Эвел 25
25
Ибрагьимдин наслар ва дугъан аьжал
1Ибрагьимди чаз сарсана, Кетура ччвур али, хпир хуру. 2Кетурайикан дугъаз Зимран, Юкшан, Медан, Мидьян, Ишбак ва Шуах баяр шулу. 3Юкшандиз Шева ва Дедан кӀуру баяр шулу. Хъа Дедандиз баяр шулу ва гьадрарилантина ашурар, летушар ва леюмар кӀуру миллетар арайиз гъюру. 4Мидьяндиз Эфа, Эфер, Ханух, Авид ва Элдаг кӀуру баяр шулу. Мурар вари Кетурайилантина гъахьи наслар вуйи.
5Ибрагьимди чаз айиб вари Исакьдиз тувнийи. 6Хъа Ибрагьимди, учв сагъди имиди, чан лукӀ-хпарикан гъахьи веледаризра багъишар тувну, чан бай Исакьдин багарихьан дурар ригъ гьудубчӀвру терефнан ругариина алдауру.
7Ибрагьим варжна ургцӀурна хьуд йисан яшамиш гъахьнийи.
8Думу лап кьаби духьну, уьмрихьди бегьем ацӀну, гъакӀнийи ва чан ата-бабйирик ктикьнийи.
9Ибрагьим, дугъан баяр Исакьдина Исмаили, Мамрейихьан ярхла дарди айи, Цухарин бай хеттжви Эфрундин хутӀлиъ айи Махпела дюрхъяъ кивнийи. 10Ибрагьимди думу хутӀил хеттарихьан гъадабгъуб вуйи. Гьамци душваъ Ибрагьимна чан хпир Сара кивнийи. 11Ибрагьим гъакӀихъанмина РАББИЙИ дугъан бай Исакь ужувлакк ккаънийи. Исакь, Беэр-Лахай-Руи кӀурушван багарихь яшамиш шулайи.
Исмаилин наслар
12Магьа Ибрагьимдиз Сарайин гъараваш египетшив Гьажарикан гъахьи бай Исмаилин тухмикан ихтилат: 13аьхюрилан ккебгъну Исмаилин баярин ччвурар: Невают – му бай Исмаилин сарпи бай вуйи, Кедар, Адбиэл, Мивсам, 14Мишма, Дума, Масса, 15Хадад, Тема, Етур, Нафиш, Кедма. 16Исмаилин му баяр йицӀикьюб тухмин регьбрар вуйи. Дурарин ччвурар чиб ерлемиш духьнайи йишваризра, дергру бинйиризра туври шуйи.
17Варжна сумчӀурна ургуд йис яшамиш духьну, Исмаилин уьмур ккудубкӀуру, думу йикӀуру ва чан ата-бабйирик ктикьуру. 18Дугъан наслар, Хавилайихъан гъадабгъуб Ассирияйихьинди гъягърушван Египетдин улихь хьайи Сурихънакьан вуйи, жилариин ерлешмиш гъахьнийи. Думу наслар вари чпин чвйирихъди душмнарси яшамиш шулайи.
Исакьдин баяр – Исавна Якьуб
19Магьа, Ибрагьимдин бай Исакьдин тухмикан ихтилат: Ибрагьимдиз Исакь шулу. 20Исакьдин, Паддан-Арамдиан (Месопотамияйиан) вуйи арамейжви Бетуэлин риш, арамейжви Лавандин чи Ребека чаз хпирди гъадагъруган, ягъчӀвур йис вуйи. 21Исакь чан хпирихъанди, веледар бадали, РАББИЙИЗ ккарагуру, фицики Ребека бицӀидар шлур дайи. РАББИЙИЗ дугъан ккарагбар гъеерхьнийи ва Ребекайик бицӀидар киршнийи. 22Дугъак кьюдюхрар кайи ва бицӀидар гьеле дугъан фуниъ имиди элегнайи. Ребекайи: «Узуз мициб ляхин гьаз шулайкӀан?» – кӀуру ва думу му фу ляхин вуш РАББИЙИХЬАН гьерхри ккарагру йишвахьна гъягъюру. 23РАББИЙИ дугъаз гъапи:
– Фунин халиъ кьюб халкь аяв.
Яв халиан удучӀвиди кьюб халкь.
Саб халкь тмунубтӀан гужал хьибди,
хъа аьхюнур бицӀинурихъ лихиди.
24Вахт хътубкьиган дугъаз кьюдюхрар шулу. 25Сифте удучӀвур цӀухур, чӀарну алацӀнайир вуйи. Дугъʼин Исав («чӀар алир») кӀуру ччвур иливнийи. 26Кьяляхъди, Исавдин швякьхъан хилихьди ижмиди хъичӀихну жара бицӀирра удучӀвуру. Дугъаз Якьуб («швякьлихъан хъичӀихнайир») кӀуру ччвур тувнийи. Дурар бабкан шлуган, Исакьдин йирхьцӀур йис вуйи.
27Баяр аьхю шулу. Исавдикан хутӀларин адми, дирбаш хюрчабан шулу, хъа Якьубдикан хулан сикин адми ктучӀвуру. 28Исакьдиз Исав ккундийи, гьаз гъапиш дугъу хру хюрчнан йикк ицциб шуйи, хъа Ребекайиз ккунир Якьуб вуйи.
29Саб ражари, Якьубди жвилли харарин хураг апӀурайиган, гашу йикӀурайи Исав хюрчʼан гъюру. 30Дугъу Якьубдиз:
– Уву гьязур апӀурайи уьру хурагнакан узуз чава! – кӀуру. – Гашу йикӀуразу!
Магьа гьаддиз дугъаз Эдум («уьрур») кӀуру.
31Хъа Якьубди дугъаз:
– Дици вуш, узуз яв аьхювал ча! – гъапи.
32– Узу гашу йикӀуразу! – гъапи Исавди. – Узу аьхюнур ву кӀури, узуз дидкан айиб фу вухъа?
33– Гьамусяаьт ху апӀин! – кӀуру Якьубди.
Исавди, Якьуб аьхюнур ву кӀури, ху апӀуру ва чан аьхювалихьан шулу. 34Хъа Якьубди Исавдиз уьлна харарин хураг тувру. Дугъу ипӀуру, убхъуру, хъа гъудужвну гъягъюру. Гьамци Исавди учв сарпирди бабкан хьувалихьна вуйи вижнасузвал улупуру.
Currently Selected:
Эвел 25: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
