aMarkus 2

aYeso sak aner akak a tá we̱ abas azining te atser

(aMat 9.1-8; aLuk 5.17-26)

1Nama inom cie̱k, aYeso tú ku bun na aKapanum, ánerawe fok ye an be̱ kari. 2Ánerawe nyim dide̱ng nanu kasa'me, ma á tse̱r karo̱ sho̱ng, ma nanu kutu. aYeso'me tú taas ba Rife̱ Ritek. 3Áner ákak ba anaas be̱ be aner akak a tá we̱ abas azining, áner'e tú sok a tá be̱e̱n'e. 4Á kyem á tseng be wu nufe aYeso baꞌ, kamok ánerawe tá nar agap, iyong á tasak katoon kutu, bubarak be karo̱ kaya aYeso'me tú kuse, nong á tá tiik be aner kuro̱k'e natoon ike̱ng kameneng'e. 5Nizen aYeso tá di kuno̱o̱k katsak ba, iyong a fe̱ be aner a tá we̱ abas azining ame ye, “Acam, a ma ka re̱ng rine̱n wan.”

6To̱, áner kubo̱so̱p Itsi ákak se nusosok azong, iyong á to̱ kaye̱e̱r aye̱ ye, 7ne á fe̱ ye “Kamok akye̱, aner na fe̱ anong e̱? A zhe̱e̱sh Adakunom! Angan ta kyem a re̱ng anerawe rine̱n wu, sang ke Adakunom baꞌ e̱?”

8aYeso tá ren ike̱ng iya ba tá to̱ kaye̱e̱r aye̱ ba, iyong a fe̱ be ba ye, “Kamok akye̱ yin to̱ yin anong kaye̱e̱r aye̱ yin e̱? 9Inyaka ro̱ ne i nar e̱? A tana fe̱ be aner kuro̱k ye, ‘A ma ka re̱ng rine̱n wan,’ ka a ta fe̱ ye, ‘Dorok, sok ike̱ng kameneng wan nong ta tseng e̱?’ 10Amma nong yin ta ren yin ye Igon Anerawe be kukyem a tanin re̱ng rine̱n nazatse.” Ayong aYeso fe̱ be aner a tá we̱ abas azining ame ye, 11“Mi fe̱ be wan ye, dorok ta sok ike̱re̱ kameneng wan ta be kari.” 12Aner ame dorok, a tá sok ike̱re̱ kameneng wu ame nong a tá tseng ne koangan kuye̱re̱k. Iyu sak koangan te zhing yong á kerek Adakunom ne á fe̱ ye, “Yir kun di yir ana baꞌ.”

aYeso yis aLawi

(aMat 9.9-13; aLuk 5.27-32)

13aYeso bun awuruk a tá be nukim agbang kudung aGalili. Ánerawe whe̱re̱ be̱s nufu iyong a tú ku bo̱so̱p ba'me. 14aYeso'me tá se be kutsang tseng yong a di aner akak a tú ku yis ye aLawi igon Alfiyus, nusonong naro̱ kushashang itso̱m iben. Ayong aYeso fe̱ be wu ye, “Ni kuus,” iyong aLawi'me dorok nong a tú ku kuus.

15Katuk kakak, aYeso mak be álimazhiri wu se naya nasa aLawi. Áfe kushashang itso̱m iben ákak whe̱re̱ ne áfe rine̱n sen ya naya'me mak be wu ne álimazhiri'me, kamok ánerawe whe̱re̱ ne á tsang ku kuus. 16Nizen iya áner kubo̱so̱p Itsi ákak a tá nye áner aFarisi tá di aYeso ta sen yas be áfe rine̱n'ong ne áfe kushashang itso̱m iben. Iyong á rip álimazhiri wu ye, “Akye̱ sak wu tá yas be áfe kushashang itso̱m iben ne ‘Áfe rine̱n e̱?’ ”

17aYeso tá fa fok anong, ayong a fe̱ be ba ye, “Aner aya a ta nye atser tse̱r abok baꞌ, amma afe iro̱k tse̱r. Mi be̱ ta yis aya a ta di ye ba se gye̱r nasho̱o̱n Adakunom baꞌ, amma áfe rine̱n.”

Kurip natoon kunye azumi

(aMat 9.14-17; aLuk 5.33-39)

18To̱, nizen iyong álimazhiri aYohana aner abatisma ne áner aFarisi sen nye azumi. Áner ákak be̱ nufe aYeso nong á tú ku rip ye, “Akye̱ sak álimazhiri aYohana ne áner aFarisi tá nye azumi amma afuan ta sen yas e̱?”

19Ayong aYeso fe̱ be ba ye, “Áfertseng aner a ta sok abining afas ta nye azumi kum ne ba rusek mak be aner a tá sok abining afas'e a? Kum ke i nye ye ba rusek mak be aner kuwe̱ne̱ng kufas'e, ba ta kyem a sor anong baꞌ. 20Izen saase ife a tana kam aner a ta sok abining afas'e be ba. Nizen iyong ne ba tà nye azumi.

21“A sok kures kufas, nong a ta tos be itan'e izen baꞌ, ke a nye anong, itan'e iyong ta bun i furuk, ne karo̱'me nibarang kusarak. 22Akak korok ashi anap #2.22: Ashi Anap: fa: Akanang Ike̱re̱ Ikak, kaye̱e̱r nafarap'e nakak. afas kaye̱e̱r ariding kukpa kuzen baꞌ, ke a nye anong, ashi anap'e ta sarak ariding'e. Ei, a korok ashi anap afas kaye̱e̱r ariding kukpa kufas.”

Kurip natoon kunom Asabar

(aMat 12.1-8; aLuk 6.1-5)

23Katuk Asabar akak, aYeso ku sen gor kaye̱e̱r riko̱ alikama rikak mak be álimazhiri wu. Á se ba be kutseng ne álimazhiri wu a kpaan bo̱s ace alikama'me ne á ya. 24Iyong áner aFarisi fe̱ be wu ye, “Di, ike̱ng iya álimazhiri wan ta nye. Akye̱ sak ba nye ike̱ng iya Itsi ta roon kunye'me katuk Asabar e̱?”

25Ayong aYeso fe̱ be ba ye, “Yin kun fa yin ike̱ng iya aDauda tá nye nizen wu be ánerawe wu tá be baꞌ, ne á fok izong aꞌa? 26Nizen Abiyata tá nye agbang atsi, á no̱ naro̱ a tú ku ya Adakunom iben nong a tá ya abiredi azhe̱l'e, aya ta se gye̱r ke ba ya baꞌ, ma ke átsi tsek. Ma a no̱o̱k áfudang kutseng wu nong á tá gip.”

27Ne aYeso ya kasho̱o̱n be rife̱ wu ye, “A nye Asabar kamok anerawe, sang anerawe kamok Asabar baꞌ. 28Kamok anong, Igon Anerawe ne a nye Agwo̱m Ágwo̱m natoon Asabar gip.”

Currently Selected:

aMarkus 2: izrNT

Highlight

Copy