwama na:dowali wisa oba dima pa:pa pa:lamalelo.
Ameta oba kabigibegale iwimunoyana
obape ela gi gobale sosawe gi a:na:munamalale.
8Enobala da: na:ma enamadela, LODote lalelo,
na: da: gima gibaba ela gima elamalowa.
Na: gi iwalela a sa:lemiwamena a:ibaiga waelabega gaogomunote,
baiga baiga waelabeyagai gaogoda:munamalale
a:pite na:dowali ga:o obai sidima saminamalale
enoba na:dowali kamalinapa ga:o ilabega.
Wa kabigibega ololamalowa,
enoba na:dowali nugu ga:o ila.
9Amale na: waelabega lumumunu magata pi wida:munamalowa,
obai waelabeyagaite LODope gagi omonenamada:le
a:pite menagimite oba dima gisaola edelamada:le.
10Kus wasewa emaya:dela,
na: balelana:miniyana luma, opa:pa:ya na:da: ediyana luma,
na: dima nagala lopala alete pa:da:madili.
11A:ma kadepala lumate a: papa pisalaminamadili,
ena: dima a:na:da:munoyana sosawena gima,
gi ase ma:ma baiga gobala
na: awagana: gima sa:keladilina luma wama auda:minamalowa.
A: pa:pa gwama na: awagana: elamalelo
na:dowali awana sakala.
12Ameta na: a: gobala elamalowa
gelanata: misa:minata:,
enobai LODope gagi gibapiminetedilina luma.
13 #
Eka 14:5
Isalalelape gwama pa:da:madilina luma soaswe gi pa:pa a:na:da:minamadili,
obaite sewata gilala pa:pa gwalemenamadili,
obaimunu magata gobala sewata gi pa:pa dololamalelo.
Obaite baya nanete tenedelamadili
a:pite eta lumagite obai emo gi pa:pa dapulamalelo.
14Dili gwaledo, O Sayonope aminagi,
mamabegale mamamido, O Islael.
Dili gwaleda:dele sa:kelo a:dowali gwana gobala,
O Yelusalemape aminagi.
15 LODote a:dowali wisa a wama egema:yana,
obate a: dima giwa:la ediliyana luma a wama eseda:miyana.
LOD, enoba Islaelpe kanaba, a:da elelo,
a: eta galabe gite pa:la gima pa:pa gwama emolamalelo.
16A:ma kadepala obaite Yelusalemadima lalamadili,
a: ege emo, O Sayon,
a:dowali mai ege a:ima bonogowada:minamalelo.
17 LOD a:dowali God a:da elelo,
oba kamalinapa giwa:lanapa a: dima ganabi lapila atamalelo.
Oba a: dima kabigibegale sa:kelolamalelo,
obate obape awe nagalale a: gelaminamalelo,
obate dili gwaleda: gile a: dima sa:kelolamalelo.
18Domoda:na pokopoko gima gwanasaweda: gi,
na: da: gobale wama milamalowa,
ma:mai gi da:dima menebega eladele pisala gi elamalelo.
19A:ma tepala ne gi a:na:minamalowa,
da:dima sosawe gi a:na:da:miniyana lumadima.
Na: a:i sauda:na lumumunu galabe pawamidamamalowa
a:pite wama opa:ya na:da: ediyana luma gwama gaogoda:munamalowa.
Na: obai dima sa:kela gita: ewama: gita: datamalowa
wa waelabegala obai pisalada:miayana sabala.
20A:ma tepala na: da: gaogoda:munamalowa,
a:ma tepala na: da: baigama alete pa:lamalowa.
Na: a: dima awaga gi atamalowa
a:pite wa gobana lumate a: dima sa:keladelamadili
ne a:dowali sa:sa:lena gi gwama pakakamunamalowamena tepala
da:dowali tao luliyabala,
LODote lalelo.
Currently Selected:
Sepen 3: GBOTP
Highlight
Share
Copy
Want to have your highlights saved across all your devices? Sign up or sign in
Gogodala Bible Translation Project © Bible Society of Papua New Guinea, 2016.