aMatiyu 16

Ánerawe shim á ta di itomong azhing

(aMar 8.11-13; aLuk 12.54-56)

1Áner aFarisi ne áfe aSadusi be̱ nufe aYeso nong a tú ku bo̱mo̱ng ye, a ra nye ike̱ng ikak ife azhing iya i tana tonong ye wu ne naza.

2aYeso fe̱ be ba ye, “Ke kawheshirim nye kaza seng ne yin fe̱ yin ye, kawheshirim, karo̱'me tà sas. 3Nadiding ne yin fe̱ yin ye, iza tà kpa katuur kamok yin ta di yin ane̱n ta tisik. Ke yin kyem i fe̱ yin itak natoon kuse kaza, amma yin kyem i fe̱ yin itak natoon ike̱re̱ i ta tseng kyo̱o̱rna baꞌ. 4Ámaan anerawe, áfe a ta won katsak áfe izam iyu shim a ta di itomong azhing, amma a ta ka nye ba'me baꞌ, ma ke ife aZhona.” Ayong aYeso dorok a tú ku won ba á ta tseng.

aYisti áner aFarisi ne áfe aSadusi

(aMar 8.14-21)

5Nizen ba ta tar agbang kudung ame álimazhiri tiburum abiredi ba. 6Ayong aYeso fe̱ be ba ye, “Nye yin tatan be ayisti áner aFarisi ne áfe aSadusi.”

7Ne á san ibo̱ro̱ng awan ba ye, “Ka kamok yir ta be yir abiredi baꞌ e̱?”

8aYeso tá ren ike̱ng ba ta sen ninye ibo̱ro̱ng natoon'e, yong a fe̱ be ba ye, “Yin áfe kuno̱o̱k katsak yin ta gop baꞌ, akye̱ sak yin sen fe̱ yin natoon abiredi e̱? 9Yin ren yin aꞌa? Yin ru yiring yin ágbang abiredi atoon ánerawe izungu itoon tá ya aꞌa? A ku tusung ribir'e iderse imang e̱? 10Ka izen ife mi tá no̱o̱k áner izungu inaas agbang abiredi kanataar a tá ya, iderse imang ne yin ku tusung yin ribir e̱? 11Akye̱ sak yin ren yin ye, sang natoon abiredi ne mi sen nife̱ baꞌ e̱? Mi fe̱ ye, nye tatan be ayisti aner aFarisi ne áfe aSadusi.” 12Iyong álimazhiri'me ren ye sang aYeso ti fe̱ natoon ayisti a tin nye abiredi baꞌ. A ti fe̱ natoon kubo̱so̱p áner aFarisi ne kufe áner aSadusi.

aBitrus fe̱ ye aYeso nye aKiristi

(aMar 8.27-29; aLuk 9.18-20)

13Nizen aYeso tá no̱ niben aKaisariya aFilipi, yong a rip álimazhiri wu ye, “Ánerawe fe̱ ye, mi, Igon Anerawe, mi nye angan e̱?”

14Iyong á fe̱ be wu ye, “Ákak fe̱ ye, aYohana aner abatisma; ákak fe̱ ye Iliya; ne ákak bun á fe̱ ye Irimiya; ka akak kaye̱e̱r aner kuzarap ayi.”

15aYeso tú ku rip ba ye, “To̱, yin ne̱? Yin fe̱ yin ye mi nye angan e̱?”

16Ayong aBitrus fe̱ be wu ye, “Wan ne i nye aKiristi, Igon Adakunom afe kuter.”

17aYeso fe̱ be wu ye, “aSiman igon aZhona, wan nye aner riye̱ rikan kamok sang anerawe ne a ta tonong iyu baꞌ, ma ke Ada mi afe a ta se kaye̱e̱r kaza ne a ta ka tonong. 18Kamok anong, mi fe̱ be wan ye, wan ne i nye aBitrus natoon kuta na ne mi tin no̱k ikilisiya mi, iya sang agap riku tana kyem a canang baꞌ. 19Mi tà ka no̱o̱k akarak kanukutu rigwo̱m kaza. Ike̱ng iya ne wan ros nazatse i ta se nurosom kaye̱e̱r kaza. Ike̱ng iya ne wan bisik nazatse i ta se nubisik kaye̱e̱r kaza.” 20Ayong a kpam álimazhiri wu ye, sang á tu tak akak ye, wu ne a nye aKiristi'me baꞌ.

aYeso zarap kuri riku wu

(aMar 8.31; 9.1; aLuk 9.22-27)

21Kum be izen iyong, aYeso san kufe̱ be álimazhiri wu kanang ye ma wu tseng na aUshalima nong a ta se so̱ iriri risam dide̱ng nibo̱k asho̱n be ágbang atsi ne áner kubo̱so̱p itsi ma a tà ku fe̱r. Nama inom itaar a tà ku dorok be kutser.

22Ayong aBitrus tú ku yis nukim a tá fe̱ be wu ye, “Adakunom ra roon'e, Atekasa, ike̱ng kuri iyu tà ka se̱ baꞌ.”

23Amma aYeso kirik a tá fe̱ be wu ye, “Kam be mi, Ishetan, wan sor ike̱ng mi tanin turuk kutak. Wan to̱ natoon ike̱re̱ iya Adakunom ta shim baꞌ, ma ife rinerawe.”

24Ayong aYeso fe̱ be álimazhiri wu ye, “Ke akak shim a tin kuus ma a rawu rice wu ne a sok kukon ku kutigak wu ne ni kuus. 25Koangan afe a ta shim a tà shesh kutser wu, a tin wei, aner aya a ti wei nutser wu kamok'i a ta se̱. 26Akye̱ kuri ike̱ng itek ne anerawe ta se̱ ke wu se̱ kazatse na kusum, amma a ti wei nutser wu e̱? Ka akye̱ ne anerawe tà no̱o̱k nong a tin shishing be kutser wu e̱? 27Kamok Igon Anerawe tà be̱ be kuyiik Ada wu ne kufe ámaleka nong a tà no̱o̱k koangan ishorong itomong wu. 28Won ta ka tak yin katsak'e, ákak kaye̱e̱r yin aze ta tsang á kus baꞌ, ma á di Igon Anerawe ta saase kyo̱ndi Agwo̱m kaye̱e̱r kuyiik wu.”

Currently Selected:

aMatiyu 16: izrNT

Highlight

Copy