MAK 13
13
I Jisas mo laqagi hurive vin vei vohogi na Sara Gogona
1Lune i Jisas mo siregi na Sara Gogona, gatagale denire nona rorongtagi mo veve lawea vena, “!Huhui, leo! Hava na vatu gagareagi ingere ngaha hava na vale gagareagi ingere ngaha” 2Nge i Jisas mo duvi lawea vena, “?Gom lehi na vale lalawua ingere ngaha? A vatu gatagale vin he toga tea loului vetu tuegi, nge rai sasarugi talo tano doluegi.”
A tau vuin rongesi ko a vai gagarasigi.
3I Jisas mo toga lo Vusi Oliv mo leo vano lo Sara Gogona, ko i Bita, Jemis, Jon ko i Andru ram huie gahea vena, 4“?Iniko gon veve lawe gamai ve a gineu ngaha vin vei tangaha? Ko gon veve lawe gamai a hava gigilegi vin vei vena haharagi ve a taro u vanai beno ve a gineu ingere ngaha rain vei lolona.”
5I Jisas mo tauvuigi mo veve lawera vena, “Nen leohuri gimiu vaiteu ihine tea mo vaga lengagi gimiu. 6A tangaloi u sao rain vonai lo henaku, rain veve vena, ‘!Ineu hi!’ ko rain sine na sinohu sao. 7Nge lune gimiu nein rongo huri na vuro ko a roroi vuro vagahao nein matagu. Huri a gineu ingere ngaha rain vei, nge a rovonagi hatie tau. 8Huri a sinobu vin qalo mena sinobu, ko a vanue mena vanue. A ruru vin vonai lo vanue saosao, ko vin maro. A gineu ingere ngaha a gagarasigi mwere hi a maresu mo ragasi retahine vena bavae.
9“Igimiu nen leohuri gimiu sibomiu. Ngere rain lei gimiu siu lo kot. Rain teli gimiu lolo valei soneana. Nein labe lo nagora Kavman meire ratahigi hurieu, huri nen ngasagi na Roro Garea lawera. 10Nge gitomuegi siu a Rani vagasigi vin vanai ne ngasagi na Roro Garea lawera sinobu doluegi. 11Ko lune vin waregi sere lawe na sinobu doluegi. Ingere rain wiribibi gimiu, rain lei gimiu sulo kot; nge nen laqagi na hava gineu vin bete lawe gimiu lo tarogi ngehi. Huri nehe laqa tea gina leomiu sibomiu, nge gina leo mo vonai dena Vui Gogona. 12A tangaloi rain siregi tuara huri ve rain ue vagamatera, ko a tamagi vin vei mwerehi vage lawe renetune; ko ire neture rain maraga goro tamara mei retahire ko rain sireginire huri ve rain ue vagamatera. 13A tangaloi doluegi rain sebugi gimiu huri na henaku. Nge ihine tea vin labe siaga vin dadari lo qereqerenagi vin mwaso.
A gineu makaragiana lawua
14“Gimiu nein lehi na Gineu makaragiana lawua’ mo labe lo ute hi ve vin he labe tea aie.” (!Igimiu hi nem valu huri na gineu ngaha nein ilo vurugegi na iloilogi!) “Lo tarogi hi, ingere ram toga Judia rain toa sulo vusi. 15Ihine tea mo toga loului valena, vin mese susuni na taro vena hivo lolo valena vena lai te gineu ve vin dige meie. 16Ihine mo tino lolo talu, vin he mule tea lo valena vena lai na luqana. 17Nge u esi garagara hurire vavine ram wali taqangi ko hurire vavine i reneture ram memeaga. 18!Nen tataro ve a gineu ingere ngaha rain mese vai lolo rara! 19A vevenagi a rani ingere hi rain horo gina gineu rau esi, hatie gineu mwere hi mosigei lo tauvuigi lune i God u teu na ure mo dadari hibagataha, ko vin he mwere hi tea taligu tetagaha. 20Nge a Huqe mo wiri utu na rani ingere ngaha; ve na mese vaie mwere hi, A tangaloi gatagale vin he mwaso lai tea. Nge i God u vei na taro mo qilodo huri vena bului na sinobu u leo wahera.
21“Lo tarogi hi, tare ve ihine vin veve lawe gimiu vena, “Leo, i Kraes nge ngaha!’ sige a tangaloi tuegi vin veve vena, ‘Leo, i Kraes ngehi!’ nein he ladohogo te ginie. 22Huri ira Kraes kalikeli ko ira tangaloi ligoligogi kalikeli rain maraga. Rain vei na vaigivui saosao ko rain vei na gineu garigiana lalawua. Ingere rain veileo ve ran kali lehi na sinobu hi i God u leowahera tare ve mo lai. 23!Igimiu nen leohuri! Ineu nau veve matagutegi lawe gimiu huri na gineu doluegi ingere ngaha siu ram bei vei.
A vonaiana noi Netui Tangaloi
24“?Nge lolo ranigi ingere ngaha lo tagui gineu esi rau vanai, a aho vin dodo ko a vule vin he leleo tea, 25ko a visiu rain soi dena eulu, ko a huireana talo mahava rain gilu lategi den tanora. 26Ko lo tarogi ngehi rain lehi i Netui Tangaloi vin vonai lolo dodo mena managi ko a varavara lawua. 27Siu nge vin hora ira engsel, ko ve rain vilegi na nona sinobu leowahe dena mahiqei ure doluegi, ko dena mahogi doluegi lo eulu
A gato tavalu huri na vui duledule
28“Nen hikehike lo gato tavalu huri na vui duledule. Lune a rangana ram tauvuigi ram qaroqaroga, ko mo tavutevu, nem ilo ve a mwagoto mo kakarani. 29Mwere hi vage, lune nem lehi na gineu ingere ngaha ram vonai, nein ilo ve a tarogi mo kakarani mo rarai vena vanai. 30A hogo, nam veve lawe gimiu vena, a tangaloi ram mwaso siseri ngaha rain he mate tea doluegi vin dadari a gineu doluegi ngaha rain vanai. 31A eulu ko a tano ngaha roin salasala, nge a noku leo vin he sala lai tea.
Hatie ve ihine tea ve u ilo na tarogi sige a matainahogi
32“Ihine tea he ilo na ranigi tea sige a tarogi ve vin vei, ira engsel ta eulu hatie, i Netui hatie, nge i Mama hogosie. 33Nen radagoro gimiu, nen rada nen rarai, huri nehe ilo na tarogi tea ve vin vanai. 34Mwere na tangaloi mo vano den tanona, mo siregi na valena lawera nona tangaloi tabanagi, mo bete na nora tabanagi vatavataha ginire; ko mo veve lawe na leogoroi mataivale vena vin rada goroe. 35Gimiu vage nein rada goro, huri ne he ilo tea ve i tagi vale vin vonai tagaha, lolo revirevi, sige lolo livugata, sige lolo toa tarere, sige lolo ului reni, 36Vaiteu mo vanai siserigi ko vin haqe gimiu nem maturu. 37Nge a hava gineu nam veve lawe gimiu, nam veve lawe na tangaloi doluegi: Nen rada goro!”
Currently Selected:
MAK 13: HNT
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific, 2013
