San Mateo 20
20
Te' yojšajpapʌ
1Yʌ'šejte' te' tzajpojmopʌ aŋgui'mʌtʌjcuy, jujcha' nas-comi tzu'cumupʌ namdzuwini wa'y maŋu mye'tzu coyojšajpawʌ wa'y yosjayaju 'yuva-nipi'ojmo. 2Y pya'tu'ca te' coyojšajpapʌ, ñʌjayaju: Maŋba'ʌsmij ŋgoyojtamu tumʌ denario tumduma'ŋbʌn tumdumʌ jama. Y quiʌ'wejyaju te' uva-nipi'ojmo. 3Y las nueveše'ŋoyj maŋgue'tu te' nas-comi plaza'ojmo. Teymʌ quienu coyojšajpapʌ, ja'ndiyʌta'mbʌ's yoscuy, 4y ñʌjayaju: ¿Ja'nja suni maŋu nyostamu ʌs uva-nipi'ojmo? Maŋba'ʌsmij ŋgoyojtamu pyʌcpaše'ŋ. Y maŋyaju. 5Y te'šejtij chʌjque'tu paŋguc-jamaše'ŋoyj, y te'šejtij chʌjque'tu las tresše'ŋoyj. 6Y maŋwʌtzʌjque'tu plaza'ojmo las cincoše'ŋoyj. Teymʌ pya'tque'tu eyata'mbʌ ja'ndiyʌta'mbʌ's yoscuy, y ñʌjayaju: ¿Tiyajca'yʌ' tumʌ jama njyaraganittamba? 7'Yaŋdzoŋyaju: Porque ya'iwʌ'stʌj jachi'ʌ yoscuy. Te' nas-comi's ñʌjayaju: ¿Ja'nja suni maŋu nyostamu ʌs uva-nipi'ojmo? Maŋba'ʌsmij ŋgoyojtamu pyʌcpaše'ŋ. 8Y maŋba'ca tyʌ'pu jama, te' yojsaŋ-gomi's ñʌjayu te' quio'aŋgui'moye: Wejya te' yojšajpapʌ y coyojaya. Winac coyojya te' yʌmajtya' yostʌjcʌyajupʌ. Y último coyojya te' wina yostʌjcʌyajupʌ. 9Y minu pyʌjcʌchoŋyaju quioyowa te' las cinco-tya'a yostʌjcʌyajupʌ's. Y tumduma'ŋbʌn quioyojyatʌju tumʌ denario. 10Y miñajque'tu te' namdzuwini yostʌjcʌyajuwʌ. Ñe'cʌ's quiomʌ'yaju juca maŋba quioyo'a'ŋʌyatʌju. Pero te'šejtij quioyojyatʌjque'tu tumduma'ŋbʌn tumʌ denario. 11Y pyʌjcʌchoŋyaju'ca quioyowa, ñʌpojpojnaquiʌ'yaju te' quiomi, 12y nʌmyaju: Yʌ' ultimotya'a yostʌjcʌyajupʌ na' tumʌ horatijque' yojšaju, y tu'mbacmistʌj nʌ ŋgoyoju. Tʌj, tumʌ jama'ndʌj yojsu y jamapʌjcu. 13Y te' comi aŋdzoŋu, y ñʌjayu tuma'ŋbʌn: Tʌwʌy, ja'nʌsmij nʌ ninu'mu. ¿Ja'nja'ʌsmij nʌtzamwa'a que tumʌ denario'ʌsmij maŋba ŋgoyoju? 14Pʌcʌ te' mis ŋgoyowa, y mawʌ. Ʌs sunba'ʌs ndzi'yaju quioyowa yʌ' último yostʌjcʌyajupʌ jujcha'ʌsmij mij nʌ ŋgoyoju. 15¿Ja'nsʌ'ŋʌs musi nyajyojsu ne' ndumin ne'cʌ'ʌs sunbašej? ¿Misja ndzocoy ni'aŋsu'nopya porque ʌs nyajyamba ndʌwʌ? 16Te'šej jeque te' winata'mbʌ maŋba 'yucaŋgʌ'mʌ'ajyaju. Y te' ucaŋgʌ'mʌcta'mbʌ maŋba wyi'najyaju. Porque wʌwʌ pʌn nʌ 'yaŋbʌquiatʌju, pero uša'ŋde' te' copiŋyajupʌ.
Jesujsis 'yaŋgocasʌwyʌtzʌjcu que maŋba yajca'yaju
(Mr. 10.32-34; Lc. 18.31-34)
17Nʌ inʌc myaŋu Jesús wa'y ñu'cu Jerusale'ŋojmo. Y wejutʌj, tʌj te' macwʌstʌjca'pyʌ quiʌ'aŋmaye, wa'ytyʌj ŋga'ŋdʌjcʌyu tu'ŋu'acapoyo'oyj, y nʌjayutʌj: 18Yʌtij nʌtʌ ŋgui'mdamu Jerusale'ŋojmo. Ʌj, te' Pʌ'nis 'Yune, maŋba'ʌj tzi'oquia'yaju sacerdote-cowi'na'sta'm y aŋgui'mguy-tyayu'sta'm quiʌ'ojmo. Yʌ'ta'mbʌ'sʌj maŋba ni'aŋba'tyaju wa'yʌj jacpʌtij ŋga'u. 19Y maŋba'ʌj tzi'oquia'yaju te' genti'lista'm quiʌ'ojmo wa'yʌj qui'tzcu'yajyaju, y nacstochʌquiaju, y wa'yʌj ma'mʌyaju cruzcʌsi. Pero tuca'y jamacʌsi maŋba'ʌj nwinsa'u.
Tiyʌta'm wya'cu Jacobo y Jua'ŋis ñana's
(Mr. 10.35-45)
20Zebedeo's 'yune'sta'm ñana's quiʌnu'cʌyu Jesús yʌ' metzapʌ 'yuneji'ŋ. Minu quiutcʌne'cu Jesujsis wyi'naŋdʌjqui wa'y wya'cu tiyʌ'iwʌ. 21Y Jesujsis ñʌjayu: ¿Tiya' sunba? Y ñe'cʌ's ñʌjayu: Sunba'ʌs wa'mis nyajpocsjayaju yʌ' metzata'mbʌ ʌs une, tumʌ mis ndzʌ'na'ŋojmo y eyawʌ mis aŋña'ojmo mbyocspacpa'cmij maŋbamʌmyij 'yaŋgui'moyu. 22Pijche'ca Jesujsis 'yaŋdzoŋyaju yʌ' metzata'mbʌ: Ja'nmis mustame tiyʌ miste' nʌ nwa'ctamu. ¿Aŋjamdambaja que muspamis mbʌ'mgopajcʌytyamu ʌs maŋba ŋguenupʌ toya? ¿Aŋjamdambaja que muspamis mbʌ'mgopajcʌytyamu ñempemij nyacsnutzʌcʌtʌjtamʌ jujcha' ʌj maŋba yacsnutzʌquiaju? Y ñe'cʌ'sta'm ñʌjayaju: Mbʌ'mgopajcʌpyatʌs. 23Y Jesujsis ñʌjayaju: Wiyuŋšej maŋbamis ŋguendamu toya jujcha' ʌs maŋba ŋguenu toya. Y maŋbamij nyacsnutzʌcʌtʌjtamu jujcha' ʌj maŋba yacsnutzʌquiaju. Pero ja'ndiyʌ ʌs aŋgui'mʌtʌjcuy wa'yʌsmij nyajpocstamu ʌs ndzʌ'na'ŋojmoc ni ʌs aŋña'ojmoc. Pero ʌs Ndata Diojsis maŋba yajpocšaju iwʌcotoyata'm ñe'cʌ's ñimejcʌyu.
24Y matoŋu'ctijtʌs yʌ'šej, tʌs majca'pyʌni, ŋgui'šca'jayajutʌs te' metzata'mbʌ tʌ atzi. 25Pijche'ca Jesujsis wejutʌj y nʌjayutʌj: Mustambamis que te' najsacopac-cowi'nata'm ñe'cʌytya' aŋgui'myajpa tyʌwʌcʌsita'm. Y mʌja'ŋajcu'yojmo ijtyajupʌ's wyejwituwituwʌyajpa ñempe'iwʌ. 26Pero mi'ojmota'm ja'n maŋu tye'še'aju. Iwʌ sunba myʌja'ŋaju mi'ojmota'm coyospawʌšej yajtzʌcʌ wyin. 27Y iwʌ sunba quiowi'na'u mi'ojmota'm coyospawʌšej yajtzʌcʌ wyin. 28Jujcha' ʌj, te' Pʌ'nis 'Yune, jaminʌ'ʌj wa'yʌj yosjayaju, sino que minu'ʌj wa'yʌs coyospawʌšej ndzʌjcu nwin. Y minu'ʌs ndzi'oquia'u nwin wa'yʌs njupyujtyaju wʌwʌ pʌn.
Yajtzojcu Jesujsis metza to'tita'mbʌ
(Mr. 10.46-52; Lc. 18.35-43)
29Nʌ'ctʌj ndzu'cumu Jesusji'ŋ te' Jerico-cumgu'yojmoc wʌwʌ pʌ'nis minu quio'ŋu ñe'cʌ. 30Y tey inʌc pocšaju metza to'tita'mbʌ pʌn te' tu'ŋaŋi. Y myatoŋyaju'ctij que nʌ quiʌtʌjcu Jesús, weju'c nʌmyaju: Señor, Davijtis 'Yune, to'ya'ŋʌtʌj. 31Y te' pʌ'nista'm 'yotoŋjayaju uy wyejyaju. Pero ñe'cʌta'm más inʌc wejqui'myajpa y nʌmyaju: Señor, Davijtis 'Yune, to'ya'ŋʌtʌj. 32Y tenachʌ'yu Jesús y wyejyaju y nʌmu: ¿Tiya' sundamba wa'yʌs ndzʌjcu mijcotoyata'm? 33Ñe'cʌ nʌmyaju: Señor, yajsʌ'ŋja tʌs nwitʌm. 34Pijche'ca Jesujsis tyo'ya'ŋʌyaju. Pyi'quisjayaju te' wyitʌm, y pijche'ctij sʌ'ŋyaju te' wyitʌm, y quio'ŋyaju Jesús.
Currently Selected:
San Mateo 20: ZCNT
Highlight
Share
Copy
Want to have your highlights saved across all your devices? Sign up or sign in
Nuevo Testamento en Zoque Copainalá © Sociedad Bíblica de México, A.C. 1967.
