Чапарзабазул ишал 12

12 бетӏер

Гьеродица чапарзабазе гӏакъуба кьола

1Гьеб заманаялда Гьерод ханас иман лъуразул агьлуялъул цо-цо гӏадамал жанир тӏамуна, гьел тӏагӏинаризе бокьун. 2Хвалчаца бетӏер къотӏун чӏвана гьес Иоаннил вац Якъуб. 3Ягьудиязе гьеб рекӏее гӏураблъи бихьун, Пётрги тӏамуна гьес туснахъалъув. (Гьел рукӏана Реччичӏел Панкъазул Байрамалъул къоял.) 4Ккун вачун туснахъалъув тӏамизавуна Гьеродица Пётр ва гьев цӏунизе анцӏила анлъго рагъухъанги тана хъаравуллъуда. Гьесда ракӏалда букӏана Пасхаялъул байрамалдаса хадуб халкъалда цеве вачун Пётрие суд гьабизе. 5Гьале Пётр туснахъалъув вуго. Иман лъуразул тӏолабго агьлуялъ тӏадчӏун Аллагьасде гьари-дугӏа гьабуна гьесда гурхӏаян.

Малаикас Пётр туснахъалъуса къватӏиве вачуна

6Гьеродица метер халкъалда цеве вачинехъин вугеб сордоялъ кӏиго рагъухъанасдехун рахсаца вухьун вугев Пётр кьижун вукӏана. Хутӏарал хъаравулзаби туснахъалъул нуцӏихъ чӏун рукӏана.

7Гьале вачӏун гьесда цеве чӏарав Бичасул малаикасул нуралъ туснахърукъ къалъ-къалъизабуна. Хьолболъ квер тункун макьидасаги вигьинавун: «Хехго тӏаде вахъа!» – ян абуна малаикас Пётрида. Гьесул кверазда рукӏарал маххул рахсал рортун ана гьебмехалъ. 8Цинги малаикас гьесда абуна хьиталги парталги ретӏеян. Гьес хьиталги парталги ретӏана. Нахъеги абуна, мугъзаде гӏабаги рехун, жинда хадув вачӏаян.

9Пётр гьесда хадув къватӏиве лъугьана. Амма гьесда ракӏалде кколеб букӏана гьев малаикас гьабулеб бугебщинаб жо жинда цебетӏамулеб бугилан. 10Цо хъаравулзабазда, цинги цоги хъаравулзабазда цересан ун, туснахъалъусан шагьаралде бугеб маххул кавудухъе щвана гьел. Каву жибго рагьун ана. Гьениса къватӏире лъугьун ун цо къватӏ лъугӏулеб бакӏалде щведал, малаик цевеса тӏагӏана.

11Гьебмехалъ гӏакълуялде вачӏун живго жиндаго гаргадизе лъугьана Пётр: «Хӏакъикъаталдаги Бетӏергьанас дихъе малаик витӏун вачӏана дун Гьеродил квердасаги ва ягьудиязул тӏолабго халкъалъе бихьизе бокьун букӏарабщиналдасаги хвасар гьавизе».

12Цинги гьеб ккара-таралъул магӏна бичӏчӏарав Пётр ана Маркилан тӏокӏцӏар бугев Иоаннил эбел Марямил бакӏалде. Гьенибе какде гӏемераб халкъ бакӏарун букӏана гьеб сордоялъ. 13Пётрица каву бухидал, Рода абун цӏар бугей цо гъараваш ячӏана гьеб лъица бухулеб бугебали хал гьабизе. 14Пётрил гьаракь батӏа бахъизе лъайдал, гӏемерго йохиялъ каву ричӏизе рекӏеда ятичӏого, гьей жание екерун ана ва Пётр вугин кавудул кӏалтӏайилан бицана гьезда. 15Дур бетӏер сверун бугилан абуна гьез. Жинца гьереси бицунеб гьечӏилан чӏана гьей. Пётрил рухӏ батилин гьебилан абуна гьез.

16Пётрица жеги-жеги бухулеб букӏана каву. Каву рагьараб мехалъ, гьенив Пётр ватидал, хӏикмалъун хутӏана гьел. 17Руцӏцӏун чӏайилан гьезие квералъ ишанги гьабун, Пётрица бицана Бетӏергьанас жив туснахъалъуса къватӏиве вачиналъул хӏакъалъулъ. Цинги гьес абуна Якъубидаги#12:17 Гӏиса Масихӏил вацгӏал, Иерусалималда букӏараб иман лъуразул агьлуялъул бетӏер. цогидал вацаздаги бицейин гьеб кинабго.

Гьениса къватӏиве вахъун, цоги бакӏалде ана Пётр.

18Радал, Пётр киведай тӏагӏанаян, кутакалда рихха-хочун лъугьана хъаравуллъуда рукӏарал дол рагъухъаби. 19Пётр валагьеян амру гьабуна Гьеродица, амма кинго кодове щвечӏо гьев. Дол хъаравулзабиги ахӏун, кин-щиб ккарабилан цӏехана Гьеродица, цинги гьел чӏвазе буюрухъ кьуна.

Гьерод борохьги бан хола

Гьелдаса хадув Ягьудиялдаса Къайсарияталде ун, гьенив чӏана Гьерод. 20Гьесул цӏакъ ццин бахъун букӏана Тиралъул ва Сидоналъул гӏадамазда. Гьебмехалъ цоцазда дандги бан гьез Гьеродихъе жидерго вакилзаби ритӏана. Гьезул ракьалде квана-гьекъолеб жо Гьеродил улкаялдаса бачӏунеб букӏана. Гьединлъидал, гьесул кӏалгӏаялъув рагьтӏателлъун вукӏарав Бластилгун гьоркьоблъиги гьабун, Гьеродидасан рекъел гьарана гьез. 21Гьелгун дандчӏвазе къотӏи гьабураб къоялъ, чӏухӏараб ретӏелги ретӏун, тахиде вахун гӏодов чӏана Гьерод ва, халкъги гӏенеккун, гьездехун хитӏаб гьабун кӏалъана. 22Гьебмехалъ халкъалъ ахӏулеб букӏана, гӏадан-инсан гурин, живго аллагь вугин жидеда кӏалъалев абун.

23Амма гьес Аллагьасе рецц гьабичӏелъул, гьебсагӏат вачӏун Бичасул малаикас жаза гьабуна Гьеродие, черхалда борохь бан хвана гьев.

24Гьедин цӏубана ва тӏибитӏана Бетӏергьанасул рагӏи. 25Барнабаги Шаулги, жидеда тӏадкъараб ишги тӏубазабун, Иерусалималдаса Антиохиялде тӏадруссана. Маркилан тӏокӏцӏар бугев Иоаннги вачана гьез жидедаго цадахъ.

Currently Selected:

Чапарзабазул ишал 12: AvrNT

Highlight

Copy