aMarkus 5

aYeso sak aner akak a tá be amaan kabik te atser

(aMat 8.28-34; aLuk 8.26-39)

1aYeso mak be álimazhiri wu nong á tá tar agbang kudung kukak, ku ta se ni iben áner aGarasi. 2Nizen iya aYeso tá wuruk kaye̱e̱r kukpara ashi, aner akak a tá be amaan kabik wuruk naro̱ a tú ku ne̱se̱k ánerawe, nong a tá nyim be aYeso'me. 3Aner'e sor naro̱ are̱k, akak kyem a tú ku yiir nong a tá rosom baꞌ, ko be atso̱m gip. 4Kamok an me̱ ne a ku rosom ibo̱k be atak be idun kutso̱m, amma ne a te̱se̱ng cei. Akak kyem be wu baꞌ. 5Katuk be kunom, a tsang a gorok are̱k ne nawhanang be kukun, ne tse̱k kuro̱m wu na ata.

6Nizen iya a tá di aYeso gugo̱k, a teng nong a tá se tigbok akuur nasho̱o̱n wu. 7A tá kuto̱ ye, “aYeso, Igon Adakunom Agbang Agwo̱m Ágwo̱m, wan tse̱r akye̱ be mi e̱? Shu be riyerek Adakunom ye wan tin no̱o̱k risam baꞌ.” 8A fe̱ anong, kamok aYeso tá fe̱ be wu ye, “Wuruk kaye̱e̱r aner na, wan amaan kabik!”

9Ayong aYeso tú ku rip ye, “Riyerek wan nye angan e̱?” Ne a fe̱ ye, “Riyerek'i nye ‘Whe̱re̱’, kamok i se yir whe̱re̱.” 10A yiir nye aYeso akusuk ye, sang a tú ro ámaan nabik'e naro̱'ong baꞌ.

11Kukpara álade tuse bubarak azong, a tá sen ya nukim kawhanang. 12Ámaan nabik ame nye aYeso akusuk ye, a ru ku tomong ba kaye̱e̱r álade'me nong á ta se no̱ kaye̱e̱r'e. 13aYeso tú won ba, nong á tá no̱ kaye̱e̱r álade ame. Kukpara álade'me se izungu ifa. Álade ame tisik rigung'e be itsi nong á ta se kpas nudung nong á tá kus.

14Áner áya a ta se be ku ni sak riye̱ na álade ame tsang á teng nong á ta se taas ike̱ng iya i tá nye kaye̱e̱r kuwo̱p ne ni iwo̱p izhizhe̱k'e i ta se bubarak. Ne anerawe'me wuruk nong á tá be̱ di ike̱ng i tan nye. 15Nizen á tá be̱ nufe aYeso á di aner aya a tá tsang a be amaan nabik whe̱r ame nusonong. An te ares nong a tá mu ku bun gye̱r kyo̱ndi aner aya rice wu ta se rizining, yong inyim tú ro̱ ba. 16Áya á tá di ike̱re̱'me tseng nong á ta se taas ánerawe ike̱re̱ iya aYeso tá nye be aner a tá be amaan nabik ame, ne itak natoon alade ame gip. 17Iyong ánerawe'me kpaan kunye aYeso akusuk ye, a ra ka won ba iben ba.

18aYeso ta sen no̱ kaye̱e̱r kukpara ame, ne aner aya a tá be ítseng ame nye aYeso izong ye wu ta tseng be wu. 19aYeso tu shim'e baꞌ, amma a fe̱ be wu ye, “Tseng kari nufe aner wan, ta su ku tak ba agbang ike̱ng iya Adakunom tá nye kamok wan, be kuri iren ife wu ta ro̱ riye̱ wan.” 20Ayong aner ame tseng ne tsang a taas na kaben ka ta be iwo̱p kuso̱k kuri agbang ike̱ng iya aYeso tá nye kamok wu. Ne anerawe ame cei te zhing.

Kanamang kakak ka ta tsang ka ku ne abining akak a ta ra kanu kukpiin aYeso

(aMat 9.18-26; aLuk 8.40-56)

21Nizen aYeso tá bun a tar kunyi agbang kudung aGalili be kukpara ashi, rigwo̱m ánerawe tú gorok azong nukim kudung'e. 22Ayong aner akak a tú ku yis ye aZharus, a tá nye ako̱k kasho̱o̱n kutu aduwa be̱ azong. A tá fa di aYeso ne a kpa na atak wu, 23nong a tá yiir ku nye izong ye, “Kabangas'i sen ku. Kusuk be̱ nong ta be̱e̱n sak kubo̱k wan ni wu nong a se̱ a ta te atser ne a sor atser.” 24Ayong aYeso tseng be wu. Rigwo̱m ánerawe whe̱re̱ tú kuus ma a tú firik.

25Abining akak tuse azong, aya naso̱k tá taas, ma aye̱ kuso̱k be afa. 26An so̱ risam be katsak nubo̱k ábok whe̱re̱, an fe̱r itso̱m wu cei, amma ni kum ke a ra kute, kuro̱m'e bun ku tibarang ingya. 27Nizen iya a tá fok itak aYeso, a no̱ kaye̱e̱r rigwo̱m ánerawe nong a tá se wuruk nabas kama aYeso, nong a tá ra kanu kukpiin aYeso ame, 28kamok a to̱ riye̱ wu ye, “Ke mi ra kukpiin wu tsek, mi ta te atser.” 29A tá ra kukpiin aYeso'me ne naso̱k'e wor na nyeseng, ne a fok kaye̱e̱r kuro̱m wu ye wu n te atser kaye̱e̱r risam wu.

30Nizen iyong, aYeso wor a ren ye kukyem n wuruk kaye̱e̱r kuro̱m wu. Ayong a kirik nabas ánerawe ame, nong a tú ku rip ba ye, “Angan ra kukpiin'i e̱?”

31Iyong, álimazhiri wu fe̱ be wu ye, “Wan di rigwo̱m ánerawe tá ma ka firik name, ne wan bun i rip ye, ‘Angan ti ra e̱?’ ”

32Amma aYeso yiir ye̱re̱k ne a gorok, ka a ta di aner a tú ku ra'e. 33Ayong abining ame a tá ren ike̱ng iya i tá nye kaye̱e̱r kuro̱m wu, be̱ a tá be kpa na atak aYeso'me be ikap kutiim ne inyim nong a tú ku tak katsak'e cei. 34Ayong aYeso fe̱ be wu ye, “Angas, kuno̱o̱k katsak wan sak wan te atser. Tseng caang wan n te atser kaye̱e̱r kuro̱k wan.”

35Nizen aYeso tá ru fe̱ anong, áner ákak ne nasa aZharus, ako̱k kasho̱o̱n kutu aduwa, nong á tá be fe̱ be wu ye, “Angas wan n ku. Akye̱ sak wan tá bun i daam aner kubo̱so̱p e̱?”

36aYeso ti tar kuto̱ natoon ike̱ng iya ba tin fe̱ baꞌ. Ayong a fe̱ be ako̱k kasho̱o̱n kutu aduwa ame ye; “Sang tu fok inyim baꞌ, no̱o̱k katsak tsek.”

37aYeso shim akak tú tseng mak be wu baꞌ, ma aBitrus, be aYakub, ne aYohana aronyining aYakub'me. 38Nizen á tá be̱ nasa ako̱k kasho̱o̱n kutu aduwa ame, aYeso di ánerawe tá washam ne á tang ikun be nanak dide̱ng. 39Ayong a no̱ kaye̱e̱r'e nong a tá fe̱ be ba ye, “Akye̱ sak yin washam yin ne i tang yin ikun be nanak dide̱ng cice̱r ana e̱? Kanamang'e n ku baꞌ, a se be ida tsek.” 40Amma ánerawe'me tú mas.

aYeso tú ku tun ba nufang cice̱r, ne a yis atek kanamang ame be anyining'e, ne álimazhiri áya a tá se mak be wu, nong á tá no̱ naro̱ igon'e tú kuse. 41aYeso ko̱ro̱k kubo̱k kanamang ame, nong a ta fe̱ be wu ye, “aTalita kum!” (I ta sor ye, “Kaban kanamang, mi fe̱ be wan ye dorok!”) 42Zizirik kanamang ame wor ka dorok nong ka tá san kutseng, ka se aye̱ kuso̱k be afa. Anong sak ánerawe ame te zhing dide̱ng. 43Amma aYeso fe̱ be ba be agap ye, sang akak tú fok itak na baꞌ, ne a fe̱ be ba ye á ra no̱o̱k kanamang'e ike̱ng ikak nong a tá ya.

Currently Selected:

aMarkus 5: izrNT

Highlight

Copy