Luka 23

Isa fuwu Gomna Bilatussen

(Mat 27.11-14; Mar 15.1-5; Yah 18.28-38)

1Daji majiliswu samma cijane Isaa fuwu Gomna Bilatussero caade 2ayau gǝnaduwu badiyera. Tayiye: «Kam adǝ jamandea tuɍu cadoro tǝmbaljiyi nayeyeiye. Kaisarro akki njo dapciyi, koro tima Almasiwu maidǝ wo cǝni,» yera. 3Bilatusse tiro: «Nima wa Mai Yaudiyayedǝ wo?» cǝne tia kiworo. Isaye: «Nima wullǝm, wuma!» yeno. 4Daji Bilatusse wurawa ɍimannaye-a jama captanadǝ-aro: «Kam adǝlan ayau fima fandǝkkǝni,» yeno. 5Amma amdǝ cayea kojǝnaro kowo sapcane: «Alamdunjun jamande cidi Yahudiyaye sammaa jawallan cuttuluwi, cidi Galileyen badije har na adǝro kadio,» yera.

Isa fuwu Mai Hirudussen

6Bilatus adǝa fangenniya, Isa kam Galileye waro kiworo. 7Isa kam Galile cidi duwon Mai Hirudus cunodidǝyero asuyenniya, cakke Isaa na maidǝyero kesado, sa adǝn ti ye Jerujalemnin nangaro. 8Mai Hirudus Isaa kirunniya, karwunju jauro kǝjiyeno. Tussǝna ti-a tado cǝraana, dalilnjudǝ calan lawarnju fanjǝna, koro alama laa sameye tiyen kuroro tǝmajǝna nangaro. 9Koro kada tiro kiddo, amma Isa awima tiro kalakcǝgǝnni. 10Wurawa ɍimannaye-a malǝmba Attauraye-a ye nadǝn daada tia jauro burwujai. 11Mai Hirudus ye sojiyanju-a rokko tiro rudu gǝnajagane rarayera. Daji kalwu darajaa tiro lujagane na Bilatussero kalakkera. 12Caman Mai Hirudus-a Gomna Bilatus-aye kattenja kuttu duwon, yim adǝman kǝjijane sawaro walyera.

Isaro shara karmoye kamduwu

(Mat 27.15-26; Mar 15.6-15; Yah 18.39–19.16a)

13Daji Gomna Bilatus wurawa ɍimannaye-a amwurawa jamaye-a jamadǝ-aa bowoje 14tayiro: «Kam adǝ jamadǝa tuɍu cadoro tǝmbaljiyi nuwe naniro kiwuduw. Fuwundon tiro koro kiddǝkkǝniya, ayau tiro gǝnagǝwwadǝn falma fandǝkkǝni. 15Koro Mai Hirudus ye cuwandǝnni nangaro, cakke tia kalakkera. Akko awima tia roro njejoye cǝdǝna bawo. 16Adǝ nangaro yakkǝkke tia kirwon jajarjane salammǝkki,» yeno. 17[Caman kǝla adayen sala adǝn kosoma fal tayiro salamjiyi.]

18Daji jama samma ci tiloaro kowo sapcane: «A’a! Kam adǝye ronju tuluwe! Barabbassa andiro salamsagane!» yera. 19Ti Barabbasdǝ, bǝrnilan tuɍu cade kam laaa ceyesǝnadǝro, tia kosoro casakkǝna. 20Bilatus Isaa salamjiya cǝraanadǝ, walde tayiro manayeyeno, 21amma kowo sapcane: «Kǝskaro tia jagǝne! Kǝskaro tia jagǝne no!» cani. 22Yakkuyedǝn walde tayiro: «Awiro? Ayau awiye cǝdo? Awima roro njejoye tilan fandǝkkǝni. Adǝ nangaro yakkǝkke tia kirwon jajarjane salammǝkki,» yeno. 23Amma jamadǝ caye baworo kowo sapcane Isaa kǝskaro jajuwo no cane, har kowonjan nasargadara. 24Daji Bilatus shara kamje awo caworǝnadǝa tǝdi yeno. 25Kam tia caworǝna, kam duwon tuɍu-a kam njejo-a nangaro kosoro casakkǝnadǝa salamgeno, amma Isaa awo caraanadǝa cadoro mukkonjaro kekko.

Isaa kǝskaro jaduwu

(Mat 27.32-44; Mar 15.21-32; Yah 19.16b-27)

26Sojiya Isaa caadi duwon, kam laa bǝla Kuraneye cunju Siman karaan isidǝa cadane kǝska karmoyedǝa ngoje ngawo Isaye jǝgane leyera. 27Curo jama tǝrǝm ngawonju jagaidǝyen kamuwa kada ti nangaro karwukuttaro nganji bakcai ye, casiri ye mbeji. 28Daji Isa suworde tayiro: «Kamuwa Jerujalembe, bare wu nangaro yiruwwi! Kǝlando-a njuɍiyando-aro yikkirowo! 29Nonowo, sa laa cǝde ambe: “Barganja kamuwa rakcane casambiwawodǝ! Barganja kamuwa ngaltema casambǝne tǝgam cadǝnnidǝ!” cani. 30Sadǝn kauwa kuruwuro: “Kǝlandero yukkurowo!” koro kǝriso yero: “Andia jansanowo!” wuldu badijai. 31Awoa kǝska kǝɍidǝro ngai caddia, awi gǝle kǝska ngamdudǝro wakkajiyi?»

32Sojiyadǝ gǝndewu yindi yea ti-a rokko njejoro kesado. 33Na tiro Buwo Kǝlaye canidǝro kadiranniya, nadǝn Isaa kǝskadǝro jayeyera. Gǝndewu yindidǝ yea jayeyera, faldǝ kǝmboramnjulan, faldǝ ye wailanjulan. 34Daji Isaye: «Bawani, tayia gawurne, awo cadi nojanni nangaro,» yeno. Sojiyadǝ kajǝmunju ngojane walawala cade dagaryera. 35Jamadǝ nadǝn daada carui ngai duwon, amwurawadǝ tiro rudu gǝnajagane: «Am gadea cǝkkaana. Tima Almasiwu Ala kǝrejǝnaa, nda kǝlanju cǝmowo!» cani. 36Sojiyadǝ ye tia rujane nanjuro isane tiro diben comcom sajagane: 37«Ni Mai Yaudiyayedǝa, kǝlanǝm moye!» cani. 38Kǝlakajinjun adǝa allolan ruwuwada: TI ADƎMA MAI YAUDIYAYE WO.

39Gǝndewu yindi jajaanadǝye falnja Isaro manakuttu cǝdde: «Nima gǝna Almasiwudǝ wo? Nda kǝlanǝm moye, andi yea sakkaye!» 40Amma faldǝ ye kamanjuro jǝkkade: «A! Ni yero shara ro tuluwoye njaddǝnama, Alaa rinǝmbawodǝ? 41Kaandedǝ jussǝna, diwi diyena nangaro ajawu gǝnasaana, amma kam adǝ awima diwi cǝdǝnni,» yeno. 42Daji walde: «Isa, kǝrmainǝm fandǝmiya, wua kǝlan sǝdai,» yenniya, 43Isaye: «Jiremaro niro wulnjǝgǝkki, kumaro wu-a rokko jannalan dǝgaiye,» yeno.

Karmo Isaye

(Mat 27.45-56; Mar 15.33-41; Yah 19.28-37)

44Kausu kǝla dawu duwon, dunia nga tǝmje cǝlǝmbo walje, har sa yakku kajiriyero kiado, 45kǝngal ye wasturo wayeno. Sa adǝn juwa curo *Fado Alayen dǝganadǝ farak yindiro kargadan. 46Daji Isa kowo dunoaro sapce: «Bawani, roni curo mukkonǝmbero yakkǝkki,» yenniya, ro kirǝmbo. 47Kajalla sojiyayedǝ awo wakkajǝna sammaa kirunniya, Alaa jajakce: «Fagatto kam adǝ jirema!» yeno. 48Jama kada na lamar adǝyen captanadǝ ye awo wakkajǝna sammaa kerunniya, karwukuttaro nganji bakcaiaro walladara. 49Amma am Isaa nojanadǝ-a kamuwa tia cidi Galileyen jaane isanadǝ-a kuruwunin daada awo ania lawarjai kasarga.

______________________________________________________________________

Kalmaram: Fado Alaye

Fado Alayedǝ Jerujalemnin kǝrga. Fadodǝn soro mafǝndi-a balballa yindi-a mbeji. Curo soro mafǝndidǝyen na jauro tayir tiro na Ala-a tadoye cani-a juwa nadǝa gǝraji-a mbeji. Kǝrwu fi yayen yim laya gawara fandoyea ɍiman kuradǝ laya duwaje na Ala-a tadoyedǝro ngayi. Laya duwajiya, ɍiman kuradǝ budǝa ngoje Ala biwu jamanjuye cinjo tayia ardijoro na Ala-a tadoyedǝro ngaye fuwu Kǝmandeyen fiji. Nonowo, ɍiman kuraro kajiya, kam gadero juwadǝa koje nanjuro ngawodǝ amardǝgǝnni, bare nunniro.

Sa Bargaande Isa Almasiwu ronju ce nuna kaldǝn, juwa na Ala-a tadoye gǝrajǝnadǝ farak yindiro kargadan. Adǝ noduwuram Kǝmande Isa ronju njodǝa ardijǝnaye. Barga adǝyen jawal Ala-a tadoyedǝ kǝrma kaada, maananju am Isa Almasiwua jaanadǝ gawara cawande bu fida gade bawoaro nodo bargaa Alayero ngasayiro walyeno.

______________________________________________________________________

Sittǝra Isaye

(Mat 27.57-61; Mar 15.42-47; Yah 19.38-42)

50Kam laa nadǝn mbeji, cunju Isuwu. Tidǝ kam ngǝlama ye, jirema ye, 51kam Arimatiya cidi Yahudiyaye, koro nodo bargaa Alayedǝa gureji. Ti majiliswudǝye falnja yaye, awo amanju niajane Isaro caddǝnadǝa kasaccǝnni. 52Daji Isuwu na Gomna Bilatussero leje kamin Isayedǝa kiworo. 53Kamindǝa kǝskadǝlan cǝsaye lowowon batta linnen kǝkǝrje kauri duwon curo kauyen laada wundumaa casakkǝnniro cakke sǝnayeno. 54Yimdǝ yim dabbarduye,#23.54 yim dabbarduye - Jǝmma, yim tustuye sǝbdu. koro yim tustuye badidunju del karǝnjǝna. 55Kamuwa duwon Isa-a rokko cidi Galileyen isanadǝ ye jaane kauridǝa lawarjane jiɍi kaminnju sǝnajanadǝa kero. 56Daji waldane kawudi-a kǝndawu-a dabbaryera. Yim tustuyea kǝla wadayen tuskera.

Currently Selected:

Luka 23: kby

Highlight

Copy