Hechos 1
1
Dios iprometia̱tp Espíritu Santu
1Oh Teófilo, en ayé libru tʉnja'jyʉ'cway tʉ-actujawiu nu'pʉjʉn cosajat jeme Jesús iwatway mit i-ajque's̈way. Tʉ-actujawiu nu'pʉjʉn desde Jesús ichu̱chij nʉmdacyo'ypay hasta ayé s̈ʉjw cuandu Dios iguimunʉjcs̈ pa tsajpni'c. 2Antes inʉjcs̈ pa tsajpni'c, Jesús icupi̱u i-apóstojlat mit i-ajque's̈cʉs̈au ti iwatcámpay. Mit Jesús iguimoy poder Espíritu Santu pa igui-ajque's̈cʉs̈awa'n ayé apóstojlat. 3Cʉs̈ i-o'jc cunu̱s̈ni'c, Jesús jutucta̱cwatu mit cʉs̈ ique's̈ta̱jcʉs̈au i-apóstojlat por cuarenta s̈ʉjwat. Iwat we'n pa ma jawiga ni'c iyacs̈ta'cway ijutucta̱jc, mit inʉmgʉs̈au nat imanda̱twa'n Dios.
4Cuandu itsʉ̱́naj Jesús mit i-apóstojlat, imanda̱tcʉs̈ magapichinga en ayé mʉjway nʉ'jcopac Jerusalén, mit inʉmgʉs̈au:
—Atsʉ̱́nga hasta Dios Nate̱jat iguicumplia̱twa'n lo que iprometia̱tway, as̈am tʉnʉmgʉ́s̈aj. 5Ni'c iyacs̈ta'cway Juan nʉ'gutem mit nʉ', po cajegáj Dios is̈moygáj Espíritu Santu.
Dios imunʉcs̈ Jesús pa tsajpni'c
6Wejpu'n ayé apóstojlat ni-apʉcmujcʉjʉu mit i-ucyo'tcau Jesús:
—Señor, ¿inyajcʉs̈áj libre Israelway jayajwat en ayʉ̱́j jinapay tiempu pa ma manda̱tca-atu?
7Mit Jesús ipo'ngʉs̈:
—Ca-itp ti is̈jawigawa'n ti tiempu o ti s̈ʉjw ijatwa'n we'n, ni'c Dios Nate̱jat iwatáj hasta je' iguiwa'nwa'n. 8Po Dios is̈acmingajáj Espíritu Santu mit wejpu'n impʉctsougáj poder. Mit inyʉmdacyo'ygáj pa jayajwat ma tʉs̈cupʉjcac. Mit inyʉmdacyo'ygáj Jerusalén, mit nu'pʉjʉn Judeajway na̱s̈, mit Samariajway na̱s̈, mit hasta mam icucʉs̈inu ayʉ̱́j mundu.
9Mit cʉs̈ iguinʉmgʉ́s̈aj ayʉ̱́j cosajat, Dios imunʉcs̈nuw Jesús pa tsajpni'c, mit je'jat i-is̈cau inʉjcs̈. Mit Jesús iguicutuc tu'c wintuc, mit ayé apóstojlat i-is̈togoygau. 10Mit je'jat yuc-e'pcau pa yucm mam icu't Jesús, mit cʉs̈ que's̈ta̱jcau jaran mechc jayajwat mam je'jat itsʉ̱nga, mit ayé mechc jayajwat cutigatsijcat mit po'pjamuc. 11Ayʉ̱́jat iguinʉmgajau:
—Jayajwat Galileajatway, ¿tini'c inyuc-e'pca pa yucm? Ayé nije'yu Jesús in-is̈cau inʉjcs̈ pa tsajpni'c, mit as̈am is̈-ís̈caj inʉjcs̈ pa tsajpni'c, wename imi'nwa'natu.
Icupiugau Matías pa apóstol
12Mit cʉs̈ ayé apóstojlat pichingau en ayé copac inʉ'jyway los Olivos, mit pitujcau pa Jerusalén. Ayé copac tsʉ̱nap tomo'c Jerusalén como tu'c kilómetro, ni'c ayé ley wejenu iguimarca̱t ma yo'y tu'c jayau po'cs̈ans̈ʉuni'c. 13Icóygaj Jerusalén, cu'tcau en tu'c cuartu tsʉ̱naway hasta yucm mam itsʉ̱ngaj Pedro, Jacobo, Juan, Andrés, Felipe, Tomás, Bartolomé, Mateo, Jacobo Alfeo iway, Simón inʉmgajapay cananista, mit Judas Jacobo imajtsʉc. 14Nu'pʉjʉn je'jat siempre ni-apʉcmujcʉjʉu pa i-ora̱ti̱jcawa'n, mit ora̱tcawey mit je'jat una̱c to's̈aywájat, mit we'ney María Jesús ima̱m, mit Jesús imajtsʉcwájat.
15En ayé s̈ʉjwat Pedro nitenda̱jcʉu es̈pu̱tum mam itsʉ̱nga nu'pʉjʉn hermanujat, mit tsʉ̱ngau jem como ciento veinte jayajwat. Mit Pedro inʉmgʉs̈au:
16—Hermanujat, it ti icumplia̱jt jeme tsʉ̱napay ja'yic Dios ilibruni'c, ni'c Espíritu Santu ámbanu i-actunʉm David ti iguijatámpay Judas. Ni'c Judas ayé jeme iwejnu'pcʉs̈away aye'jat jeme i-actangaway Jesús. 17Judas yo'y mit ʉjtsat, mit ayé jayau cupiwigate-ey pa tʉs̈muyos̈watcawa'n Jesús. 18Judas ma̱lo'c ni'c ito'ctʉgʉy Jesús, mit ayé tumi̱n imoygaway itujuygau tu'c na̱s̈. Mit cʉs̈ Judas jas̈manac, pʉjtuc itinchay mit s̈is̈cada̱c nu'pʉjʉn itripajat. 19Mit nu'pʉjʉn jeme tsʉ̱ngaway Jerusalén ijawigau jeme jatway, mit ayé na̱s̈ inʉ'jymoygau je'jat i-auni'jcat Acéldama, ayʉ̱́j inʉmo'jcʉp Nipin-na̱s̈. 20Ni'c ja'yic itsʉ̱na libruni'c los Salmos, inʉm:
Nu'pʉjʉn ma cuyaguiga ayé tʉjc mam je' itsʉ̱naj,
magatsʉ̱na nepʉn jem.
Mit inʉm jatu'c salmu:
Iche'ngáj jatu'c jeme yos̈watámpay je' ilajni'c.
21Inʉm Pedro:
—Itp ti nas̈cupiugawa'n tu'c jayau jeme tsʉ̱naway mit ʉjtsat nu'pʉjʉn ayé tiempu cuandu el Señor Jesús iyo'jy mit ʉjtsat. 22Nacupiugáj tu'c jayau jeme tsʉ̱naway mit ʉjtsat desde Juan inʉ'gutejm hasta ayé s̈ʉjw cuandu Dios iguimunʉjcs̈ Jesús pa tsajpni'c. Ayé jayau ma nʉm as̈am ʉjtsat ni'c iyacs̈ta'cway ijutucta̱jc Jesús.
23Mit icupiugau mechc jayajwat pa pʉn ipʉgámpay ayé yos̈. Tu'c jayau inʉ'jy José mit inʉ'jyey Barsabás, mit i-apellidu Justo. Jatu'cway inʉ'jy Matías. 24Mit i-ora̱tcajau Dios, inʉmgajau:
—Señor, mi̱ inis̈cap nat itsʉ̱nga tʉnjo̱jtat tʉnu'pʉjʉjnat. Actujáwigac jʉmay incupiwáj de ayʉ̱́j mechc jayajwat. 25Actujáwigac pʉn yos̈watáj mit ʉjtsat mit ma jat apóstol, ni'c Judas i-actogoy iyos̈ ni'c ma̱lo'c. Je' o'c mit nʉcs̈ je' ilugarni'c pa iguitunas̈wa'n.
26Mit je'jat i-i̱jcajau suerte mit actsʉ̱nau Matías. Mit je' tʉgʉy mit ayé once apóstojlat.
Currently Selected:
Hechos 1: PSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
