LUK 1

I Luk mo veve sere huri hava gineu nge u reve na revereve ngaha Tueku Tiovilas

1Ngere rau sao rau vei lei huri ram reve na roro huri na gineu ngerehi rau vomai lolo livugada. 2Rau reve na roro ngaha, dau rongoe beno denire tangaloi ngerehi rau lehi na gineu ingere ngaha gitomue, siu ram ngasaginie. 3Siu, Tiovilas, iniko a tangaloi lawua, nau hikehike vurugegi huri na roro ngaha u teuvuigi lo vuigi redu. Siu nam lado ve u garea huri ve neu nan reve na gineu doluegi ngerehi nan tau vovohoi ginire. 4Siu nam tarani ve gon ilo vurugegi na halai gineu ngerehi rau huhuigo ginire beno.

Mo serelue huri na vorana noi Jon Garuhigogona

5Lo taro hi i Herot u ratahigi lolo vanue Judia, a rugurugu gatagale a henana i Sekaraea, ingeie talo burigi noi Abia. A henai gahorana i Elisabet; ingeie vage talo duvire rugurugu, ngehi a duvi Eron. 6Ingere vunu ru toga vovohoi lo nagoi God, ko ru tabe vurugegi na Leo hora nona Huqe doluegi. 7Ingere rohe hako te maresu huri Elisabet he bavabava tea, ko ingere vunu ru sesea.

8Lo rani gatagale i Sekaraea mo vai na nona tabanagi mwere na tangaloi lalakogi lo Sara Gogona, mwerehi mo lalakogi vatahatarogi. 9Mo hure na lengagi nora rugurugu, ram tuli na tais ram haqea vin ingeie vin hure na gai buhoru lo tanoi rugurugu. Siu ingeie mo vano sulolo vale gogona nona Huqe, 10lune a sinobu ram toga varea ram tataro lo tarogi hi mo hure na gai buhoru. 11A engsel nona Huqe mo vomai mo serelue lawea, mo labe lobe na tanoi hure na gai buhoru lo matue. 12Lo taro hi i Sekaraea mo lehe, mo vai vutugegi go mo matagu. 13Nge a engsel mo veve lawea vena, “Sekaraea, gon mese matagu! God u rongo na nomu tataro, ko i gahoramu Elisabet vin bava netumu a maresu mwera. Iniko goin suri na henana ve i Jon. 14Iniko goin rong garea ko nego goin hevuhevu liu, go a sinobu rain hevuhevu lune ingeie vin vora. 15Huri ingeie vin voragi na tangaloi lawua lo nagoi Huqe. Vin he inu na waen tea sige a wai mwamwavi. Lo tarogi hi nge mo toga tau mosigei lolo taqangi retahine e ingeie horo gena Vui Gogona. 16Ko nge vin lei na sinobu sao a duvi Israel taligu lawe na Huqe a nora God. 17Nge vin vano tomuegi na Huqe, u huire ko muremure mwere na tangaloi ligoligogi i Elaeja. Ingeie vin lei bubugi ira tama koi reneture taligu, nge ve dore na sinobu hi ram galogalo lo leo vanai taligu sulo matahala vovohoi; Ingeie vin ve vagatai na sinobu nona Huqe raraie.”

18I Sekaraea mo veve lawe na engsel vena, “?Nain iloe wuraha ve vin mwere ngaha? Huri ineu nau tamaragai beno ko i gahoraku u tubui vage.”

19A engsel mo duvi vena, “Ineu Kabriel. Nam labe lo nagoi God; nge mo horau ve nain laqa lawego ko nain veve na Roro Garea ngaha lawego. 20Nge gohe ladohogo tea lo noku leo ngaha, nge vin vomai lo taro vovohoi hi. Huri gohe ladohogo tea, goin he gato lai tea, goin toga rorongo vin dadari lo rani ngehi a noku leo hi vin eno lune.”

21Lo tarogi hi a sinobu rau toga rarai Sekaraea, ram awogi huri u toga riribigi lolo vale gogona. 22Lo taro hi mo mwalue Ingeie he gato lai tea lawera, siu ram ilo huri ve ingeie u hueri lolo vale gogona. He gato lai tea, nge mo gato gena limana.

23Lo taro hi a nona taroi lalakogi lolo vale gogona u rovo, i Sekaraea mo mule taligu lo valena. 24He ribi tea, lo tagugi hi, i gahorana Elisabet mo tino gina maresu, ko mo toga tamwere lo valena hure na vule gailime. 25Me mo veve vena, “Lo taro ngaha a Huqe mo buluieu mwere ngaha. Ne mo lai vohogi na maemae denieu.”

Mo serelue huri na voraana noi Jisas

26Lune Elisabet a vulana gaionogi, God mo hora na engsel i Kabriel sulo togagi venue a Kalili a henagi Nasaret 27lawe na matavono u mesinge beno mena tangaloi a henana Josev, dena duvi Devet a Ratahigi. A henai matavono hi i Meri. 28A engsel hi mo himei lobena ko mo veve vena, “A tamwata na toga meigo! A Huqe nge meigo, ko u lologarea garagara ginigo!”

29I Meri mo romasi garagara gena leo nona engsel, ko mo ladolado huri ve a nona leo a iloilogi mwerehilogo. 30A engsel mo veve lawea vena, “Gon mese matagu, Meri, huri God u lolo garea ginigo.” 31Leo, goin tinogi na maresu ko goin bavae a maresu mwera, ko goin waregi na henana i Jisas. 32Ingeie vin voragi na tangaloi lawua ko vin warea ve i Netui God u hahale garagara. A Huqe i God vin bete na tantanoi ratahigi noi tubune Devet lawea, 33ko ingeie vin ratahigi goro na duvi Jekob vin tuei; a nona Ute vin he rovo lai tea!”

34I Meri mo veve lawe na engsel vena, “Ineu a matavono. A gineu ngaha vin vei mwerehilogo?” 35A engsel mo duvi lawea vena, “A Vui Gogona vin himei lumu, ko a managi noi God vin melumelu gorogo. Giniehi, rain ware na maresu ngaha u gogona, i Netui God. 36Ko leo, i havamu Elisabet, nge u tubui beno, ve vin he bava na maresu tea; nge siseri ngaha nge mo tino, a vulana gaiono beno. 37Huri hate gineu gatagale ve i God vin vei samwegi ginie.”

38I Meri mo veve vena, “Ineu a tangaloi tabanagi nona Huqe; na eno laweau mwerehi gu veve.” Ko a engsel mo vano denie.

I Meri mo siro Elisabet

39Siserigi lo tagugi i Meri mo maraga ko mo hage siseri lo vusi lo togagi venue gatagale a Judia. 40Mo vano sulolo valei Sekaraea me mo garigerigi Elisabet. 41Lo taro hi Elisabet mo rongo Meri mo garigeriginie, a maresu mo gilu lolo taqangine. Elisabet u horo gena Vui Gogona, 42mo gato gina dilogi u lawua vena, “God u veigareaginigo liu na vavine doluegi! Ko mo vaigareagi na maresu hi goin bavae! 43?Huri hava gineu mo vai laweau mwere ngaha, huri a retahi noku Huqe mo vomai mo siroau? 44Huri siseri hi nau rongogo gom garigerigieu, a maresu mo gilu mena havuhevu lolo taqangiku. 45Havuhevu meigo gom ladohogo huri ve a leo nona Huqe vin vomai hogo lawego!”

I Meri mo waregareagi God

46I Meri mo veve vena,

“A tarabesiku mo waregareagi na Huqe;

47a domiku mo hevuhevu huri God

i Vagamwasoieu,

48huri nge u lehieu, a nona

tangaloi tabanagi nau ladobitigieu.

Mo tauvuigi bagataha a sinobu doluegi

rain wareau ve ineu a vavine vaigarea,

49huri na gineu lalawua i God managi

u veire hurieu;

Ko a henana u gogona;

50ingeie mo hagavire ngerehi ram ladomavaginie

lo vataha tarogi vin he rovo lai tea.

51Nge mo vei na managi gena limana

ko mo livu vohogi na sinobu ngerehi

rau sagesagera lolo domire.

52Ingeie mo reve surire ratahigi dena tanora,

ko mo tabe hagagi na tangaloi ngerehi

rau ladobitiginire.

53Mo vangani na tangaloi rau mweruruhi

gena gineu garea, ko mo hora

vohoginire mwerai homu.

54Ingeie mo buluire Israel,

a nona tangaloi tabanagi.

Nge u ladobibi a nona hahagavi,

55Ingeie u lado taligu ve vin hagavi

Ebraham ko lawera duvine doluegi

vin tueie.” 56I Meri u toga vule gaitolu lobei Elisabet, siu mo mule taligu lo valena.

I Jon Garuhigogona mo vora

57A tarogi mo vomai huri Elisabet ve vin bava netune, mo vora maresu mwera. 58Ngere talo vanuana meire havana ram rongo huri ve a Huqe u veigarea garagara ginie, ko ingere doluegi ram havuhevu meie. 59Lune a rani gaibitu u rovo ingere ram vomai huri ve ran teve gigileginie, ram suri na henana i Sekaraea, mo huri na henai tamana. 60Nge i ratahine mo veve vena, “Hatie! Nge a henana i Jon.”

61Nere ram veve lawea vena, “Nge hate tangaloi gatagale den nomu havahava u lei na hea hi!” 62Mo rovo ram vai na gigilegi lawe tamana, ram huie vena, “?Gom tarani na hava hea ve goin ware na maresu ginie?”

63I Sekaraea mo huire huri na pepa ko mo reve vena, “A henana i Jon.” Ingere doluegi ram garigi garagara. 64Siserigi hi i Sekaraea mo gato taligu, ko mo tauvuigi mo waregareagi God. 65Ngere talo vanuana doluegi ram matagu garagara, ko a roro huri na gineu ingere ngaha mo vano lategi lolo togagi venue doluegi lo vusi Judia. 66Ngere doluegi hi rau rongo huri na roro ngaha ran hakobibie lolo taqangire ko ram hui vena, “?A maresu ngaha vin vei na hava gineu?” Huri a limei God mo malumelu goroe.

I Sekaraea mo ligogi huri na gineu rain vomai

67I tamana Sekaraea u horo gena Vui Gogona ko u veve rarai vena,

68“Igide da waregareagi na Huqe,

i God nora Israel!

U vomai vena siro na nona sinobu

ko vena vaire rain mwelue

den nora toga vau.

69Ko mo ragasi na Vagamwasoi lawe gide,

talo duvi Devet, nona tangaloi tabanagi.

70Mwerehi u warataugi teu lure tangaloi

ligoligogi ta tuei,

71Ingeie u waratau ve vin vagamwasoi gide

dena noda tavului vuro,

ko dena huireana noi rahine doluegi

ram leomasi gide.

72U veve vage ve vin haharagi na hahagavi

lawe re tubude,

ko ve vin ladobibi na nona waratau

u gogona tau tuei.

73Ngehi a waratau nge u veve tau lawe

tubude Ebraham tuei,

74ve vin lei gide dena noda tavului vuro.

Nge u vei mwerehi ve dain tabanagi lei

lawea, hatie gena matagute,

75ve dain toga gogona, toga vovohoi

lo nagona vataha bongide lo mwasoada.

76“Iniko, netuku, rain warego ve iniko

a tangaloi ligoligogi gogona noi God

u hahale garagara.

Iniko goin vano tomuegi na Huqe

ve goin vei rarai na matahala hurie.

77Goin veve lawe na nona sinobu ran ilo

huri ve God vin vagamwasoire,

giniehi, nge vin ladovohogi

na nora galegaleasi.

78A noda God u hahagavi ko u veigarea;

nge vin vei na aho ta eulu vin kalo

vin varavara lo ulude,

79ko vena leleo haginire ram toga lolo dodogi

ko lolo malumelu mateana,

ko vena tomuegi gide sulo

matahalai tamwata.”

80A maresu mo sesea ko mo huire lo betune ko lo domine. U toga lolo vanue vurogi mo dadari lo tarogi nge vin labe lue sibona lawera sinobu a duvi Israel.

Currently Selected:

LUK 1: HNT

Highlight

Copy