LUK 3

A toretore noi Jon Garuhigogona

1Lo tarogi hi i Taebirias u ratahigi lo vanue Rom a higao hangavulu domwagi gailime beno; i Bontius Baelat nge a kavman ta Judia, i Herot u leogoro a Kalili, ko i tuana Vilib u leogoro na vanue Ituria ko Trakonaetas; i Laesanias u leogoro a Abilini, 2ko i Anas tona i Kaiavas ingere a rugurugu lawua. Lo tarogi hi a leo noi God mo vomai lobei Jon, i netui Sekaraea, lolo vanue vurogi. 3Nge i Jon mo vano turu na togagi venue dali na wai Jodan, mo laqagi na nona leo lawera, mo veve vena, “Igimiu nen ladowenigi, nen lai na garuhigogona; siu God vin ladovohogi na bugumiu.” 4Mwere i Aesaea a tangaloi ligoligogi u reve lo nona buk vena,

“A diloi hine gatagale mo waregi

lo vanue vurogi mo veve vena:

‘Nen vagatai na matahalai Huqe,

Nen vai vovohoigi na turegine!’ ’

5Vin horongi na waluwelu doluegi,

ko vin tavolagi na vusi doluegi.

A turegi tagege vin vei vovohoi ginire,

ko a matahala hugihugire vin vagaminuginire.

6Ko a duvi tangaloi doluegi rain lehi

na vai vagamwasoi noi God!

7A vevenagi hi, i Jon mo veve lawera sinobu rau vomai lobena huri ve na garuhigogona ginire, mo vena, “Gimiu neu mwere na mwata! ?Ihine u veve lawe gimiu ve nei mwelue dena leo vevegi noi God hi vin vomai? 8Giniehi, gimiu nen vai na gineu a gigilegi huri ve neu ladowenigi. Nen mese veve lawe gimiu sibomiu vena, “I Ebraham i tubude.” Huri ineu nam veve lawe gimiu vena i God vin vei lei na vatu ingere ngaha rain voragi na duvi Ebraham! 9Siseri ngaha a talai u rarai beno vena tai vohogi na gai lolo vuigi. A gai ngerehi rahe wai tea vena garea vin tei vohoginire ko vin tulire talolo avi.

10A sinobu ram huie vena, “?E gamai gain ve mwerehilogo?”

11Nge mo duvi lawera vena, “Tare ve hine a luqana gairue, vin bete lawe hine hi hate luqana, ko tare ve hine a gana hinaga lune, vin bete lawe hine hi hate gana hinaga.”

12Ira tangaloi vilevile homu lavasigi ram vomai huri garuhigogona, ko ingere ram huie vena, “?Huhui, gamai gain vei mwerehilogo?”

13Nge mo veve lawera vena, “Nen mese vile na homu ve na liu den tovogi.”

14A soldia lavasigi vage ram huie vena, “?Nge wuraha huri gamai? Gamai gain vei mwerehilogo?”

Ingeie mo veve lawera vena, “Nen mese garogi hine tea ko nen mese vaie huri vena matagu huri nona doridori esi vena bete homu. Nge nen rong garea huri ve nein lei nomiu gaitawe vovohoi hogosie.”

15A domire sinobu mo tau vuigi mo maraga, ram tau vuigi ram domhikehike huri Jon, ram lado ve bataha ingeie i Ratahigi Vurei. 16Nge i Jon mo veve lawera doluegi vena, “Ineu nam garuhigogonagi gimiu gena wai hogosie, nge ingeie hi u lawua liu denieu vin vomai. Ineu nahe tataresi tea hurive nain riqe na garoi nona butu. Ingeie vin garuhigogonagi gimiu gena Vui Gogona mena avi. 17Nge mo hakovi na nona gaigigi lo limana, huri ve vin gigi langa na mwasi matui; ne vin teu na mwasigi lo nona qea, ne vin hure na rongigi lolo avi ngehi vin he mate lai tea.”

18I Jon mo toretore gena Roro Garea lo matahala sao lawera sinobu ko mo garoginire ve rain leahi na doridorire. 19Nge i Jon mo garogi Herot a Ratahigi huri Herodias, gahorai tuana, ko huri Herot u vei na gineu esi vage u sao. 20Ko i Herot u vei na gineu esi garagara, huri u teu Jon lolo valei vauveu.

I Jon mo garuhigogonagi Jisas

21Lo tagugi sinobu doluegi rau lei na garuhigogona, i Jisas mo lai na garuhigogona vage. Lune nge mo tataro, a eulu mo waga, 22ko a Vui Gogona mo hivo lune a tarabesine u mwere na rangamea. A dilogi mo himei dena eulu mo veve vena, “Iniko i Netuku a Mweratabe. Nam leo lolo gareaginigo.”

A duvi Jisas

23Lune i Jisas mo tauvuigi na nona tabanagi a higaona lategi ngavulu gaitolu beno; ingeie i netui Josev, mwere a sinobu ram lado; nge Josev i netui Heli, 24Heli i netui Matat, Matat i netui Livae, Livae i netui Melki, Melki i netui Janae, Janae i netui Josev, 25Josev i netui Matataeas, Matataeas i netui Emos, Emos i netui Nahum, Nahum i netui Eslae, Eslae i netui Naki, 26Naki i netui Mat, Mat i netui Matataeas, Matataeas i netui Semen, Semen i netui Josek, Josek i netui Joda;

27Joda i netui Joanan, Joanan i netui Risa, Risa i netui Serubabel, Serubabel i netui Salatiel, Salatiel i netui Nerae, 28Nerae i netui Melki, Melki i netui Adi, Adi i netui Kosam, Kosam i netui Elmadam, Elmadam i netui Ere, 29Ere i netui Josua, Josua i netui Eliesa, Eliesa i netui Jorim, Jorim i netui Matat, Matat i netui Livae;

30Livae i netui Simeon, Simeon i netui Juda, Juda i netui Josev, Josev i netui Jonam, Jonam i netui Eliakim, 31Eliakim i netui Melea, Melea i netui Mena, Mena i netui Matata, Matata i netui Netan, Netan i netui Devet, 32Devet i netui Sese, Sese i netui Obed, Obed i netui Boas, Boas i netui Salmon, Salmon i netui Nason;

33Nason i netui Aminadab, Aminadab i netui Admin, Admin i netui Ani, Ani i netui Hesron, Hesron i netui Beres, Beres i netui Juda, 34Juda i netui Jekob, Jekob i netui Aesak, Aesak i netui Ebraham, Ebraham i netui Tera, Tera i netui Naho, 35Naho i netui Sirak, Sirak i netui Riu, Riu i netui Belek, Belek i netui Eba, Eba i netui Sela;

36Sela i netui Kenan, Kenan i netui Avaksat, Avaksat i netui Sem, Sem i netui Noa, Noa i netui Lemek, 37Lemek i netui Metusila, Metusila i netui Inok, Inok i netui Jaret, Jaret i netui Mahaliel, Mahaliel i netui Kenan, 38Kenan i netui Enos, Enos i netui Set, Set i netui Adam, Adam i netui God.

Currently Selected:

LUK 3: HNT

Highlight

Copy