Jean 13
13
1Ke dongor baa ndò Pâque ke bo, Jésus geré ndò la ta kïya nange nèn ta tél ke rò Bòi Allah té dé mbä. Mbata nè ndiki dooudjé la ke nange nèn, nè ndikidè sar ndò ke goukou toï.
2Tokou dèdè dao dön mourou ke lowoul té, mbata Satan ongou tar mè Judas Iscariot té dongor, ngon lo Simon, ta karè ndokè,
3Jésus, mbata nè ngeré Bòi Allah ongou né dja té toï mbä, mbata nè nï rò Allah té ke nè nao ntél ke rò Allah té,
4Nè nï ta table té, nè nòrou koubou la. Nè noun koubou bòrou rò, nè nto berè té.
5Gè té, nè nongou man bai té, nè nounkoutou toko gòl ndjè kao gè tédjé, ke nè mbòrou né gòldè ke koubou bòrou rò ke nto berè té.
6Tokou ban nè ndé rò Simon Pierre té, Pierre pa are, Mbaibé Seigneur, i a toko gèlem wa?
7Jésus tél pa arè, Né ke ma mao nda i a geré loshénè nèn ang, mare ndò ke dang baa a geré gelè.
8Pierre pa arè, I a toko gòlem ndò kada ang. Jésus tél pa arè, Tokou mam ntoki ang, i a kinga né lom kada ang.
9Simon Pierre pa arè, Mbaibé Seigneur, gòlem ke kadè ang, a djim ke dom tò.
10Jésus pa arè, Doou ke ndoko man mbä na toko gòlè kadaba, mbata rè toï arè, sésè ròsè arè, a sésè toï ang.
11Mbata nè ngeré doou ke ata ndokè, mbata yèn nè mpana, Sésè aridjé toï ang.
12Gè té tokou nè ntoko gòldè toï mbä, nè nto koubou la, a ntél nisi ta table té, nè mpa naredè, Sésè egeridjé né ke mam nda kesè wa?
13Sésè ebaremdjé Ndjè tòdjou tar ke Mbaibé Seigneur, yèn epaidjé madji, mbata ma méh ban.
14Tokou ma Mbaibé Seigneur ke Ndjè tòdjou tar, mam ntoko gòlsè, ase kare sésè etokoidjé gòlsè horosè té.
15Mbata mam ntòdjousè deo mbä, tokou ban sésè asidjé ta da tokou mam ntòdjousè tò.
16Tokoro, tokoro, ma mpa maresè, bere a kota ebèèdjè ang, ke ndjè koula a kota nè ke noulè ang.
17Tokou sésè egeridjé né nèn, ròsè a nèlsè tokou sésè edaidjé.
18Ma mpa tar losè toï ang, mam ngeré dèdè ke ma mberedè, a ta kare tar maketourou lo Allah ase ta dé to tar ke tokoro,
Nè ke nön sem mourou,
Nè ke nòrou gòlè ta koubam né.
19Tokou ban ma mpa maresè dongor baa né téh, mbata tokou né téh sésè asidjé ta ko mèsè té mam nto nè.
20Tokoro, tokoro, ma mpa maresè, doou ke taa doou ke moulè, a taam, ke doou ke taam a taa nè ke noulam.
21Tokou Jésus pa tar ban mbä, ndilè sangè, nè mpa tar né nèn, nè mpana, Tokoro, tokoro, ma mpa maresè, kada losè a ndokom.
22Tokou ban ndjè kao gè tédjé aa kemna kada kada, mbata dèdè nsange mèdè do doou té ke nè mpa tar la.
23Ndjè kao gè té kada ke Jésus ndikè, nisi ta table té, nè nto kare Jésus té.
24Tokou ban Simon Pierre kebe doou nèn, nè mpa narè, Epa aredjè ri doou ke nè mpa tar la.
25Nè ke nto kare Jésus té mpa narè, Mbaibé Seigneur, doou ke da wa?
26Tokou ban Jésus tél pana, To nè ke ma moukou mourou mòrou né nai marè. Tokou ban, goukoudang nè noun kese mourou nòrou né nai, nè nare Judas Iscariot, ngon lo Simon.
27Gè té Judas taa kese mourou nèn, Satan ande mèa té. Tokou ban Jésus pa arè, Né ke i ata da, eda loshénè loshénè.
28Doou kada ke isi ta table té geré ang mbata di a mpa sa tokou ban.
29Mbata maredjé edji mèdè té, mbata Judas éh ke bòl Jésus pa arè, Ndoko né ke djèdjè ndiki mbata ndò ke bo, aséh, nè nase kare né dangetédjé.
30Tokou ban, gè té ke nè ntaa kese mourou mbä, loshénè loshénè nè nao daka, a loou ndoul nga.
31Tokou ban, tokou nè nao daka mbä, Jésus pana, Loshénè Ngon lo doou inga piti mbä, ke Allah inga piti mèa té.
32Allah a karè piti mèa té ndja, a loshénè loshénè Allah a karè piti.
33Ngandjé ke ngadji, mam nai kesè ngadji bai. Sésè a sangemdjé, a tokou ma mpa mare Juifdjé leo, loou ke ma mao kendé, sésè asidjé téh ang, tokou ban ma mpa maresè loshénè.
34Ma mpa maresè ta ke to ke siki, sésè ndikidjéna horosè té, deo kadaba tokou mam ndikisè mbä, ase kare sésè ndikidjéna horosè té to.
35Deo ke nèn dooudjé toï a geré né sè to ndjè kao gom tédjé, tokou sésè ndikidjéna horosè té.
36Simon Pierre pa arè, Mbaibé Seigneur, i ao ke da wa? Jésus tél pana, Loou ke ma mao kendé, i ase ta kao gom té ke loshénè nèn ang. Mare ndò baa ase ta kao gom té.
37Pierre pa arè, Mbaibé Seigneur, mbata di a ma mase ta kao goi té ke loshénè nèn ang wa? Mam ndiki ta kïya tébe lom mbata loi.
38Jésus tél pana, I ndiki ta kïya tébe loi mbata lom wa? Tokoro, tokoro, ma mpa mari, i a mbetem gar mouta baa könra a nò.
Currently Selected:
Jean 13: KL1960
Highlight
Share
Copy
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here:
