San Mateo 19
19
Ca-oy nas̈actogoyda'c cʉ'pa't
1Cʉs̈ Jesús iguinʉmgʉ́s̈aj wename, je' pichin Galilea mit coy Judeajway na̱s̈ tuganʉ-ájw Jordán. 2Mit may jayajwat iguinatspoguigau, mit i-ac-oytangʉs̈ jem jeme yo'ygaway tu'nij.
3Mit mingau fariseujat mam je' itsʉ̱na, mit i-ucyo'tcau pa iguiproba̱tcawa'n, inʉmgau:
—¿Oy tu'c jayau iguicuyaguiwa'n ito's̈ay te iguiwajtap tanti?
4Jesús ipo'ngʉs̈:
—¿Inganicotscap Dios ilibruni'c nat iguiwajt primer jayau? Je' iwat qui'chay mit to's̈ay. 5Mit inʉm Jesús: “Jemni'c tu'c jayau iyagáj ite̱t mit ima̱m, mit ipʉgáj ito's̈ay, mit ayé mechcat jatcáj as̈am tu'gu.” 6Mit we'n ayé mechcatway jatcau tu'gujyu. Jemni'c jeme Dios i-acnipʉjcʉs̈ʉway, nepʉn maga-acniguyáguijyʉ.
7Mit je'jat i-ucyo'tcawatu:
—¿Tini'cpaj Moisés iguinʉjm ni'c tu'c jayau oyap iguiwat yos̈tʉcm tu'c noc pa iguicuyaguiwa'n ito's̈ay?
8Jesús inʉmgʉs̈au:
—Moisés is̈moygau laj is̈cuyaguigawa'n into's̈ajyat ni'c mijchat micopacmʉgʉgo'jcat. Po más primeru Dios iganʉmu we'n. 9Mit tʉnʉmgʉs̈ap ni'c pʉmba'tu icuyaguiyámpay ito's̈ay mit te iguigachajyo'jyap, ayé jayau chajyo'yáj ni'c ipʉgáj jatu'c to's̈ay. Mit pʉn ipʉgámpay tu'c to's̈ay cuyáguiyicway, ayé jayau chajyo'yámpey.
10Iguinʉmgajau ipʉctampajyat:
—Te wename ijatwa'n tu'c jayau mit ito's̈ay, mejor naganicʉ'pá̱jtʉ.
11Mit Jesús inʉmgʉs̈au:
—Nu'pʉjʉn jayajwat ca-oyap igui-entendia̱tca ayʉ̱́j tʉnyʉmpay. Solo ijawigáj jeme Dios i-actujawigʉs̈ámpay. 12Ni'c itp jayajwat jeme ca-oyapay inicʉ'pá̱tcʉjʉ ni'c tu'nijat desde iguita̱jcau ima̱jmat. Mit itp jayajwat jeme ca-oyapay inicʉ'pá̱tcʉjʉ ni'c jayajwat igui-actu'ngʉjʉu. Mit itp jayajwat nimajmoygʉjʉpay pa iganicʉ'pa̱tcʉjʉwa'n ni'c más iwangap iguimanda̱tcáj Dios. Jeme oyapay iguipʉctsou ayʉ̱́j tʉnyʉmpay, ma pʉctsou.
Jesús ibendiciona̱tcʉs̈p ya̱waywájat
13Mit imumingajau ya̱waywájat pa ma yajcʉs̈a icʉ'jat iyucuinmat mit ma ora̱tcʉs̈a. Mit ipʉctampajyat igamoygawu laj ma munas̈ca. 14Po Jesús inʉm:
—Moyga laj ya̱waywájat ma minga mam ʉ̱ mit camatújca, ni'c jayajwat jeme jatcámpay as̈am ayʉ̱́j ya̱waywájat, je'jat iguimanda̱tcáj Dios.
15Mit iyajcʉs̈au icʉ'jat, mit cʉs̈ pichin jem.
Tu'c ya̱wayna' ricuway
16Mit tu'c ya̱wayna' coy mam itsʉ̱na Jesús, mit i-ucyo't:
—Amayipay oyway, ¿ti cosa oyway tʉnwatáj pa tʉs̈aguepwa'n vida jeme cacʉs̈ámpay?
17Mit Jesús ipo'n:
—¿Tini'c is̈-ucyo'tp ti cosa oyway inwatáj? Itp tu'c jeme oyway mit ayé Dios, mit solo je' oyap is̈actujawip cosa oyway. Po te inwamp is̈aguepwa'n vida cacʉs̈ámpay, jayaumay lo que imanda̱tpay Dios.
18Mit ya̱wayná i-ucyo't:
—¿Jʉmay tʉnjayaumayáj?
Mit Jesús iguinʉjmau:
—Miga-ago'gáj, migachajyo'yáj, miganu'máj, ingawe̱twajtáj nepʉn. 19In-oyninʉmáj inte̱t mit inma̱m, mit inwa'náj inmupro̱wije̱way as̈am mi̱ inyiwajnʉ.
20Ayé ya̱wayna' ipo'n:
—Nu'pʉjʉn ayé tʉnguarda̱tway desde tʉyauya̱waymijn. ¿Ti jatu'c tʉs̈togoyp?
21Jesús iguinʉjmau:
—Te inwamp intanwa'n más oy mit Dios, nʉs̈ to'cpʉ'n nu'pʉjʉn inaguepay mit moygʉs̈ pro̱wiwájat, mit mitsʉ̱náj oy tsajpni'c ni'c ayé as̈am tu'c riqueza más oyway, mit cʉs̈wa'n mi'n pa is̈natspoguiyáj.
22Iguimarajw ayé ya̱wayna' lo que iguinʉjmaway Jesús, tu'no'c ijo̱jt, mit nʉcs̈nuw jaran, ni'c je' ricujo'c.
23Mit cʉs̈ Jesús inʉmgʉs̈au ipʉctampajyat: Iyacs̈ta'cway tʉnʉmgʉs̈ap:
—Majo'c pa itʉgʉywa'n mam imanda̱t Dios tu'c ricu. 24Tʉnʉmgʉs̈apey ni'c más fácil pa tu'c camellu inas̈wa'n agu̱s̈acʉtwayni'c que tu'c ricu itʉgʉywa'n en ayé lugar mam imanda̱t Dios.
25Iguimáraugaj we'n ipʉctampajyat, nigu-épigʉjʉu may, mit inʉmgau:
—¿Pʉmpaj oyáj inisalvá̱jtʉ?
26Po Jesús igui-is̈cʉs̈, inʉmgʉs̈au:
—Jayajwat ca-oyap inisalvá̱tcʉjʉ je'jatu, po Dios oyap iguiwat nu'pʉjʉn cosa.
27Cʉs̈ Pedro iguinajau:
—Señor, ʉjtsat tʉncuyaguigaway nu'pʉjʉn mit tʉnatspoguigap mi̱. ¿Tipaj tʉmpʉctsougáj?
28Mit Jesús inʉmgʉs̈au:
—Iyacs̈ta'cway tʉnʉmgʉs̈ap ni'c inamjatwa'natu ayʉ̱́j mundu, ʉ̱ jeme tʉjatway jayau tʉtsʉ̱náj mʉjninʉmic tʉntronuni'c, mit mijchat is̈natspoguigapay jinap mitsʉ̱ngámpey en ayé doce tronujat mit tʉ-actujuzga̱tcʉs̈áj nu'pʉjʉn Israelway jayajwat jeme pichingaway de ayé doce familiajat. 29Mit pʉmba'tu iyagámpay itʉjc, i-ajch, itsʉ', ite̱t, ima̱m, ito's̈ay, iwajyat mit ina̱s̈at ni'c ʉ̱ más tʉs̈wamp, je' ipʉctsowáj premiu cien veces más, mit ijtʉ̱́j vida jeme cacʉs̈ámpay. 30Po mayo'c jeme ipensa̱to'jcapay itangawa'n jʉpm, tangáj mugus̈á̱m. Mit jeme mingapay mugus̈á̱m, tangáj jʉpm.
Currently Selected:
San Mateo 19: PSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
