Acts 12
12
nōtināwak otayamihāwak
1ēkospī kihci-okimāw Herod kī‑māyi-tōtawēw ātiht otayamihāwa. 2kī‑itasowātēw osimākanisīma kita-nipahāyit Jamesa, ostēsa John. 3ē‑kiskēyihtahk Jewa ē‑nahēyihtamiyit, kī‑kipahwēw Petera. ēwako ōma kī‑ihkin mēkwāc ēkāya ohpihkasikan ē‑āpatahk pahkwēsikanihk wīhkohkēwin. 4ē‑kī-otiniht Peter mīna ē‑kī-kipahoht kī‑kanawēyimik nēwo simākanisa, ē‑nā-nēwicik nēwotahtwāpitēw. Herod kī‑kīsēyihtam kita-wiyasiwātāt ita ayisiyiniwa kita-ayāyit kī‑pōni-miyāskākēwi-wīhkohtowiht. 5ēkosi Peter kī‑kanawēyimāw kipahotowikamikohk. otayamihāwak sōhki kī‑ayamihēstamawēwak Petera.
Peter paspīhāw
6kā‑kī-otākosik Herod itohtahēw Petera ayisiyiniwa ita ē‑ayāyit kita-wiyasiwātāt, Peter kī‑nipāw tastawāyihk nīso simākanisa. kī‑tahkopisiw nīso pīwāpiskwēyāpiya ohci, ēkwa simākanisak kī‑kanawēyihtamwak iskwāhtēmihkān. 7kētahtawē okīsikōma kā‑tipēyihcikēt kī‑nīpawiyiwa ēkota ēkwa kī‑wāstēw pīhcāyihk. okīsikow kī‑tōskinēw ē‑pēkonāt ēkwa ōmisi itēw, “kakwēciyāho! waniskā!” sēmāk anihi pīwāpiskwēyāpiya kī‑pahkihtiniyiwa ocihcihk ohci. 8okīsikow itēw, “pakwahtēho, ēkwa postaskisinē.” ēkosi kī‑tōtam Peter, ēkwa okīsikow itēw, “postasākē ēkwa pimitisahon.” 9Peter kī‑pimitisahwēw ē‑ati-wayawīcik kipahotowikamikohk ohci. Peter namwāc ohci-kēhcināhow kīspin tāpwē ōma kā‑isi-wāpamāt okīsikowa, ē‑pawātamān ōma itēyihtam ēsa. 10kī‑ati-miyāskawēwak nistam simākanisa kā‑kanawēyihcikēyit ēkwa anihi iyaskohc ati, ēkwa piyisk anima iskwāhtēmihkān kā‑pīwāpiskowik ē‑yōhtēpayiyik, ēkosi ati-wayawīwak kihci-ōtēnāhk isi. nētē pimohtēwinihk ē‑pimohtēcik kētahtawē ana okīsikow nakatēw Petera.
11ēkota ēkwa Peter kā‑kiskēyihtahk tāpwē ē‑paspīt kipahotowikamikohk ohci. ōmisi itwēw, “tāpwē ēcika ani. kā‑tipēyihcikēt pē‑itisahwēw okīsikōma kita-paspīhiyit osōhkisiwiniyihk ohci Heroda, ēkwa kahkiyaw ohci Jewak kā‑kī-isi-pakosēyihtahkik.”
12mayaw ē‑mōyēyihtahk ōma, kī‑itohtēw Mary wīkiwāyihk, okāwiya John Mark. mihcēt ayisiyiniwa ēkota kī‑mēkwā-ayamihāyiwa ēsa. 13Peter kī‑pakamahikēw iskwāhtēmihk wayawītimihk. atoskēyākaniskwēw Rhoda ē‑isiyihkāsot kī‑pē-itohtēw. 14ē‑nisitohtawāt Petera ēkwa mistahi ē‑miywēyihtahk namōya yōhtēnamawēw, māka ispahtāw ē‑nitawi-wīhtahk Petera wayawītimihk ē‑nīpawiyit. 15“tāpwē kimōhcowin!” itēwak ōki. āhci piko kī‑wīhtam Petera ēkota ē‑ayāyit. ōmisi itwēwak, “kēhcinā anihi okīsikōma.”
16wiya awa Peter āhkami-pāhpakamahikēw iskwāhtēmihk. piyisk yōhtēnamwak, ēkwa ē‑wāpamācik Petera, kī‑māmaskātamwak. 17Peter kī‑ay-itinamawēw ēkāya nānitaw kita-itwēyit. kī‑wīhtamawēw tānisi kā‑tipēyihcikēyit ē‑kī-isi-wayawīhtahikot kipahotowikamikohk ohci. “ācimostākok James mīna otāpwēhtamowak ōma kā‑ispayihikoyan,” itēw, ēkosi ati-sipwēhtēw kotakihk ē‑itohtēt.
18ē‑wāpahk, mitoni kī‑wā-wānēyihtamwak okanawēyihcikēwak Petera ē‑wanihācik kipahotowikamikohk ohci. 19kihci-okimāw kī‑itasowēw kita-natonāmiht Petera, māka namwāc ohci-miskawēwak. ēkosi nitawāc kī‑itasowēw kita-kakwēcimimiht okanawēyihcikēwa ēkwa kita-nipahimiht. ēkota ohci Herod sipwēhtēw Judea ohci ēkwa Caesarea kī‑nitawi-ayāw.
Herod namōya pimātisiw
20Herod mistahi kī‑kisiwāhik ayisiyiniwa Tyre kā‑ayāyit ēkwa Sidonihk. ēkosi ē‑māmawēyaticik ōki ayisiyiniwak kī‑nitawi-wāpamēwak Heroda. pitamā kī‑natomēwak Blastusa kita-pīkiskwēstamākocik, ēwako kihci-okimāwikamik kā‑pimipayihtāt. kī‑kakwēcimēwak Herod pēyahtakēyimowin kita-ayācik, ayisk ēkota otaskiyihk kā‑otācihocik mīciwin.
21ē‑otihcipayik anima kīsikāw Herod kī‑postiskam otokimāwi-ayiwinisa ēkwa kī‑apiw okimawi-apiwinihk ēkwa kī‑pīkiskwātēw ayisiyiniwa. 22“namōya awa nāpēw kā‑pīkiskwēt, māka ē‑manitōwit,” isi-tēpwēwak ēsa. 23sēmāk ēsa kā‑tipēyihcikēt okīsikōma kī‑pakamiskākow Herod, ayisk ēkāya ē‑mamihcimāt kisē-manitowa. kī‑mowik mohtēwa ēkwa kī‑nipiw.
24omiywācimowin kisē-manitow kī‑siswēpayiw ēkwa ayiwāk ayisiyiniwa kī‑pēhtamwak ēkwa kī‑tāpwēhtamwak.
25Barnabas ēkwa Saul kī‑kīsihtāwak otatoskēwiniwāw ēkwa kī‑kīwēwak Jerusalemihk isi, ē‑wī-kiskinohamawācik John Marka.
Currently Selected:
Acts 12: PCSBR
Highlight
Share
Copy
Want to have your highlights saved across all your devices? Sign up or sign in
Plains Cree Ruth © 2004 Canadian Bible Society
Plains Cree Psalms (collection) © 2013 Canadian Bible Society
Plains Cree James © 2014 Canadian Bible Society
Plains Cree Gospels and Acts © 2018 Canadian Bible Society
