San Lucas 3

Juan nʉ'gutempayna' nʉmdacyo'yp

1Cuandu Tiberio César itsʉ̱naj de rey quince s̈iwit, wejpu'n Poncio Pilato gobernador Judeajway na̱s̈, mit Herodes gobernador Galileajway na̱s̈, mit ije̱way Felipe gobernador Itureajway na̱s̈ mit Traconitejway na̱s̈, mit Lisanias gobernador Abiliniajway na̱s̈. 2Mit tsʉ̱ngau judíujat imʉjpa̱nijat Anás mit Caifás. Mit wejpu'n Dios imucots Juan, Zacarías iway, mam igatsʉ̱na nepʉn. 3Mit Juan nʉcs̈ nu'pʉjʉn laj tom ayé mʉjnʉ' Jordán, mit inʉmdacyo'y ni'c itp ti nas̈cuyaguiwa'n nama̱lway to̱u mit cʉs̈wa'n naninʉ'gutéjmʉ pa Dios nas̈chi'jtáj nu'pʉjʉn mal nawatway. 4Ayʉ̱́j jat as̈am profeta Isaías iguinʉjm ilibruni'c:

“Tu'c jayau inʉmdacyo'yp mam igatsʉ̱na nepʉn:

Oyájca tu'c to̱u ni'c mimp el Señor.

Acyács̈ca imvidajat pa is̈pʉctsougawa'n je'.

5I-apatscáj nu'pʉjʉn sanja,

mit i-acyacs̈cáj nu'pʉjʉn copajcat,

mit to̱jwat catsʉ̱ngapay pajcu i-acyacs̈cáj,

mit to̱jwat itcʉjʉpay cʉtwájat i-oyajcáj.

6Mit nu'pʉjʉn jayajwat ijawigáj ni'c Dios isalva̱tcʉs̈áj ijayajwat.”

7Mit nʉs̈cau may jayajwat pa iguinʉ'gutemgáj je', mit inʉmgʉs̈au:

—Mijchat as̈am mitsanajyt ni'c mipo'jcap jaran cuandu is̈jáwiga ni'c Dios is̈castiga̱tcáj. ¿Pʉn is̈acpo'jcau? 8Yo'yga yacs̈ic pa jayajwat ma e'pca ni'c incuyaguigaway inma̱lway to̱jwat. Camnʉmga ni'c más mivalia̱tcap ni'c mipichingau Abraham ifamiliani'c. Tʉnʉmgʉs̈ap ni'c Dios oyap iguipʉjcʉs̈ ayʉ̱́j tsa'jat pa iguituwatcʉs̈awa'n Abraham iwajyat. 9Mit jinap listu itsʉ̱na tu'c hacha pa iguitupus̈pichingawa'n cujyat hasta cʉtʉm, mit ipus̈pichingáj cujyat igayacpay oyway fruta, mit ica'tstʉgʉygáj jʉngʉtʉm. We'n is̈jatcáj mijchat te siguia̱tp is̈wátca mal.

10Mit ayé jayajwat i-ucyo'tcau Juan:

—¿Tipaj tʉnwatcáj?

11Mit Juan ipo'ngʉs̈:

—Jeme ijtʉpay mechc chec ma mo' jeme ca-ijtʉpay. Mit jeme ijtʉpay ti icayámpay, ma mo' jeme ca-ijtʉpay.

12Mingawey una̱c jeme ique'chumgapay demás impuestujat. Je'jat mingau pa ininʉ'gutemgʉjʉwa'n, mit je' inʉmgajau:

—Amayipay, ¿ti tʉnwatcáj?

13Mit inʉmgʉs̈au:

—Camque'chúmga demás. Que'chúmga as̈am iguinʉm ley.

14We'ney igui-ucyo'tcau una̱c soldajat:

—¿Ʉjtsat te? ¿Ti tʉnwatcáj?

Mit inʉmgʉs̈au:

—Camchi'tcajawit nepʉn neti, mit camwe̱twátcaja nepʉn, mit tsʉ̱́nga contentu mit insueldujat.

15Mit ayé jayajwat ipensa̱tcau pʉn ayé Juan, mit ni-ucyo'tcʉjʉu te Juan ayé Cristu i-ajyu'támpay Dios. 16Mit Juan inʉmgʉs̈au nu'pʉjʉn:

—Iyacs̈ta'cway tʉnʉ'gutemgʉs̈áj mit nʉ', po mimp tu'c jeme más ijtʉpay poder que ʉ̱, mit tʉs̈camerecia̱tp tʉs̈quejawa'n icʉ'acbúlin. Je' is̈moygáj Espíritu Santu as̈am jʉjn. 17Je' ijtʉp icʉ'ni'c ayé yeman itugus̈ujpay trigu mit i-aparta̱táj jeme limpiuway, mit icomáj ayé trigu mam iguiguarda̱t, po pu̱tsputsna' ino'gáj mit tu'c jʉjn jeme cajapi'chámpay nunca.

18We'n iguitsawigʉs̈ Juan mit inʉmgʉs̈au oyway noticia ayé jayajwat. 19Mit Juan iche'cta̱c ayé gobernador Herodes, ni'c Herodes ipʉjcau Felipe ito's̈ay. Mit ayé to's̈ay inʉ'jy Herodías, mit Felipe ayé Herodes ije̱way. Mit mayo'c mal iguiwajt Herodes. 20Po Herodes igawatu cuenta mit iwat jatu'c más mal ni'c icuytʉjcom Juan.

Jesús ninʉ'gutejmʉp

21Icʉs̈ca ninʉ'gutejmʉpay nu'pʉjʉn ayé jayajwat, we'ney Jesús ninʉ'gutejmʉu, mit i-ora̱jt, tsajp awa̱ts, 22mit manac Espíritu Santu, mit je' i-is̈cau as̈am tu'c paloma, mit tan iyucuinm. Mit Dios cots tsajpni'c, inʉm:

—Mi̱j ayé tʉ̱wáy jeme tʉwampay, mit is̈acji'jcap tʉnjo̱jt.

Jesús ifamiliajat

23Mit Jesús ijtʉu como treinta s̈iwit cuandu ichu̱chij ajque's̈pay, mit jayajwat inʉmgau ni'c je' ite̱t José. Mit José ite̱t Elí, 24Elí ite̱t Matat, Matat ite̱t Leví, Levi ite̱t Melqui, Melqui ite̱t Jana, Jana ite̱t José. 25José ite̱t Matatías, Matatías ite̱t Amós, Amós ite̱t Nahum, Nahum ite̱t Esli, Esli ite̱t Nagai, 26Nagai ite̱t Maat, Maat ite̱t Matatías, Matatías ite̱t Semei, Semei ite̱t José, José ite̱t Judá, 27Judá ite̱t Joana, Joana ite̱t Resa, Resa ite̱t Zorobabel, Zorobabel ite̱t Salatiel, Salatiel ite̱t Neri, 28Neri ite̱t Melqui, Melqui ite̱t Adi, Adi ite̱t Cosam, Cosam ite̱t Elmodam, Elmodam ite̱t Er, 29Er ite̱t Josué, Josué ite̱t Eliezer, Eliezer ite̱t Jorim, Jorim ite̱t Matat, 30Matat ite̱t Leví, Leví ite̱t Simeón, Simeón ite̱t Judá, Judá ite̱t José, José ite̱t Jonán, Jonán ite̱t Eliaquim, 31Eliaquim ite̱t Melea, Melea ite̱t Mainán, Mainán ite̱t Matata, Matata ite̱t Natán, 32Natán ite̱t David, David ite̱t Isaí, Isaí ite̱t Obed, Obed ite̱t Booz, Booz ite̱t Salmón, Salmón ite̱t Naasón, 33Naasón ite̱t Aminadab, Aminadab ite̱t Aram, Aram ite̱t Esrom, Esrom ite̱t Fares, Fares ite̱t Judá, 34Judá ite̱t Jacob, Jacob ite̱t Isaac, Isaac ite̱t Abraham, Abraham ite̱t Taré, Taré ite̱t Nacor, 35Nacor ite̱t Serug, Serug ite̱t Ragau, Ragau ite̱t Peleg, Peleg ite̱t Heber, Heber ite̱t Sala, 36Sala ite̱t Cainán, Cainán ite̱t Arfaxad, Arfaxad ite̱t Sem, Sem ite̱t Noé, Noé ite̱t Lamec, 37Lamec ite̱t Matusalén, Matusalén ite̱t Enoc, Enoc ite̱t Jared, Jared ite̱t Mahalaleel, Mahalaleel ite̱t Cainán, 38Cainán ite̱t Enós, Enós ite̱t Set, Set ite̱t Adán, mit Adán iguiwat Dios.

Currently Selected:

San Lucas 3: PSNT

Highlight

Copy