San Mateo 28

Jutucta̱c Jesús

1Inas̈ ayé po'cs̈ans̈ʉjw mit icus̈ʉwij iprimers̈ʉjw s̈ama̱na, nʉs̈cau María Magdalajway mit jatu'cway María pa igui-e'pcawa'n ayé á̱nimacʉt. 2Mit nas̈ʉ'c tu'c us̈ mʉgʉcway, ni'c el Señor i-ángel manac tsajpni'c. Mit icojy, i-acchi'tpituc ayé tsa' mit nitsʉ̱nda̱jcʉu tsa'yucuinm. 3Je' que's̈ oymanac as̈am tu'c ániway iquijan, mit ijamuc po'p as̈am nieve. 4Mit cuida̱tpayna'jat ipʉ̱tcau ayé ángel hasta yaratcau, mit tangau as̈am o'guijcatway.

5Mit cʉs̈ ayé ángel inʉmgʉs̈au ayé to's̈ajyat:

—Campʉ̱tcawit, tʉnjawip ni'c inche'ngap Jesús jeme iyajcaway cunu̱s̈ni'c. 6Je' cajapʉn yam, jutucta̱cway as̈am iguinʉjm. Yam minga, e'pca ayé lugar mam iguiyájcaj je'. 7Nʉ́s̈ca jaran, nʉ́mgaja ipʉctampajyat ni'c je' jutucta̱cway mam itsʉ̱nga á̱nimajat, mit je' nʉs̈ʉ'gáj Galilea mit jem is̈-e'pcawa'n. Jemé-ate tʉnʉmgʉs̈ámpay.

8Mit cʉs̈ ayé to's̈ajyat pichingau jaran mam i-it ayé á̱nimacʉt, mit pʉ̱tcau po majawe'naj ji'c ijo̱jtat. Mit pujʉ'jcau pa iguinʉmgajawa'n Jesús ipʉctampajyat ayé oyway noticia.

9Mit meru-ate inʉ́s̈caj, Jesús ipichinda̱jcʉs̈au mit isaluda̱tcʉs̈. Mit je'jat nigutomigʉjʉu mam je' mit i-actangajau ita'jnat pa igui-adora̱tcawa'n. 10Mit cʉs̈ Jesús inʉmgʉs̈au:

—Campʉ̱tcawit. Nʉ́s̈ca ajque's̈caja tʉnhermanujat pa ma nʉs̈ca Galilea, mit jem tʉs̈-e'pcáj.

Cuida̱tpajyat inʉmgap lo que jatway

11Mit ayé to's̈ajyat meru-ate inʉ́s̈caj, una̱c ayé cuida̱tpajyat nʉs̈cau nʉ'jcopacni'c mit i-ajque's̈cajau judíujat imʉjpa̱nijat nu'pʉjʉn jeme jatway. 12Mit ni-apʉcmujcʉjʉu mit na'waywájat, mit ini-acóchigʉjʉj, imoygau may tumi̱n ayé soldajat. 13Mit inʉmgajau ayé soldajat:

—Nʉmga ni'c mingau tsu'm ipʉctampajyat, mit meru-ate inmá̱gaj inu'mgajau Jesús icuerpu. 14Mit te imarap gobernadorna', ʉjtsat tʉcotsmajyigáj pi is̈cajatcac neti.

15Mit ayé soldajat iguipʉ́jcaj ayé tumi̱n, iwatcau as̈am iguinʉmgajau. Mit hasta jinap judíujat icupʉjcap lo que soldajat inʉmgaway.

Jesús i-ajyu'tcʉs̈p ipʉctampajyat

16Mit cʉs̈ ayé once pʉctampajyat nʉs̈cau Galilea en tu'c copac mam iguinʉmgajau Jesús. 17Mit igui-ís̈caj Jesús, i-adora̱tcau, po cʉjtu'c duda̱tcau. 18Mit Jesús nigutomijyʉu mam je'jat mit inʉmgʉs̈au:

—Dios tʉs̈moyway nu'pʉjʉn poder itpay tsajpni'c mit na̱s̈ni'c. 19Jinap nʉ́s̈ca mit che'nga jayajwat en nu'pʉjʉn mundu pa ma jatca tʉmpʉctampajyat. Mit nʉ'gutémga inʉ'jyni'jcat Dios Nate̱jat, iway Jesucristu, mit Espíritu Santu. 20Mit ajque's̈caja ma jayaumayga nu'pʉjʉn tʉmanda̱tcʉs̈way mijchat, mit tʉtsʉ̱náj mit mijchat nu'pʉjʉn s̈ʉjwat hasta icʉs̈wa'n ayʉ̱́j mundu. Amén.

Currently Selected:

San Mateo 28: PSNT

Highlight

Copy