Матфейица бицараб Рохалил хабар 26

26 бетӏер

Ягьудиязул кашишзаби ургъула Гӏиса тӏагӏинавизе

1Гьеб хабар бицун лъугӏараб мехалъ, жиндирго муридазда Гӏисаца абуна:

2– Нужеда лъалаха кӏиго къоялдасан Пасхаялъул байрам букӏине бугеблъи. Гьеб къоялъ Гӏадамил Лъимадуе хилиплъизе руго ва гьев хъанчида вазе вуго.

3Кайафа абун жинда цӏар бугев бищунго кӏудияв кашишасул кӏалгӏаялъуре данделъун рукӏана гьебмехалъ чӏахӏиял кашишзабиги халкъалъул чӏухӏби-хӏакимзабиги. 4Гьез хӏукму гьабуна, хӏилла-рекӏкӏалдалъун кквезеги ккун, Гӏиса чӏвазавизе кколилан. 5Амма байрамалъул къоялъ бегьиларин, халкъалъул дандечӏей багъаризе бегьулилан абулеб букӏана гьез.

Цо чӏужугӏаданалъ Гӏисае гьабураб лъикӏлъи

6Барасалъ унтарав Симон абулев чиясул бакӏалда Бетаниялда кваназе гӏодов чӏун Гӏиса вугеб мехалъ, 7цӏакъ къиматаб ва бацӏцӏадаб махӏгьуинаб нахул цӏураб щагӏил сурахӏиги босун ячӏарай цо пуланай чӏужугӏаданалъ, гьеб гьесул ботӏроде чӏехьола. 8Гьеб бихьараб мехалъ, Гӏисал муридазул ццин бахъана:

– Щай гьабгощинаб нах гӏадада хвезабулеб? 9Гьеб нахги хирияб багьаялде бичун, гьелъухъ щвараб гӏарац мискинзабазе садакъаде кьезе бегьилаан.

10Гьезул пикру бичӏчӏун, Гӏисаца гьезда абуна:

– Щай нужеца гьей къварид гьаюлей? Дие лъикӏлъи гьабулейлъидал гьей йигей. 11Мискинзаби кидаго ратила нужеда аскӏор. Дунин абуни, кидаго гуро нужгун вукӏунев. 12Дир черхалда тӏаде махӏгьуинаб нахги тӏун, гьей чӏужугӏаданалъ хабалъейин дун къачӏалев вугев. 13Хӏакълъун абулеб буго дица нужеда: тӏолабго дуниялалда гьеб Рохалил хабар лъазабунщинаб бакӏалда бицен букӏине буго, гьай гӏаданги ва гьалъ дие гьабураб лъикӏлъиги ракӏалде щвезабун.

Ягьуда Искариот Гӏисае хилиплъула

14Гьебмехалъ анцӏила кӏиявго чапарасда гьоркьов вукӏарав Ягьуда Искариот абулев чияс, чӏахӏиял кашишзабазухъе ун, гьезда гьикъана:

15– Гӏиса дица нужер кверде кьуни, щиб нужеца дие кьелеб? – ан.

Лъеберго гӏарцул гъурущ кьезе къотӏи гьабуна гьез Ягьудае. 16Гьелдаса нахъе Ягьудаца балагьулеб букӏана Гӏиса гьезул кверде кьезе санагӏалъи бугеб бакӏги заманги.

Пасхаялъул квен

17Реччичӏел Панкъазул Байрамалъул тӏоцебесеб къоялъ, Гӏисахъе рачӏун, муридаз гьикъана:

– Пасхаялъул квен киб кваназе дуе бокьилеб? Нижеца хӏадур гьабила гьеб.

18Гӏисаца абуна:

– Шагьаралда вугев цо пуланав чиясухъе ун, гьесда абе нужеца, жиндир болжалги гӏагарлъун бугелъул, Пасхаялъул байрам жиндирго муридазда цадахъ дур бакӏалда тӏобитӏилин абизе ритӏанин ниж нижер Мугӏалимасилан.

19Гӏисаца абурабги тӏубазабун, гьез пасхаялъул квенги хӏадур гьабуна.

20Дуниял рукӏкӏараб мехалъ вачӏун, анцӏила кӏиявго муридасда цадахъ кваназе гӏодов чӏана Гӏиса. 21Кваналел рукӏаго, гьес абуна:

– Хӏакълъун абулеб буго дица нужеда: нужер цояв дие хилиплъила.

22Кутакалда пашманлъана гьел. Цин-циял рахъун цӏехана:

– Я, Бетӏерчӏахъад! Дун гуро гурищ? – абун.

23Гӏисаца гьезда абула:

– Дида цадахъ гьаб гъадринибе квер бегьулев вугев чи хилиплъизе вуго дие. 24Гӏадамил Лъимадул иш ккезе буго Тӏухьдузда хъван бугеб куцалда. Амма квешаб балагь рещтӏине бугебха Гӏадамил Лъимер тушбабазул кверде кьурав чиясде. Дуниялалда вижичӏевани лъикӏан гьесие.

25Гьесие хилиплъарав Ягьудаца гьикъана гьебмехалъ:

– Дун гуро гурищ, Рабби#26:25 Дир Мугӏалим. ? – ян.

Гӏисаца гьесда абуна:

– Дуца абулеб бугоха гьедин.

26Гьедин кваналел рукӏаго, Гӏисаца, цо чедги кодобе босун, тӏаде дугӏаги гьабун, бек-бекун муридазухъе кьолаго, абуна:

– Босе, кванай. Гьаб буго дир черх.

27Цинги, чогърол цӏураб щурунги кодобе босун, Аллагьасе реццги гьабун, гьезухъе кьолаго, Гӏисаца абуна:

– Кинацаго гьекъе гьаб щурумалъуса. 28Гьаб буго киназулго мунагьал чуризе гӏоло тӏолеб дир би – Цӏияб Къотӏи щулалъиялъе тӏолеб би. 29Дица нужеда абулеб буго: дир Инсул Парччахӏлъиялда цӏияб чагъир нужеда цадахъ гьекъолеб къо тӏаде гӏунтӏизегӏан, дица гьаб цӏолбол цӏураб жа тӏокӏаб гьекъезе гьечӏо.

30Цинги гьез туркаби ахӏана, гьениса рахъун ун, Зайтуналъул магӏарде рахана.

«Дуца дидаса инкар гьабила»

31Гьебмехалъ Гӏисаца гьезда абула:

– Дида аскӏоб яхӏ рехараб жо гьабизе буго къаси нужеца кинацаго. Тӏехьалда хъван бугелъул:

«Дица вехь чӏвала, гӏиял рехъенги рахъ-рахъалде тӏурун ина».

32Хун тун хадув чӏаголъараб мехалъ нужедаса цеве щвела дун Галилеялде.

33Пётрица гьесда абуна:

– Киназго яхӏ реханиги, дица киданиги яхӏ рехиларо.

34Гӏисаца гьесда абуна:

– Хӏакълъун абулеб буго дица дуда: гьанже радакье хӏелеко бахъиналде лъабцӏул инкар гьабизе буго дуца дидаса.

35Пётрица гьесда абуна:

– Дуда цадахъ хвезе кканиги, дица дудаса инкар гьабизе гьечӏо, – ян.

Гьедин абулеб букӏана киналго цогидал муридазги.

Гетсемания ахикь Гӏисал гьари-дугӏа

36Цинги Гӏиса гьезда цадахъ Гетсемания абулеб бакӏалде уна. Гьес муридазда абула:

– Нуж гьанир гӏодор чӏун рукӏа, дове ун, Аллагьасе гьари-дугӏа гьабун дун вачӏинегӏан.

37Пётрги Зебедайил кӏиявго васги рачана Гӏисаца жиндаго цадахъ, ва гьев ккана къваридаб ва пашманаб ургъалилъе. Гьебмехалъ Гӏисаца гьезда абула:

38– Хвалил гӏазаб буго дир рекӏее. Нуж гьанир дида цадахъ рукӏа ва рорчӏуда чӏа.

39Цинги, дагьав довегӏанги ун, кӏалагъоркьеги речӏчӏун, гьари-дугӏаялда абулеб букӏана гьес:

– Я, дир Эмен! Бегьулеб батани, гьеб хвалил лълъар гьекъезабуге дида. Амма дие бокьухъе гуреб, дуего бокьухъе букӏине биччанте.

40Тӏадвуссун вачӏиналде, муридал кьижун ратана. Гьес Пётрида абуна:

– Цо сагӏаталъ дида цадахъ кьижичӏого чӏезе кӏолеб букӏинчӏебищ нужеда? 41Воре, нуж рорчӏуда чӏа! Гьари-дугӏаялде русса, нужго къосинарунгутӏизе. Инсанасул рухӏ – лебалаб, черх – загӏипаб.

42Нахъеги довегӏанги ун, гьари-дугӏа гьабуна:

– Я, дир Эмен! Гьеб хвалил лълъар дица гьекъечӏого гӏолареб батани, дуе бокьухъе букӏине биччанте.

43Гьанжеги тӏадвуссун щведал, Гӏисада гьел ратула, беразул тӏелхал бакӏлъун, кьижун ккун. 44Гьелги жалго тун, нахъеги довегӏанги ун, лъабабизеги гьари-дугӏаялда долго рагӏаби абизе лъугьана Гӏиса. 45Цинги тӏадвуссун вачӏун, гьес муридазда абуна:

– Нуж жеги рахӏаталда кьижунищ ругел? Гьале тӏаде гӏунтӏана доб Гӏадамил Лъимер мунапикъзабазул кверде кьолеб сагӏат. 46Гьа, рахъа, доле хиянатчи тӏаде щолев вугин.

Гӏиса ккун вачун уна

47Гӏисаца гьедин абулаго, гьале тӏаде щвана Ягьуда – дол анцӏила кӏигояздасан цояв. Гьесда цадахъ хвалчабигун, тӏилалгун тӏаде бачӏунеб букӏана чӏахӏиял кашишзабазги чӏухӏби-хӏакимзабазги битӏараб гӏемераб халкъ. 48Хиянатчияс гьезда лъазабун букӏана: «Дица убач гьабурав чи Гӏиса вукӏина. Цинги ккве нужеца гьев». 49Ягьуда битӏун Гӏисада аскӏове уна.

– Ассаламу гӏалайкум, Рабби! – янги абун, Гӏисада убач гьабула.

50Гӏисаца гьесда абула:

– Дурго мурад тӏубазабе, гьудул, гьанже.

Гьебсагӏат тӏадречӏчӏун гӏадамаз Гӏиса къан ккола.

51Гьебмехалъ Гӏисал цо муридас лъалиниса бахъун хьвагӏараб хвалчаца цо чиясул (гьев вукӏана бищунго кӏудияв кашишасул рагьтӏател) гӏин къотӏун рехула. 52Гӏисаца гьев муридасда абуна:

– Хвалчен лъалиниб лъе! Хвалчен бахъарав хвалчадалъун хвезе вуго. 53Дие кумекалъе гьабсагӏат малаикзабазул анцӏила кӏигоялдаса цӏикӏкӏун бо битӏеян дирго Инсуда гьаризе дида кӏоларебиланищ дуда ракӏалде кколеб? 54Тӏухьдузда хъвавухъе лъугьинарогури гьебмехалъ.

55Гьебсагӏаталъ Гӏисаца гьел гӏадамаздехун вуссун абуна:

– Хвалчабигун, тӏилалгун хъачагъасде гӏадин кӏанцӏанагури нуж дун кквезе. Щибаб къоялъ халкъалъе вагӏза-насихӏат гьабулев Мукъадасаб Рокъов гӏодов чӏун вукӏунаангури дун, гьениб нужеца диде квер борхичӏо. 56Амма гьаб кинабго лъугьунеб буго аварагзабазул Тӏухьдузда хъвараб ритӏухълъизелъун.

Гьебмехалъ киналго муридал, вукӏаралъув гьевги тун, лъутун уна.

Гӏиса тӏадегӏанаб судалда цеве чӏезавула

57Гьез Гӏиса вачана Кайафа абулев бищунго кӏудияв кашишасул бакӏалде. Гьенир данделъун рукӏана диниял гӏалимзаби ва чӏухӏби-хӏакимзаби. 58Пётрги вукӏана нахъа-нахъа чӏун вачӏунев, ва гьездаго хадув цун, бищунго кӏудияв кашишасул азбаралъухъе щвана гьев. Жаниве лъугьун, гӏодов чӏана.

59Гьебмехалъ чӏахӏиял кашишзабазги тӏолабго тӏадегӏанаб судалъги балагьулеб букӏана Гӏиса чӏвазе къотӏиялъе гӏураб гӏайиб гьесде гӏунтӏизабизе гьересинугӏлъи. 60Амма гьеб гьезухъе щолеб букӏинчӏо, гьересинугӏлъиялъе гӏезегӏанго гӏадамал гьенире рачӏунел рукӏаниги. Амма ахиралда кӏиго чи вачӏун, 61гьез бицана, гьас абулеб букӏанин Аллагьасул Мукъадасаб Рукъ щущазабизе ва лъабго къоялде цӏидасан гьеб базе кӏолин жиндаян. 62Гьебмехалъ, тӏаде вахъун, бищунго кӏудияв кашишас Гӏисада гьикъана:

– Дуда данде нугӏлъи гьабун гьаз бицунеб бугеб жоялъе жаваб кьезе рагӏигойищ дур гьечӏеб?

63Гӏиса вуцӏцӏун чӏун вукӏана. Бищунго кӏудияв кашишас гьесда абуна:

– Хӏакъав Аллагьасул цӏар бахъун гьарулеб буго дица дуда: Аллагьасул Вас Масихӏ мун ватани, вугилан абе нижеда.

64Гӏисаца гьесда абуна:

– Дуцаго абулеб бугоха гьедин, амма дица нужеда абулеб буго: гьанжеялдаса хадув Гӏадамил Лъимер нужеда вихьила Къудратав Аллагьасул кваранаб рахъалда гӏодов чӏун ва зобалазул накӏкӏул парчабазда тӏад вачӏунев.

65Гьебмехалъ бищунго кӏудияв кашиш, жиндаго тӏад букӏараб ретӏелги тӏутӏун балаго, ахӏдезе лъугьана:

– Гьас гӏасиял-пасикъал жал рицунел руго. Тӏокӏалги сундуе нилъее нугӏзал къваригӏарал? Гьале гьабсагӏат рагӏанагури гьасул гӏасиял-пасикъал рагӏаби. Щиб пикру нужер бугеб?

66Киназго абуна гьев чӏвазе къотӏизе кколилан.

67Цинги гьел Гӏисал бадире тударизе, гьев вухизе лъугьана.

68– Мун авараг ватани, лъица кьабурабали бице, Масихӏ! – анги абун, гьесул кӏаркьен чӏвалаан.

Пётрица Гӏисадаса инкар гьабула

69Азбаралъув гӏодов чӏун вукӏарав Пётрида аскӏое ячӏун, цо гъаравашалъ абуна:

– Мунги вукӏанагури Галилеялдаса Гӏисада цадахъ.

70Киназдаго цебе нагӏадала ккун, Пётрица абуна дуца бицунеб жо щибилан.

71Пётр кавудухъехун унаго, гьений йикӏарай цоги гъаравашалда вихьана гьев. Гьенир аскӏор ругезда гьелъги абуна гьав чи Назареталдаса Гӏисада цадахъ вукӏанилан. 72Гьев чи жинда лъаларилан гьедун нагӏадала ккуна Пётрица гьанжеги. 73Гӏемер мехго балелде гьенир рукӏарал гӏадамаз, аскӏоре рачӏун, Пётрида абуна: «Гьайгьай, мунги дозул чи вуго. Мацӏалъухъ балагьун лъалеб буго мун ватӏа вахъизе». 74Гьебмехалъ Аллагьасул цӏар бахъун гьедаризе лъугьана гьев чи жинда лъаларилан. Гьебсагӏат рагӏана гӏегӏедулеб хӏелкил гьаракь. 75Пётрида ракӏалде щвана радакье хӏелеко бахъиналде, лъабцӏулго инкар гьабилин дуца дидасайилан Гӏисаца жиндаго абун рукӏарал рагӏаби. Къватӏиве ун гӏек-гӏекиялда гӏодана Пётр.

Currently Selected:

Матфейица бицараб Рохалил хабар 26: AvrNT

Highlight

Copy