Paikhiatna 8
8
1Tua ciangin TOPA in Moses kiangah, "Pharaoh kiangah pai inla ama kiangah, ‘Hih in TOPA gen ahi hi: Kei hong biak theih nadingun ka mite paisak hen, ci hi,’ ci-in gen in. 2 Amaute na paisak nop kei leh na gambuppi uiphuk zangin ka gimsak ding hi. 3 Nile ah uiphuk a dim ding hi. Tuate na kumpi inn sungah hong kahto in na lupna inndei sung, na lupna tung na uliante le na mite innsung, tua banah na thuk sung le na buhnel mekmanna kuang sungte ah a om ding hi. 4 Tua uiphukte nang tung le na mite tung le na uliante tungah hong kah ding hi, ci hi,’ ci-in gen in," a ci hi.#Pk 3:12,18;10:6
5 Tua ciangin TOPA in Moses kiangah, "Aaron kiangah, ‘Na khutin na ciangkhut tawi inla luite, hawkguamte, bualte tungah zanin Egypt leitanga uiphukte paikhiasak in,’ ci in,’ a ci hi.#Pk 7:19
6 Tua ciangin Aaron in Egypt a tuite tungah a khut zankhia-a, uiphukte paikhia-in gamsung teng a tuam hi. 7 Ahi hangin mitphial siamte in amau siamna tawh tua tawh ki- bang a hih thei uh hi; amaute in zong Egypt leilak ah uiphuk a paikhiasak uh hi.#Pk 7:11; Ph 78:45
8 Pharaoh in Moses le Aaron sam a, "Kei le ka mite tung pan uiphuk a lakmang nadingin TOPA tungah thu ngen un, TOPA biakpiakna pia dingin na mite ka paisak ding hi," a ci hi.#Pk 9:28; 10:17
9 Moses in Pharaoh kiangah, "Nang le na uliante, le na mite inn sungah, Nile sunga om laite lobuang uiphukte a bei nadinga thu kong ngetsak nading hun seh ding hamphatna nang kong pia hi," a ci hi.
10 Pharaoh in, "Zingciang," a ci hi.
Moses in, "TOPA kote Pasian, bang kuamah om lo cih na theih thei nadingin na cih bang hi ding hi. 11 Uiphukte in nang le na innte, na uliante le na mite nusia ding hi; amaute Nile sung bekah a om ding uh hi," a ci hi.#Pk 9:14; Tp 33:26
12 Moses le Aaron in Pharaoh a nusiat khit uh ciangin Pharaoh tunga a tunsak uiphukte thu TOPA kiangah Moses in a ko hi. 13 Tua ciangin Moses nget bangin TOPA in a hih hi. Uiphukte, inn sung, huang sung, lo sungah a si hi. 14 Amaute a lomlomin kiciang a gam sungteng a uihsak hi. 15 Ahi hangin Pharaoh in haksatna bei ta cih a theih ciangin TOPA cihsa bang tektekin a lungtang khauhsak a, Moses le Aaron thu ngai lo hi.
Cippi Gimna
16 Tua ciangin TOPA in Moses tungah, "Aaron kiangah gen in, ‘Na ciangkhut van inla leivui lak sat in,’ tua ciangin Egypt gam sung khempeuh a leivuite cippi suak ding hi," a ci hi. 17 Amaute in hih uh a, Aaron in a khut zankhia-in ciangkhutin leivui lak a sat ciangin mihingte le ganhingte tungah cippi a tu hi. Egypt gam sunga leivuite khempeuh cippi a suak hi. 18 Ahi hangin mitphial siamte in amau siamna tawh cippi omsak a sawm uh hangin a hih thei kei uh hi. Mihingte le ganhingte tawh cippi a om uh hi.#Pk 9:11
19 Mitphial siamte in Pharaoh kiangah, "Hih in Pasian khutma ahi hi," a ci uh hi. Ahi hangin TOPA cihsa bang tektekin Pharaoh lungtang khauh a thu a ngai kei hi.#Pk 7:5; Ph 8:3; Lk 11:20
Tho Gimna
20 Tua ciangin TOPA in Moses tungah, "Zingsangin tho baih inla tuiphual-a Pharaoh a pai ding na ngak kholin ama kiangah, ‘Hih in TOPA gen ahi hi: Kei hong biak theih nadingun ka mite paisak in; 21 ka mite na paisak nop kei leh nang le na uliante tung, na mite tung le na inn sungah tho honpi ka sawl ding hi. Egypt mite innah tho dim dinga, a omna uh leitang nangawnah a dim ding hi.
22 "‘Ahi hangin tua ni-in ka mite tenna Goshen gam mundang tawh ka kilamdangsak ding hi; keimah TOPA tua gamah ka om lam na theih nadingin tua lai-ah tho hon a om kei ding hi. 23 Kei mite le nang mite deidanna a#8.23 Hebrew in Septuagint le Vulgate ka hukhia ding khat ka bawl ding hi. Hih nalamdang lim zing ciangin a tung ding hi,’ ci in," a ci hi.#Pk 7:5
24 TOPA in hih bangin sem hi. Kumpipa Pharaoh inn sung le a uliante inn sung le Egypt bupah thohon lompi lengin lut-a, tua gam khempeuh thote in siasak gawp hi.
25 Tua ciangin Pharaoh in Moses le Aaron sam a, "Pai unla hih gam sungah note Pasian tungah biakna va pia un," a ci hi.
26 Ahi hangin Moses in, "Ahi thei kei ding hi. TOPA kote Pasian tunga ka biakpiakna uh Egypt mite adingin a kihhuai suak ding hi. Amau muhna-ah a kihhuai-in biakpiaknate pia le ung kote suangin hong deng lo ding uh ahi hiam? 27 Amah in kote hong thupiaksa bangin TOPA kote Pasian tungah biakpiakna pia dingin sehnel gam sungah nithum lam ka pai uh kul ding hi," a ci hi.#Pc 43:32; Pk 3:18
28 Pharaoh in, "TOPA note Pasian tungah biakpiakna pia dingin gam sungah kong paisak ding hi; ahi zongin a gamla lua-ah na pai peuhmah kei ding uh hi. Tu-in kei thu hong ngetsak un," a ci hi.
29 Moses in, "Nang kong nusiat khit phetin TOPA kiangah thu ka ngen dinga, zing ciangin thote in Pharaoh le a uliante le a mite a nusia ding hi. Mite a TOPA tung-ua biakpiakna pia dinga paisak nop lohna tawh Pharaoh in hong khembawl kik nawn peuhmah kei in," a ci hi.
30 Tua ciangin Moses in Pharaoh nusia in TOPA tungah thu ngena, 31 TOPA in Moses nget bangin a hih hi: Thote in Pharaoh le a uliante le a mite a nusia hi; tho khat zong a om nawn kei hi. 32 Ahi zongin tutung in zong Pharaoh in a lungsim khauh-saka, mite a paisak nuam kei hi.#tg 12; Pk 4:21
Currently Selected:
Paikhiatna 8: ZIV
Highlight
Share
Copy
Want to have your highlights saved across all your devices? Sign up or sign in
Copyright 1994 Myanmar Center for World Mission
