Piancilna 39
39
Joseph le Potiphar’ Zi
1Tu-in Egypt ah Joseph ki paipih suk uh hi. Pharaoh ulianpa Egypt mi inncing mangpa Potiphar in Ishmael-te tung pan amah lei-a, tua lai tun hi.#Pc 37:25, 36; Ph 105:17
2 TOPA in Joseph ompih a, amah daupai-in a pu Egypt-pa’ innah a om hi. 3 TOPA in amah ompih-a, a hihna khempeuh ah TOPA in gualzosak hi cih a pu in mu hi. 4 Joseph in a pu maipha ngaha, a mi muanpi suak hi. Potiphar in amah a innsung khempeuh uksak-a, a neih khempeuh uk dingin muang hi. 5 A inn sunga a neih khempeuh uk dingin a koih-a kipan Joseph hangin TOPA in Egypt mipa innsung thupha pia hi. Potiphar neihsa inn sung le lo sunga na khempeuh ah TOPA thupha a tung hi. 6 Tua ciangin a neihsa na khempeuh Joseph ap khin hi; ama annek simloh lunghimawh lo a, Joseph a uksak hi.#Pc 21:22; 26:28; Ph 1:3
Tu-in Joseph thahoihin a mel hoih-a, 7 tawlkhat khit ciangin a pu’ zi in Joseph zawlmit-in, "Kei hong luppih in!" ci hi.#Pn 7:15-18
8 Ahi hangin amah in nial hi. Ka pu in a inn sunga na khempeuh a uk dingin kei hong koih manin lunghimawhna nei lo-a, a neih khempeuh kei hong ap hi. 9 Hih inn sungah kei sanga lianzaw a om kei hi. Ka pu in nang lobuang aituama a neih om lo hi. Nang nangawn ama zi na hih hang hi bek hi. Bangci bangin tua bang gitlohna hih in Pasian tungah mawh ding ka hi hiam?" ci hi. 10 Amah in ni khat khit ni khat Joseph a zol hangin amah a luppih gen loh amah tawh kithuah ding nangawn a nial hi.
11 Ni khat a tavuan khat sem dingin inn sungah pai-a, tua laitak innsung nasemte khat beek inn sungah a om kei hi. 12 Tuanu in a puanpi in mana, "Hong pai-in hong luppih in," ci hi. Ahi hangin a puanpi tuanu khutah nusia-in innpua-ah taikhia hi.
13 Tuanu in a khut sungah a puanpi nusia in innpua-ah tai cih a muh ciangin, 14 a innsung nasemte sama, amaute kiangah, "En un hih Hebrew-pa in hong siattut dingin ei kiangah hong kipuak hi! Amah kei hong luppih dingin inn sungah hong pai-a ahi hangin ka awngkhia hi. 15 Huhna ngenin ka kiko a zak ciangin ka gei-ah a puanpi koihin inn pua-ah taikhia hi," ci hi.#Tp 22:24,27
16 A topa innah a ciah mateng tuanu in tua puanpi a kiangah kemcip hi. 17 Tua ciangin: "Tua inn sung nong tut Hebrew sila pa ka kiangah kei hong no dingin hong pai hi. 18 Ahi hangin huhna ngenin ka kiko ciangin ka gei-ah a puanpi nusia in amah inn pua-ah taikhia hi," ci hi.
19 A topa in a zi thugen teng a zak ciangin, "Na sila pa in tua banga hong bawl maw," ci-in heh mahmah hi. 20 Joseph’ pu in amah kumpipa’ thongkiate kikhumna thongah a khia hi.
Ahi hangin Joseph tua lai-ah thongkia-a a om laitakin 21 TOPA in amah ompih hi; ama tungah a migitna laka, thong-ukpa mai-ah maipha ngahsak hi. 22 Tua ahi ciangin thongukpa in thong sunga om khempeuh Joseph uksak-a, tua sunga kisem khempeuh ama thuthu ahi hi. 23 Thongukpa in Joseph ukna nuai-a om peuhmah a don vet kei hi. Bang hang hiam cih leh TOPA in Joseph ompiha, a hihna khempeuh a lamzangsak hi.#tg 3; Pk 3:21
Currently Selected:
Piancilna 39: ZIV
Highlight
Share
Copy
Want to have your highlights saved across all your devices? Sign up or sign in
Copyright 1994 Myanmar Center for World Mission
