Luc 1
1
1Mbata dooudjé nya ounkotè ta da mè maketourou té, tar né ke téh horodjè té,
2Deo kadaba tokou dèdè daredjè, dèdè ke do ke kemdè ke mpa tar nadji tar ndja dongor kèté.
3Ke mem té ma mo madji to, Théophile ke madji nya, ta da tar nèn mè maketourou té ke deoè té madji mbata loi, mbata mam nsange né toï gaté gaté ke ndò té ke dongor.
4Ta kari geré tar ke tokoro do né té ke dèdè ntòdjou leo.
5Ndò té lo Hérode, mbaibé ke Judée té, doou ke ndjè kòr kada éh tén, ria na Zacharie. Nè nto doou ke gel dooudjé té lo Abia. Nè ntaa dènè kada ke to gel ngandjé lo Aaron, ria na Elisabeth.
6Dèdè djokem nto gaté gaté kem Allah té, dèdè ndja deo tar ndedji té ke tar lo Mbaibé Seigneur madji, tar kada to dòdè té ang.
7A ngondè goto mbata Elisabeth to dènè ke ao katé, ke dèdè djokem ndé bouka mba.
8Bana tokou Zacharie da koula kòr no Allah té, ndò ke to tar la ta da,
9Deo té lo tar lo ndjè kòrdjé, ntoura dè té ta kao mè tokou kei té lo Mbaibé Seigneur ta nounga yambo.
10Dooudjé ke baya baya toï doudjou Allah loou té ke daka ke kade nounga yambo té.
11Ange lo Mbaibé Seigneur kada téh rò Zacharie té, nao narr er kòl bann té ke nounga yambo kendé.
12Tokou Zacharie wo ange, mèa ounda do biä ke bel dè.
13Ange pa arè, Eda bel ang, Zacharie. Allah wo doudjou loi, dènè loi Elisabeth a koudjou ngon ke dingao, i a kounda ria na Jean.
14I a kinga rònèl ke koukou, rò dooudjé baya a nèldè ndò koudjè té.
15Mbata nè na dé tokou kem Mbaibé Seigneur té. Nè na kaih vin ke koto ngadji ang, mèa a dousou ke Ndil ke madji toï ke ndò koudjè té.
16Nè na tél mè ngandjé lo Israël baya rò Mbaibé Allah té lodè.
17Nè na kao no Mbaibé Seigneur té ke ndil ke singa tokou lo Élie, ta tél mè bo ngandjé rò ngandè té, ke ta tél dooudjé ke ndjè mbeté tar ta ndja kemkarè té lo ndjè ke gaté gaté, ta da mè mare dooudjé dé gaté gaté mbata Mbaibé Seigneur ndja.
18Zacharie pa are ange, Ma ma geré tar nèn to di wa? Mbata mam nto bouka ke bal dènè lom baya nya to.
19Ange tél pa arè, Mam nto Gabriel ke arr no Allah té, nè noulam ta pa kari, ta kari tar ke madji nèn.
20Wo, gòsi a koutou, i a pa tar ang nderèng ndò té ke né nèn toï a dé, mbata i wo mei té ke tar lom ang, tar né toï ke a téh ke ndòè.
21Dooudjé ngebe Zacharie, ke mèdè edji mbata nè nisi gè eo nya mè tòkou kei Allah té.
22Tokou nè ntéh daka, nè nase ta pa tar kedè ang. Dèdè ngeré nè no né tokou lo ni mè tokou kei Allah té. Nè nyè dja naredè, a nè néh to doou ke pa tar ang.
23Tokou ndò koula la asenga, nè nao kei té la.
24Go ndò té ke nèn, dènè la Elisabeth waa sem. Nè niyaa rè nnè mi, mpana,
25Tokou ban Mbaibé Seigneur da sem ndò ke nè no tar lom leo, ta kòrou ròkoul lom horo dooudjé té.
26Ke nnè misä, Allah oula ange Gabriel béh té kada ke Galilée, ri béh nèn na Nazareth.
27Noulè rò ngomandé té kada, ke doou ria na Joseph doudjou ta tèè. Nè nto doou ke mè kei gel dooudjé té lo David. Ri ngomandé nèn na Marie.
28Ange dé rè té pana, Laphia, i kada ke inga mè madji mbä, Mbaibé Seigneur éh sei.
29Mè Marie ounda dè biä nya mbata tar nèn. Nè nedji mèa té tar laphia nèn to to di an wa?
30Ange pa arè, Eda bel ang Marie, mbata i inga mè madji kem Allah té mbä.
31Wo, i a kwaa sem, ke i a koudjou ngon ke dingao, i a kounda ria na Jésus.
32Nè na dé tokou, ke da barè ngon lo nè ke nouta toï.
Ke Mbaibé Allah a karè ngèndé mbai lo bèdjè David,
33Nè na ko kei lo Jacob ke ndè ke ndò, béh ko la a keo ndò kada ang.
34Marie pa are ange. Nèn ase ta dé to di wa, mbata mam ntaa ngao ang bai?
35Ange pa arè, Ndil ke madji toï a dé dòi té, ke singa lo nè ke nto nouta toï a kisi dòi té. Tokou ban ngon ke madji toï ke i a koudjè, da barè Ngon lo Allah.
36Wo, ngoköi Elisabeth ke to bouka dènè waa sem ngon ke dingao. Loshénè to nnè misä ke nè ke dèdè mmarè dènè ke ao katé.
37Mbata tar kada ke ngeng ke Allah goto.
38Marie pana. Wo, mam nto ngonlokisi ke dènè lo Mbaibé Seigneur, are né toï dé rom té deo té lo tar loi. Ange ao nga ïyè.
39Ndò té ke nèn, Marie ï ao loshénè loshénè mare nange té ke err to tén, ke béh té kada lo Juda.
40Nè nao mè kei té lo Zacharie, nda laphia Elisabeth.
41Tokou Elisabeth wo laphia lo Marie, ngon ï mèa té, ke mè Elisabeth dousou ke Ndil ke madji toï.
42Nè mpa ke tarr, I ke éh madji nya horo dènèdjé té, ke ngon ke téh mei té to madji nya.
43Tar ke madji nèn dé rom té mba di wa, mbata kö Mbaibé Seigneur lom dé rom té?
44Mbata wo, tokou ndou laphia loi oso mbim té, ngon ke mem té ï ke rònèl.
45Madji éh ke nè ke no mèa té mbä, tar toï ke Mbaibé Seigneur oula arè a dé tokou ban.
46Marie pana,
Mem piti Mbaibé Seigneur,
47Ke ndil lom isi ke rònèl mè Allah té, ndjè kadjim.
48Mbata nè no tar ke ba lo ngonlokisi la ke dènè.
Mbata wo, sar loshénè gel dooudjé toï da barem to dènè ke madji wota.
49Mbata nè ke nisi ke singa nya, nda tokou né mbata lom, ria na madji toï.
50Mè madji la to do dooudjé té ke da bel la, sar gel dooudjé té toï bal ke bal.
51Nè ntòdjou singa la ke dja, nè nsärè dèdè ke mpiti ròdè ndja ke kedji ke mèdè té.
52Nè nòrou tòkou dooudjé ke ngèndé mbai té lodè, ke nè mpiti dangetédjé.
53Nè nda baa dèdè ke disi ke boo ndan ke né ke madji, ke nè nare ndjè né kinga ta kao wel ba.
54Nè nouma ngonlokisi la Israël, mbata mè madji la ikè ang.
55Deo kadaba tokou nè mpa nare kadjèdjè, nare Abraham ke gel dooudjé la ke ndò ke ndò.
56Marie isi ke Elisabeth ase nnè mouta, gè té nè ntél béh la.
57Bana ndò koudjou lo Elisabeth dé nga, nè noudjou ngon ke dingao.
58Bokoradjé la ke ngaköèdjé do Mbaibé Seigneur da sa mè madji nya, ke ròdè nèldè sa.
59Ndò té ke djidjo dèdè ndé ta koudja ta mote ngon, ke dèdè ndiki ta kounda ria na Zacharie, deo kadaba tokou ri bèdjè.
60A këndjè pana. Eë, tokou ban ang, da bar ria na Jean.
61Dèdè mpa darè, Ri ngoköi kada to tokou ri nèn ang.
62Dèdè nyè djidè dare bèdjè, ta doudjè nè ndiki ri ngon nèn na na wa.
63Nè ndoudjou mbata maketourou, nè nda mè maketourou té, ria na Jean. Mèdè toï ounda do biä.
64Loshénè loshénè gòsou Zacharie oudja, ke ndë teï, nè mpa tar, nè mpiti Allah.
65Bel da dooudjé toï ke isi ngosiba kedè. Dooudjé pa tar nèn dò nange err té ke Judée toï.
66Dèdè toï ke do tarn lé ngem mèdè té, mpana, Ngon nèn a to di wa? Mbata dji Mbaibé Seigneur éh sa.
67Mè bèdjè Zacharie dousou ke Ndil ke madji toï. Nè mpa tar lo Allah ke daka, mpana,
68Madji éh ke Mbaibé Allah lo Israël, mbata nè ndé no dooudjé la, ke nè nadjidè mbä.
69Nè nare ndjè kadji ke ngeng ï tarr mè kei té lo ngonlokisi la David mbata lodjè.
70Deo kadaba tokou nè mpa deo ta té lo prophètedjé la ke madji toï, ndò té ke leo.
71Ke nè na kòroudjè dji ndjè kembaadjé té lodjè, ke djidè té toï ke mbetédjè to.
72Ta da mè madji ke nè nto nare kadjèdjè, ke ta kare mèa woei dò tar kwaana medji té ke madji toï la ang.
73Tar ke madji ke nè noubou né rè nare bòdjèdjè Abraham,
74Ta karedjè, djèdjè ke nòroudjè dji ndjè kembaadjé té lodjè, ta da koula sa ke bel ang,
75Ta da ke mè ndaa kaï ke gaté gaté nòè té ndò tébe té lodjè toï.
76I ngon, da bari prophète lo nè ke nto wota toï, mbata i a kao kèté no Mbaibé Seigneur té ta da deo la.
77Ta kare dooudjé la geré tar kadji deo kïya né ke madjang lodè.
78Deo mè madji té ke mè ndaa kaï lo Allah lodjè, mbata yèn baa lokarè ke ï ke tarr dé ròdjè té,
79Ta kare lokarè dèdè ke disi londoul té, ke disi kö ndil yo té, ta tòdjou gòldjè ta ndja deo mè woul té.
80Ngon nèn tokou ke nè ndé mongou deo ndil té. Nè nisi mè kòr té nderèng ndò ke nè ntéh daka kem dooudjé té lo Israël.
Currently Selected:
Luc 1: KL1960
Highlight
Share
Copy
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here:
