aMarkus 1

aYohana aner abatisma ne a nye iren

(aMat 3.1-12; aLuk 3.1-9; aYoh 1.19-28)

1Iyuna ne i nye ime̱se̱ng Rife̱ Ritek natoon aYeso Kiristi, #1.1: aKiristi: fa: Akanang Ike̱re̱ Ikak, kaye̱e̱r nafarap'e nakak. Igon Adakunom'me.

2Kyo̱ndi a tá zibir kaye̱e̱r kufumung Ishaya, aner kuzarap ye:

“Mi tà tom atom mi nasho̱o̱n wan,

aya a tana ka nye iren,”

3“Kuto̱ akak yis kaye̱e̱r katse ye,

‘Nye yin Agwo̱m Ágwo̱m iren,

ku nye yin iren'e cop.’ ”

4aYohana be̱ be kunye abatisma #1.4: aBatisma: Iyu nye riso riya ri tana tonong ye, aner n shishing kuse wu. kaye̱e̱r katse, ne a fe̱ rife̱ natoon abatisma kushishing kuse nong a ta ku re̱ng ba rine̱n. 5Ánerawe iben aYahuda ne áfe aUshalima wuruk cice̱r nong a tá be̱s nufu. Á taas rine̱n ba, ne a ku nye ba abatisma kaye̱e̱ isho̱ng aUrdun. 6aYohana tes ares a tá nye be nakuyo̱ng arakumi, ne a rosom kudun kukpa nutin wu, ne a ya kubep be ashi ritong. 7A fe̱ be ba ye, “Nama mi, aner akak, aya afe a tin nar be kukyem ta be̱, aya afe mi tana kyem i tiguum nong ta bis idun akpatak wu baꞌ. 8Mi ta nye yin abatisma be ashi, amma wu tà ka nye yin abatisma be Kabik Kazhe̱l'e.”

A nye aYeso aBatisma

(aMat 3.13-17; aLuk 3.21-22)

9Nizen iyong aYeso dorok na aNazaret ni iben aGalili nong aYohana ta su ku nye abatisma ni isho̱ng aUrdun. 10Kum be kuwuruk wu kaye̱e̱r ashi'me ne a di kaza nukarak ne Kabik Kazhe̱l'e kyo̱ndi abo̱p ti tiik ni wu. 11Ne kuto̱ ne naza ye, “Wan ne i nye Igon'i kaya mi ta shim. Mi fok kusas wan dide̱ng.”

Ishetan bo̱mo̱ng aYeso

(aMat 4.1-11; aLuk 4.1-13)

12Nizen izining Kabik'e wor ka tseng be aYeso kaye̱e̱r katse, 13a sor azong kuko̱s iso̱k inaas ne Ishetan yiir kubo̱so̱p. aYeso se be ámaan ikewum azong ne ámaleka ni sak riye̱ ni wu.

aYeso san itomong na aGalili

(aMat 4.12-17; aLuk 4.14-15)

14Nama a tá te aYohana ni itso̱m, aYeso no̱ kaye̱e̱r aGalili, ne a taas Rife̱ Ritek Adakunom, 15ye, “Izen'e n nye, rigwo̱m Adakunom m be̱ bubarak. Shishing yin kuse yin ne i ni no̱o̱k yin katsak Rife̱ Ritek'e!”

aYeso yis áner anaas á tá se be kuyising izos

(aMat 4.18-22; aLuk 5.1-11)

16Nizen aYeso tá sen gor nukim agbang kudung aGalili, a di aSiman ne aronyining wu Adarawus. A sen te águnung ba kaye̱e̱r kudung'e, kamok ba nye aner kuyising izos. 17Ne aYeso fe̱ be ba ye, “Be̱ yin, ni kuus yin. Mi ta ka sak yin ta te yin áya a tana yising ánerawe kyo̱ndi i ta yising yin izos.” 18Zizirik á wor á won águnung ba ame, nong á tú ku kuus.

19Nizen iya a tá ra kutseng cie̱k, ne aYeso di aYakub igon aZabedi, ne aronyining wu aYohana kaye̱e̱r kukpara ashi, á se be kunye kanye̱k águnung ba. 20Ne aYeso wor a tú yis ba ne won atek ba aZabedi ne áfe itomong itso̱m kaye̱e̱r kukpara'me, nong á tá kuus aYeso.

aYeso ton aner akak ítseng

(aLuk 4.31-37)

21aYeso be áya a tú ku ku kuus be̱ kaye̱e̱r kuwo̱p aKapanum. Kunom Asabar tá fa nye, aYeso no̱ kaye̱e̱r kutu aduwa nong a tá bo̱so̱p ánerawe'me. 22Ánerawe'me te zhing be kubo̱so̱p wu, kamok a tú ku bo̱so̱p ba'me kyo̱ndi aner aya a ta be kukyem, sang kyo̱ndi aner aya a ta bo̱so̱p ánerawe Itsi baꞌ. 23Nizen iyong aner akak tuse azong a tá be amaan kabik. A ta kuto̱, 24ye, “aYeso afu aNazaret, wan tse̱r akye̱ be yir e̱? Wan m be̱ ta bin fe̱s yir a? Mi ta ren, wan nye Azhe̱l'e afe Adakunom!”

25Ayong aYeso tigba ámaan nabik'e ye, “Tigbik! Wuruk kaye̱e̱r aner na!” 26Ámaan nabik'e tú zuur aner ame. I tá kukun nong i tá wuruk. 27Ánerawe cice̱r te zhing ma á kpaan ku naka risim ye, “Kai, akye̱ na e̱? Kubo̱so̱p kufas be kukyem! Aner na fe̱ be ámaan nabik ne i ku fok.” 28Itak'e wor i tseng koake̱ kaye̱e̱r iben aGalili.

aYeso sak anyining abining aBitrus te atser

(aMat 8.14-15; aLuk 4.38-39)

29Be kuwuruk ba kaye̱e̱r kutu aduwa, á no̱ nasa aBitrus be Adarawus mak be aYakub ne aYohana. 30Anyining abining aBitrus se nameneng be kuro̱m kuzhoosh, yong á tak aYeso itak'e. 31Ayong aYeso tseng nufu, ne a yiir kubo̱k wu nong a tú ku ko̱ro̱k nong a tá sonong tsik. Kuro̱m kuzhoosh'e tú won yong a tú nyes ba.

aYeso sak ánerawe whe̱re̱ te atser

(aMat 8.16-17; aLuk 4.40-41)

32Nawheshirim'ong, nama kunom tá kpa, ánerawe be̱s be áfe iro̱k ne áfe amaan nabik nufe aYeso. 33Ánerawe kuwo̱p'e cice̱r nyim nanu kasa'me, 34ne aYeso sak áya a tá be iriri iro̱k whe̱r tá te atser. A turung ámaan nabik dide̱ng. A won ámaan nabik'e tá fe̱ kanu baꞌ, kamok ba ren ka wu nye angan'e.

aYeso be ninye aduwa

35Bop nadiding ne karo̱ rusek whi, aYeso dorok a tseng naro̱ kakak wu ze̱r, nong a tá se nye aduwa. 36Ayong aBitrus be áfudang akak tsang á ku tse̱r. 37Á tá fa ku se̱ ne á fe̱ be wu ye,

“Koangan sen tsang a ka tse̱r.”

38aYeso fe̱ be ba ye, “I tseng yir nuwo̱p kukak ku bubarak'e nong a se̱ mi ta taas rife̱ Adakunom azong gip. Iyu ne i sak mi tá be̱.” 39Iyong á tsang á tseng koake̱ kaye̱e̱r iben aGalili ne a tsang á taas rife̱ Adakunom kaye̱e̱r atu aduwa ba ne á turung ámaan nabik.

aYeso sak akparo̱ng akak te atser

(aMat 8.1-4; aLuk 5.12-16)

40Aner akak a tá be rikparo̱ng be̱ nufe aYeso, a tá be̱ tigbok akuur a tú ku nye izong nong a tá fe̱ be wu ye, “Ke wan shim, wan ta kyem i ni sak ta te zhe̱l.”

41Kaye̱e̱r kuro̱ riye̱, aYeso nabak kubo̱k nong a tá ra aner ame. Ne a fe̱ be wu ye, “Mi shim, te zhe̱l!” 42Rikparo̱ng ame wor ri won aner ame. Aner'e te atser.

43Ayong aYeso tú ku te ni iren be rife̱ be agap ye, 44“Sang a tu tak akak ike̱ng ikak natoon'e baꞌ. Amma tseng tá se tonong rice wan nufe atsi, ne i nye asidaka aya aMusa tá fe̱ ye a ra nye kamok kute zhe̱l wan nong i ta sor ike̱ng ife koangan tana ren.” 45Kum aner ame tá fa wuruk ne a kpaan kutaas'e koake̱ ma a sak aYeso ba kyem a no̱ kaye̱e̱r kuwo̱p'e baꞌ, a sor naro̱ anerawe tuse baꞌ. Gip be anong, ánerawe nes na naro̱ ze̱r ze̱r nong á be̱s nufu.

Currently Selected:

aMarkus 1: izrNT

Highlight

Copy