KUZOYA 18

Ilaghiro ja mwana wa womi kwa Abrahamu

1Nao BWANA ukamfutukia Abrahamu aja midinyi ya kuela ya Mamre, uko kidombo mnyangonyi ghwa hema yake, ngelo ya mruke ghwa dime ghadi. 2Abrahamu ukawusira meso ghake ukazighana, ukawona wandu wadadu wiko kimusi imbiri kwake. Hata iji wawiwona ukafuma hemenyi kwake na iseghe ukawimara, ukawighoghomia hata andoenyi ukaghamba,#Waeb. 13.2 3“Bwana wapo, ikakaia nawuyarumirikia mesonyi kwako, kusakeniida mdumiki wako. 4Kadunyi mredelo machi mwoghoshe maghu ghenyu, mhore katini aisi ya mudi, 5nani nim'boisire vindo vitini muje mhoreshe, angu hoku mwamchea mdumiki onyu; niko nyuma ya kuja muide.” Wikaghamba, “Bonya sa iji koni kwaghamba.”

6Abrahamu ukaghenda shwa-shwa cha hemenyi kwa Sara ukamzera, “Bonya shwa vipimo vidadu va mufu ghuboie, kuboise mikate.” 7Abrahamu ukaghenda shwa-shwa cha chaghenyi, ukaiwada ngache iboie ukamneka mdumiki nao ukaiboisa shwa wori. 8Ukawusa siagi na mariwa na ija nyama ereboisiroghe, ukaviwika imbiri kwawo; nao moni ukakaia kimusi mudinyi wikija.

9Nao wikamkotia, “Mkako Sara oko hao?” Ukawitumbulia, “Oko hemenyi.” 10BWANA ukamzera, “Kwa loli kimu sa ichi nichakuwuria na mkako Sara uchakuvaia mwana wa womi.”#War. 9.9 11Na Sara orekoghe na nyuma yake mnyangonyi ghwa hema ukisikiria. 12Aho Sara ukaseka ngolonyi kwake ukaghamba, “Loli niko mkeku huwu, na mumi wapo wakaia mghosi m'baa, nadima kuboilwa?”#1 Pet. 3.6 13Nao BWANA ukamzera Abrahamu, “Kwaki Sara waseka ukighamba, ‘Loli nadima kuva mwana ini niko mkeku huwu?’ 14Welee, jeko ilagho jingi jikurie jisedimikagha kwa BWANA? Nichakuwuria kwa ngelo iwikilo kimu sa ichi, na Sara uchakuvaia mwana wa womi.”#Lk. 1.37 15Ela Sara ukakana ukaghamba, “Sisekie kungi.” Angu oreobueghe. BWANA ukamzera, “Hai, kwaseka to.”

Mizi ya vololonyi na malombi gha Abrahamu

16Nao waja wandu wikazoya charo kulangaya cha Sodoma, na Abrahamu ukafumanya nawo ukiwifumira. 17BWANA ukaghamba, “Nimvisiraki Abrahamu ilagho nichaajibonya, 18ikakaia Abrahamu uchakaia mbari mbaa, iwadie ndighi na mbari rose ra ndoenyi rirasimilo kwa wundu ghwake? 19Hata, nameria kumsaghua uo, upate kuwifundisha wana wake, na wose wa nyumbenyi kwake, kubonya agho ghiko gha loli na gha hachi; nani nipate kumkatishira Abrahamu ilaghano japo.” 20Niko BWANA ukaghamba, “Kwa kukaia kililo cha Sodoma na Gomora chakaia kibaa, na kaung'a yawo yakaia mbaa na ndighi, 21nichasea niwone ngera agho wawuyaghibonya ni karakara na ichi kililo chawuyanivikia, na ikakaia si huwo kungi, sena nichamanya.”

22Niko aho waja wandu wikaghaluka na kughenda cha Sodoma; ela Abrahamu ukasigharikanya na BWANA. 23Nao Abrahamu ukasoghoda kaavui na BWANA ukaghamba “Welee, kuchawitotesha wahachi andwamweri na wawiwi anguwada? 24Ngera wakaia wandu mirongo misanu andenyi ya muzi wiko na hachi, kuchakutotesha andu aho, hata kulemo ni kukusigha kwa wundu ghwa awo wahachi mirongo misanu anguwada? 25Ai! BWANA wapo kusebonye ilagho iji jebwagha wahachi chiaimweri na wawiwi, hata mhachi usakefwananishwa na mmbiwi; ilagho ijo jisebonyeke kwako. Welee, ndeifwane Mtanyi wa wurumwengu ghose kubonya agho ghiko gha hachi anguwada?”

26Nao BWANA ukaghamba, “Ngawikua wandu mirongo misanu Sodoma wiko wahachi, nichaghuleka muzi ghose kwa wundu ghwawo.” 27Abrahamu ukaghamba, “Nifuye wughoma nidedanye na oho BWANA ini nisefwane kindo chingi, ela ne teri na maivu gheni. 28Welee, wikapungua wasanu kwa awo mirongo misanu wahachi, kuchaghutotesha ugho muzi ghose kwa wundu ghwa awo wasanu wapungua?” Nao ukaghamba, “Iji nawikua mirongo ina na wasanu sichaaghutotesha anduangi.” 29Nao ukakotia sena, “Kukawikua mirongo ina ikaia wada?” Nao ukaghamba, “Kwa wundu ghwa awo mirongo ina sichaatotesha kungi.” 30Abrahamu ukaghamba, “Nakuvoya kusezamilo BWANA, leka nidede. Welee, kukawikua mirongo idadu ikaia wada?” Nao ukatumbulia, “Kwa wundu ghwa mirongo idadu sichaaghutotesha anduangi.” 31Abrahamu ukaghamba, “Nifuye wughoma nidedanye na oho BWANA. Welee, kukawikua mirongo iwi ikaia wada?” Nao ukatumbulia, “Kwa wundu ghwa mirongo iwi sichaaghutotesha anduangi.” 32Abrahamu ukaghamba, “Kusejoko ni machu BWANA, nichadeda iji indo jimweri tu. Kukawikua ikumi uko ni wada?” Nao ukaghamba, “Kwa wundu ghwa ikumi sichaatotesha anduangi.” 33Nao BWANA ukaghenda chia yake nyuma ya kudedanya na Abrahamu, na wokoni Abrahamu ukawuya cha kwake.

Currently Selected:

KUZOYA 18: TAITA

Highlight

Copy