KUZOYA 19

Wungi ghwa kaung'a ra Sodoma

1Nao weke malaika wawi wikacha Sodoma luma lwa kenyi; na Loti orekoghe kidombo mbengenyi. Hata iji Loti wawiwona ukawuka kuwimara, nao ukawighoghomia hata wushu ghwake ghukadunga andonyi ukaghamba, 2“Weke bwana wapo, ghalukenyi namvoya mungie nyumbenyi kwapo ini mdumiki onyu, mlale aho, muoghoshe maghu ghenyu, nao mmbuke nakesho mghende chia yenyu.” Wikaghamba, “Hata, isi dichalala ahaeni chienyi.” 3Ela ukawishingira kwa kufunga ndighi wighaluke wingie nyumbenyi kwake. Nawo wikaghaluka na kungia nyumbenyi, ukawibonyera karamu ya mikate isewadie chachu, nawo wikaja. 4Ela imbiri wiselale, wandu wose putu wa muzi ghwa Sodoma wabaa kwa watini, wikacha na kuimara nyumba; 5wikamkotia Loti, “Waja wandu wingirieghe kwako luma lwa kenyi weko hao? Wifunye diwimanye.”#Wat. 19.22-24 6Loti ukafuma shighadi ukarugha mnyango nyuma yake ukawizera, 7“Namvoya wanedu msakebonya wuwiwi ghungi, 8Olenyi neko na wai wawi jingi wisemmanyire mndwawomi ungi, lekenyi nimfunyire awo wai, muwibonye seji mkunde, ela awa wandu msewibonyere kiwiwi chingi, kwa kukaia ni waghenyi wapo, nani suti niwilindie.”

9Ela awo wikaghamba, “Injika noko!” Wikazerana, “Mundu uhu odecha kodu sa mghenyi, nao idana nuo ukunde kutanya malagho. Idana isi dichakubonya kiwiwi kuchumba awo wandu.” Niko wikamsindika na ndighi uo Loti hata wikavika kaavui wighuchikanye mnyango. 10Ela awo waghenyi wikaghorua mikonu na kumngira Loti nyumbenyi, wikaghurugha mnyango. 11Nawo wikawikaba na kira cha meso wandu wose werekoghe mnyangonyi wabaa na watini; wikaja wasi loli-loli wikighulola mnyango.#2 Waz. 6.18

Loti kufuma Sodoma

12Nao waja wandu wikamzera Loti, “Koko na mndungi wako aha? Waghosi wako, wana wako wa womi na wa waka, angu mndungi wako kuko nao andenyi ya muzi ughu? Wifunye; 13kwa kukaia dichakutotesha andu aha, angu kililo aighu ya wandu waro chakaia kibaa imbiri ya BWANA, nao wadiduma dikutoteshe.” 14Niko Loti ukafuma na kuwighendia waghosi wake awa werewilowugha wai wake ukawizera, “Wukenyi mfume aha angu BWANA oko kaavui kughutotesha muzi ughu.” Ela madedo ghake ghikawoneka kukaia gha wukelu kwa waghosi wake.

15Iji ndoe yavika kuela, waja weke malaika wikamzera Loti, “Wuka kummbwade muka wako, na wai wako wawi, mfume msechetoteshwanya na ughu muzi.” 16Ela orekoghe ukikuwada-wada. Waja wandu wikammbwada Loti, mkake na wai wake wawi, na kummbika shighadi ya muzi angu BWANA oremfuyeghe wughoma.#2 Pet. 2.7 17Iji wameria kumfunya shighadi wikamzera, “Kimbienyi mkire marangi ghenyu, msezighane na nyuma, hata msemange andu kungi vololonyi; kimbirienyi mghondinyi msechetota.”

18Nao Loti ukaghamba, “Ai, weke bwana wapo, huwo mbai. 19Hoku ini mdumiki onyu narumirikia mesonyi konyu, nenyo seji mwawadwa ni wughoma ghwapo na ndighi, mwakira irangi japo; ela sidimagha kukimbia nivike mighondinyi nisepatiro ni icho kiwiwi na kufwa. 20Ola muzi hoghuja kimonu ghuko kaavui nidimagha nighukimbirie. Nilekenyi nikimbirie aho, si mtinieri ugho? Nani nichakira irangi japo.” 21Nao ukamzera, “Na iji wori nakurumiria, nani sichaaghutotesha ugho muzi mtini kwaghamba. 22Shashira kukimbirie aho, angu sichaabonya ilagho jingi hata kwavika aho.” Kwa huwo muzi ugho ghorewangiloghe Soari.

Kutoteshwa kwa Sodoma na Gomora

23Iruwa jerekoghe jajoka iji Loti orevikieghe Soari. 24Nao BWANA ukanyesha aighu ya Sodoma na Gomora kibiriti na modo ghubirie kufuma mlungunyi,#Mat. 10.15; 11.23-24; Lk. 10.12; 17.29; 2 Pet. 2.6; Juda. 7 25ukaighusha mizi yose, na vololo yose, na wandu wose werekoghe wikikaia andenyi yaro, andwamweri na icho chose cherebukieghe andoenyi chikanoneka. 26Ela mka Loti ukazighana na nyuma, nao ukawuya nguro ya chumbi.#Lk. 17.32

27Abrahamu ukawuka nakesho ukaghenda andu aho werekaieghe kimusi na BWANA, 28ukazighana cha Sodoma na Gomora na isanga jose jerekoghe vololonyi, nao ola ukawona mosi ghukijoka mlungunyi kufuma ndoenyi sa ghwa iwiwi ibaa. 29Iji Mlungu orekoghe ukiitotesha ija mizi erekoghe vololonyi, oremkumbukieghe Abrahamu, nao ukamkira Loti uo orekoghe ukikaia aho, usetotanye na awo weretotesheroghe.

Kuzoya kwawo Waamori na Waamoni

30Nao Loti ukajoka kufuma Soari, ukakaia mighondinyi andwamweri na wai wake wawi, angu oreobueghe kukaia Soari, ukakaia mbangenyi andwamweri na wai wake wawi. 31Nao uja mwai m'baa ukamzera uja mtini, “Aba waghosia, na aha ndekuwadie mndwawomi ungi okanya nesi karakara na seji dibonyagha ndoenyi. 32Nndoko dimnyoshe aba divei uwongie, dipate kulala nao eri dipate kivalwa kwake.” 33Wikamnyosha ndee divei ukawongia, na chija kio uja mwai m'baa ukangia kwa ndee ukalala nao, na ndee nderemanyireghe ukilala hata ukiwuka anduangi. 34Ituku ja kawi uja mwai m'baa ukamzera uja mtini, “Ola nalale na aba ikwau; ndedimnyoshe divei sena ichi kio, na oho kungie kulale nao, nesi dikupatire kivalwa kwa aba.” 35Wikamnyosha ndee divei sena chija kio, na uja mwai mtini wori ukangia kwa ndee, ukalala nao, na ndee nderemanyireghe ukilala hata ukiwuka anduangi. 36Niko huwu wai wose wa Loti werepatireghe wana na ndee. 37Uja wa imbiri ukapata mwana ukammbanga Moabu, nuo ndee Wamoabu hata linu. 38Nao uja mtini ukava mwana ukammbanga Benami, nuo ndee Waamoni hata linu.

Currently Selected:

KUZOYA 19: TAITA

Highlight

Copy