San Marcos 4
4
Ni̱payna' icuentu
1Mit Jesús chu̱chiwatu ajque's̈pay laguna-auni'c, mit coy jem mayo'c jayau. Mit Jesús tʉgʉy en tu'c aj mit nitsʉ̱nda̱jcʉu jem, po ayé jayaujuc tan na̱s̈ni'c laguna-auni'c. 2Mit i-ajque's̈cʉs̈au mayo'c cosajat mit itumuquips̈cʉs̈au cuentujat, mit i-ajque's̈cʉs̈au wename:
3—Márauga. Tu'c ni̱payna' nʉcs̈ iguini'p trigu. 4Mit mam iguis̈ics̈ ayé semilla, una̱c ca'ugau to̱u-auni'c, mit mingau jonwájat, icaygau. 5Mit una̱c semilla ca'ugau tsa-awa'tsam mam iga-ijt may na̱s̈, mit s̈u̱mgau jaran ni'c cajucu itʉgʉygaj. 6Mit ipichijn s̈ʉjw, toygau ayé ma̱tawájat mit cutʉ̱tsigau ni'c caticchictʉgʉyu. 7Mit una̱c ca'ugau apit-awa'tsam. Iye'jcaj apitna'jat, igamoygawu laj pa iye'jcawa'n ayé ma̱tawájat. 8Mit japu̱t semilla ca'ugau mam i-oyi na̱s̈, mit s̈u̱mgau mit ye'jcau mit tʉmwatcau. Una̱c semilla iyajcau hasta treinta semilla, ja-una̱c iyajcau hasta sesenta, mit ja-una̱c iyajcau hasta cien.
9Mit Jesús inʉm:
—Jeme ijtʉpay ita̱tsʉc pa iguitumarawa'n, ma marau lo que tʉnyʉmpay.
¿Pa ti oy ayé cuentujat?
10Mit cuandu itángaj je'jatu, igui-ucyo'tcau ayé doce pʉctampajyat mit japu̱jtat jeme tsʉ̱ngaway tom:
—¿Ti inʉmo'jcʉp ayʉ̱́j cuentu?
11Jesús ipo'ngʉs̈:
—Dios is̈actujawigap jeme tsʉ̱naway cuyu'tsic nat imanda̱twa'n, po japu̱t jayajwat tʉnmucotscʉs̈p mit cuentujat, 12pa ma e'pca po magajawiga ti i-e'pcapay, mit pa ma marauga po maga-entendia̱tca ti imaraugapay. Iguijatcap we'n pa magapitujca mam Dios, ne magaperdona̱tcaja ayé mal iwatcaway.
Jesús i-actujawigʉs̈p ni̱payna' icuentu
13Mit Jesús inʉmgʉs̈au:
—Te inga-entendia̱tcap ayʉ̱́j cuentu, ¿natpaj is̈-entendia̱tcawa'n japu̱t cuentujat? 14Tʉ-actujawigʉs̈áj ti inʉmo'jcʉpay ni̱payna' icuentu. Jeme is̈ics̈pay semilla ayé as̈am jeme i-ajque's̈apay Dios ipalabra. 15Ayé semilla jeme ca'way to̱u-auni'c, ayé as̈am una̱c jayajwat. Je'jat imaraugajap Dios ipalabra, po mimp jaran Awayagatsna' mit iguichi'tcajap jeme Dios igui-actujawigapay. 16Mit ja-una̱c jayajwat as̈am ayé semilla jeme ca'ugaway tsa-awa'tsam. Je'jat imaraugajap Dios ipalabra mit ipʉctsougau oy mit igui-acji'jcajap ijo̱jtat, 17po je'jat as̈am ma̱tawájat ca-itcʉjʉpay ticchic, ni'c cacupʉjcap jec. Mit i-itwa'n pʉ̱tna̱s̈ mit iguipo'ctangáj jayajwat ni'c ipʉctsougajap Dios ipalabra, icuyaguigap jaran. 18Mit ja-una̱c jayajwat as̈am ayé semilla jeme ca'ugaway apit-awa'tsam, ni'c je'jat imaraugajap Dios ipalabra, 19po ipensa̱tí̱jcap ti iwatcámpay en ayʉ̱́j tiempu, niwe̱tcʉjʉp mit itumi̱jnat, mit iwangap japu̱t cosajat, mit ca-oyap iguimutanga mʉgʉc Dios ipalabra. 20Mit ja-una̱c jayajwat imaraugajap Dios ipalabra, mit ipʉctsougap mit yos̈watcap más pa Dios. Je'jat as̈am ayé semilla jeme ca'ugaway mam i-oyi na̱s̈. Mit we'ney je'jat as̈am ayé semilla ni'c una̱c iyajcau treinta, una̱c iyajcau sesenta, mit ja-una̱c iyajcau cien.
Ta'cs̈an icuentu
21Mit Jesús inʉmgʉs̈awey:
—¿Is̈jawiga namumimp tu'c ta'cs̈an pa nas̈yacwa'n ca'cpa'tm o che's̈pa'tm? Más oy nas̈yacwa'n ta'cs̈anyagani'c. 22Ca-oyap nas̈cuyu'ts neti ni'c nu'pʉjʉn cuque's̈áj. Te nacutucp tanti, itp ti icuque's̈wa'n. 23Te tu'c jayau ijtʉp ita̱tsʉc pa iguitumarawa'n, ma marau lo que tʉnyʉmpay.
24Mit inʉmgʉs̈au:
—Watca cuenta lo que inmaraugapay, ni'c ayé quips̈an intuquips̈pay, ayé is̈tuquips̈cámpey, mit mijchat mimaraugapay Dios is̈moygáj más. 25Ipʉctsowáj más jeme ijtʉnupay, Mit jeme ijtʉpay s̈ʉ̱n, ichi'tpʉ'ngajanúj nu'pʉjʉn ijtʉpay.
Nat iye'c tu'c semilla
26Mit Jesús i-ampiugʉs̈au jatu'c cuentu pa ma jawiga ni'c Dios ipalabra ye'gáj, inʉm:
—Yename imanda̱t Dios, as̈am te tu'c jayau ini̱ptacyo'yp semillawájat na̱s̈ni'c. 27Mit je' ma̱p tsu'm mit jutucp s̈ʉ̱m, mit s̈u̱mgap mit ye'jcap ayé semillawájat, mit je' igajawip nat iye'c. 28Po na̱s̈ je'yu i-acs̈u̱jmʉ'cp ayé mo̱jcuywáy, cʉs̈wa'n pichimp icoc, mit pichimp imo̱jc. 29Mit cuandu itʉ'tswa'n ayé mo̱jc, ayé jayau ichicp, ni'c coyway chigans̈ʉjw.
Mostaza-semilla icuentu
30Mit Jesús i-actujawigʉs̈ nat imanda̱twa'n Dios. Itumuquips̈cʉs̈au tu'c cuentu pa ma jawiga ni'c Dios ijayajwat mayigáj. Inʉm Jesús:
—Tʉ-actujawigʉs̈áj nat imanda̱t Dios. 31Ayé as̈am tu'c mostaza-semilla, ni'c cuandu nas̈ni'p na̱s̈ni'c, ayé más titigo'c de nu'pʉjʉn semillajat jeme itpay na̱s̈ni'c, 32po nas̈ni'pwa'n, ye'cp, mit jatp más mʉj que nu'pʉjʉn ma'tswájat, mit s̈u̱mp majat i-awecna'jat hasta jonwájat oyap is̈ʉupo'cs̈ca i-amu̱jʉcni'c.
Jesús i-ocupa̱tcʉs̈p cuentujat
33Mit yename Jesús igui-ajque's̈cʉ́s̈aj Dios ipalabra. Itumuquips̈ cuentujat as̈am i-oya igui-entendia̱tca. 34Mit inʉmgʉs̈au mit puru cuentu, po ipʉctampajyat itu'gujmatu i-actujawigʉs̈ nu'pʉjʉn cuentujat.
Jesús i-actentamp s̈e'm
35Icutsu'jítij en ayé s̈ʉjw, Jesús inʉmgʉs̈au:
—Janga tuganʉ-ájw.
36Mit igui-acnʉ́s̈caj ayé jayaujuc, imunʉs̈cau Jesús as̈am itsʉ̱na ajni'c, mit iguimunʉs̈cawey japu̱t ajwájat. 37Mit min mʉgʉc tu'c s̈e'mtu̱ mit mayo'ganu nʉ' itʉgʉjy ajni'c hasta patscunas̈nupate. 38Mit Jesús ma̱p ajmugus̈á̱m mit tu'c nach, mit i-acjutujcau mit inʉmgajau:
—Amayipay, ¿ingawatp cuenta ni'c natogoygáj?
39Mit ijutujc, inʉjmau s̈e'mna' ma tentan, mit imucots lagunana', inajau:
—Nicalmá̱jtʉ, camjaya̱s̈wit.
Mit s̈e'm tentan mit cajas̈uju. 40Mit i-ucyo'tcʉs̈:
—¿Tini'c impʉ̱tca? ¿Migacupʉjcap?
41Cʉs̈ pʉ̱jtʉgʉygau mit ni-ucyo'tcʉjʉu:
—¿Pʉna jayau ayʉ̱́j, ni'c iguijayaumaygap hasta s̈e'm mit laguna?
Currently Selected:
San Marcos 4: PSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
