LUK 4
4
I Vui esi mo kali Jisas
1I Jisas u horo gena Vui Gogona, siu mo mule dena wai Jodan, a Vui hi mo tomue ginie sulo vanue vurogi. 2Aiehi i Vui esi mo kali lehe huri na rani ngavulu gaivesi. Lo tarogi hi i Jisas he gani na hinaga te vohogi, lune a taro hi rovo, ingeie mo be mwaruruhi.
3I Vui esi mo veve lawea vena, “Tare ve iniko Netui God, gon veve lawe na vatu ngaha na dori gena bereti.”
4I Jisas mo duvi vena, “U reve beno lo Reve reve Gogona vena, ‘A tangaloi vin he mwaso lai tea gina bereti hogosie.’ ”
5Siu i Vui esi mo laie hage ko mo haharagi vagatagalegi na vanuei ratahigi doluegi lolo ure lawea. 6I Vui esi mo veve lawea vena, “Nain bete na huireana hure na gineu ingere ngaha doluegi lawego. Huri a gineu ingere ngaha rau betera laweau. Ko ineu nain bete lai lawe hine hi nain leo wahea. 7A gineu ingere ngaha doluegi rain voragi nomu, tare ve goin huduhudu goroau.”
8I Jisas mo duvi vena, “U reve beno lo Reve reve Gogona vena, ‘Gon huduhudu goro na Huqe nomu God, ko goin tabanagi lawea hogosie!’ ”
9Siu i Vui esi mo laie vano a Jerusalem ko mo labetaginie lo hunei Vale Gogona, mo veve lawea vena, “Tare ve iniko i Netui God, gon qale hivo dena ute tangaha. 10Huri u reve beno lo Reve reve Gogona vena, ‘God vin hora ra nona engsel ve rain leohuri vurugeginigo.’ 11U reve vage ve, ‘Ngere rain halovigo hage lo limara vai teu gom taturegi na karumu lo vatu.’ ”
12I Jisas mo duvi vena, “U reve beno lo Reve reve Gogona vena, ‘Go mese kali lehi na Huqe nomu God.’ ”
13Lune i Vui esi u keli lehi Jisas lo matahala doluegi u rovo, nge mo sireginie lo mahogi biti.
I Jisas mo tauvuigi na nona lalakogi a Kalili
14I Jisas mo mule taligu a Kalili, a managi noi Vui Gogona mo tomue ginie. A rorona mo vano doluegi na togagi venue aie. 15Nge mo huhui lolo nora valei soneana ko ingere doluegi ram vevegarea ginie.
A vanue Nasaret mo rahagi vohogi Jisas
16Siu i Jisas mo vano a Nasaret, nge u sesea aie, ko lo rani mangaana nge mo vano lolo valei soneana mwere gesegi. Nge mo maraga hage vena valu na Reve reve Gogona, 17ko ingere ram bete na buk noi tangaloi ligoligogi e Aesaea. Nge mo waga na buk ko nge mo haqe na tanogi hi i Aesaea u reve vena,
18A Vui nona Huqe mo toga luku.
A vevenagi ingeie hi u leowaheau,
ve nain lei na Roro Garea
vano lawera mahogi.
Nge u horau ve nain veve sere
lawera tangaloi ram toga vau
ve rain mwelue tabetabegi.
Nge u horau ve nain vei
na matadodo rain leo taligu,
ko nain vei na tangaloi hi ram vaiveire
rain vano tabetabegi,
19ko nain veve sere na taro u vonai beno
hurive a Huqe vin vagamwasoi
na nona sinobu.”
20I Jisas mo lulu bulutegi na buk hi taligu, mo betea lawe na tangaloi hi mo leogoro buk, ko mo soi toga hivo vuine. A sinobu doluegi lolo valei soneana ram leogaragara gieu. 21Nge mo tauvuigi mo laqa lawera mo veve vena, “A mavusui Reve reve Gogona ngaha neu rongoe rau velue, mo eno lune gaqarigi.”
22Ngere doluegi ram havuhevu ginie, ko ram awogi huri na leo garea nge u laqagi. Ngere ram veve vena, “?Wa hatie nge i netui Josev?”
23Nge mo veve lawera vena, “Bataha gimiu nein veve na matagi leogi hi laweau vena, ‘Dokta, gon vagamwasoigo sibomu.’ Ko nein veve vage laweau vena, ‘Gamai gau rogo na leoi gineu hi rau mwelue a Kabeniam, nge u garea gon vaire lo vanuemu sibomu.’ ” 24I Jisas mo veve vena, “A hogo neu nam veve lawe gimiu vena, a tangaloi ligoligogi rain he lai vurugeginie tea lolo vanuana sibona. 25Nen rongo: a vavine madue u sao lo vanue Israel lo taroi Elaeja, lune he uhe tea huri higao gaitolu vule gaiono ko a maro lawua lolo vanue doluegi. 26Nge i God he hora Elaeja tea lawea gatagale denire nge hogosie lawe na vavine madue ta Sarevat lo qatui venue ta Saedon. 27Ko lo taroi Elaeja a tangaloi ligoligogi, a sinobu u sao a vohavono u veire lo vanue Israel. Nge gatagale denire he mwasara tea, nge hogosie Naman ta Siria.”
28A sinobu doluegi lolo valei soneana ram rongo na leo ngaha, ram lologagasi garagara. 29Ram maraga hage, ram susuni Jisas tau varea dena nora togagi venue, ko ram laie hage lo vuhungai vusi hi a vanuara mo toga aie, ve ran tulie lolo baha. 30Nge mo dige turu lolo livugei sinobu mo vano lo matahalana sibona.
A tangaloi mena vui esi
31Siu i Jisas mo vano a Kabeniam, lolo qatui venue ta Kalili. Aiehi mo huhui na sinobu lo Rani Mangaana. 32Ngere ram awogi huri na matahala nge mo huhui ginie huri a nona leo u managi. 33A tangaloi gatagale lolo valei soneana a vui esi lune, mo ulo gina dilogi u lawua vena, 34“!A! ?Gom tarani na hava gineu mei gamai, Jisas ta Nasaret? Wa nego tagaha ve goin vai vohogi gamai? Neu nau ilogo ve iniko hine, iniko a hora gogona noi!”
35I Jisas mo gatogoro na vui esi, mo veve vena, “Gon toga rorongo, gon mwalue denie!” A vui esi mo tuli na tangaloi hi mo soi hivo lo nagora sinobu, ko mo mwalue denie, he vaiesiesi ginie tea vohogi.
36Ngere doluegi ram awogi garagara, ram veve-veveginire vena, “?A hava leo ngaha? Nge mo hora na vui esi mena managi ko a huireana, ko ram mwalue.” 37Ko a roroi hure Jisas mo vano doluegi lolo mahoi vanua hi.
I Jisas u vagamwasoi na tangaloi u sao
38I Jisas mo siregi na valei soneana mo vano lo valei Saemon. I tubui qeligei Saemon mo sege mo mahagi u liu, ko ram veve lawe Jisas hurie. 39Nge mo vano mo labe lobena, ko mo hora vohogi na mahagite. A mahagite hi mo rovo denie, ko nge mo maraga siserigi ko mo vai rarai gara hinaga.
40Lo tagui matenaho roro, ingere doluegi hi a nora buluana rau sege gina lalangai segeana ram laire vano lawe Jisas. Nge mo tango gina limana lure, ko mo vagamwasoire doluegi. 41A vui esi vage ram mwalue dena sinobu sao ram ruru rurugi ram veve vena, “Iniko i Netui God!”
I Jisas mo gatogorora, ko he siregi tea ve ran laqa, a vevenagi rau iloe ve ingeie i Ratahigi Vurei.
I Jisas mo toretore lolo valei soneana
42Lolo robongi siaga i Jisas mo siregi na qatui venue ko mo vano lo mahoi ute. A sinobu ram tauvuigi ram hikesie. Lune ram haqea, ram vaileo ve rain hako bibie vena mese vano denire. 43Nge mo veve lawera vena, “Mo eno laweau ve nain laqagi na Roro Garea huri i God mo ratahigi goro na tangaloi doluegi lawera lo qatui venue lavasigi vage, a vevenagi ngehi a gineu i God u horau ve nain veie.”
44Siu nge mo toretore lolo valei soneana vataha vanue doluegi.
Currently Selected:
LUK 4: HNT
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific, 2013
