San Mateo 18
18
Pʉn más mʉjninʉmic
1En ayé tiempu Jesús iguicutomigau ipʉctampajyat, mit igui-ucyo'tcau:
—¿Pʉn tsʉ̱náj más mʉjninʉmic mam imanda̱t Dios?
2Mit Jesús iya̱s̈ tu'c qui'chwáy, mit iyac es̈pu̱tum. 3Mit inʉm:
—Iyacs̈ta'cway tʉnʉmgʉs̈ap ni'c te migatigatscap pa injatcawa'n as̈am qui'chwájat, nunca ca-oyáj is̈manda̱tcap Dios. 4Jemni'c jeme canimʉjninʉjmʉ́mpay as̈am ayʉ̱́j qui'chwáy, je' tsʉ̱náj más mʉjninʉmic mam imanda̱t Dios. 5Jeme ipʉctsowámpay tu'c qui'chwáy as̈am ayʉ̱́jway ni'c ʉ̱ tʉs̈wamp, casi ʉ̱ tʉs̈pʉctso̱p.
Lo que nas̈actuwatpay mal
6’Mit pʉmba'tu i-actuwatámpay mal tu'c ayʉ̱́j jayawájat jeme tʉs̈cupʉjcapay, más oy nacutsúmijya tu'c mʉjway pa̱wan iyo'cni'c mit naca'tstʉgʉy lama̱tjugum mam ijuqui. 7¡Pro̱wij de jayajwat jeme tsʉ̱ngapay en ayʉ̱́j mundu ni'c i-actuwatcap mal imupro̱wije̱wajyat! Ni'c en ayʉ̱́j mundu siempre itáj cosa nas̈actuwatpay mal, po ¡pro̱wij de ayé jayau jeme nas̈jomipay nas̈watwa'n mal!
8’Jemni'c te incʉ' o inta'n is̈actuwatp mal, camjatuwat mal as̈am impus̈tucpay ayé. Más oy pi tan en ayʉ̱́j vida as̈am cʉ'tuguic o cu̱s̈u mit caje' is̈aguepwa'n mechc incʉ' o mechc inta'n pa is̈ca'tstʉgʉygáj jʉngʉtʉm mam igapi'chwa'n. 9Mit te inwijn is̈actuwatp mal, camja-e'p ayé mal as̈am inchi'tpay inwijn. Más oy pi tan en ayʉ̱́j vida mit tu'gu inwijn, mit caje' is̈aguepwa'n mechc inwijn pa is̈ca'tstʉgʉygáj jʉngʉtʉm.
Borregu tógoyicway icuentu
10’Cuidaj is̈yajcawa'n menus tu'c ayʉ̱́j jayawájat. Ʉ̱ tʉnʉmgʉs̈ap ni'c je'jat i-ángejlat tsʉ̱ngap tsajpni'c mit siempre tsʉ̱ngap mit tʉnte̱t Dios. 11Mit ʉ̱ jeme tʉjatway jayau tʉmín pa tʉs̈salva̱tcʉs̈wa'n jeme tógoyijcatway.
12’Tʉnampiwáj tu'c cuentu pa pi pensa̱tca. Te tu'c jayau ijtʉp cien borregu mit te iguitogojyap tu'c, iyagáj ayé noventa y nueve borregujat, mit nʉs̈áj iguiche'n copac-awa'tsam ayé jeme togoyway. 13Mit te ipa̱tp ayé tógoyicway, iyacs̈ta'cway tʉnʉmgʉs̈ap ni'c más ji'gáj ijo̱jt que por ayé noventa y nueve borregujat jeme catógoyijcatway. 14We'ney Dios Nate̱jat jeme tsʉ̱napay tsajpni'c igawamp ma togoy netu'c ayʉ̱́j jayawájat.
Nat nas̈perdona̱twa'n nahermanu
15’Mit te inhermanu is̈wajtau mal, nʉs̈ cots mit je' intu'gujmatu mit naja ni'c is̈wajtau mal. Mit te je' is̈po'mp oy, mitsʉ̱nájatu oy mit inhermanu. 16Po te je' is̈po'mp mal, che'n tu'c o mechc jayau pa ma marauga nu'pʉjʉn inʉmpay, pa we'n itáj mechc o tu̱gup testigujat contra je'. 17Po te igawatcʉs̈p cuenta ayé testigujat, ajque's̈cʉ́s̈a cupʉcpajyat jeme ni-apʉcmujcʉjʉpay. Mit te igamaraugʉs̈p ne cupʉcpajyat, yajca ma tan as̈am tu'c pe'ta̱may jayau, mit as̈am tu'c ique'chumpay demás impuestujat.
18’Iyacs̈ta'cway tʉnʉmgʉs̈ap ni'c yam na̱s̈ni'c lo que inyʉmgajámpay tʉnjayajwat ni'c ca-oy iguiwatca, Dios tsajpni'cway inʉmámpey ni'c ca-oy iguiwatca, mit yam na̱s̈ni'c lo que inyʉmgajámpay ni'c oy ma watca, Dios tsajpni'cway inʉmámpey ni'c oy ma watca.
19’Mit tʉnʉmgʉs̈apey: Te mechc jayajwat mam mijchat tsʉ̱ngap en acuerdu yam pa iguiyo'tcajawa'n Dios ti iwangámpay, je'jat iguimoygáj tʉnte̱t Dios jeme tsʉ̱napay tsajpni'c. 20Ni'c te mechc o tu̱gup jayajwat tsʉ̱ngap apʉcmuguic ni'c ʉ̱ tʉs̈cupʉjcap, jemey tʉtsʉ̱nawa'n mit je'jat.
21Mit cʉs̈ Pedro icutomiu Jesús mit i-ucyo't:
—Señor, ¿pʉjʉn veces tʉs̈perdona̱twa'n tʉnhermanu te tʉs̈wajtap mal? ¿Hasta siete veces?
22Jesús inajau:
—Tʉganajap pi perdona̱t hasta siete veces, po más oy pi perdona̱tí̱c inhermanu. Camwat cuenta pʉjʉn veces is̈wajtap mal.
Mechc jayajwat pʉ́jquijatway
23’Jemni'c oyap nas̈tumuquips̈ nat imanda̱t Dios. Ayé as̈am tu'c rey jeme iwanway iguique'chumgʉs̈wa'n imozojat jeme iguitangajaway pʉjqui. 24Mit ichú̱chij igui-acpichin cuenta, imumingajau tu'c imozo jeme iguipʉjquiway tu'c tumi̱njuc mayway. 25Po ayé mozo como ca-oyawu iguitso'c, ijayc manda̱t ma to'jca ayé jayau mit we'ney ito's̈ay mit iwaywájat mit nu'pʉjʉn ijtʉpay pa iguitso̱jcupa̱tiwa'n ayé cuenta. 26Mit cʉs̈ ayé mozo nicos̈atenda̱jcʉu mam ijayc mit iyo'jtau, inʉm: “Señor, aguep calma mit ʉ̱ mit tʉtso'gáj nu'pʉjʉn tʉ̱pʉjquiway.” 27Mit ijayc igui-ayo̱wis̈ ayé mozo mit iperdona̱jtau nu'pʉjʉn iguipʉjquiway, mit iyac libre.
28’Po ipichijn ayé mozo, imunipa̱jtʉu tu'c imumozoje̱way jeme iguipʉjquiway cien pesu. Mit igui-actajn iyo'cni'c, inajau: “Tso'gac lo que is̈pʉjquiway.” 29Mit cʉs̈ imumozoje̱way nicos̈atenda̱jcʉwey ita'ná̱m mit iyo'jtau, inʉm: “Aguep calma mit ʉ̱, mit tʉtso'gáj nu'pʉjʉn tʉ̱pʉjquiway.” 30Po je' igawanu iguiperdona̱t, oy iguicotsnas̈ mit icom cuytujugum hasta iguitso'cwa'n jeme iguipʉjquiway. 31Igui-ís̈caj we'n japu̱t mozojat, tu'ngau ijo̱jtat, mit nʉs̈cau iguinʉ́mgaja ijaycat nu'pʉjʉn jeme jatway. 32Mit ijaycat iya̱s̈ ayé mozo, mit inajau: “¡Mi̱ mi tu'c mozo ma̱lway! Tʉperdona̱jtau nu'pʉjʉn is̈pʉjquiway ni'c is̈jomiu. 33Mit mi̱ ingajatu is̈-ayo̱wis̈ inmumozoje̱way as̈am tʉ-ayo̱wis̈ mi̱.” 34Mit cʉs̈ awa'no'c itajn ijayc, mit i-entrega̱t jaran ayé mozo ma castiga̱tca mit ma comga cuytujugum hasta iguitso'cwa'n nu'pʉjʉn ayé tumi̱njuc iguipʉjquiway.
35Mit cʉs̈ Jesús inʉmgʉs̈au:
—Wename-ey is̈watcajáj tʉnte̱t Dios jeme tsʉ̱napay tsajpni'c te ingaperdona̱tcap inmupro̱wije̱wajyat mit nu'pʉjʉn injo̱jtat.
Currently Selected:
San Mateo 18: PSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
