San Lucas 2

Yename i-ijt Jesús

1En ayé s̈ʉjwat Augusto César manda̱t pa nu'pʉjʉn jayajwat ma nija'ygu'tcʉjʉ. 2Primeru nija'ygu'tcʉjʉu cuandu itsʉ̱naj Cirenio gobernador Siriajway na̱s̈. 3Mit nu'pʉjʉn nʉs̈cau nija'ygu'jtʉpay inʉ'jcopacni'jcat. 4Mit José pichin en ayé nʉ'jcopac Nazaret Galileajway na̱s̈ pa inʉcs̈wa'n nʉ'jcopac Belén Judeajway na̱s̈ mam i-ijt David, ni'c José pichin David ifamiliani'c. 5Mit José nʉcs̈ nija'ygu'jtʉpay mit María jeme imunicʉ'pa̱jtʉ́mpay, mit María wáyajanu itsʉ̱na. 6Mit cuandu jem itsʉ̱ngaj, María iguicojyau s̈ʉjw pa ita'cwa'n. 7Mit ita̱c iprimer-wáy, icupitmo'n mit jamuc, mit icʉmda̱c mam igui-actsʉ̱́nga aníma̱jtat ni'c ca-itu laj pa je'jat mʉjtujugum.

Dios i-ángejlat mit pastojrat

8Mit en ayé na̱s̈ it borregu-cuida̱tpajyat mit i-ama̱gap i-aníma̱jtat. 9Mit cʉs̈ el Señor Dios i-ángel iguique's̈ta̱jcajau, mit Dios iluz iguicuta'cs̈ta̱jcau, mit je'jat ni-apʉ̱tigʉjʉu. 10Mit ayé ángel iguinʉmgajau:

—Campʉ̱tcawit ni'c tʉmumingʉs̈ap tu'c namay noticia pa nu'pʉjʉn jayajwat ma ji'jca ijo̱jtat. 11Ni'c jinap i-ijt David inʉ'jcopacni'c tu'c jeme is̈salva̱tcámpay, mit ayé Cristu el Señor jeme i-ajyu'tway Dios pa is̈manda̱tcáj. 12Pa pi jawiga ni'c iyacs̈way tʉnʉmgʉs̈apay, impa̱tcáj qui'chwáy cupitmo'nic mit jamuc, mit cʉmnap mam igui-actsʉ̱́nga aníma̱jtat.

13Mit de repente mit ayé ángel que's̈ta̱jcau más ángejlat tsajpni'jcatway, mit i-oyninʉmgau Dios mit inʉmgau yename:

14¡Namʉjninʉ́mga Dios yucmay!

mit yam na̱s̈ni'c nepʉn magatsuguinwat, mit jayajwat ma niwangʉjʉ.

15Ipítujcanuj ayé ángejlat pa tsajpni'c, ayé borregu-cuida̱tpajyat inʉmgau je'jatu:

—Jaga Belén na-e'pca lo que jatway, mit na-e'pcáj lo que el Señor nas̈actujawigaway.

16Mit je'jat nʉs̈cau junju'n mit ipa̱tcau María mit José, mit qui'chwáy cʉmnap mam igui-actsʉ̱́nga aníma̱jtat. 17Mit igui-ís̈caj, i-actujawigau nu'pʉjʉn lo que ángejlat iguinʉmgajaway, ni'c itnup ayé qui'chwáy. 18Mit nu'pʉjʉn imaraugaway nigu-épigʉjʉu ni'c we'n iguinʉ́mgaj borregu-cuida̱tpajyat. 19Po María iguarda̱t nu'pʉjʉn ayʉ̱́j cosajat ijo̱tni'c. 20Mit borregu-cuida̱tpajyat pitujcanuw mit imʉjninʉmgau mit i-oyninʉmgau Dios ni'c imaraugau mit i-is̈cau nu'pʉjʉn ayé cosajat as̈am ayé ángel iguinʉmgajau.

Ipresenta̱tcap Jesús templuni'c

21Mit i-íjtʉj ocho s̈ʉjwat, imarca̱tcau ayé qui'chwáy as̈am judíujat iguiwátcaj mit iyajcajau inʉ'jy Jesús ni'c we'n iguinʉjm Dios i-ángel ma yajcaja inʉ'jy antes iguitajnau ima̱m ijo̱jtugum.

22Mit icumplia̱tcau ayé s̈ʉjwat pa iniprepara̱jtʉwa'n María as̈am iguinʉjm Moisés iley, mit cʉs̈ imunʉs̈cau Jesús pa Jerusalén pa iguipresenta̱tcajawa'n el Señor. 23Iwatcau we'n ni'c ja'yic itsʉ̱na el Señor ileyni'c: “Nu'pʉjʉn qui'chwáy ijtʉ'gámpay, ayé el Señor ije'.” 24Mit inʉm el Señor ileyni'c ni'c ma yajcaja pa ofrenda mechc esquibú o mechc palomawájat. Mit we'n iguiwajt María.

25Mit it Jerusalén tu'c jayau inʉ'jyway Simeón, mit ayé tu'c jayau yacs̈icway mit i-adora̱t Dios, mit je' i-atsʉ̱nap hasta Dios iguisalva̱tcʉs̈wa'n Israejlatway. Mit Espíritu Santu tsʉ̱nau mit je'. 26Mit je' igui-actujawiu Espíritu Santu ni'c ca-o'gáj hasta tega-e'p ayé Cristu jeme el Señor i-ajyu'támpay. 27Mit Espíritu Santu iguinʉjmau ma nʉcs̈ templuni'c. Mit wejpu'n José mit María imunʉs̈cau ayé qui'chwáy Jesús pa templuni'c pa iguiwatcajawa'n as̈am iguinʉm ayé ley. 28Mit Simeón ime't ayé qui'chwáy, mit i-oyninʉm Dios, inʉm:

29Señor, tʉservia̱jtaway mi̱.

Jinap tʉnganʉmp neti tʉ-o'cwa'n ni'c incumplia̱t lo que is̈prometia̱jtaway.

30Ni'c jinap tʉn-is̈way jeme tʉs̈salva̱tcámpay.

31Mi̱ inajyu't je' pa iguisalva̱tcʉs̈wa'n nu'pʉjʉn jayajwat.

32Mi̱ inactu-entendia̱tcʉs̈áj jeme caje'jatway judíujat,

mit inactujawigʉs̈áj ni'c mi̱ in-oyninʉmgʉs̈ injayajwat Israejlatway.

33Mit José mit María nigu-épigʉjʉu ni'c Simeón inʉm nat ijatwa'n ayé qui'chwáy. 34Mit Simeón ibendiciona̱tcʉs̈, mit inajau María:

—Marau, Dios i-ajyu't ayʉ̱́j inway, mit Israejlatway itáj jeme itunas̈cámpay por je', mit itáj jeme tsʉ̱ngámpay oy por je'. Mit Dios i-actujawigʉs̈áj jayajwat ni'c i-ajyu't iway, po majawe'naj imalninʉmgáj. 35Mit wejpu'n najawigáj ti ipensa̱tcapay anu'mu nu'pʉjʉn jayajwat. Mit mi̱ tu'náj may injo̱jt.

36Mit jeméy itsʉ̱naj tu'c ajchwaywáy inʉ'jyway Ana mit ite̱t inʉ'jy Fanuel, mit je' pichin Aser ifamiliani'c. Mit Ana ajchwayo'ganu, mit oyau iguinʉm ti jatámpay. Je' tsʉ̱nau mit ina'u siete s̈iwitu, 37mit ochenta y cuatro s̈iwit icu-o'ctsʉ̱naj. Mit capichinu templuni'c, mit iservia̱jtau Dios tsu'm mit s̈ʉ̱m ni'c oratí̱c mit ayuna̱t. 38En ayé nije'yu hora coy Ana mit inʉjmau Dios ni'ctiyu̱s̈, mit inʉmgʉs̈au nu'pʉjʉn jeme tsʉ̱ngaway jem nat ijatwa'n ayé qui'chwáy. Mit ayé jayajwat i-atsʉ̱ngapate hasta Dios iguilibra̱tcʉs̈wa'n jeme tsʉ̱ngapay Jerusalén.

Pitujcanup pa Nazaret

39Cʉs̈ iguiwátcaj nu'pʉjʉn inʉmway el Señor iley, pitujcanuw pa Galileajway na̱s̈ mam itsʉ̱na inʉ'jcopac Nazaret. 40Mit qui'chwáy ye'c mit ipʉc maj icuerpu mit i-is̈cap may, mit Dios iguimoy favor.

Jesús templuni'c

41José mit María cada s̈iwit inʉ́s̈caj Jerusalén pa iguitsougawa'n ma̱s̈ʉjw pascua. 42Mit i-íjtʉj Jesús doce s̈iwit, nʉs̈pʉ'ngau pa Jerusalén as̈am iguiwatí̱jcaj en ayé ma̱s̈ʉjw. 43Icʉs̈ ayé ma̱s̈ʉjw, José mit María pitujcau, po ayé qui'chwáy Jesús tan Jerusalén, mit igajawigawu je'jat. 44Mit inʉmgapayta ni'c je' mimp jayau-awa'tsam, mit yo'ygau najs̈ʉjw, po cʉs̈ ijache'ngau je' mam iminga imutʉcmay je̱wajyat mit icumpajlat. 45Po como igapa̱tcawu, pitujcau pa Jerusalén iguiche'nga.

46Mit imutu̱gupay s̈ʉjw ipa̱tcau Jesús templuni'c, tsʉ̱nap mit ayé i-ajque's̈capay ley, mit je' imaraugʉs̈p mit iwatcʉs̈au preguntajat. 47Mit nu'pʉjʉn iguimaraugapay, nigu-épigʉjʉu ni'c je' i-is̈capo'cp mit oyo'gu iguipo'ngʉs̈. 48Cuandu José mit María igui-ís̈caj, nigu-épigʉjʉu, mit ima̱m iguinʉjmau:

—Tʉnwáy, ¿tini'c is̈watcau we'n? Ʉ̱ mit inte̱t tʉche'ngau hasta tu'ngap tʉnjo̱jtat.

49Mit Jesús inʉmgʉs̈au:

—¿Tini'c is̈che'ngap? ¿Ingajawigap ni'c itp ti tʉs̈wajtawa'n lo que iwampay tʉnte̱t Dios?

50Po je'jat igajawigawu ti iguinʉmgajaway.

51Mit nʉcs̈ mit je'jat pa Nazaret, mit ijayaumaygʉs̈. Mit ima̱m iguarda̱t nu'pʉjʉn ayé cosajat ijo̱tni'c. 52Mit Jesús siguia̱t igui-is̈cap más, mit yucye'c, mit Dios más iguimoy favor mit jayajwat igui-oyninʉmgawey.

Currently Selected:

San Lucas 2: PSNT

Highlight

Copy