Jean 12
12
1Tokou ban ndò misä dongor ndò Pâque Jésus téh Béthanie té, béh té lo Lazare, nè ke Jésus orè mè bwa yo té leo.
2Nda mourou ke lowoul té nou darè, ke Marthe a da aredè, a Lazare mare doou kada ke isi kedè ke ön mourou ke Jésus.
3Tokou ban Marie oun kou yambo nard ke madji toï kada, ke narè ngeng nya, nda né gòl Jésus ke mbòrou gòlè ke bi dè, bai yambo dousou mè kei.
4A Judas Iscariot, mare doou kada ke horo ndjè kao gè tédjé, doou ke ata ndokè, nè mpana,
5Mbata di a nlabe yambo nèn mbata denier kòr mouta, a dare narè dangetédjé ang wa?
6Nè mpa yèn ang mbata mèa ndiki dangetédjé, a mbata nè nto ndjè boukou, ke bòl to dja té, ke nè ntaa narè ke dooudjé ongou mè té.
7Tokou ban Jésus pana, Ïyèdjé, nè ngem yambo nèn mbata ndò doubou ninim.
8Mbata dangetédjé eh kesè ke ndò toï, a ma méh kesè ke ndò toï ang.
9Tokou dooudjé baya baya ke horo Juifdjé té wo Jésus éh nou, dèdè ndé ta ko Jésus ke kadèba ang, a ndé ta ko Lazare tò, doou ke nè nòrè mè bwa yo té leo.
10Tokou ban tòkou ndjè kòrdjé ndedjina ta tòl Lazare tò.
11Mbata Juifdjé baya ïyadè, dèdè do mèdè té ke Jésus mbata la.
12Gè té ndò kada, dooudjé baya baya ke dé mbata ndò ke bo, tokou dèdè do Jésus ao dé Jérusalem té,
13Dèdè dao nti barkem kake mar, dwaa djidè té, dao ntila kem Jésus deo bo, dèdè mpa ke tarr, Hosanna. Pa tar ke madji ke nè ke ndé ke ri Mbaibé Seigneur, Mbaibé lo Israël.
14Tokou ban Jésus inga ngon kororo, nè nisi dè té, tokou maketourou lo Allah pa,
15Ïya bel, ngon ke dènè ke Sion.
Wo, mbaibé loi ao dé do ngon kororo té.
16Ndjè kao gè tédjé wo gel tar nèn dongor ang, a tokou Jésus inga piti mbä, tokou ban mèdè olè do tar té ke maketourou pa ke ria, ke dooudjé da né nèn sa mbä.
17Tokou ban dooudjé ke éh ke Jésus tokou mmar Lazare mè bwa yo té, ke nòrè horo ndjè yodjé té, dèdè mpa tar nadji nèn.
18Mbata nèn dooudjé baya baya ao ingè ke deo, mbata dèdè do tar né mori nèn ke nè nda tò.
19Tokou ban Pharisiendjé pa horodè té, Woidjé, edaidjé pi. Woidjé, dooudjé toï ao gè té mbä.
20Grecdjé kada kada éh horodè té nou, dèdè ndé ta doudjou Allah ndò té ke bo.
21Tokou ban dooudjé nèn dé rò Philippe té, doou ke Bethsaïda ke Galilée té, dèdè ndoudjè, mpana, Mbaibé, djèdjè ndiki ta ko Jésus.
22Philippe ao pa are André, André dè ke Philippe dao mpa dare Jésus.
23Jésus tél pa aredè, pana, Ndò dé mbä, mbata Ngon lo doou taa piti.
24Tokoro, tokoro, ma mpa maresè, tokou kandé ko oso nange a kwoei ang, éh ndja ke kadèba, a tokou nè noei, na kan marè nya.
25Doou ke ndiki tébe la, tébe la a nai, a doou ke mbeté tébe la do nange té nèn, nè na ngem tébe la mbata tébe ke ke ndò ke ndò.
26Tokou doou da sem, ase kare nè ndja gom té, ke loou ke méh kendé, ngonlokisi lom a kéh té to. Tokou doou da sem, Bòi Allah a pitè.
27Loshénè oumam sangem, a ma mpana di wa? Bòi, òromn ke kade té nèn? Eë, mam ndé ke kade nèn mbata tar nèn.
28Bòi, òsou gadji ri. Tokou ban ndou téh daka mè dara té, pana, Ma mpitè mbä, ke ma ma tél pitè bai.
29Tokou ban dooudjé baya baya ke arr nou, dèdè do ndou nèn, dèdè mpana, Ndi a ndange. Maredjé pana, Ange pa sa tar.
30Jésus tél tar pana, Ndou nèn dé mbata lom ang, a mbata losè.
31Saria ke nange nèn to loshénè, ta kila mbai ke nange nèn daka.
32Ma, tokou dèdè ntòm ke tarr nange nèn, ma ma kòrou dooudjé toï ke rom té.
33Nè mpa nèn mbata tòdjou deo kwoei ke nata kwoei.
34Tokou ban dooudjé ke baya baya tél pa arè, Djèdjè djo maketourou tar ndedji pana Christ ndja isi ke ndò ke ndò. Mbata di a epana, Ase ta kare nto Ngon lo doou ke tarr wa? Ngon lo doou a to doou di wa?
35Tokou ban Jésus pa aredè, Lokarè nai horosè té ngadji bai. Ndjaidjé tokou lokarè nai horosè té, mbata londoul ndoulsè ang, mbata doou ke ndja londoul té a geré loou ke ao kendé ang.
36Tokou lokarè éh kesè, woidjé mèsè té ke lokarè, baa ta kare asidjé ta dé to ngandjé ke lokarè té.
Tokou Jésus pa tar nèn mbä, nè ndai, nè niyaa rè ndeo kemdè té.
37Yèn ka nè nda né mori nya nodè té, dèdè nai do mèdè té sa ang.
38Baa ta kare tar lo prophète Ésaïe, ke nè mpa leo, ase ta dé to tar ke tokoro,
Mbaibé Seigneur, doou di a wo tar lodjè wa?
Ke doou di a wo dji Mbaibé Seigneur wa?
39Mbata tar nèn dèdè dase ko mèdè té ang, mbata Ésaïe pa mare loou té,
40Nè nto kemdè, ke nè nda mèdè ngeng,
Mbata dèdè dase ta ko ke kemdè ang,
Ke ta geré mèdè té ang,
Ke da mbeté deo lodè, baa ma kòrou rò too lodè.
41Ésaïe pa tar nèn leo, mbata nè no ndokoo la, ke nè mpa tar la.
42Ke horo mbaidjé té ka dooudjé nya wo mèdè té sa, a dèdè mpa ke daka ang mbata Pharisiendjé, mbata da kòroudè mè kei Allah té.
43Mbata dèdè ndiki piti lo dooudjé wota piti lo Allah.
44Jésus pa ke tarr, pana, Doou ke wo mèa té sem, a wo mèa té sem ang, a ke nè ke noulam.
45Ke doou ke wom a woè nè ke noulam.
46Mam ndé to lokarè ke nange nèn, mbata doou ke wo mèa té sem a kase ta kisi londoul té ang.
47Tokou doou wo tar lom a ngem ang, mam ngange saria la ang, mbata mam ndé ta gange saria ke dooudjé ke nange nèn ang, a ta kadji dooudjé ke nange nèn.
48Doou ke mbetem, a wo tar lom ang, kada to nèn a gange saria la. Tar ke ma mpa leo, tar nèn a gange saria la ndò té ke goukou.
49Mbata ma mpa tar ke mem té ndja ang, Bòi Allah ke oulam, nè mpa tar narem, tar ke nè ndiki ta karem mpa, ke tar ke ma mase ta pa.
50Mam ngeré tar la ke nè mpa to tébe ke ke ndò ke ndò. Tokou ban tar ke ma mpa, deo kadaba tokou Bòi Allah pa arem, ma mpa tokou ban.
Currently Selected:
Jean 12: KL1960
Highlight
Share
Copy
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here:
