Лукаца бицараб Рохалил хабар 10

10 бетӏер

Лъабкъоялда анцӏго мурид халкъалъухъе витӏула

1Гьелдаса хадуб Тӏадегӏанав Гӏисаца тӏаса вищана жеги лъабкъоялда анцӏго чи ва жиндасаго цере кӏи-кӏиккун ритӏана живго щвезе ракӏалда букӏарабщинаб шагьаралдеги росулъеги. 2Гьес гьезда абуна:

– Хуриб хӏалухъен гӏемер бижун буго, хӏалтӏухъаби дагь руго. Гьеб лъилъизе кверщел кодоб бугев Бетӏергьанасда гьаре лъилъарухъаби ритӏеян. 3Гьанже а! Гьале дица нуж ритӏулел руго бацӏазда гъорлъе кьагӏи гӏадин. 4Я гӏарац лъун таргьа босуге, я къайи лъун къвачӏа босуге, я хисун ретӏине хьитал росуге, нухда данде ккарасе саламги кьоге#10:4 Заман гӏадада хвезабугейилан абураб магӏна ккола гьелъул. . 5Лъил бакӏалде нуж щваниги, гьезие рекъел гьарун, «Ассаламу гӏалайкум (Рекъел нужее)» абун лъугьа гьесул къавулъе. 6Саламалъе (ай ракълие) мустахӏикъав чи вугони – нужер салам гьесде щвела, гьечӏони – гьеб нужедего тӏадбуссина. 7Гьеб къавулъ чӏа нуж, гьезда цадахъ квана-гьекъон, – хӏалтӏухъанасе мухь хӏалалаб букӏунелъул. Цо къавулъа цоги къавулъе гочаруге. 8-9Цо шагьаралде щун, нуж гьенир къабул гьаруни, нужее кьурабги кванай, гьенир ругел унтаралги сахлъизаре, Аллагьасул Парччахӏлъи нужеде тӏаде гӏунтӏун бугиланги бице гьезда. 10Ваамма цо шагьаралде щун, нуж гьенир къабул гьаричӏони, къотӏнореги рахъун, гьадин абе: 11«Нужер шагьаралда нижер хӏатӏазда тӏад чӏараб хӏургицин нижеца къватӏазде нужеего кӏутӏулеб буго. Амма лъан букӏаха Аллагьасул Парччахӏлъи тӏаде гӏунтӏун бугеблъи». 12Дица нужеда абулеб буго: къиямасеб къоялъ Содомалъул халкъ гӏемерго лъикӏ букӏина гьеб шагьаралъул халкъалдаса.

Балагьги гӏазабги Аллагьасде руссинчӏел шагьаразде

13Балагьги гӏазабги дуе, Хоразин шагьар! Балагьги гӏазабги дуе, Байтсаида шагьар! Амма Тиралъулгун Сидоналъул гӏадамазда рихьун рукӏаралани нужеда рихьарал гӏадинал мугӏжизатал, тӏутӏу-хъухъураб парталги ретӏун, ботӏроде рахъуги бан, ракьалда гӏодорги чӏун#10:13 Гьедин загьир гьабула жугьутӏаз ракӏ бухӏун бугеблъи. , церего руссинаан гьел Аллагьасде. 14Гьединлъидалин Тиралъулги Сидоналъулги халкъалъе къиямасеб къоялъ нужееялдаса бигьа букӏине бугеб! 15Дудаги, Капернаум, зобалазде бахине гьабилинищ ракӏалде кколеб бугеб? Жужахӏалъул кӏкӏалахъе рехила мун!

16Нужехъ гӏенеккулел дихъги гӏенеккула, нужеде инкар кколез дидеги инкар ккола, диде инкар кколез дун жинца витӏарав Аллагьасдеги инкар ккола.

Лъабкъоялда анцӏавго мурид тӏадвуссун вачӏуна

17Лъабкъоялда анцӏавго мурид рохуца холаго тӏадруссун рачӏана.

– Я, Бетӏерчӏахъад! – ан абуна гьез. – Жундулгицин мутӏигӏлъула нижее, дур цӏар рехсон гьезие амру гьабураб мехалъ.

18Гӏисаца гьезда абуна:

– Дида бихьана илбис пири гӏадин зодисан бортун унеб! 19Гьале дица нужее къудрат кьуна щибго зарал гьечӏого борхьалги ичӏкӏалалги хӏатӏаз мерхьине ва тушманалъул тӏолабго къуват-гучалда тӏад кверщелги кьуна. 20Амма нуж рохуге хъубал жундул нужее мутӏигӏлъулел ругилан, нуж роха зобалазда жидер цӏарал хъваразда гьоркьор рукӏиналдаса.

«Дуе рецц буго, дир Эмен!»

21Илагьияб Рухӏалъ цӏурав ва вохизавурав Гӏисаца гьебмехалъ абуна:

– Дуе рецц буго, дир Эмен, зоб-ракьалъул Бетӏергьан, цӏодораздаса ва гӏакъилаздаса балъго гьабун, лъимер гӏадиназе гьаб кинабго дуца загьир гьабуралъухъ. Уха, дир Эмен, гьелъулълъидалха бугеб дур цӏобалъул гӏатӏилъи!

22Кинабго дие дир Инсуца кьураб буго. Инсуда гурони, лъиданиги лъаларо Вас щивали. Васасда ва Эмен жидее загьир гьавизе Васасе бокьарал гӏадамазда гурони, лъиданиги лъаларо Эмен щивали.

23Муридаздехун вуссун, цохӏо гьезда абуна Гӏисаца:

– Гьардарал гурищха гьаб кинабго бихьулел нужер берал. 24Дица нужеда абулеб буго: гӏемерал аварагзабазеги парччахӏзабазеги бокьун букӏана нужеда бихьулеб бугеб бихьизе, амма гьезда бихьичӏо. Нужеда рагӏулеб бугеб рагӏизеги бокьун букӏана, амма гьезда рагӏичӏо.

Гурхӏел бугев самариясул хӏакъалъулъ

25Гьале цо динияв гӏалимчияс, гьесул хӏалбихьизе, суал кьуна:

– Я, Мугӏалим! Абадияб рукъалъул бутӏа щвезе щиб дица гьабизе кколеб?

26Гӏисаца гьесда абуна:

– Къануналда кин бугеб? Щиб цӏалараб дуца гьелъул хӏакъалъулъ?

27Дос жаваб кьуна:

– «Дурго Бетӏергьан Аллагь дуе вокьа дур тӏолабго ракӏалдалъун, дур тӏолабго рухӏалдалъун, дур тӏолабго къуват-жаналдалъун, дур тӏолабго гӏакълу-пикруялдалъун» ва «Мунго гӏадин вокьа дуе дуда аскӏов вугевги».

28Гӏисаца гьесда абуна:

– Дуца битӏун жаваб кьуна. Гьеле гьедин гьабуни, абадияб гӏумру букӏина дур.

29Живго ритӏухъ гьавизелъун, дов чияс гьикъана:

– Щивха кколев «дида аскӏов вугев»?

30Гьанже Гӏисаца гьесие, мисал бачун, хабар бицана:

– Цо чи унев вукӏана Иерусалималдаса Иерихоналде. Тӏаде кӏанцӏун хъачагъаз гьесухъа къайи бахъана, кьабун-вухун, хвалде ккезавун гьевги тун, нахъе ана. 31Гьале цо кашиш ккана досда тӏаде, амма гьев нухлул добцояб рахъалдехун лъугьана. 32Гьединго цо левитги#10:32 Левит – Иерусалималда букӏараб Мукъадасаб Рукъалъул гьитӏинав хъулухъчи. ккана досда тӏаде, гьевги лъугьана нухлул добцояб рахъалде. 33Сапаралда вукӏарав цо самариявги ккана досда тӏаде. Дов вихьаравго, гурхӏизе бачӏун, 34аскӏове ун, чогъроца чурун ва нах бахун, досул ругънал къачӏана гьес, жиндирго гӏорцӏмидаги рекӏинавун, петералде вачун, досие хъулухъги гьабуна. 35Нахъисеб къоялъ, петералъул бетӏергьанасе кӏиго динарги кьун, самарияс абуна: «Дуца тӏалаб гьабе досул. Гьалдаса цӏикӏкӏун дуца хвезабизе ккани, тӏадвуссун вачӏунаго гьебги бецӏила дица дуе». 36Хъачагъаз зулму гьабурасда «аскӏов вугевлъун» щив рикӏкӏинев гьел лъабаздаго гьоркьоса?

37– Досда гурхӏун кумек гьабуравха, – ян жаваб кьуна динияв гӏалимчияс.

Гӏисаца гьесда абуна:

– Инеги ун, дуцаги гьедин гьабе, – ян.

Марталги Марямилги хӏакъалъулъ

38Гьедин Гӏисаги муридалги сапаралда рукӏаго, гьев цо росулъе щвана. Марта абулей цо гӏаданалъ Гӏиса гьоболлъухъ вачана. 39Гьелъул йикӏана Марям абун яцги. Тӏадегӏанав Гӏисал хӏатӏаахада гӏодойги чӏун, гьесул харбихъ гӏенеккун йикӏана гьей. 40Мартайилан абуни, гьебмехалъ гьезие кӏудияб гьоболлъи гьабизе квалквадилей йикӏана. Гӏисада аскӏое ячӏун, гьелъ абуна:

– Я, Бетӏерчӏахъад! Дуе агъазго гьечӏо яцалъ дун гьаний квалквадизе тун йикӏиналъул. Дие кумек гьабизе яхъаян абе гьелда.

41Тӏадегӏанав Гӏисаца, гьелъие жаваб кьун, абуна:

– Марта! Марта! Мун гӏемераб жоялда квер чӏвазе лъугьун йиго, 42амма цо жо кквезе ккола чияс. Гьале Марямица лъикӏаб бутӏа тӏаса бищана, лъиданиги кӏвеларо гьелъухъа гьеб бахъизе.

Currently Selected:

Лукаца бицараб Рохалил хабар 10: AvrNT

Highlight

Copy