MAK 16
16
A maraga taligu noi Jisas
1Lune a Rani Mangaana u rovo, i Meri ta Makdala mei Meri ratahi Jemis ko i Salome ram voli na vurei bonbon huri ve ran vano ram vurei na betui Jisas ginie. 2Lolo robongi siaga lo Sande, a muei rani talo wik, lune a aho mo tawaga, ram vano lo malanga. 3Lune ram vano lo turegi, ram veve veveginire vena, “?Ihine vin lulugi vohogi na vatu dena matai malanga lawe gide?” 4(Huri a vatu hi u lawua.) Siu ram rada hage, ram leo ve a vatu hi u telulu beno. 5Siu ingere ram ahu lolo malanga, ram lehi na mwalakelo mo toga hivo lo matue, mo saru na luqe mavute. Ko ingere ram vutugegiesi ginie. 6Nge mo veve lawera vena, “Nen mese vai vutugegi. Igimiu nem hikesi Jisas ta Nasaret, ngehi rau toto vehavehaginie. Nge u maraga ingeie hatie tangaha! Leo, a tanogi nge ngaha rau teue aie. 7Nge nen vano nen waregi sere lawe ira nona rorongtagi mei Bita vena, ‘Nge mo vano tomuegi gimiu a Kalili, nein lehe aiehi, mwere u veve lawe gimiu.’ ” 8Siu ram mwalue ram toa dena malanga, a vevenagi ram vai vutugegi ko a huire mo ruru. Ko rahe veve tea lawe hine tea hurie, huri ram matagu.
I Jisas mo vagaweteginie sibona lawe Meri ta Makdala
9Lune i Jisas u maraga beno lolo robongi siaga lo Sande, a muei rani talo wik, nge mo vagaweteginie sibona tomuegi lawe Meri ta Makdala, ngehi u vuro lue na vui esi gaibitu denie. 10I Meri mo vano lobei retuana ram tatavigi ko ram tangi, ko mo veve sere lawera hurie. 11Lune ingere ram rongo ve i Jisas u mwaso taligu ko ve i Meri u lehe, rahe ladohogoginie tea.
I Jisas mo vagaweteginie sibona lawera rorongtagi gairue
12Lo tagugi ngaha, i Jisas u vaga weteginie sibona gina nago dolue lawera nona rorongtagi gairue lune ingere rom dige mo vano lo turegi. 13Ingere rom tudori, rom veve sere lawera lavasigi, nge ingere rahe lado hogoginire tea.
I Jisas u vagaweteginie sibona lawera hangavulu domwagi gatagale
14Vagasigi i Jisas u vagaweteginie sibona lawera hangavulu domwagi gatagale lune ram gagani. Nge mo gato siaga meire hatie nora ladohogo lure ko a qature u siaga, huri rahe lado hogoginire tea hi rau lehe ve u mwaso taligu. 15Nge mo veve lawera vena: “Nen vano lolo ure doluegi, nen ahagi na Roro Garea lawera tangaloi doluegi. 16Ihine tea mo ladohogo ko mo lai na garuhigogona vin mwaso; nge ihine he ladohogo tea vin veveginie. 17Irahine ram ladohogo vin bete na huireana lawera ve rain vei na vaigivui saosao, rain vuro vohogi na vui esi lo henaku, ko rain gato lo leo wagiwegineu. 18Rain hakovi na mwata, sige rain inu na wai matemate, nge ran he mate tea; rain tango gina limara lo segesege, ko ingere rain mwaso.”
I Jisas mo hage eulu
19A Huqe Jisas u laqa u rovo meire, ko mo bei leie hage eulu, ko nge mo toga hivo lo matuei God. 20Ira rorongtagi ram mwalue ram ahagi na leo garea vataha vanue, ko a Huqe mo lalakogi meire, mo turebibi na nora toretore gina vaigivui teri hi rau vei.
Currently Selected:
MAK 16: HNT
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific, 2013
